Ȓmaƹna n wenni izerrƹen
8
1 Umbaƹd i manaya yuyur Ƹisa ḏi ṯneddam ḏ ȓedcur, itḥeddaṯ u itbeccar s ȓmulk n Arebbi. Akiḏes ṯenƹac n imeḥḍaren nnes,
2 ḏ can ṯemɣarin isgenfa-ṯent zi jnun ḏ ȓehȓacaṯ: ḏ Maryam umi tȓaɣan ṯamagdaliṯ iy zi ffɣen sebƹa n jnun,
3 ḏ Yunna ṯemɣarṯ n Xuzi lwakil n Hirudus, ḏ Suzana, ḏ ṯinneḍni aṭṭas iy ḏasen tƹawanent s wagȓa nsent.
4 Wami munen ƹaweḏ aṭṭas n ȓɣaci ḏ yinni ɣares d yusin zi mkuȓ ṯendint, issiweȓ s ij n ȓmaƹna:
5 "Iffeɣ ufeǧaḥ ḥima aḏ izreƹ. Wami tuɣa izerreƹ, ṯewḍa-yas can zzarriƹeṯ x ṭṭarf n ubriḏ, ƹeffsen xas yiwḏan, ccin-t ijḍaḍ n ujenna.
6 Can zzarriƹeṯ nneɣnit ṯewḍa-yas x yizra. Wami ṯeɣmi-d, ṯuzeɣ minzi xeṣṣan-t waman.
7 Can zzarriƹeṯ nneɣnit ṯewḍa jar isennanen. Ɣmin-d akis isennanen, jeyyfen-t.
8 Maca can zzarriƹeṯ nneɣnit ṯewḍa x ṯmurṯ ṯaṣebḥant. Wami ṯemɣar, ṯegga ṯiyḏerin mkuȓ icten ṯegga miyya." Inna manaya uca isɣuy, inna: "Ṣennṭeṯ mliḥ, ay yinni itsȓan."
Asfhem n ȓmaƹna n wenni izerrƹen
9 Sseqsan-ṯ imeḥḍaren nnes, nnan-as: "Min ixes aḏ yini wawaȓ-a?"
10 Inna: "Itwasmeḥ i kenniw aḏ tessnem min inuffren ḏi ȓmulk n Arebbi, maca i yiwḏan nneɣnit nessawaȓ-asen xas s ȓemƹani ḥima aḏ xzaren maca war twiȓin, ḥima aḏ sȓen maca war fehmen.
11 Ȓmaƹna-ya ixes aḏ inni: Zzarriƹeṯ nni nettaṯ ḏ awaȓ n Arebbi.
12 Zzarriƹeṯ nni ig iǧan x ubriḏ nettaṯ am yiwḏan iy tesȓan i wawaȓ n Arebbi, itas-d Ibȓis itekkes-asen-ṯ zeg wuȓ ḥima war timnen ca, war nejmen ca.
13 Zzarriƹeṯ nni ig iǧan x yizra nettaṯ am yiwḏan iy tesȓan i wawaȓ n Arebbi qebȓen-ṯ s ȓefraḥeṯ, maca war uwṯin bu izewran, tamnen zzayes ḏeg ij n ȓweqṯ waha. Ḏi ȓweqṯ n ȓemḥayen teffɣen abriḏ.
14 Zzarriƹeṯ nni ig iǧan jar isennanen nettaṯ am yiwḏan iy tesȓan i wawaȓ n Arebbi, maca ḏeɣya aḏ mjeyyafen s umnus ḏ wagȓa ḏ ccehweṯ n ddunect, war neffƹen ca.
15 Maca zzarriƹeṯ nni ig iǧan ḏi ṯmurṯ ṯaṣebḥant nettaṯ am yiwḏan iy tesȓan i wawaȓ n Arebbi, xemmȓen-ṯ ḏeg wuȓ nsen aṣebḥan, acemȓaȓ, ṣebbaren ḥima aḏ nefƹen.
Ȓmaƹna n ȓqendiȓ
16 Uȓa ḏ ijjen war itcaƹƹiȓ bu ȓqendiȓ ḥima axas igg aqnuc niɣ aṯ igg swadday i qama. Lƹaks, itegg-iṯ x ȓmarfaƹ ḥima aḏ yuc ṯfawṯ i yinni iy d ɣa yaḏfen.
