Siḏna Ƹisa itȓaɣa-d i imeḥḍaren nnes imezwura
5
1 Wami Ƹisa ibedd ɣar ȓebḥar n Ganisarat, mzaḥamen xas ȓɣaci ḥima aḏ sȓen i wawaȓ n Arebbi.
2 Iẓra ṯnayen n ṯɣarruba beddent ṭṭarf n ȓebḥar. Hwan-d zzaysent iḥeǧaqen n iseȓman ḥima aḏ ƹeḏȓen ṯiracciwin nsen.
3 Inya ḏeg ict n ṯɣarrabut iy iǧan n Simƹan, ittar-iṯ azzayes iggwej cwayt x ȓbarr. Iqqim, iseȓmaḏ ȓɣaci zi ṯɣarrabut.
4 Wami ikemmeȓ wawaȓ nnes, inna: "A Simƹan, ndeh ṯaɣarrabut nnec ɣar mani uǧɣen waman, ṯenḍareḏ ṯiracciwin nnec ḥima aḏ tḥeǧqeḏ iseȓman."
5 Ijaweb-iṯ Simƹan, inna-as: "A lmuƹallim, ǧiȓeṯ ṯekmeȓ neccin nexḏem, war d nḥeǧeq uȓa ḏ ij n usȓem, maca ƹlaḥsab awaȓ nnec aḏ nḍareɣ ṯiracciwin."
6 Wami ggin manaya, ṭṭfen aberru n iseȓman, ṯiracciwin nsen ƹȓayen aḏ carrgent.
7 Ssekken ɣar imeddukaȓ nsen ḏi ṯɣarrabut nneɣnit ḥima aḏ d asen aṯen ƹawnen. Usin-d, ƹemmaren ṯnayen n ṯɣarruba aȓ wami ƹȓayen aḏ ɣerqent.
8 Wami iẓra Simƹan Buṭrus manaya, iwḍa ɣar iḍaren n Ƹisa, inna-as: "A Siḏi, beƹƹeḏ xafi, nec ḏ lƹaṣi."
9 Iḏhec netta ḏ yinni akiḏes marra, minzi ḥeǧqen aṭṭas n iseȓman.
10 Ƹaweḏ ḏehcen uȓa ḏ Yaƹqub ḏ Yuḥanna, ṯarwa n Zubaydi iy iǧan ḏ imeddukaȓ n Simƹan.
Inna Ƹisa i Simƹan: "War teggweḏ a Simƹan, ssa aȓ ṯsawent aḏ tḥeǧqeḏ iwḏan."
11 Wami d ḏewȓen s ṯɣarruba ɣar ȓbarr, semḥen ḏi ȓeḥwayej nsen marra, ḏfaren-ṯ.
Siḏna Ƹisa isgenfa ijjen ihȓec s jḏam
12 Wami Ƹisa iǧa ḏeg ij n ṯendint, ḏin ij n uryaz ḏayes jḏam aṭṭas iẓra Ƹisa. Iwḍa ɣar iḍaren nnes, ittar-iṯ, inna-as: "A Siḏi, cek meȓa ṯexseḏ, ṯzemmreḏ aḏayi ṯeṣfiḏ."
13 Ƹisa iḥaḏa-ṯ s ufus nnes, inna-as: "Wah, xseɣ, aḏ tgenfiḏ!" Ḏeg umcan ikkes-as jḏam.
14 Iweṣṣa-ṯ ḥima war itxebbar uȓa ḏ ijjen, inna-as: "Ruḥ ɣar ȓefqih ṯseḍhareḏ-as ixef nnec, ṯeggeḏ ṣṣeḏqeṯ iy zi iweṣṣa Musa, ḥima aḏ ssnen min iweqƹen."
15 Ƹaḏ intacar xas ȓexbar ktar. Usin-d ɣares aṭṭas n ȓɣaci ḥima aḏas sȓen, ƹaweḏ ḥima aḏ genfan zi ȓehȓacaṯ nsen.
16 Maca netta itraḥ ɣar imucan ixȓan ḥima aḏ iẓẓaǧ.
Siḏna Ƹisa isgenfa ij n unecruf
17 Ḏeg ij n nhar xmi iseȓmaḏ iwḏan, qqimen ḏinni ȓebƹaḍ zi ȓḥizeb n ifarrisiyen ḏ imseȓmaḏen n ccariƹa n wuḏayen, usin-d zi marra ȓedcur n Ljalil ḏ Yahuḏiya ḏ Lquds. Ḏinni jjehḏ n Siḏi Arebbi isgenfa imehȓac.
18 Usin-d can yiwḏan ysin ij n uryaz ḏi ṯassuṯ nnes, mmuṯen-as iḍaren. Xzaren mammec ɣa ggen aṯ siḏfen, aṯ sersen zzaṯes.
