Min iǧan ḥalal ḏi nhar n ssebṯ n lƹibada
6
1 Ij n nhar n ssebṯ n lƹibada, iƹḏu Ƹisa ḏi ȓwesṭ n imendi. Bḏan imeḥḍaren nnes tekksen ṯiyḏerin, tqeccaren-ṯent s ifassen nsen, tetten-ṯent.
2 Nnan-asen ȓebƹaḍ zi ȓḥizeb n ifarrisiyen: "Mayemmi teggem min iǧan ḥram ḏi nhar n lƹibada?"
3 Ijaweb-iṯen Ƹisa, inna-asen: "Ma war ṯeɣrim min igga Dawud wami iǧuz netta ḏ yinni akiḏes?
4 Yuḏef ɣar ṯemziḏa n Arebbi, iysi aɣrum nni iy iǧan ḏ ṣṣeḏqeṯ, icci-ṯ, yuca-asen i yinni akiḏes, waxxa manaya war iǧi ca ḥalal ɣir i ȓefquha waḥeḏsen."
5 Inna-asen: "Mmis n bnaḏem ig iǧan ḏ lḥakem x nhar n lƹibada."
6 Ij n ssebṯ nneɣnit, yuḏef ɣar ṯemziḏa n wuḏayen, ibḏa iseȓmaḏ. Ḏinni ij n uryaz fus nnes afusi immuṯ.
7 Imseȓmaḏen n ccariƹa ḏ ȓḥizeb n ifarrisiyen tlaḥaḍen xas ma aṯ isgenfa niɣ lla ḏi nhar n lƹibada, ḥima aḏ afen s minzi ɣa ṯ tahmen.
8 Ƹisa issen min iǧan ḏi ȓaƹqeȓ nsen, inna i uryaz ɣar iǧa fus immuṯ: "Kkar, bedd ḏi ȓwesṭ." Ikkar uryaz nni ibedd ḏinni.
9 Inna-asen Ƹisa: "Akenniw sseqsiɣ: Ma ḥalal ḏi nhar n lƹibada a negg ȓxir niɣ a negg ccerr? A nsenjem nnefs niɣ aṯ nneɣ?"
10 Ixzar ɣarsen marra ij ij, inna-as i uryaz nni: "Sarreḥ fus nnec!" Isarreḥ-iṯ, uca iḏweȓ ufus nnes igenfa.
11 Uca ɣeḍben aṭṭas, mcawaren jarasen min ɣa ggen i Ƹisa.
Siḏna Ƹisa ixḍar ṯenƹac n arrusul
12 Ḏeg wussan nni, igaƹƹeḏ ɣar uḏrar aḏ iẓẓaǧ, iqqim ḏinni ǧiȓeṯ ṯekmeȓ netta itẓaǧa i Arebbi.
13 Wami iṣbaḥ ȓḥaȓ, iȓaɣa-d x imeḥḍaren nnes, ixḍar zzaysen ṯenƹac, iggi-ṯen ḏ arrusul.
14 Ḏinni Simƹan umi qqaren Buṭrus, ḏ umas Andrawus, ḏ Yaƹqub, ḏ Yuḥanna, ḏ Filibbas, ḏ Bartulumay,
15 ḏ Matta, ḏ Tuma, ḏ Yaƹqub mmis n Ḥalfa, ḏ Simƹan umi qqaren "lmuqawim",
16 ḏ Yahuḏa mmis n Yaƹqub, ḏ Yahuḏa Isxaryuṭi wenni iy ɣa izzenzen Ƹisa.
Siḏna Ƹisa isgenfa aṭṭas n yiwḏan
17 Ihwa-d Ƹisa, ibedd ḏeg ij n umcan ḏ ȓewḍa. Ḏinni aṭṭas n imeḥḍaren nnes, ḏ aṭṭas n yiwḏan zi ṯmurṯ n Yahuḏiya ṯekmeȓ, zi Lquds, ƹaweḏ zi ȓebḥar n Ṣur ḏ Ṣayda.
