Siḏna Ƹisa issekk ṯnayen u sebƹin aḏ beccaren
10
1 Umbaƹd i manaya ixḍar Siḏiṯneɣ ṯnayen u sebƹin nneɣnit, issekk-iṯen ṯnayen ṯnayen, izwaren-as ɣar mkuȓ ṯendint ḏ umcan igga aɣarsen iraḥ.
2 Inna-asen i imeḥḍaren nnes: "Ṯafeǧaḥṯ aṭṭas maca icewwaren ḏrus iy ɣa ixeḏmen. Ttareṯ zi Bab n ṯfeǧaḥṯ aḏ irni icewwaren.
3 Ruḥem, akenniw ssekkeɣ amecnaw izmaren jar wuccanen.
4 War kiwem kessim ṯazeƹbuȓṯ, niɣ ḏ aqrab, niɣ ḏ ṯisiȓa. War tseǧamem bu x wenni ɣa ṯafem ak ubriḏ.
5 Axmi ɣa ṯaḏfem ɣar can ṯeddarṯ, inim ḏ amezwaru: Sȓam x ṯeddarṯ-a.
6 Meȓa ireḥḥeb zzaywem bab n ṯeddarṯ, uca akiḏes tiȓi lbaraka nwem. Meȓa war zzaywem ireḥḥeb ca, war ḏayes ṯɣimi lbaraka nwem.
7 Qqimem ḏi ṯeddarṯ nni, ccem swem zi min ɣarsen, minzi wenni itbeccaren isḏaheǧ macca. War traḥem zi ṯeddarṯ ɣar ṯeddarṯ.
8 Axmi ɣa ṯaḏfem can ṯendint, meȓa reḥḥben zzaywem ayṯbab nnes, ccem s minzi ḏawem ɣa ucen,
9 sgenfam imehȓac nsen inim-asen: Ȓmulk n Arebbi yuḏes-d ɣarwem.
10 Meȓa ṯuḏfem ɣar can ṯendint war zzaywem reḥḥben ayṯbab nnes, ffɣem ɣar ibriḏen nnes inim:
11 Uȓa ḏ ṯaƹejjact n ṯendint nwem ḏayneɣ iȓeṣqen ḏeg iḍaren nneɣ at nemseḥ, maca ixeṣṣa-awem aḏ tessnem belli ȓmulk n Arebbi yuḏes-d.
12 Aḏawem iniɣ: Ḏi Yewm Lḥisab ḏ Lƹiqab aḏ yiȓi lƹiqab n ṯendint nni ktar zi lƹiqab n ṯendint ṯaƹeffant n Sadum.
13 Ya ȓefḍiḥeṯ nnem ya ṯandint n Kurzin! Ya ȓefḍiḥeṯ nnem ya ṯandint n Bayt Ṣayda! Maƹlik lmuƹjizaṯ-a twaggent ḏi ṯneddam ṯiƹeffanin, ṯandint n Ṣur ḏ Ṣayda, iȓi tuben ayṯbab nsent aṭṭas zeg wami, iȓi rḍen arruḍ n ḥeznan uca qqimen x yiɣeḏa ḥima aḏ sbeyynen belli qqa tuben.
14 Aqa ṯineddam ṯiƹeffanin, ṯandint n Ṣur ḏ Ṣayda aḏ iȓint xir zzaykent ḏi Yewm Lḥisab ḏ Lƹiqab.
15 Y cem, a ṯandint n Kafernaḥum, ma tɣir-am aḏ tgaƹƹḏeḏ ɣar ujenna? Lla, aḏ tehwiḏ ɣar Ljaḥim."
16 Inna Ƹisa i imeḥḍaren nnes: "Wenni itsȓan i wawaȓ nwem, itsȓa-yayi i nec. Wenni war kenniw iqbiȓen war ḏayi iqbiȓ nec. Wenni war ḏayi iqbiȓen war iqbiȓ wenni ḏayi-d issekken."
Ṯnayen u sebƹin ḏewwȓen-d farrḥen
17 Ḏewren-d ṯnayen u sebƹin n imeḥḍaren farḥen, nnan i Ƹisa: "A Siḏi, uȓa ḏ jnun teggen-aneɣ array s lḥikma nnec."
18 Inna-asen: "Ẓriɣ Cciṭan iwḍa-d zeg ujenna amecnaw ȓbarq.
19 Aqa ticceɣ-awem jjehḏ iy zi ɣa ṯƹeffsem x ifiɣeran ḏ ṯɣirḏemawin ḏ marra jjehḏ n ȓaƹḏu, war kenniw iḍarri ca.
20 Bȓa ma ṯfarrḥem wami jnun teggen-awem array, maca farḥem wami isemawen nwem urin zemmen ḏeg ujenna."
21 Ḏi ȓweqṯ nni ifareḥ Ƹisa s Arruḥ iqedsen, inna: "Ḥemḏeɣ-cek, a Baba, a Siḏi Arebbi n ujenna ḏ ṯmurṯ, minzi ṯesnuffreḏ manaya x imiɣisen ḏ lƹulama, ṯseḍhareḏ-ṯ-id i iḥenjiren imezyanen. Wah, a Baba, ȓaḥeqqac ammu iy twaȓiḏ ḥsen.
