Siḏna Ƹisa issekk arrusul aḏ ḥeddṯen
9
1 Iȓaɣa-d Ƹisa x ṯenƹac n arrusul, yuca-asen jjehḏ ḏ ṯzemmar x marra ȓaryaḥ u ƹaweḏ ḥima aḏ sgenfan ȓehȓacaṯ.
2 Uca issekk-iṯen ḥima aḏ ḥeddṯen s ȓmulk n Arebbi, aḏ sgenfan imehȓac.
3 Inna-asen: "War kiwem tiwim walu ag ubriḏ. War kessim aƹekkaz, uȓa ḏ aqrab, uȓa ḏ aɣrum, uȓa ḏ nnuqarṯ, uȓa ḏ arruḍ nneɣnit.
4 Axmi ɣa ṯaḏfem can ṯeddarṯ, qqimem ḏayes aȓ ɣa ṯuyurem ssenni.
5 Meȓa war kenniw qbiȓen ḏi can ṯendint, ffɣem ssenni mesḥem ṯaƹejjact zeg iḍaren nwem am ij n chaḏeṯ xasen."
6 Wami ruḥen arrusul ƹḏun ḏi ȓedcur, tbeccaren sgenfan iwḏan ḏi mkuȓ amcan.
7 Ɣares ȓexbar ɣar lwali Hirudus x marra min itweqiƹen, iḏhec minzi can yiwḏan qqaren: Yaḥya ikkar-d zi ȓmewṯ.
8 Can yiwḏan nnan: Ḏ Ilyas iy d iḍharen. Inneɣnit nnan: Ikkar-d ijjen zi lʼanbiya iqḏimen.
9 Hirudus inna: "Nec qesseɣ azeǧif i Yaḥya, min iƹna wanita iy xef tesȓiɣ manaya?" Irezzu aṯ iẓer.
Siḏna Ƹisa isecc xemsa aȓef n iryazen
10 Wami d ḏewȓen arrusul, xebbaren Ƹisa zi marra min ggin. Yiwi-ṯen ssenni ɣar ij n ṯendint qqaren-as Bayt Ṣayda.
11 Wami ȓɣaci ssnen manaya ḏfaren-ṯ, isteqbeȓ-iṯen, issiweȓ akisen x ȓmulk n Arebbi, isgenfa yinni irezzun aḏ genfan.
12 Wami iruḥ ȓḥaȓ, qarrben ɣares ṯenƹac n arrusul, nnan-as: "Sekk iwḏan-a ssa ɣar ȓedcur ḏ ṯuḏrin yuḏsen ammu ḏ wammu, aḏ rzun min ɣa ccen ḏ mani ɣa sensen. Amcan-a ḏ ȓexȓa."
13 Inna-asen Ƹisa: "Ucem-asen kenniw min ɣa ccen."
Nnan-as: "Ɣarneɣ ḏa ɣir xemsa n ṯxebbazin ḏ ṯnayen iseȓman. Ma a nraḥ a nseɣ macca i marra iwḏan-a?"
14 Minzi ḏinni can xemsa aȓef n iryazen.
Inna i imeḥḍaren nnes: "Sɣimem-ṯen ḏ lfirqaṯ, xemsin xemsin."
15 Ggin manaya, sɣimen-ṯen marra.
16 Iṭṭef xemsa nni n ṯxebbazin ḏ ṯnayen nni iseȓman, isgaƹƹeḏ ṯiṭṭawin nnes ɣar ujenna uca ickar Arebbi. Irza aɣrum nni yuca-asen-ṯ i imeḥḍaren nnes ḥima aṯ ferqen x yiwḏan nni marra.
17 Ccin jjiwnen marra. Uca ysin ṯenƹac n induṯen ƹemmaren s min iceṭṭen.
Buṭrus itcehhaḏ x Lmasiḥ
18 Wami Ƹisa itẓaǧa waḥḏes, ḏinni ṭṭarf nnes imeḥḍaren nnes, isseqsa-ṯen: "Min qqaren yiwḏan xafi?"
19 Jawben-ṯ, nnan-as: "Ȓebƹaḍ qqaren ḏ Yaḥya, ḥad nneɣnit iqqar ḏ Ilyas, ḥad nneɣnit iqqar belli cek ḏ ijjen zi lʼanbiya iqḏimen iy d ikkaren."
20 Inna-asen Ƹisa: "Y kenniw, min ḏayi tarrim nec?"
Yarra xas Buṭrus inna-as: "Cek ḏ Lmasiḥ n Arebbi."
