Ammu ixȓeq Siḏna Ƹisa
2
1 Ḏi ȓweqṯ nni azeǧiḏ Qayṣar Awɣusṭus yuca lʼamar aḏ ḥesben marra imezḏaɣ n ṯmura iy ḏi iḥkem.
2 Aḥsab-a amezwaru iwqeƹ wami Krinus iḥkem x Surya.
3 Ruḥen marra ḥima aḏ sejjlen, mkuȓ ijjen ƹlaḥsab ṯandint nnes.
4 Igaƹƹeḏ Yusef zi Ljalil zi ṯendint n Nnaṣira ɣar ṯmurṯ n Yahuḏiya ɣar ṯendint n Dawud umi qqaren Bayt Laḥm, minzi netta zi ddurriṯ n Dawud ḏ ȓeḥbab nnes.
5 Igaƹƹeḏ ḏinni aḏ isejjel netta ḏ Maryam wikeḏ igga zzujiya. Aqa-t s uƹeddis.
6 Wami ǧan ḏinni, ṯiweḍ-d ȓweqṯ nnes ḥima aḏ tarew.
7 War ḏin ufin bu umcan mani ɣa sensen. Ṯurew mmis amenzu, ṯseḥnunneḍ-iṯ, ṯeggi-ṯ ḏi ȓmeḏweḏ.
Lmalaʼikaṯ ḏ imeksawen
8 Tuɣa ḏin aȓ jjiha nni imeksawen, ḥeṭṭan ṯiḥimeriwin nsen s ǧiȓeṯ.
9 Ṯbedd-d ɣarsen ij n lmalaʼika n Siḏi Arebbi, iceƹceƹ nnur n lƹaḍama n Siḏi Arebbi, inneḍ-d xasen, uca ggwḏen aṭṭas.
10 Ṯenna-asen lmalaʼika: "War teggwḏem. Aqa tbeccareɣ-kenniw s ij n ȓexbar ḏ ameqqran, azzayes ifareḥ marra ccaƹb.
11 Ixȓeq nhara ḏi ṯendint n Dawud wenni kenniw ɣa isnejmen, netta ḏ Lmasiḥ Siḏiṯneɣ.
12 Aḏ tafem ij n lƹalama; aḏ yiȓi ij n useymi iḥnunneḍ, iṭṭeṣ ḏi ȓmeḏweḏ."
13 Ḏeg umcan ḍharen-d akeḏ lmalaʼika aṭṭas n ȓƹaskar n ujenna, ḥemmḏen Arebbi, qqaren:
14 "Lƹaḍama i Arebbi yuƹȓan, ḏ ȓehna ḏi ṯmurṯ i yinni xef irḍa."
15 Wami ruḥent lmalaʼikaṯ ɣar ujenna, ssiwȓen imeksawen ak wayawya nnan: "Yallah a nraḥem ɣar Bayt Laḥm ḥima a nexzar manaya ig iweqƹen mixef ḏaneɣ ixbar Siḏi Arebbi."
16 Ruḥen ḏeɣya ufin Maryam ḏ Yusef, ḏ useymi nni iṭṭeṣ ḏi ȓmeḏweḏ.
17 Wami ṯ ẓrin, xbaren zi min ḏasen itwannan x uḥenjir nni.
18 Marra wi itsȓan itƹejjeb ḏeg wawaȓ iy ḏasen nnan imeksawen.
19 Ṯxemmeȓ Maryam marra ṯimesȓayin-a, txemmam ḏaysent ḏeg wuȓ nnes.
20 Ƹeqben imeksawen u niṯni semɣaren Arebbi, ḥemmḏen-ṯ x marra min sȓin u marra min ẓrin, amecnaw mamc ḏasen itwanna.
Ṭṭehhareṯ n Siḏna Ƹisa
21 Wami ikemmeȓ uḥenjir nni nhar n wis ṯmenyam ḥima aḏ iṭehhar, semman-ṯ Ƹisa, mamc ṯ tsemma lmalaʼika qbeȓ ma ḏ yiȓi ḏeg uƹeddis n yemmas.
22 Wami kemmȓen wussan bac aḏ iȓin lwalidin nnes ṣfan ƹlaḥsab ccariƹa n Musa, uwin-ṯ ɣar Lquds ḥima aṯ qeddmen i Siḏi Arebbi.
23 Mamc yura ḏi lkitab n Tuwrat n Siḏi Arebbi:
"Mkuȓ mmis amenzu aḏ yiȓi ḏ ameqqran ɣar Siḏi Arebbi."
24 Ƹaweḏ ḥima aḏ qeddmen ḏbiḥeṯ mamc d yusa ḏi lkitab n Tuwrat n Siḏi Arebbi:
"Ṯnayen n ṯmaǧwin niɣ ṯnayen n ṯeḏbirin ḏ ṯimezyanin."