22 Baba yuca-ayi-d kuȓci. Uȓa ḏ ijjen war issin min iƹna mmis menɣir babas, niɣ min iƹna babas menɣir mmis. Babas, aṯ ssnen ɣir yinni umi ixes mmis aḏasen-ṯ-iḏ iseḍhar."
23 Ineqȓeb ɣar imeḥḍaren nnes inna-asen waḥeḏsen: "Ssaƹḏ n wenni ɣa iẓren min ṯeẓrim!
24 Minzi aḏawem iniɣ: Aṭṭas n lʼanbiya ḏ izeǧiḏen rzun aḏ ẓren min twaȓam maca war ṯ ẓrin ca, aḏ sȓen min ṯesȓim maca war ṯ sȓin ca."
Ij n uryaz zi Samarya itegg ȓxir
25 Ikkar ijjen zeg yinni itcerraḥen ccariƹa ḥima aṯ ijarreb, inna-as i Ƹisa: "A lmuƹallim, min ɣa ggeɣ ḥima aɣari ṯiȓi ṯuḏarṯ n ȓebda?"
26 Inna-as Ƹisa: "Min ṯeqqar ccariƹa? Min ḏac inḍharen ḏayes?"
27 Ijaweb-iṯ, inna-as: "Aḏ texseḏ Siḏi Arebbi nnec s marra uȓ nnec, s marra arruḥ nnec, s marra jjehḏ nnec, s marra ȓaƹqeȓ nnec. Aḏ texseḏ ajjar nnec amecnaw ixef nnec."
28 Inna-as Ƹisa: "Ɣarek ȓḥaqq ḏi min ṯenniḏ; egg zzayes ḥima aɣarec ṯiȓi ṯuḏarṯ."
29 Maca wenni itcerraḥen ccariƹa irzu aḏ isbeyyen belli iggur nican, uca isseqsa-ṯ: "Min iƹna wajjar inu?"
30 Ijaweb-iṯ Ƹisa, inna-as: "Ij n uṯarras ihwa zi Lquds iruḥ ɣar Ariḥa, ffɣen-d akis ixewwanen, kksen-as arruḍ, uwṯin-ṯ jjin-ṯ jar ȓmewṯ ḏ ṯuḏarṯ.
31 Iƹḏu ij n ȓefqih ḏeg ubriḏ nni, iẓri-ṯ irweȓ zzayes.
32 Iƹḏu ssenni ij n crif ƹaweḏ zi Ayṯ-Lawi, ixzar ḏayes irweȓ zzayes.
33 Maca iƹḏu ssenni ijjen zi ṯmurṯ n Samarya isafer. Wami ṯ iẓra iqqes-as.
34 Iqarreb ɣares iysi zzect ḏ waman n uḍiȓ igga-as-ṯen x ijariḥen icedd-as-ṯen. Uca isney-ṯ x uɣyuȓ nnes. Yiwi-ṯ ɣar ij n ṯeddarṯ n imsafaren, igga ḏayes ȓxir.
35 Ṯiwecca nnes iysi-d ṯnayen dinar yuca-as-ṯ i bab n ṯeddarṯ n imsafaren inna-as: Thella ḏayes, cḥaȓ ma ṯṣerrfeḏ nneḍni, xmi iy d ɣa ƹeqbeɣ aḏac-ṯen uceɣ.
36 Mammec twariḏ cek? Uw ig iǧan zi ṯȓaṯa-ya ḏ ajjar n uṯarras nni wikeḏ d ffɣen ixewwanen?"
37 Inna-as wenni itcerraḥen ccariƹa: "Wenni ḏayes iggin ȓxir."
Inna-as Ƹisa: "Ruḥ, egg manaya uȓa ḏ cek."
Marṯa ḏ Maryam
38 Wami gguren, yuḏef Ƹisa ɣar ij n dcar, ṯreḥḥeb zzayes ij n ṯemɣarṯ qqaren-as Marṯa ɣar ṯeddarṯ nnes.
39 Ɣares ij n učmas qqaren-as Maryam, ṯeqqim ɣar iḍaren n Siḏiṯneɣ tesȓa i wawaȓ nnes.
40 Marṯa ṯeȓha akeḏ waṭṭas n ȓxeḏmeṯ ḏi ṯeddarṯ, ṯbedd ṯenna: "A Siḏi, ma war twiȓiḏ belli učma ṯejj-ayi xeddmeɣ waḥḏi? Ini-yas ḥima aḏayi ṯƹawen!"