21 Yumar-iṯen iweṣṣa-ṯen ḥima war tƹiwiḏen i ḥad manaya.
22 Inna i imeḥḍaren nnes: "Itxeṣṣa i Mmis n bnaḏem aḏ itwaƹeddeb x waṭṭas n ṯmesȓayin, aṯ ƹiffen imeqqranen n wuḏayen ḏ arruyas n ȓefquha ḏ imseȓmaḏen n ccariƹa, aṯ nɣen, wis ṯeȓt-yyam aḏ d ikkar zi ȓmewṯ."
23 Inna i marra: "Wenni ixsen aḏayi iḏfar, aḏ iƹiff ixef nnes, ȓebda aḏ ikessi ṣṣalib nnes mix ɣa iƹeddeb, aḏayi iḏfar.
24 Ȓaḥeqqac wen ixsen aḏ irbeḥ ȓaƹmar nnes aṯ ixser. Wen ɣa ixesren ȓaƹmar nnes x ȓesbab inu aṯ irbeḥ.
25 Min ɣa inefƹen bnaḏem meȓa irbeḥ ddunect amen ṯekmeȓ maca ixser ixef nnes niɣ iḍeyyeƹ ixef nnes?
26 Wenni xafi ɣa iƹeffaren, niɣ aḏ iƹeffar x wawaȓ inu, axas iƹeffar Mmis n bnaḏem xmi d ɣa yas s lƹaḍama nnes, ḏ lƹaḍama n Babas ḏ lmalaʼikaṯ iqedsen.
27 Aqa tesȓam ȓḥaqq: Ȓebƹaḍ zeg yinni iǧan ḏa akiḏi war tmettin aȓ ɣa ẓren ȓmulk n Arebbi."
Siḏna Musa ḏ Siḏna Ilyas ḍehharen-d akeḏ Siḏna Ƹisa
28 Umbaƹd i wawaȓ-a can ṯmenyam, yiwi Ƹisa akis Buṭrus ḏ Yuḥanna ḏ Yaƹqub, igaƹƹeḏ ɣar uḏrar ḥima aḏ iẓẓaǧ.
29 Wami iẓẓuǧ, ibeddeȓ uɣembub nnes iḏweȓ warruḍ nnes ḏ acemȓaȓ ireqq.
30 Aqa ṯnayen n iryazen ssawaȓen akis, u niṯni Musa ḏ Ilyas.
31 Ḍharen-d s lƹaḍama, ssiwȓen x wufuɣ nnes iy ḏeɣya itxeṣṣa aḏ ikemmeȓ ḏi Lquds.
32 Maca Buṭrus ḏ yinni akiḏes tnuddumen, wami faqen ẓrin lƹaḍama nnes ḏ ṯnayen n iryazen akis ibedden.
33 Wami gguren, indeq-d Buṭrus, inna-as i Ƹisa: "A lmuƹallim, mliḥ a neqqim ḏanita. Yallah, a negg ṯȓaṯa n iqiḍan, ijjen i cek, ijjen i Musa, unneɣnit i Ilyas."
Maca war issin min iqqar.
34 Tuɣa ƹaḏ issawaȓ Buṭrus wami d yusa ij useynu ihwa-d xasen, ggwḏen wami uḏfen ḏeg useynu.
35 Ṯendeq-d ij n ṯmijja zeg useynu ṯenna-asen: "Ḏ wa ḏ mmi iy xḍareɣ, sȓem ɣares."
36 Wami ṯbedd ṯmijja nni ufin Ƹisa waḥḏes. Niṯni sqaren, war xebbaren uȓa ḏ ijjen ḏi ȓyamaṯ nni zi can ȓḥajeṯ zi min ẓrin.
Siḏna Ƹisa isgenfa ij n uḥenjir ḏayes ij n jjen
37 Ṯiwecca nnes hwan-d zeg uḏrar, reḥḥben zzaysen ȓɣaci aṭṭas.
38 Isɣuy ij n uryaz zi ȓɣaci, inna: "A lmuƹallim, tettareɣ-cek aḏ texẓareḏ mmi ɣir wenni iy ɣari.
39 Iteȓqaf-iṯ ij n jjen, isɣuyiw ḏeɣya, iserjjijay-iṯ, isufuɣ kuffu zeg uqemmum nnes, war ḏas irexxu ḥetta xas isala.
40 Ttareɣ imeḥḍaren nnec ḥima azzayes sufɣen jjen, maca war zzayes uwin walu."
41 Yarra xasen Ƹisa inna-asen: "A iwḏan n ȓweqṯ-a iy ḏi war iǧi lʼiman. A yinni iffɣen abriḏ, mecḥaȓ iy kiwem ɣa qqimeɣ u mecḥaȓ ḏawem ɣa ṣbareɣ? Ruḥ awi-d mmic ḏa."
