Luqa
Lʼinjil n Siḏiṯneɣ Ƹisa Lmasiḥ
Lkitab n Luqa
Luqa itari i ij n uryaz qqaren-as Tawfilus
1
1 A si Tawfilus, aṭṭas n yiwḏan jarrben aḏ arin x min iweqƹen ɣarneɣ.
2 Tarrin ƹlaḥsab mamc ḏaneɣ xbaren yinni iǧan ḏeg umezwaru ḏ ȓechuḏ, u niṯni ȓexxu tbeccaren s wawaȓ.
3 Uȓa ḏ nec uriɣ ƹlaḥsab manaya a siḏi, wami beḥṯeɣ ḏi marra manaya mliḥ. Aḏac-ṯ ariɣ ṯa s ṯa
4 ḥima aḏ tessneḏ belli min ḏac sȓemḏen iǧa nican.
Lmalaʼika txebbar mammec ɣa d ixȓeq Yaḥya
5 Tuɣa ḏeg wussan n Hirudus azeǧiḏ n ṯmurṯ n Yahuḏiya ij n ȓefqih zi lfirqa n Abyu qqaren-as Zakariya. Ɣares ij n ṯemɣarṯ nettaṯ zi ddurriṯ n Harun qqaren-as Ilizabet.
6 Zakariya ḏ Ilizabet gguren nican akeḏ Arebbi. Niṯni ɣarsen uȓ nsen ḏ acemȓaȓ. Teggen zi marra min yumar ḏ marra min iweṣṣa Siḏi Arebbi.
7 Maca war ɣarsen bu iḥenjiren minzi Ilizabet war tirew ca. Ƹaweḏ s ṯnayen iḏsen mɣaren aṭṭas.
8 Ij n nhar xmi ixeddem ḏi ddur nnes ḏ ȓefqih zzaṯ i Arebbi akeḏ lfirqa nnes,
9 ggin lqurƹa ƹlaḥsab taqalid nsen iy teggen ȓefquha. Nhar nni ṯusa-d ḏayes ḥima aḏ yaḏef ɣar ṯemziḏa ṯameqqrant n Siḏi Arebbi ḥima aḏ igg tbaxur.
10 Marra amuni n ccaƹb tẓaǧan ḏi barra wami itegg tbaxur nni.
11 Uca ṯban-as-d ij n lmalaʼika n Siḏi Arebbi ṯbedd x ufusi n ȓmeḏbaḥ n tbaxur.
12 Wami t iẓra Zakariya inexȓeƹ, iggweḏ.
13 Lmalaʼika nni ṯenna-as: "War teggweḏ ca, a Zakariya, istajeb-ac Arebbi min ḏas ṯettareḏ. Ṯamɣarṯ nnec Ilizabet aḏac tejj ij n uḥenjir aḏas ṯsemmiḏ Yaḥya.
14 Ssaƹḏ nnec, aḏ tfarḥeḏ. Wami d ɣa ixȓeq, azzayes farḥen aṭṭas n yiwḏan,
15 minzi aḏ yiȓi ḏ ameqqran ɣar Siḏi Arebbi. Itxeṣṣa ƹemmarṣ aḏ isew aman n uḍiȓ niɣ aman n imendi. Aḏ yiȓi iƹemmar s Arruḥ iqedsen ḏeg uƹeddis n yemmas.
16 Aḏ yarr aṭṭas n Ayṯ-Israʼil ɣar Siḏi Arebbi nsen.
17 Aḏ yuyur zzaṯ i Siḏi Arebbi s ij n arruḥ ijheḏ am wenni n Ilyas. Aḏ iṣȓeḥ lwalidin akeḏ ṯarwa nsen. Aḏ yarr yinni iƹṣan ɣar ubriḏ n yinni iǧan nican, ḥima aḏ isewjeḏ ccaƹb i Siḏi Arebbi aḏ iȓin wejḏen."
18 Inna Zakariya i lmalaʼika: "Mammec ɣa ssneɣ manaya ḏ ṣṣaḥ? Nec ḏ awessar, ṯamɣarṯ inu ḏ ṯawessarṯ."
19 Ijaweb-iṯ lmalaʼika nni: "Nec qa ḏ Jibril ibedden zzaṯ i Arebbi. Netta issekk-ayi-d ɣarec ḥima akic ssiwȓeɣ aḏac iniɣ ȓexbar-a isfarḥen.
20 Rexxu aḏ tḏewȓeḏ ḏ azeynun. War ṯzemmareḏ aḏ tessiwȓeḏ ḥetta aȓ nhar iy ḏi ɣa iwqeƹ manaya, minzi war ṯumineḏ ḏeg wawaȓ inu. Awaȓ inu aḏ d iffeɣ ḏi ȓweqṯ nnes."
21 Ccaƹb trajan Zakariya, tƹejjben minzi iƹeṭṭeȓ ḏaxeȓ i ṯemziḏa ṯameqqrant n wuḏayen.
22 Wami d iffeɣ, war izemmer akisen issiweȓ. Fehmen belli iḍhar-as-d lwaḥi ɣar ḏaxeȓ i ṯemziḏa. Issawaȓ akisen s ifassen, iqqim ḏ azeynun.
