Ibȓis itjerrab Siḏna Ƹisa
4
1 Iḏweȓ-d Ƹisa zeg iɣzar n Lʼurdun iccur s Arruḥ iqedsen, yiwi-ṯ Arruḥ ɣar ȓexȓa.
2 Arbeƹin yum ḏ Ibȓis itjerrab-iṯ, war icci walu ḏeg wussan nni. Wami kemmȓen wussan nni iǧuz.
3 Inna-as Ibȓis: "Meȓa cek ḏ mmis n Arebbi, ini-yasen i yiẓra-ya aḏ ḏewȓen ḏ aɣrum."
4 Yarra xas Ƹisa: "Aqa yura ḏi lkitab n Tuwrat: Bnaḏem war iddar bu s uɣrum waha."
5 Yiwi-ṯ Ibȓis ɣar ij n umcan yuƹȓa, iseḍhar-as marra lmemlakaṯ n ddunect ḏeg ij n ḏqiqeṯ.
6 Inna-as Ibȓis: "Aḏac uceɣ marra jjehḏ-a ḏ lƹaḍama nsent, minzi ṯemmuc-ayi, nec at uceɣ i umi xseɣ.
7 Meȓa ṯsejjḏeḏ-ayi, aḏ yiȓi marra manaya nnec."
8 Ijaweb-iṯ Ƹisa, inna-as: "Yura ḏi lkitab n Tuwrat: Sejjeḏ i Siḏi Arebbi nnec, ƹbeḏ-iṯ waḥḏes."
9 Yiwi-ṯ ɣar Lquds, isbedd-iṯ x ṯqicceṯ n ṯemzida ṯameqqrant n wuḏayen, inna-as: "Meȓa cek ḏ mmis n Arebbi, ngez ssa ɣar ṯmurṯ,
10 minzi yura: Aḏ iweṣṣa Arebbi lmalaʼikaṯ nnes ḥima ac ḥḍant.
11 Ƹaweḏ: Ac ysint x ifassen nsent ḥima war ṯḥekmeḏ bu uzru s uḍar nnec."
12 Ijaweb-iṯ Ƹisa, inna-as: "Lkitab iqqar: War tjerrab bu Siḏi Arebbi nnec."
13 Wami ikemmeȓ Ibȓis ajerrab marra, ibeƹƹeḏ xas aȓ ij n ṯwaȓa ṯenneɣnit.
Tazzȓen x Siḏna Ƹisa zi ṯendint nnes
14 Iḏweȓ Ƹisa ɣar Ljalil s jjehḏ n Arruḥ iqedsen, intacar ȓexbar nnes ḏi marra jwayeh nni.
15 Iseȓmaḏ ḏi ṯemzidawin n wuḏayen, semɣaren-ṯ marra iwḏan.
16 Yusa-d ɣar Nnaṣira mani irebba. Iruḥ nhar n ssebṯ n lƹibada am ȓebda ɣar ṯemzida n wuḏayen, ikkar ḥima aḏ iɣer.
17 Ucin-as lkitab n nnabi Icaƹya, irzem-iṯ, yufa amcan iy ḏi yura:
18 "Aqa Arruḥ n Siḏ Arebbi xafi,
minzi ixḍar-ayi ḥima aḏ beccareɣ ȓmusakin.
Issekk-ayi-d aḏ xbareɣ lḥurriya i imeḥbas,
aḏ arreɣ iḍarɣaȓen twaȓan,
aḏ rxuɣ i yinni itwaḍeȓmen.
19 Aḏ xbareɣ x useggwas n ȓxir n Siḏi Arebbi."
20 Ibelleƹ lkitab nni, yarri-ṯ i uxeddam, iqqim. Marra yinni iǧan ḏi ṯemziḏa n wuḏayen qqimen xzaren ɣares.
21 Ibḏa iqqar-asen: "Nhara iffeɣ-d wawaȓ n lkitab-a umi ṯesȓim."
22 Marra ssiwȓen xas mliḥ, tƹejjben ḏeg wawaȓen iṣebḥanen iy d iffɣen zeg uqemmum nnes, qqaren, Wa ḏ mmis n Yusef, niɣ?
23 Inna-asen Ƹisa: "Ṯexsem aḏayi ṯinim ȓmaƹna-ya: Sgenfa ixef nnec, ay aḍbib. Aḏayi ṯinim ƹaweḏ: Nesȓa min iweqƹen ḏi ṯendint n Kafernaḥum. Ȓexxu egg manaya uȓa ḏa ḏi ṯmurṯ nnec."