42 Wami d iqarreb uḥenjir nni ɣar Ƹisa, iṣerjjiji-ṯ jjen nni aƹeffan iɣḍer-iṯ ɣar ṯmurṯ. Isbedd Ƹisa jjen nni aƹeffan, isgenfa aḥenjir, yuci-ṯ i babas.
43 Uca marra tƹejjben ḏi jjehḏ n Arebbi.
Wami tuɣa marra tƹejjben ḏi marra min igga Ƹisa, inna i imeḥḍaren nnes:
44 "Ṣennṭeṯ mliḥ i wawaȓ-a: Aḏ itwaxḏeƹ Mmis n bnaḏem i yiwḏan."
45 Maca niṯni war fhimen awaȓ-a, iqseḥ xasen ḥima aḏ fehmen, ggwḏen aṯ sseqsan x manaya.
Manwen ig iǧan ḏ ameqqran?
46 Tmenɣan imeḥḍaren akeḏ wayawya ug iǧan ḏ ameqqran ḏaysen.
47 Issen Ƹisa min iǧan ḏeg wuȓ nsen. Isqarreb-d ij uḥenjir ibedd akiḏes.
48 Inna-asen: "Wen ɣa iqebȓen ƹlaḥsab nec can uḥenjir am wa, ḏ nec ig iqbeȓ. Wen ḏayi ɣa iqebȓen, iqbeȓ wenni ḏayi-d issekken. Minzi wenni zzaywem ḏ amezyan qaƹ, netta ḏ ameqqran."
49 Inna-as Yuḥanna: "A lmuƹallim, neẓra ijjen isufuɣ ȓaryaḥ s lḥikma nnec uca neccin nerzu aṯ nesbedd minzi war iggur ca akiḏneɣ."
50 Inna-as Ƹisa: "War ṯ sbeddam ca minzi yinni maci ḍed nwem, aqa-ṯen akiwem."
Ij n dcar n Samarya war iqebbeȓ Siḏna Ƹisa
51 Wami d tuweḍ ȓweqṯ iy ḏi ɣa itwarfeƹ ɣar ujenna, igga aḏ iraḥ ɣar Lquds.
52 Issekk arrusul qbeȓ iy ɣa iraḥ netta, ruḥen uḏfen ɣar ij n dcar n Samarya ḥima aḏas swejḏen amcan.
53 Maca Ayṯ-Samarya war ṯ qbiȓen ca minzi ssnen belli aḏ iraḥ ɣar Lquds.
54 Wami ẓrin manaya ṯnayen n imeḥḍaren nnes Yaƹqub ḏ Yuḥanna nnan: "A Siḏi, ma ṯexseḏ a nȓaɣa ṯimessi aḏ tehwa zeg ujenna ḥima aṯen ṯecc?"
Yinni ixsen aḏ ḏfaren Siḏna Ƹisa
57 Wami gguren, inna-as ij n uryaz ḏeg ubriḏ: "Ac ḏfareɣ mani ma ṯruḥeḏ."
58 Inna-as Ƹisa: "Uccanen ɣarsen ifran nsen, ijḍaḍ ɣarsen ȓaƹwac nsen, maca Mmis n bnaḏem war ɣares bu can umcan mani ɣa issummeṯ azeǧif nnes."
59 Inna-as i unneɣnit: "Ḏfar-ayi!"
Yarra xas: "A Siḏi, samḥ-ayi aḏ raḥeɣ aḏ neḍȓeɣ baba."
60 Inna-as Ƹisa: "Ejj yinni immuṯen aḏ neḍȓen imettinen nsen. Cek ruḥ aḏ tbeccareḏ ȓmulk n Arebbi."
61 Inna-as ijjen nneɣnit: "Acek ḏfareɣ, a Siḏi, maca ejj-ayi amezwaru aḏ msafaḍeɣ x familya inu."
62 Inna-as Ƹisa: "Wenni icerzen maca ixezzar ɣar ḏeffar war isḏiheǧ aḏ yaḏef ḏi ȓmulk n Arebbi."