23 Wami ƹḏun wussan n ȓxeḏmeṯ nnes, iḏweȓ ɣar ṯeddarṯ nnes.
24 Umbaƹd, ṯeysi ṯemɣarṯ nnes Ilizabet aƹeddis. Ṯesnuffer ixef nnes xems chur, ṯeqqar:
25 "Ḏ manaya iy ḏayi yuca Siḏi Arebbi ḏi nhar wami ḏayi ifqeḏ, ḥima axafi ikkes ȓƹib n yiwḏan."
Lmalaʼika itxebbar mamc d ɣa ixȓeq Siḏna Ƹisa
26 Wami Ilizabet ṯeǧa ḏi char wis setta, issekk Arebbi Jibril ɣar ij n ṯendint ḏi Ljalil qqaren-as Nnaṣira.
27 Iruḥ ɣar ij n ṯeƹzrect qqaren-as Maryam, kiḏ igga zzujiya ij n uryaz zi ddurriṯ n Dawud qqaren-as Yusef.
28 Yuḏef ɣares lmalaʼika inna-as: "Sȓam xam, ya ṯenni iy xef irḍa Arebbi, Siḏi Arebbi akiḏem."
29 Ḏinni ṯnexȓeƹ Maryam wami ṯesȓa i wawaȓ-a n lmalaʼika. Ṯenna ḏeg yixef nnes mant ȓmaƹna n sȓam-a?
30 Inna-as lmalaʼika: "War teggweḏ, a Maryam, xam arḍa n Arebbi!
31 Aḏ teysiḏ aƹeddis, aḏ tejjeḏ ij n uḥenjir aṯ tsemmiḏ Ƹisa.
32 Aḏ yiȓi ḏ ameqqran, ataf tȓaɣan-as mmis n wenni yuƹȓan. Aḏas yuc Siḏi Arebbi nnes lƹarc n jeddis Dawud.
33 Aḏ iḥkem x ccaƹb n Yaƹqub i ȓebda, ȓmulk nnes ƹemmarṣ aḏ ifna."
34 Ṯenna-as Maryam i lmalaʼika: "Mammec manaya? Qa nec ḏ ṯaƹzrect."
35 Ijaweb-it lmalaʼika nni: "Axam d ihwa Arruḥ iqedsen, jjehḏ n wenni yuƹȓan axam igg ṯiȓi. S manaya aḥenjir iqedsen iy ɣa ṯejjeḏ ataf tȓaɣan-as Mmis n Arebbi.
36 Ilizabet, ȓeḥbab nnem, waxxa nettaṯ ṯemɣar, aqa-t s uƹeddis. Aqa-t ḏi char wis setta, waxxa tȓaɣan-as yiwḏan a ṯenni war itirwen ca.
37 War ṯeǧi bu can ȓḥajeṯ ṯeqseḥ ɣar Arebbi."
38 Ṯenna Maryam: "Nec ḏ ṯaxeddant n Siḏi Arebbi, aḏ iȓiɣ nec ƹlaḥsab awaȓ nnec." Uca iruḥ ssenni lmalaʼika.
Maryam ḏ Ilizabet
39 Ḏeg wussan nni, ṯekkar Maryam ṯruḥ s ṯazzȓa ɣar uḏrar, ɣar ij n ṯendint ḏi ṯmurṯ n Yahuḏa.
40 Ṯuḏef ɣar ṯeddarṯ n Zakariya, ṯseǧem x Ilizabet.
41 Wami ṯesȓa Ilizabet i sȓam n Maryam, inhezz useymi nni ḏeg uƹeddis nnes. Uca Ilizabet ṯeccur s Arruḥ iqedsen.
42 Ṯesɣuy s jjehḏ, ṯenna:
"Ibarek-icem jar i ṯemɣarin,
ƹaweḏ ibarek wenni iǧan ḏeg uƹeddis nnem!
43 Nhara ḏ nhar ḏ ameqqran i nec wami ɣari d tusa yemmas n Siḏi!
44 Wami d tusiḏ sȓiɣ i sȓam nnem, ṯenhezz ddiseṯ inu s ȓefraḥeṯ.
45 Ssaƹḏ n ṯenni yumnen belli min ḏas inna Siḏi Arebbi aḏ yiȓi."
Maryam ṯḥemmeḏ Arebbi
46 Uca ṯenna Maryam:
"Uȓ inu iḥemmeḏ Siḏ Arebbi,
47 arruḥ inu ifareḥ zi Arebbi iy ḏayi isnejmen.
48 Iẓra-ayi, nec ḏ ṯaxeddanṯ nnes ṯadriwect.
Ssa aȓ ṯsawent marra iwḏan aḏayi ḥesben ḏ ṯamimunt,
49 minzi wenni izemmren igga-ayi aṭṭas n ṯmesȓayin ṯimeqqranin.