18 Usin-d ɣares ḥima aḏas sȓen, ƹaweḏ ḥima aṯen isgenfa zi ȓehȓacaṯ nsen. Yinni itƹeddaben s jnun ḏ iƹeffanen, uȓa ḏ niṯni tgenfan.
19 Xsen marra ȓɣaci aṯ ḥaḏan, minzi ij n jjehḏ iteffeɣ-d zzayes, isgenfa-ṯen marra iḏsen.
Ssaƹḏ nwem, ȓefḍiḥeṯ nwem
20 Iysi Ƹisa ṯiṭṭawin nnes ɣar imeḥḍaren nnes, inna:
"Ssaƹḏ nwem, a ȓmusakin,
aqa ȓmulk n Arebbi i kenniw.
21 Ssaƹḏ nwem a yinni iǧuzen,
aqa aḏ tejjawnem.
Ssaƹḏ nwem kenniw itrun,
minzi aqa aḏ tḍeḥcem.
22 Ssaƹḏ nwem meȓa tƹiffan-kenniw yiwḏan, war kenniw qebȓen, ssawaȓen ḏaywem s ȓƹib, tzawaren-kenniw ƹlaḥsab Mmis n bnaḏem.
23 Farḥem, negzem s ȓefraḥeṯ ḏi nhar nni, minzi aɣarwem yiȓi ij n lʼajar ḏ ameqqran ḏeg ujenna,
minzi ammu iy iggin ȓejḏuḏ nsen i lʼanbiya.
24 Walakin, ya ȓefḍiḥeṯ nwem, a twajar,
minzi ṯƹicem min ṯƹicem.
25 Ya ȓefḍiḥeṯ nwem, a yinni ijjiwnen,
minzi akenniw iȓqef ȓaz.
Ya ȓefḍiḥeṯ nwem kenniw iḍeḥcen ȓexxu,
minzi aḏ txeyyqem, aḏ trum.
26 Ya ȓefḍiḥeṯ nwem meȓa tcekkaren-kenniw yiwḏan,
minzi ammu iy iggin ȓejḏuḏ nsen i yinni itarran ixef nsen ḏ lʼanbiya.
Xsem ȓƹaḏyan nwem
27 Maca aḏawem iniɣ, a yinni itsȓan: Xsem ȓƹaḏyan nwem, ggem ȓxir ḏeg yinni kenniw iƹiffen.
28 Barkem uw iy kenniw ineƹȓen, ttarem i Arebbi x yinni kenniw itƹeddaben.
29 Wenni c ɣa yuwṯan ɣar umeggiz nnec, uc-as ameggiz nnec nneɣnit. Meȓa can ijjen ixes aḏac iysi azeǧab nnec, ejj-iṯ aḏ iysi uȓa ḏ ṯaqmijat nnec.
30 Wi ḏac ɣa ittaren can ȓḥajeṯ, uc-as-t. Wenni ḏac ikksen ṯimesȓayin nnec, war ṯ tettar aḏac-ṯent yarr.
31 Mammec texsem aḏawem ggen yiwḏan, uȓa ḏ kenniw ggem-asen amenni.
32 Meȓa texsem yinni kenniw itexsen, mant lʼajar iy ɣarwem kenniw? Uȓa ḏ yinni iƹṣan texsen wi ṯen itexsen.
33 Meȓa teggem ȓxir ḏeg yinni ḏaywem iteggen ȓxir, mant lʼajar iy ɣarwem? Uȓa ḏ yinni iƹṣan teggen manaya.
34 Meȓa ṯerḍȓem i yinni ṯessnem aḏawem d arren, mant lʼajar iy ɣarwem? Uȓa ḏ yinni iƹṣan reṭṭȓen i yinni iƹṣan ḥima aḏ d arran amarwas nsen.
35 Maca xsem ȓƹaḏyan nwem, ggem ḏaysen ȓxir. Reḍȓeṯ u war trajaṯ walu. Uca aɣarwem yiȓi lʼajar ḏ ameqqran, aḏ tiȓim ḏ ṯarwa n Arebbi yuƹȓan, minzi netta iṣbaḥ akeḏ yinni war ṯ tcekkaren ḏ yinni iy ḏi iǧa ccerr.