19 Wami war zmiren aṯ siḏfen minzi ḏin aṭṭas n ȓɣaci, gaƹƹḏen zzayes ɣar ṯzeqqa, qeȓƹen ij n umcan ḏi sqef, sehwan-ṯ ḏi ṯassuṯ nnes ɣar ȓwesṭ zzaṯ i Ƹisa.
20 Wami iẓra lʼiman nsen, inna-as i unecruf: "Ay aryaz, twaɣfarent-ac ȓmuƹṣiyaṯ iy ṯeggiḏ."
21 Bḏan imseȓmaḏen n ccariƹa ḏ ȓḥizeb n ifarrisiyen qqaren ḏi nnefs nsen: "Min iƹna wanita itarra ixef nnes ḏ Arebbi? Ug izemmren aḏ iɣfar ȓmuƹṣiyaṯ ɣir Arebbi waḥḏes!"
22 Issen Ƹisa ḏi min tfekkaren, inna-asen: "Mayemmi tfekkarem ammu ḏeg wuȓ nwem?
23 Min isehȓen aṭṭas at yini i bnaḏem, Twaɣfarent ȓmuƹṣiyaṯ iy ṯeggiḏ, niɣ as yini, Kkar ṯuyureḏ?
24 Ȓexxu aḏ tessnem belli Mmis n bnaḏem ɣares ssulṭa x ṯmurṯ ḥima aḏ iɣfar ȓmuƹṣiyaṯ." Uca inna i unecruf nni: "Aḏac iniɣ, kkar, ysi ṯassuṯ nnec ruḥ ɣar ṯeddarṯ nnec!"
25 Ȓxeddnnit ikkar zzaṯsen, iysi min tuɣa xef izzeȓ, iruḥ irewweḥ, iḥemmeḏ Arebbi.
26 Marra ḏehcen ḏi manaya, ḥemmḏen Arebbi, ggwḏen aṭṭas, nnan: "Nhara neẓra ȓeƹjaʼib!"
Siḏna Ƹisa itȓaɣa-d i Lawi
27 Umbaƹd iruḥ Ƹisa, iẓra ijjen ijemmeƹ ḍḍariba qqaren-as Lawi, iqqim ḏeg umcan mani jemmƹen ḍḍariba. Inna-as Ƹisa: "Ḏfar-ayi-d."
28 Ismeḥ ḏi marra, ikkar, iḏfar-iṯ.
29 Igga-as Lawi ij n zarrdeṯ ṯameqqrant ḏi ṯeddarṯ nnes. Ḥḍaren-as aṭṭas n ȓɣaci n yinni ijemmƹen ḍḍariba ḏ inneɣnit iy qqimen akiḏsen aḏ ccen.
30 Ceṯcan zzayes ȓḥizeb n ifarrisiyen ḏ imseȓmaḏen n ccariƹa n wuḏayen i imeḥḍaren nnes, nnan-asen: "Mayemmi tettem u ṯsessem akeḏ yinni ijemmƹen ḍḍaribaa ḏ yinni iƹṣan?"
31 Ijaweb-iṯen Ƹisa, inna: "Iwḏan iǧan mliḥ war teḥḏijin bu uḍbib, teḥḏajan-ṯ imehȓac.
32 War d usiɣ aḏ ȓaɣiɣ yinni iǧan nican ḥima aḏ tuben. Usiɣ-d ɣar yinni iƹṣan."
33 Nnan-as: "Mayemmi imeḥḍaren n Yaḥya ḏ imeḥḍaren n ȓḥizeb n ifarrisiyen tẓumman u tẓaǧan aṭṭas, maca imeḥḍaren nnec ɣir tetten sessen?"
34 Inna-asen: "Ma ṯzemmrem aḏ tejjem imeddukaȓ n muȓay aḏ ẓummen ḏi ȓfarḥ nnes?
35 Maca aḏ d asen wussan aḏ imeysi muȓay zi ȓwesṭ nsen. Ȓxeddnnit aḏ ẓummen ḏeg wussan nni."
36 Issiweȓ ƹaweḏ akiḏsen s ȓmaƹna-ya: "War iǧi ḥad itcerrag ṭṭarf n warruḍ ḏ jḏiḏ ḥima azzayes ireqqeƹ arruḍ ḏ abaȓi. Maɣar? Arruḍ ḏ jḏiḏ itcerrag, ḏ wenni ḏ abaȓi war xas d itis ṭṭarf n wenni ḏ jḏiḏ.
37 Ḥetta aman n uḍiȓ ḏ jḏiḏ war xeǧqen ḏeg yiȓemawen ḏ iqḏimen, ḥima war duquzen aḏ zeǧƹen waman n uḍiȓ aḏ ḍeyyƹen yiȓemawen nni.
38 Aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ.
39 Meȓa iswa can ijjen aman uḍiȓ iqḏimen, war itxis yinni ḏ jḏiḏ, minzi iqqar: Yinni iqḏimen ḏ iṣebḥanen."