Yuḥanna
Lʼinjil n Siḏiṯneɣ Ƹisa Lmasiḥ
Lkitab n Yuḥanna
Awaȓ n Arebbi netta ḏ nnur netta ḏ ṯuḏarṯ
1
1 Ḏeg umezwaru iǧa wawaȓ.
Awaȓ nni iǧa ak Arebbi.
Awaȓ nni ḏ netta ig iǧan ḏ Arebbi.
2 Ḏeg umezwaru iǧa ak Arebbi.
3 Zzayes iy d ixȓeq Arebbi marra,
u bȓa awaȓ nni war tiȓi uȓa ḏ ij n ṯmesȓayṯ zi min d ixȓeq.
4 Ḏayes iy ṯeǧa ṯuḏarṯ,
u ṯuḏarṯ nni nettaṯ ḏ nnur i yiwḏan.
5 Nnur nni itceƹciƹ ḏi ṯaǧest,
ṯaǧest nni war ḏas ṯzemmar.
6 Yusa-d ij n uryaz issekk-iṯ-iḏ Arebbi qqaren-as Yaḥya.
7 Netta yusa-d ḏ ccaheḏ ḥima aḏ icheḏ i nnur, ḥima s chaḏeṯ nnes aḏ amnen marra yiwḏan.
8 Netta Yaḥya war iǧi ca ḏ nnur. Lla, yusa-d aḏ icheḏ i nnur,
9 iƹni nnur nni nican iy d ɣa yasen ɣar ddunect aḏ iceƹceƹ x kuȓ bnaḏem.
10 Nnur nni tuɣa iǧa ḏi ddunect. Waxxa ḏ netta ig iggin ddunect, ayṯbab n ddunect war ṯ ssinen ca.
11 Yusa-d ɣar ṯmurt nnes, ayṯbab n ṯmurṯ nnes war ṯ qbiȓen ca.
12 Yinni iy ṯ iqebȓen umnen zzayes zeg yisem nnes, yuca-asen netta ṯizemmar ḥima aḏ d ḏewren ḏ ṯarwa n Arebbi.
13 Yina war d xȓiqen ca ƹlaḥsab ddurriṯ uȓa ƹlaḥsab min texs ddat uȓa ƹlaḥsab ȓxaḍar n uryaz. Lla, ḏ Arebbi iy ṯen d ijjin.
Awaȓ n Arebbi netta ḏ Siḏiṯneɣ Ƹisa Lmasiḥ
14 Awaȓ-a iḏweȓ ḏ bnaḏem, izḏeɣ jaraneɣ. Neccin neẓra lƹaḍama ɣares iǧan, lƹaḍama-ya ṯeǧa ɣar Mmis waḥḏes n Babas. Netta iccur s arḍa ḏ lḥaqiqa.
15 Icheḏ xas Yaḥya, itberraḥ inna: "Ḏ wa iy xef tuɣa ssiwȓeɣ. Nniɣ-awem aḏ d yas ijjen menbaƹd i nec, walakin netta imɣar xafi minzi tuɣaṯ qbeȓ ma aḏ iȓiɣ nec."
16 S lbaraka nnes ṯameqqrant ibarek-aneɣ marra s arḍa x arḍa.
17 Ccariƹa n Ayṯ-Israʼil ṯemmuc x ufus n Musa. Arḍa ḏ lḥaqiqa niṯenti usint-id x ufus n Ƹisa Lmasiḥ.
18 Uȓa ḏ ijjen war iẓri Arebbi ƹemmarṣ. Mmis waḥḏes ig iǧan ḏeg wuȓ n Babas ḏ netta iy ḏaneɣ d iseḍharen Siḏi Arebbi.
Nnabi Yaḥya isewjaḏ abriḏ i Lmasiḥ
19 Ḏ ṯa ḏ chaḏeṯ n Yaḥya wami ɣares d ssekken iʼisraʼiliyen can n ȓfuqha ḏ can n ccurfa n Ayṯ-Lawi zi ṯendint n Lquds ḥima aṯ sseqsan, min teƹniḏ cek?
20 Yaḥya war inkar ca ixef nnes, iƹtaref-asen inna-asen: "Nec war ǧiɣ ca ḏ Lmasiḥ."
21 Nnan-as: "Y min teƹniḏ, ma ḏ nnabi Ilyas?"
Inna-asen: "Maci ḏ nec."
Nnan-as: "Cek, ma ḏ nnabi iy qqaren aḏ d yas?"
Inna-asen: "Lla."
22 Nnan-as: "Y cek, min teƹniḏ? Ḥima a naf min ɣa nini i yinni iy ḏaneɣ d issekken, min ṯeqqareḏ x yixef nnec?"
23 Yarra xasen s wawaȓ n nnabi umi qqaren Icaƹya inna qbeȓ:
"Nec ḏ ṯmijja itȓaɣan ḏi ȓexȓa ṯeqqar:
Swejḏeṯ abriḏ nican i Siḏi Arebbi."
24 Yinni iy ɣares d issekken niṯni zi ȓḥizeb n ifarrisiyen.
25 Nnan-as: "Meȓa cek war ṯeǧiḏ ḏ Lmasiḥ, niɣ ḏ Ilyas, niɣ ḏ nnabi iy d ɣa yasen, mayemmi cek tṭehhareḏ iwḏan s waman?"
26 Indeq-d Yaḥya inna-asen: "Nec tṭehhareɣ iwḏan s waman, walakin ḏanita ijjen ḏi ȓwesṭ nwem war ṯ ṯessinem ca.
27 Ḏ netta iy d ɣa yasen menbaƹd i nec, qa war sḏihiǧeɣ aḏas fesyeɣ uȓa ḏ ifiȓan n ṯsiȓa nnes."
