Lʼiman n ij n uƹaskari ḏ ameqqran n arrumanus
7
1 Wami ikemmeȓ Ƹisa awaȓ nnes akeḏ yiwḏan iy tuɣa ḏas itsȓan, yuḏef ɣar ṯendint n Kafernaḥum.
2 Ḏinni ij n uƹaskari ḏ ameqqran n arrumanus ɣares ij n uxeddam itƹewwaȓ xas aṭṭas. Axeddam nni ihȓec, war ḏas iqqim ca aḏ immeṯ.
3 Wami isȓa x Ƹisa, issekk ɣares can ȓecyux n wuḏayen ḥima aṯ ḥeccmen aḏ d yas aḏ isgenfa axeddam nnes.
4 Wami d usin ɣar Ƹisa, ḥeccmen-ṯ nnan-as: Bnaḏem-a isḏaheǧ aṯ tƹawneḏ,
5 minzi itexs ccaƹb nneɣ, ƹaweḏ ibna ṯamziḏa nneɣ.
6 Iruḥ Ƹisa akisen.
Wami iqarreb ɣar ṯeddarṯ, issekk-d ɣares uƹaskari nni can imeddukaȓ nnes, inna-as: "Ahya Siḏi, ṯƹeddbeḏ ixef nnec, nec war sḏihǧeɣ aḏ tadfeḏ ɣar ṯeddarṯ inu.
7 Ḥesbeɣ ixef inu war sḏihǧeɣ aḏ d aseɣ ɣarek. Ini ɣir ij n wawaȓ ḥima aḏ igenfa uxeddam inu.
8 Uȓa ḏ nec s yixef inu ɣari yinni xafi iḥekkmen. Ɣari ȓƹaskar x ufus inu iy xef ḥekkmeɣ. Aḏ iniɣ i wa: Ruḥ, aḏ iraḥ. Aḏ iniɣ i unneɣnit: Araḥ-d, aḏ d yas. Aḏ iniɣ i uxeddam inu: Egg ṯa, at igg."
9 Wami isȓa Ƹisa i manaya, itƹejjeb ḏayes, ineqȓeb ɣar ȓɣaci iy ṯ iḏfaren, inna-asen: "Aḏawem iniɣ: Yinni iǧan ḏ uḏayen war ḏaysen ufiɣ lʼiman imɣar aṭṭas am wa!"
10 Ḏewȓen yinni issekk uƹaskari nni ɣar ṯeddarṯ, ufin axeddam igenfa.
Siḏna Ƹisa isnekkar-d ij n umettin
11 Ṯiwecca nnes iruḥ Ƹisa ɣar ij n ṯendint qqaren-as Naƹin. Ruḥen akis imeḥḍaren nnes ḏ ȓɣaci aṭṭas.
12 Wami iqarreb ɣar ṯewwarṯ n ṯendint, yufa ysin ij n umettin aṯ nḍȓen. Netta iy ɣares ɣar yemmas waḥḏes, nettaṯ ḏ ṯajjaȓṯ. Akeḏ ṯemɣarṯ nni aṭṭas n ȓɣaci zi ṯendint.
13 Wami t iẓra Siḏiṯneɣ, iḥinn xas, inna-as: "War tru ca!"
14 Iqarreb ɣar ȓmeḥmeȓ iḥaḏa-ṯ, bedden yinni ṯ iysin, inna: "Ay aḥenjir, kkar."
15 Ikkar-d umettin, ibḏa issawaȓ, yarr-iṯ Ƹisa i yemmas.
16 Marra ggwḏen, semɣaren Arebbi, nnan: "Iḍhar-d ḏayneɣ ij n nnabi ḏ ameqqran. Arebbi ifqeḏ ccaƹb nnes!"
17 Iffeɣ ȓexbar-a x Ƹisa ḏi marra ṯamurṯ n Yahuḏiya ḏ marra jwayeh iy ḏas yuḏsen.
Siḏna Ƹisa ḏ Yaḥya
18 Yaḥya issen marra manaya zeg imeḥḍaren nnes, iȓaɣa-d x ṯnayen zzaysen,
19 issekk-iṯen ɣar Siḏiṯneɣ ḥima aṯ sseqsan: "Ma ḏ cek iy xef nesȓa aḏ d yas niɣ a netraja ḥad nneɣnit?"