17 Marra min inuffren aḏ d iḍhar. Marra min itwasnuffren aḏ itwafḍeḥ, aḏ itwassen.
18 Arrem-d ȓbaȓ nwem i mammec tesȓam. Wenni iǧan ɣares itmerni-yas. Wen war ɣar iǧi ca, itmeysi-yas uȓa min ḏas itɣir ɣares."
Siḏna Ƹisa ḏ yemmas ḏ ayṯmas
19 Ƹisa ṯusa-d ɣares yemmas ḏ ayṯmas, war zmiren aɣares awḍen, ḏin aṭṭas n ȓɣaci.
20 Nedqen-d can yiwḏan, nnan-as: "Yemmac ḏ ayṯmac trajan-cek ḏi barra, xsen acek ẓren."
21 Ijaweb-iṯen, inna-asen: "Yemma ḏ ayṯma ḏ yinni itsȓan i wawaȓ n Arebbi, xeddmen zzayes."
Siḏna Ƹisa isbedda asemmiḍ
22 Ij n nhar inya Ƹisa ḏi ṯɣarrabut akeḏ imeḥḍaren nnes, inna-asen: "Yallah a nezwam ɣar ujemmaḍ-in n ȓebḥar." Uca ruḥen.
23 Wami uyuren, iṭṭeṣ Ƹisa. Ikkar-d ij n usemmiḍ ḏi ȓebḥar, ṯebḏa ṯɣarrabut ṯƹemmar s waman, ḏewȓen ḏi ȓxaṭar.
24 Qarrben ɣares imeḥḍaren, sfaqen-ṯ nnan-as: "A Lmuƹallim, a Lmuƹallim, aqa netmetta!" Ikkar isbedd arriḥ ḏ ȓemwaj n waman, heddnen, irsa ȓḥaȓ.
25 Inna-asen: "Mani iǧa lʼiman nwem?"
Ggwḏen, tƹejjben, nnan i wayawya: "Min iƹna wa? Uȓa ḏ asemmiḍ ḏ ȓemwaj itamar-iṯen, tṭaƹan-as."
Ijjen ḏayes ȓaryaḥ ḏi ṯmurṯ n ijariṯiyen
26 Iwḍen ɣar ṯmurṯ n ijariṯiyen qibač i Ljalil.
27 Wami yiweḍ Ƹisa ɣar ȓbarr iȓqa-ṯ ij n uryaz zi ṯendint ḏayes jnun. War ɣares bu arruḍ. War izeddeɣ bu ḏi ṯuḏrin aṭṭas zeg wami, izeddeɣ ḏeg imeḍȓan.
28 Wami iẓra Ƹisa ibḏa isɣuyiw, iwḍa-yas ɣar iḍaren nnes, indeq-d s ij n ṯmijja ṯuƹȓa, inna-as: "A Ƹisa mmis n Arebbi Yuƹȓan, min zzayneɣ ṯexseḏ? Tettareɣ zzayek ḥima war ḏayi tƹeddibeḏ!"
29 Inna manaya minzi Ƹisa yumar jjen nni aƹeffan ḥima aḏ iffeɣ zeg uryaz nni. Ƹaweḏ minzi jjen nni iteȓqaf-iṯ aṭṭas n ṯwaȓaṯin. Waxxa teqqnen ifassen ḏ iḍaren nnes s snaseȓ, ḥeṭṭan-ṯ, maca netta itrezza-ṯent, indeh-iṯ jjen nni ɣar ȓexȓa.
30 Isseqsa-ṯ Ƹisa: "Mammec ḏac qqaren?"
Inna-as: "Qqaren-ayi Aberru," minzi ḏayes aṭṭas n jnun.
31 Ḥeccmen-ṯ aṭṭas ḥima war ṯen issekki ɣar ȓaǧeɣ bȓa ȓaḥedd.
32 Ḏinni ij n ṯḥimerṯ ḏ ṯameqqrant n yiȓfan ṯerwes ɣar uḏrar. Ttaren zzayes ḥima aṯen ijj aḏayes aḏfen. Uca ijji-ṯen.
