Ȓexḏayem
Ȓexḏayem n Arrusul
Lmasiḥ itgaƹƹaḏ ɣar ujenna
1
1 A si Tawfilus, lkitab amezwaru iy uriɣ nec ḏayes marra min igga Ƹisa ḏ min iseȓmaḏ
2 aȓ nhar iy ḏi itwarfeƹ. Netta qbeȓ ma aḏ itwarfeƹ, iweṣṣa s Arruḥ iqeddsen arrusul iy tuɣa ixḍar.
3 Wami iƹḏu ȓaƹḏab n ȓmewṯ nnes, ikka arbeƹin yewm imeḍhar-asen-d. Isefham-iṯen mebȓa ccekk netta aqaṯ iddar. Ibedd-d ɣarsen, issiweȓ akiḏsen x ȓmulk n Arebbi.
4 Wami kisen itett, iweṣṣa-aṯen inna-asen: "War teffɣem ca zi ṯendint n Lquds. Rajam aḏ ikemmeȓ ȓƹaheḏ n Baba iy xef ḏawem tuɣa ssiwȓeɣ,
5 iƹni Yaḥya iṭehhar iwḏan s waman maca kenniw war ḏawem iqqim ca aḏ twaṭehharem s Arruḥ iqeddsen."
6 Wami munen arrusul akeḏ Ƹisa, nnan-as: "A Siḏi, ma ḏeg wussan-a iy d ɣa ṯarreḏ ȓmulk ɣar Ayṯ-Israʼil?"
7 Inna-asen: "War ḏawem itwasmeḥ ca aḏ tessnem lʼawqat niɣ tarixaṯ tuɣa igga Baba s ssulṭa nnes.
8 Maca axmi xawem d ɣa ihwa Arruḥ iqeddsen, aɣarwem yiȓi jjehḏ. Axafi ṯcehḏem ḏi ṯendint n Lquds ḏ marra ṯamurṯ n Yahuḏiya ḏ Samarya aȓ ṭṭarf n ddunect."
9 Wami ikemmeȓ Ƹisa awaȓ nnes, itwarfeƹ ɣar ujenna. Qqimen xezzaren ḏayes, iweddar-asen ḏeg useynu.
10 Qqimen xezzaren mliḥ wami yuȓi ɣar ujenna, ƹlaɣafla ufin ṯnayen iṯarrasen bedden akiḏsen ɣarsen arruḍ ḏ acemȓaȓ.a
11 Nnan-asen: "Ay iwḏan n ṯmurṯ n Ljalil, mayemmi ḏa ṯbeddem ṯxezzarem ḏeg ujenna? Qa Ƹisa-ya wanita iy ḏawem itwarfƹen ɣar ujenna, mammec ṯeẓrim igaƹƹeḏ ɣar ujenna, amenni iy d ɣa iḏweȓ."
Tixḍaren wi ɣa yiȓin ḏeg umcan n Yahuḏa
12 Ssenni ḏewȓen-d arrusul zeg Uḏrar n zzitun ɣar ṯendint n Lquds ig iggwjen ij n kilumiter.
13 Wami uwḍen, gaƹƹḏen ɣar ṯɣurfat mani tiȓin: Buṭrus ḏ Yuḥanna ḏ Yaƹqub ḏ Andrawus, Filippas ḏ Tuma, Bartulumay ḏ Matta, Yaƹqub mmis n Ḥalfa ḏ Simƹan lmunaḍil, ḏ Yahuḏa mmis n Yaƹqub.
14 Yina marra tmunen tẓaǧan ȓebda akeḏ can n ṯemɣarin ḏ Maryam yemmas n Ƹisa ḏ ayṯmas.
15 Ḏeg wussan nni ikkar ibedd Buṭrus ḏi ȓwesṭ n ȓmuminin (ḏinni can miyya u ƹicrin iḏsen), inna-asen:
16 "Ay ayṯma, tuɣa itxeṣṣa aḏ ikemmeȓ wawaȓ n Arruḥ iqeddsen iy d yusin x yiȓes n nnabi Dawud ḏeg yij n zman wami issiweȓ x Yahuḏa iƹni wenni izenzen Ƹisa isbeyyen-asen abriḏ yuwi yinni iy ṯ iṭṭfen.
17 Yahuḏa-ya tuɣa itwaḥsab zzayneɣ, iǧa akiḏneɣ ḏi ȓxeḏmeṯ n Arebbi.
18 S tmenyaṯ nnes n lḥaram, isɣa zzaysent ij n ṯmurṯ. Ḏinni iy iwḍa s jjehḏ x wuḏem, iduqqez-as uƹeddis menḍaren-as-d marra waḏan nnes.
19 Arrin-as-d ȓexbar marra ayṯbab n Lquds. X manaya semman ṯamurṯ nni s wawaȓ nsen <Ḥaqel Damma>. Ȓmaƹna n wawaȓ-a: Iyer n iḏammen.b
20 Iqqar Lkitab n Zzabur: Aḏ ixȓa Arebbi ṯaddarṯ nnes war ḏayes izeddeɣ ḥadd. Iqqar ƹaweḏ: Ȓxeḏmeṯ nnes at iṭṭef ijjen nneɣnit.
21 Iḏen, itxeṣṣa a nexḍar ij uryaz zeg yinni tuɣa iǧan akiḏneɣ marra ȓweqṯ nni wami Siḏiṯneɣ Ƹisa itaḏef iteffeɣ ɣarneɣ.
22 Iƹni zeg wami iy ṯ iṭehhar Yaḥya s waman aȓ wami iy itwarfeƹ xaneɣ ɣar ujenna. Aryaz-a aḏ icheḏ akiḏneɣ qa Ƹisa ikkar-d zi ȓmewṯ."
23 Kkaren qeddmen ṯnayen n yiwḏan: Matyas ḏ Yusef umi qqaren Barsaba, semman-ṯ ƹaweḏ s Yustus.
24 Ttaren i Arebbi, nnan-as: "Cek a Siḏi Arebbi, ṯessneḏ min iǧan ḏeg wuȓawen n yiwḏan marra. Seḍhar-aneɣ manwen iy ṯixḍareḏ zi ṯnayen-a.
25 Akiḏneɣ yiȓi ḏi ȓxeḏmeṯ-a, aḏ iḏweȓ ḏ arrasul ḏeg umcan n Yahuḏa ig isemḥen ḏi ȓxeḏmeṯ-a, iruḥ ɣar umcan nnes aƹeffan."
26 Kkaren ggin lqurƹa, ṯusa-d ḏi Matyas. Rnin-ṯ-iḏ ɣar ḥiṭac nni n arrusul.