20 Wami d usin ṯnayen nni n iryazen ɣar Ƹisa, nnan-as: "Isqaḏ-aneɣ-d ɣarek Yaḥya ac nesseqsa: Ḏ cek iy netraja aḏ d taseḏ, niɣ aḏ d yas ḥad nneɣnit?"
21 Ḏi ȓweqṯ nni isgenfa Ƹisa aṭṭas n imehȓac ḏ yinni ḏi iǧa ȓeḥȓiq ḏ yinni ḏi ǧan jnun ḏ iƹeffanen. Ƹaweḏ yarra aṭṭas n iḍarɣaȓen twaȓan.
22 Inna-asen Ƹisa: "Ƹeqbem ƹawḏem-as i Yaḥya min ṯeẓrim ḏ min ṯesȓim: iḍarɣaȓen twaȓan, izeḥḥafen gguren, yinni ḏi iǧa jḏam genfan, iḏehcuren tesȓan, yinni immuṯen tnekkaren-d, twabeccaren ȓmusakin.
23 Ssaƹḏ n yinni war ḏayi itcekkin."
24 Rewwḥen yinni issekk Yaḥya. Ƹisa issawaȓ x Yaḥya, iqqar i ȓɣaci: "Mayemmi ṯeffɣem aḏ texzarem ḏi ȓexȓa? Ṯexsem aḏ texzarem ij n uɣanim ithezza-ṯ usemmiḍ?
25 Meȓa lla, min ṯeffɣem aḏ teẓrem? Aḏ teẓrem aryaz irreḍ arruḍ ḏ aṣebḥan? Yinni ɣarsen arruḍ aṣebḥan tƹicen mliḥ tiȓin ḏi ȓeqṣur n izeǧiḏen!
26 Inim-ayi: Min ṯeffɣem aḏ teẓrem? Ij n nnabi? Aḏawem iniɣ: Wah, netta ktar zi nnabi.
27 Ḏ Yaḥya iy xef issiweȓ lkitab:
Aqa tsekkiɣ-d ij n arrasul inu zzaṯec,
ḥima ac isewjeḏ abriḏ nnec.
28 Aḏawem iniɣ: Zi min d jjint ṯemɣarin, war ḏin bu can ijjen ḏ ameqqran ktar zi Yaḥya, maca wen iǧan ḏ amezyan ḏi ȓmulk n Arebbi netta ḏ ameqqran x Yaḥya."
29 Marra iwḏan tesȓan xas, uȓa ḏ yinni ijemmƹen ḍḍariba niṯni s yixef nsen ƹtarfen belli manaya iǧa nican, minzi ggin aṭehhar s waman ƹlaḥsab Yaḥya.
30 Maca ȓḥizeb n ifarrisiyen ḏ yinni itcerraḥen ccariƹa war xisen min ixes Arebbi, war xisen ca aṯen iṭehhar Yaḥya s waman.
31 "X manaya wi ḏi ɣa cebbheɣ iwḏan n ȓweqṯ-a? Wi ḏi tcebbahen?
32 Tcebbahen ḏeg iḥenjiren iy iqqimen ḏi saḥa, tȓaɣan i wayawya, qqaren: Nzammar-awem s zzammar, war ṯecḍiḥem ca. Netƹezza, war ṯrum ca.
33 Minzi Yaḥya yusa-d war itett aɣrum, war isess aman n uḍiȓ, ṯennim: Ḏayes jnun!
34 Yusa-d Mmis n bnaḏem itett isess, ṯennim: Bnaḏem-a itett, isess aṭṭas, ƹaweḏ ḏ ameddukeȓ n yinni ijemmƹen ḍḍariba ḏ yinni iƹṣan.