25 Tuɣa ḏin ḏi Lquds ij n bnaḏem qqaren-as Cimƹun. Iǧa nican, iteggweḏ Arebbi, itraja asenjam n Israʼil. Arruḥ iqedsen iǧa xas.
26 Tuɣa ixbar-iṯ Arruḥ iqedsen belli netta war itmetti aȓ ɣa iẓer Lmasiḥ n Siḏi Arebbi.
27 Indeh-iṯ Arruḥ iqedsen ɣar ṯemziḏa ṯameqqrant n wuḏayen. Wami yuḏef babas ḏ yemmas n uḥenjir Ƹisa ḥima aḏas ggen min ṯeqqar ccariƹa n Musa,
28 iysi-ṯ Cimƹun jar ifassen nnes, ickar Arebbi, inna:
29 "Ya Mulana, ejj-ayi ȓƹabḏ nnec aḏ iraḥ ḏi ȓehna,
amecnaw mamc ṯenniḏ.
30 Minzi ṯiṭṭawin inu ẓrint asenjam nnec,
31 wenni ṯeswejḏeḏ i marra iwḏan.
32 Netta ḏ nnur iy ṯseḍhareḏ i ȓegnus,
ḏ lƹaḍama n ccaƹb nnec Ayṯ-Israʼil."
"Wa, qa iggi-ṯ Siḏ Arebbi
bac aḏ isehwa aḏ isiȓi aṭṭas n yiwḏan ḏi Ayṯ-Israʼil.
Netta ḏ ij n lƹalama,
walakin war t txisen ca.
35 Aḏ twafeḍḥen lʼafkar n wuȓ nsen.
Ij n uḥzan am ssif iqḍeƹ aḏ icukk uȓ nnem."
36 Tuɣa ḏinni ij n nnabiya ṯawessarṯ qqaren-as Ḥanan yeǧis n Fanwil. Nettaṯ zi ṯeqbiȓṯ n Ƹacur. Ṯƹic akeḏ uryaz nnes sebƹa iseggwusa.
37 Immuṯ ṯeqqim ḏ ṯajjaȓṯ, ṯeddar arbeƹa u ṯmanin iseggwusa. Tɣima ḏi ṯemziḏa ṯameqqrant n wuḏayen, ṯƹebbeḏ Arebbi, tẓumma tẓaǧa ǧiȓeṯ ḏ wass.
38 Ḏi ȓweqṯ nni ṯusa-d, ṯebḏa ṯḥemmeḏ Arebbi, ṯessiweȓ xas akeḏ marra yinni itrajan nhar iy ḏi ɣa ifekk Arebbi Lquds.
39 Wami ikemmeȓ Yusef ḏ Maryam marra min zzaysen ṯumar ccariƹa n Siḏi Arebbi, ḏewȓen ɣar Ljalil, ɣar ṯendint nsen Nnaṣira.
40 Ƹisa imeqqar, itejhiḏ, itcar s ȓefhameṯ, xas arḍa n Arebbi.
Ṯimesȓayin itegg Siḏna Ƹisa ḏ aḥenjir
41 Lwalidin nnes traḥen mkuȓ aseggwas ɣar Lquds ḏi Ȓƹiḏ Ameqqran n wuḏayen.
42 Wami Ƹisa yiweḍ ṯenƹac n iseggwusa, gaƹƹḏen ɣar Lquds ƹlaḥsab taqalid n Ȓƹiḏ.
43 Wami kemmȓen wussan n ȓƹiḏ, rewwḥen, maca netta iqqim ḏi Lquds. Niṯni war ssinen ca iqqim ḏinni.
44 Tɣir-asen imun-d akiḏsen ḏi ṯarbiḥeṯ. Uyuren nhar ikmeȓ, bḏan rezzun xas jar familya ḏ imeddukaȓ nsen.
45 Wami war ṯ ufin ca, ḏewȓen ɣar ṯendint rezzun xas.
46 Umbaƹd wis ṯeȓt-iyyam ufin-ṯ iqqim ḏi ṯemzida ṯameqqrant n wuḏayen jar yinni iseȓmaḏen, itsȓa-yasen, itseqsa-ṯen.
47 Marra yinni ḏas itsȓan tƹejjben ḏayes s ȓaƹqeȓ nnes ḏ ljawab nnes.
48 Wami ṯ ẓrin lwalidin nnes tƹejjben ḏayes, ṯenna-as yemmas: "Mayemmi ḏaneɣ ṯeggiḏ ammu? Aqa babac ḏ nec nrezzu xak u neccin ṯejjiḏ-aneɣ ḏi ȓaƹḏab."
49 Inna-asen: "Mayemmi xafi ṯrezzum? War ṯessinem belli itxeṣṣa-ayi aḏ iȓiɣ ḏi ṯeddarṯ n Baba?"