28 Marra manaya iwqeƹ ḏi dcar n Bayt Ƹanya ajemmaḍ i yiɣzar n Lʼurdun mani ig itṭehhar Yaḥya iwḏan s waman.
Nnabi Yaḥya icehheḏ x Siḏiṯneɣ Ƹisa ḏ Mmis n Arebbi
29 Ṯiwecca nnes Yaḥya itwaȓa Ƹisa iggur-d ɣares, inna: "Xzarzeṯ, ḏ win ḏ izmar n Arebbi iy ɣa ikksen ȓmuƹṣiyeṯ x yiwḏan marra.
30 Ḏ win iy xef tuɣa ssiwȓeɣ nniɣ-awem: Aḏ d yas menbaƹd i nec ij n uryaz, walakin netta imɣar xafi minzi tuɣaṯ qbeȓ ma ḏ iȓiɣ nec.
31 Tuɣa nec s yixef inu war ṯ ssineɣ ca min iƹna, walakin usiɣ-d aḏ ṭehhareɣ iwḏan s waman ḥima aḏasen d iban netta i Ayṯ-Israʼil."
32 Yaḥya icheḏ xas inna: "Ẓriɣ Arruḥ n Arebbi ihwa-d amecnaw ṯeḏbirṯ zeg ujenna imers x Ƹisa.
33 Tuɣa nec war ṯ ssineɣ ca min iƹna, walakin ḏ Arebbi iy ḏayi d issekken aḏ ṭehhareɣ iwḏan s waman, netta inna-ayi: Wenni ɣa ṯeẓreḏ ihwa-d xas Arruḥ imers xas, ḏ netta iy ɣa iṭehharen iwḏan s Arruḥ iqeddsen.
34 Nec ẓriɣ manaya s yixef inu, u cehḏeɣ xas belli netta ḏ Mmis n Arebbi."
Imeḥḍaren imezwura n Siḏiṯneɣ Ƹisa
35 Ṯiwecca nnes ƹaweḏ ibedd ḏinni Yaḥya akeḏ ṯnayen n imeḥḍaren nnes.
36 Wami yufa Ƹisa iƹḏu ssenni inna-asen: "Xzarem, ḏ win ḏ izmar iy d issekk Arebbi."
37 Wami ṯnayen nni imeḥḍaren sȓin-as issawaȓ x Ƹisa, ḏfaren-ṯ.
38 Ineqȓeb Ƹisa ɣar ḏeffar yufi-ṯen ḏfaren-ṯ-id inna-asen: "Min trezzum?"
Nnan-as: "Mani tiȓiḏ, a Ravi?" (Awaȓ-a Ravi ixes aḏ yini Lmuƹallim.)
39 Inna-asen: "Araḥem-d aḏ texzarem." Ruḥen akiḏes, ẓrin mani itiȓi. Ṯsaƹat ƹȓayen ḏ arbeƹa n uƹecci u ssenni sensen akiḏes nhar nni.
40 Ijjen zi ṯnayen imeḥḍaren nni qqaren-as Andrus, umas n Simƹan Buṭrus, isȓa i wawaȓ n Yaḥya iḏfar Ƹisa.
41 Ȓexddennit yufa umas Simƹan inna-as nufa Lmasiya. (Awaȓ-a Lmasiya ixes aḏ yini Lmasiḥ.)
42 Issiweḍ-iṯ-iḏ ɣar Ƹisa. Wami ṯ iẓra Ƹisa inna-as: "Cek ḏ Simƹan mmis n Yuḥanna, zi ssa aȓ ṯsawent aḏac tȓaɣan Ṣifas." (Awaȓ-a Ṣifas ixes aḏ yini Buṭrus.)
43 Ṯiwecca nnes Ƹisa ixes aḏ iraḥ ɣar ṯmurṯ n Ljalil. Iruḥ yufa ijjen qqaren-as Filippas inna-as: "Ḏfar-ayi-d!"
44 Filippas netta zi ṯendint n Bayt Ṣayda, abilaj n Andrus ḏ Buṭrus.
45 Filippas yufa ijjen qqaren-as Naṯnahil inna-as: "Nufa wenni iy xef yura Musa ḏi Ccariƹa, mixef urin Lkutub n Lʼanbiya. Netta ḏ Ƹisa zi ṯendint n Nnaṣira ḏ mmis n Yusef."
46 Inna-as Naṯnahil: "Min iṣebḥan zi Nnaṣira!?"
Inna-as Filippas: "Araḥ-d, aḏ texzareḏ."
47 Ƹisa iẓra Naṯnahil iggur-d ɣares inna: "Wanita nican zi Ayṯ-Israʼil, war ḏayes bu ixarwiḍen."
48 Inna-as Naṯnahil i Ƹisa: "Minzi ḏayi ṯessneḏ?"
Inna-as Ƹisa: "Ẓriɣ-c swadday i ṯcejjarṯ n ṯazarṯ, qbeȓ ma c d iȓaɣa Filippas."
49 Inna-as Naṯnahil i Ƹisa: "A lmuƹallim, qa cek ḏ Mmis n Arebbi, cek ḏ azeǧiḏ n Ayṯ-Israʼil."