36 Reḥmeṯ iwḏan amecnaw mamc ireḥḥem Babaṯwem.
War tƹeyyabem bu yiwḏan
37 War tƹeyyabem ḥad ḥima Arebbi war kenniw itƹeyyib. War tzawaȓem ḥad ḥima war kenniw izawaȓ Arebbi. Semḥem i yiwḏan, aḏawem iɣfar Arebbi.
38 Ucem i yiwḏan, aḏawem immuc. Aḏawem immuc ȓaƹbar ḏ aṣebḥan ḏeg waḥsi n uzeǧab nwem, aṯ shezzen, aṯ ḏekknen, aḏ ifeyyeḍ. Ȓaƹbar iy ṯsexḏamem, akiḏwem-ṯ isexḏem Arebbi."
39 Uca issiweȓ akiḏsen Ƹisa s ȓmaƹna-ya: "Ma aḍarɣaȓ aḏ ijarr aḍarɣaȓ? Ma war weṭṭin s ṯnayen iḏsen ḏeg can uḥfur?
40 Ameḥḍar war izemmer aḏ yiȓi xir zi lmuƹallim nnes, maca mkuȓ ameḥḍar ig ikemmȓen ṯɣuri nnes itiȓi amecnaw lmuƹallim nnes.
41 Mayemmi ṯxezzareḏ ɣar njir ig iǧan ḏi ṯiṭṭ n umac maca war ṯxezzireḏ ɣar ukeccuḍ ig iǧan ḏi ṯiṭṭ nnec?
42 Mammec ɣa ṯzeƹmeḏ aḏ tiniḏ i umac: Ay uma, ejj-ayi aḏac-d kkseɣ njir ig iǧan ḏi ṯiṭṭ nnec, maca cek ɣarec mana ktar ḏi ṯiṭṭ nnec? A lmunafiq, kkes ḏ amezwaru akeccuḍ iy ɣarec ḏi ṯiṭṭ nnec. Ȓxeddnnit aḏ twaȓiḏ mliḥ ḥima aḏ tekkseḏ njir ig iǧan ḏi ṯiṭṭ n umac!
Ṯacejjarṯ tessnen-t ƹlaḥsab min tarew
43 War ṯeǧi ṯcejjarṯ ṯaṣebḥant iy itarwen ȓɣiǧeṯ iy war iḥȓin, niɣ ṯacejjarṯ war iḥȓin iy itarwen ȓɣiǧeṯ ṯaṣebḥant.
44 Minzi mkuȓ ṯacejjarṯ tessnen-t yiwḏan ƹlaḥsab min tarew. War ȓeqḍen bu ṯazarṯ zeg isennanen. War tekksen aḍiȓ zi ṯzeggwarṯ.
45 Bnaḏem iṣebḥan isufuɣ-d min iṣebḥan zi ȓkenz aṣebḥan n wuȓ nnes. Bnaḏem aƹeffan isufuɣ-d ṯuƹeffna zi ȓkenz aƹeffan n wuȓ nnes, minzi iȓes issawaȓ s min iǧan ḏeg wuȓ.
Ȓebni n ṣṣaḥ
46 Mayemmi ḏayi ṯeqqarem: A Siḏi, a Siḏi, u kenniw war teggem min ḏawem qqareɣ?
47 Marra wenni ɣari d itasen, itsȓa i wawaȓ inu, ixeddem zzayes. Aḏawem iniɣ lmiṯal iy ḏi itcebbah.
48 Itcebbah ḏeg ij n uryaz ig ibnan ṯaddarṯ, iɣza aṭṭas, igga dsas x uzru. Wami d iḥmeȓ iɣzar, ikka-d ḏi ṯeddarṯ nni, war izemmer at ihḏem minzi ṯebna mliḥ.
49 Wenni itsȓan i wawaȓ inu, war zzayes itegg ca, itcebbah ḏeg ij n uryaz ibna ṯaddarṯ nnes x ucaȓ bȓa dsas. Ikka ḏayes iɣzar, ṯewḍa ḏeg umcan, ṯeqqim ḏ ȓxarbeṯ."