Yaḥya isewjaḏ abriḏ i Lmasiḥ
3
1 Ḏeg useggwas wis xemsṭac ḏi ȓeḥkam n Qayṣar Tibaryus, Bilaṭus Lbanṭi iǧa ḏ lḥakem x Yahuḏiya, ḏ Hirudus ḏ lwali x Ljalil, ḏ wumas Filibbas ḏ lwali x Iturya ḏ jwayeh n Traxunitis, ḏ Laṣan ḏ lwali x Abilina.
2 Ḥanin ḏ Qiyafa ḏ arruyas n ȓefquha. Ḏi ȓweqṯ nni awaȓ n Arebbi yusa-d i Yaḥya mmis n Zakariya ḏi ȓexȓa.
3 Ikka ḏi marra imucan ṭṭarf n iɣzar n Lʼurdun, itḥeddaṯ i yiwḏan ḥima aḏ tuben aḏ ṭehharen s waman ḥima aḏ twaɣfarent ȓmuƹṣiyaṯ nsen.
4 Ƹlaḥsab mamc yura ḏi lkitab n wawaȓen n nnabi Icaƹya:
"Ṯmijja tȓaɣa ḏi ȓexȓa:
Swejḏeṯ abriḏ i Siḏi Arebbi,
ggem ibriḏen nnes nican.
5 Aḏ itwantu kuȓ iɣzar,
aḏ itwaṭa kuȓ aḏrar ḏ kuȓ ṯaƹrurṯ.
Min war icnin aḏ icna,
aḏ ƹeḏȓen ibriḏen iḥfaren.
6 Marra iwḏan aḏ ẓren mamc isenjem Arebbi."
7 Yaḥya iqqar i ȓɣaci iy iffɣen ḥima aṯen iṭehhar s waman: "Ya ṯarwa n ifiɣeran! Wi ḏawem iƹeȓmen aḏ trewȓem zi lɣaḍeb iy d ɣa yasen?
8 Meȓa ṯtubem ḏ ṣṣaḥ, ggem min iǧan nican. Maci aḏ tinim ḏi nnefs nwem neccin ḏ ṯarwa n Brahim u ṣafi. Meȓa ixes Arebbi ṯarwa n Brahim, aḏ iysi izra-ya aṯen yarr ḏ ṯarwa n Brahim!
9 Aqa caqur iwjeḏ ḥima aḏ iqess izewran n ȓcejjur. Mkuȓ ṯacejjarṯ iy war itirwen ȓɣiǧeṯ iṣebḥan aḏ twaqess, aḏ tmenḍar ḏi ṯmessi."
10 Sseqsan-ṯ ȓɣaci marra, nnan: "Min ɣa negg?"
11 Ijaweb, inna-asen: "Wenni ɣar ǧan ṯnayen n ṯeqmijaṯin itxeṣṣa aḏ yuc icten i wenni war ɣar iǧi ca. Ƹaweḏ wenni ɣar iǧa macca itxeṣṣa aḏ yuc i wenni war ɣar iǧi ca."
12 Usin-d ɣares ȓebƹaḍ zeg yinni ijemmƹen ḍḍariba ḥima aḏ ṭehharen s waman, nnan-as: "A lmuƹallim, min ɣa negg?"
13 Yarra xasen: "War jemmƹem bu ktar zi lqanun."
14 Ƹaweḏ sseqsan-ṯ ȓƹaskar, nnan-as: "Y neccin, min ɣa negg?"
Inna-asen: "War teksim bu tmenyaṯ s bessif. War znuzim ḥad x lbaṭel. Qenƹem s min ṯrebḥem."
15 Iwḏan trajan, u niṯni tfekkaren ḏeg wuȓ nsen x Yaḥya ma ḏ netta ḏ Lmasiḥ.
16 Ijaweb-iṯen Yaḥya marra, inna-asen: "Nec ṭehhareɣ-kenniw s waman, maca aḏ d yas ijjen nneɣnit u netta ijheḏ xafi. War sḏihǧeɣ aḏas fesyeɣ uȓa ḏ ifiȓan n ṯsiȓa nnes. Netta akenniw iṭehhar s Arruḥ iqedsen ḏ ṯmessi.
17 Ɣares ṯazzarṯ ḏeg ufus ḥima aḏ izuzzar ṯaffa nnes marra. Aḏ ismun ṯiḥebba n yirḏan ḏi ṯsrafṯ. Aḏ isḥreq min war ineffƹen ca ḏi ṯmessi iy war ixsin ƹemmarṣ."
18 Yaḥya iseȓmaḏ iwḏan u itbeccar-iṯen s waṭṭas n ṯmesȓayin nneɣnit.
19 Umbaƹd lwali Hirudus yiwi icten qqaren-as Hirudya u nettaṯ ḏ ṯamɣarṯ n umas. Yaḥya inha Hirudus x manaya. Ƹaweḏ inha-ṯ x marra lɣalaṭ nneɣnit iy itegg.
20 Irni ḏi ccerr nnes Hirudus wami igga Yaḥya ḏi ȓeḥbes.
Yaḥya iṭehhar Siḏna Ƹisa s waman
21 Wami marra ccaƹb itṭehhar s waman, uȓa ḏ Ƹisa iṭehhar s waman. Wami itẓaǧa, inurzem ujenna.
22 Ihwa-d xas Arruḥ iqedsen ḏi ṣṣifeṯ n ṯeḏbirṯ. Ij n ṯmijja zeg ujenna ṯeqqar: "Cek ḏ memmi iƹizzen, farḥeɣ zzayek."
Ȓejḏuḏ n Siḏna Ƹisa
23 Wami ibḏa Ƹisa lƹamal nnes tuɣa ɣares can ṯȓaṯin iseggwusa. Tɣir-asen ḏ mmis n Yusef, n Ƹali,
24 n Maṭyu, n Lawi, n Mluki, n Yani, n Yusef,
25 n Maṭyusus, n Ƹamuṣ, n Naḥum, n Ḥuṣni, n Naji,
26 n Muḥit, n Maṭyusus, n Cmaƹi, n Yusik, n Yuḍa,
27 n Yuhan, n Ris, n Zarubbabil, n Cƹaltihil, n Nir,
28 n Mluki, n Adi, n Qasem, n Lmudam, n Ƹir,
29 n Yassu, n Lƹizar, n Yurim, n Maṭyu, n Lawi,
30 n Cimƹun, n Yahuḏa, n Yusef, n Yunam, n Lyaqim,
31 n Malyu, n Mennan, n Maṭyus, n Naṯan, n Dawud,
32 n Yessa, n Ƹubid, n Buƹazza, n Salmun, n Nacun,
33 n Ƹaminadab, n Admi, n Ƹarni, n Ḥaṣrun, n Faris, n Yahuḏa,
34 n Yaƹqub, n Isḥaq, n Brahim, n Taraḥ, n Naḥur,
35 n Sarug, n Raƹu, n Falaj, n Ƹabir, n Ṣalaḥ,
36 n Qinan, n Arfakcaḏ, n Sam, n Nuḥ, n Lamak,
37 n Matucaliḥ, n Ḥanux, n Jarid, n Muhallil, n Qinan,
38 n Anus, n Cuṯ, n Adam, mmis n Arebbi.