35 Ȓefhameṯ n Arebbi qebbȓen-t marra yinni ifehhmen."
Ij n ṯemɣarṯ twaɣfarent-as ȓmuƹṣiyaṯ nnes
36 Ij n ufarrisi iƹreḍ Ƹisa ḥima akis icc. Yuḏef ɣar ṯeddarṯ n ufarrisi, uca iqqim.
37 Ḏin ḏi ṯendint nni ij n ṯemɣarṯ ṯeƹṣa. Ṯarra-d ȓexbar belli Ƹisa iqqim aḏ icc ḏi ṯeddarṯ n ufarrisi, ṯusa-d u nettaṯ ɣares ṯazzeyat n waman n lwarḏ.
38 Ṯbedd ɣar ḏeffar n Ƹisa ɣar iḍaren nnes, ṯebḏa ṯetru, weṭṭan imeṭṭawen nnes x iḍaren n Ƹisa, ṯemseḥ-iṯen s ucewwaf nnes, ṯseǧem-iṯen, ṯeḏhen-iṯen s waman n lwarḏ.
39 Afarrisi nni ṯ iƹerḍen wami iẓra manaya, inna ḏi nnefs nnes, Maƹlik wa ḏ nnabi aḏ tiȓi issen min ṯeƹna ṯamɣarṯ-a iy ṯ itḥaḏan, nettaṯ ṯeƹṣa Arebbi.
40 Ijaweb-iṯ Ƹisa, inna-as: "A Simƹan, ɣari ij n ȓḥajeṯ aḏac-t iniɣ."
Uca inna-as: "Siweȓ, a Lmuƹallim."
41 "Ij n siḏ irḍeȓ tmenyaṯ i ṯnayen n yiwḏan. Ijjen irḍeȓ-as xemsa miyya dinar, unneɣnit xemsin.
42 Maca war ɣarsen minzi ɣa arren, uca ismeḥ-asen marra. In-ayi: Manwen ṯ ɣa iḥibben aṭṭas?"
43 Inna-as Simƹan: "Imken wenni umi ismeḥ aṭṭas."
Inna-as Ƹisa: "Ɣarec ȓḥaqq."
44 Iḏweȓ ɣar ṯemɣarṯ nni, inna i Simƹan: "Twaȓiḏ ṯamɣarṯ-a? Usiɣ-d ɣar ṯeddarṯ nnec, war ḏayi d ṯiwiḏ uȓa ḏ aman iy zi ɣa sirḏeɣ iḍaren inu. Nettaṯ ṯsireḏ-ayi iḍaren inu s imeṭṭawen, ṯemseḥ-iṯen s ucewwaf nnes.
45 Cek war xafi ṯseǧmeḏ ca. Nettaṯ zeg wami d usiɣ ṯseǧam-ayi iḍaren inu.
46 Cek war ḏayi ṯeḏhineḏ azeǧif uȓa s zzect. Nettaṯ ṯeḏhen-ayi iḍaren inu s waman n lwarḏ.
47 X manaya aḏac iniɣ, ȓmuƹṣiyaṯ nni iy ṯegga aṭṭas twaɣfarent-as minzi nettaṯ ḏayes ȓemḥibbeṯ aṭṭas. Wenni umi twaɣfarent ȓmuƹṣiyaṯ ḏrus, netta ḏayes ȓemḥibbeṯ ḏrus."
48 Inna i ṯemɣarṯ nni: "Ȓmuƹṣiyaṯ nnem twaɣfarent."
49 Bḏan yinni iy kis iqqimen qqaren i wayawya: "Min iƹna wanita ig iɣfaren ȓmuƹṣiyaṯ?"
50 Inna-as Ƹisa i ṯemɣarṯ nni: "Isenjam-icem lʼiman nnem, ruḥ ḏi ȓehna."