33 Ffɣen ȓaryaḥ zi bnaḏem nni, uḏfen ḏeg yiȓfan. Ṯehwa ṯḥimerṯ nni x uḏrar ɣar ȓebḥar, ṯeɣreq ḏinni.
34 Yinni irewsen, wami ẓrin min iweqƹen, rewȓen sufɣen ȓexbar ḏi ṯendint ḏ ȓedcur.
35 Ffɣen-d yiwḏan ḥima aḏ xzaren min iweqƹen. Usin-d ɣar Ƹisa ufin aryaz nni ffɣen zzayes jnun, iqqim ɣar iḍaren n Ƹisa, ireḍ arruḍ, igenfa s ȓaƹqeȓ nnes. Uca ggwḏen aṭṭas.
36 Xebbaren-ṯen ȓechuḏ mammec Ƹisa isgenfa aryaz nni iy ḏi ǧan jnun.
37 Ttaren-ṯ marra ayṯbab n jjiha n ijariṯiyen ḥima axasen ibeƹƹeḏ, minzi ggwḏen aṭṭas. Inya ḏi ṯɣarrabut iƹqeb ssenni.
38 Aryaz nni iy zi ffɣen jnun ittar Ƹisa ḥima akis iraḥ, maca Ƹisa issekk-iṯ inna-as:
39 "Ƹqeb ɣar ṯeddarṯ nnec, xebbar s min ḏac igga Arebbi." Iruḥ uryaz nni u netta ixebbar ḏi ṯendint ṯekmeȓ zi min ḏas igga Ƹisa.
Siḏna Ƹisa isgenfa yeǧis n Yagrus
40 Wami d iḏweȓ Ƹisa, reḥḥben zzayes ȓɣaci minzi marra iḏsen trajan-ṯ.
41 Iruḥ ɣares ij n uryaz qqaren-as Yagrus. Netta ḏ arrayes n ṯemziḏa n wuḏayen. Iwḍa ɣar iḍaren n Ƹisa iḥeccem-iṯ aṭṭas ḥima akis iraḥ ɣar ṯeddarṯ nnes,
42 minzi ɣares ɣir ij n ṯḥenjirṯ ṯqarreb ɣar ṯenƹac iseggwusa, tmetta. Wami iruḥ, mzaḥamen akis ȓɣaci.
43 Ḏinni ij n ṯemɣarṯ ṯenƹac iseggwusa zeg wami ṯehȓec, tazzeȓ s iḏammen.a Ṯuca marra min ɣares i iḍbiben, war izmir ḥad at isgenfa.
44 Ṯeḏfar Ƹisa, ṯḥaḏa-yas ṭṭarf n useȓham nnes uca ṯgenfa ḏeg umcan.
45 Inna Ƹisa: "Wi ḏayi iḥaḏan?"
Marra iḏsen nkaren, inna-as Buṭrus: "A lmuƹallim, marra iwḏan temzaḥamen akic u cek ṯeqqareḏ wi ḏayi iḥaḏan?"
46 Inna Ƹisa: "Can ijjen iḥaḏa-ayi, minzi ssneɣ jjehḏ iffeɣ zzayi."
47 Wami twaȓa ṯemɣarṯ nni belli twafḍeḥ, ṯusa-d ɣar Ƹisa terjjiji, ṯewḍa ɣar iḍaren nnes. Ṯexbar-iṯ zzaṯ i marra iwḏan maɣar ṯ tḥaḏa, mammec ṯgenfa ḏeg umcan.
48 Inna-as: "A yeǧi, lʼiman nnem isenjem-icem, ruḥ ḏi ȓehna."
49 Wami ƹaḏ issawaȓ, yusa-d ijjen zi ṯeddarṯ n arrayes n ṯemziḏa n wuḏayen, inna-as: "Yeǧic ṯemmuṯ. War tseddaƹ bu lmuƹallim."
50 Isȓa-yas Ƹisa, inna-as: "War teggweḏ ca! Amen waha, aḏ tgenfa yeǧic."
51 Wami yiweḍ ɣar ṯeddarṯ, war ijji uȓa ḏ ijjen aḏ yaḏef, ɣir Buṭrus ḏ Yuḥanna ḏ Yaƹqub ḏ babas n ṯḥenjirṯ nni d yemmas.
52 Marra trun xas u tƹezzan. Inna-asen Ƹisa: "War xas trum. War ṯemmuṯ ca ṯeṭṭeṣ waha!"
53 Ḍeḥcen xas, minzi ssnen belli ṯemmuṯ.