Isem nnes ḏ ameqqran,
50 arraḥmeṯ nnes ṯeǧa zi ljil ɣar ljil i yinni ṯ iteggwḏen.
51 Igga s ufus nnes ȓexḏayem ṯimeqqranin,
icettet yinni iḥesben ixef nsen ḏ imeqqranen.
52 Isehwa-d izeǧiḏen zi lƹarc nsen,
isgaƹƹeḏ yinni iǧan drawec.
53 Isejjiwen s ȓxir nnes yinni iǧuzen,
u issekk twajar s ifassen xwan.
54 Iƹawen Ayṯ-Israʼil iy iǧan ḏ ȓƹabḏ nnes ƹlaḥsab arraḥmeṯ nnes,
55 mamc iwƹeḏ ȓejḏuḏ nneɣ,
Brahim ḏ ddurriṯ nnes i ȓebda."
56 Ṯeqqim Maryam ɣar Ilizabet can ṯeȓt chur uca ṯeƹqeb ɣar ṯeddarṯ nnes.
Ammu ixȓeq Yaḥya
57 Wami d ṯiweḍ ȓweqṯ n Ilizabet ḥima aḏ tarew, ṯejja-d aḥenjir.
58 Wami ɣarsen ȓexbar jjiran nnes ḏ ȓeḥbab nnes belli Siḏi Arebbi irḍa xas aṭṭas, farḥen akis.
59 Wami yiweḍ uḥenjir ṯmenyam, usin-d ḥima aṯ ṭehharen. Xsen aḏas semman Zakariya x yisem n babas,
60 maca yemmas ṯenna: "Lla, aṯ nsemma Yaḥya."
61 Nnan: "Uȓa ḏ ijjen zi ȓeḥbab nnem itwasemma s yisem-a."
62 Sseqsan babas s ifassen: "Mammec ṯexseḏ aṯ tsemmiḏ?"
63 Ittar ij n ṯaȓwiḥet, yura ḏayes: "Isem nnes Yaḥya." Uca tƹejjben marra iḏsen.
64 Ḏeg umcan indeq, iḏweȓ issawaȓ, iḥmeḏ Arebbi.
65 Ggwḏen marra jjiran. Ssiwȓen yiwḏan x marra manaya ḏi marra iḏurar n ṯmurṯ n Yahuḏiya.
66 Marra ug itsȓan iqqar ḏeg wuȓ nnes, Min ɣa yiȓi uḥenjir-a? Minzi fus n Siḏi Arebbi akis.
Zakariya iḥemmeḏ Arebbi
67 Babas Zakariya iccur s Arruḥ iqedsen, issiweȓ s min iƹȓem zi Arebbi inna:
68 "Lḥamdu lillah i Siḏi Arebbi n Israʼil,
ƹlaḥeqqac ifqeḏ ccaƹb nnes, ifekk-iṯen.
69 Iseḍhar-aneɣ-d wenni ḏayes jjehḏ iy ḏaneɣ ɣa isnejmen,
ḏi ddurriṯ n Dawud ȓƹabḏ n Arebbi.
70 Mamc issiweȓ s yiȓes n lʼanbiya aṭṭas zeg wami,
71 aḏaneɣ isenjem zi ȓƹaḏyan nneɣ,
ƹaweḏ zeg ifassen n marra yinni ḏaneɣ itƹiffan.
72 Aḏ d iseḍhar arraḥmeṯ nnes i ȓejḏuḏ nneɣ,
aḏ iƹqeȓ x ȓƹaheḏ nnes iqedsen.
73 Yuca-as ȓƹaheḏ i Brahim jeddiṯneɣ,
74 aḏaneɣ isenjem zeg ifassen n ȓƹaḏyan nneɣ,
ḥima aṯ neƹbeḏ bȓa ṯiggwḏi,
75 s wuȓ iṣfa ḏ acemȓaȓ i marra ṯuḏarṯ nneɣ.
76 Y cek, ay aḥenjir,
aḏac tȓaɣan nnabi n wenni yuƹȓan,
minzi aḏ tezwureḏ ḥima aḏ teṣfiḏ abriḏ i Siḏi Arebbi.
77 Ƹaweḏ aḏ tesȓemḏeḏ i ccaƹb nnes mamc ṯen ɣa isenjem Arebbi,
minzi aḏ twaɣfarent ȓmuƹṣiyaṯ nsen.
78 Minzi Arebbi nneɣ ḏ araḥman ḏ araḥim,
ifqeḏ-aneɣ-d zeg ujenna wami ṯuȓi ṯfuct.
79 Ḥima aḏ yuc ṯfawṯ i yinni itƹicen ḏi ṯaǧesṯ ḏi ṯiȓi n ȓmewṯ,
ḥima aḏaneɣ indeh iḍaren nneɣ ɣar ubriḏ n ȓehna."
80 Tuɣa aḥenjir itemɣur, itejhiḏ s arruḥ nnes. Izeddeɣ ḏi ȓexȓa aȓ wami d imeḍhar i Ayṯ-Israʼil.