24 Inna: "Aqa tesȓam ȓḥaqq: War iǧi can nnabi qebȓen-ṯ ḏi ṯmurṯ nnes.
25 Tesȓam ȓḥaqq: Tuɣa ḏinni ḏi ṯmurṯ n Israʼil aṭṭas n ṯajjaȓin ḏi zman n Ilyas, wami war yuwṯi unẓar ṯeȓt snin u sett chur, wami iwqeƹ buheyyuf ḏi ṯmurṯ ṯekmeȓ.
26 Maca war d itwassekk Ilyas ɣar can icten zzaysent, ɣir ɣar ij n ṯajjaȓṯ ḏi dcar n Ṣarepta ḏi ṯmurṯ n Ṣayda.
27 Tuɣa ḏinni ḏi Israʼil aṭṭas n yiwḏan heȓcen, ḏaysen jḏam, ḏi zman n nnabi Alicaƹ. Arebbi war zzaysen isgenfi uȓa ḏ ijjen ɣir Nuƹman zi Surya."
28 Wami sȓin yinni imunen ḏi ṯemziḏa, ɣeḍben aṭṭas.
29 Kkaren, sufɣen-ṯ barra i ṯendint. Uwin-ṯ ɣar jjarf n uḏrar mani ṯebna ṯendint nsen ḥima aṯ seyyben x jjarf.
30 Maca ifȓeṯ zzaysen, yuyur.
Siḏna Ƹisa isufuɣ ij n jjen ḏ aƹeffan
31 Iruḥ ɣar Kafernaḥum, ig iǧan ij n ṯendint ḏi Ljalil, ibḏa iseȓmaḏ iwḏan ḏi nhar n lƹibada nsen, kuȓ ssebṯ.
32 Qqimen tƹejjben marra ḏeg useȓmaḏ nnes, minzi ɣares ṯizemmar zi issawaȓ.
33 Ḏinni ḏi ṯemziḏa n wuḏayen ij n uryaz ḏayes ij n jjen ḏ aƹeffan. Uca isɣuy s jjehḏ,
34 iqqar-as: "Min ḏac iruḥen ḏayneɣ, a Ƹisa naṣiri? Ma ṯusiḏ-d axaneɣ ṯeqḍiḏ? Nec ssneɣ min ṯeƹniḏ; cek ḏ arrasul n Arebbi!"
35 Izeyyar-iṯ Ƹisa, inna-as: "Sqar, ffeɣ zzayes!" Iɣḍer-iṯ jjen nni ɣar ṯmurṯ ḏi ȓwesṭ nsen, uca iffeɣ zzayes war ḏas iggi walu.
36 Ḏehcen marra iwḏan nni, nnan i wayawya: "Min iƹna wawaȓ-a? Itamar s jjehḏ ḏ ṯzemmar jnun ḏ iƹeffanen uca teffɣen."
37 Intacar ȓexbar nnes ḏi mkuȓ amcan ḏi jwayeh nni.
Siḏna Ƹisa isgenfa ṯaḏeggwaȓṯ n Simƹan
38 Umbaƹd iffeɣ-d zi ṯemziḏa n wuḏayen, yuḏef ɣar ṯeddarṯ n Simƹan. Yufa ṯaḏeggwaȓṯ n Simƹan ḏayes ṯimessi aṭṭas, ttaren zzayes ḥima at isgenfa.
39 Yuḏar ɣares, isbedd ṯimessi, ṯeffeɣ-it. Ḏeg umcan ṯekkar, ṯebḏa tsexxar xasen.
40 Wami ṯeɣȓi ṯfuct, marra yinni ɣar ǧan imehȓac uwin-ṯen-d ɣares, ḏaysen aṭṭas n ȓehȓacaṯ. Isers fus nnes x mkuȓ ijjen zzaysen, isgenfa-ṯen.
41 Ƹaweḏ ȓaryaḥ teffɣen zeg waṭṭas n yiwḏan, u niṯni sɣuyiwen: "Cek ḏ mmis n Arebbi." Maca netta itzeyyar-iṯen, war ṯen ijji aḏ ssiwȓen, minzi ssnen belli netta ḏ Lmasiḥ.