Siḏna Ƹisa iseȓmaḏ imeḥḍaren nnes mamc ɣa ẓẓaǧen
11
1 Ƹisa itẓaǧa ḏeg ij n umcan.
Wami ikemmeȓ ṯẓaǧiṯ, inna-as ijjen zeg imeḥḍaren nnes: "A Siḏi, seȓmeḏ-aneɣ a neẓẓaǧ amecnaw mamc iseȓmeḏ Yaḥya imeḥḍaren nnes."
2 Inna-asen: "Meȓmi ɣa ṯeẓẓaǧem, inim:
A Babaṯneɣ, ḏ ameqqran isem nnec.
Aḏ d yas ȓmulk nnec.
3 Uc-aneɣ ȓebda aɣrum iy ɣa neḥḏaj.
4 Ɣfar-aneɣ ȓmuƹṣiyaṯ,
minzi uȓa ḏ neccin nsemmeḥ i yinni iy kiḏneɣ ixḍan.
War ḏaneɣ tegg ca ḏi ȓemḥayen."
5 Inna-asen Ƹisa: "Ug iǧan zzaywem ɣares ameddukeȓ, aɣares iraḥ ḏi ȓwesṭ n ǧiȓeṯ, aḏas yini: Ay ameddukeȓ inu, rḍeȓ-ayi ṯȓaṯa n uɣrum,
6 minzi ij n umeddukeȓ isafer ikka-d xafi, war ɣari bu min ḏas ɣa uceɣ.
7 Aṯ ijaweb zi ḏaxeȓ i ṯeddarṯ: War ḏayi tseddaƹ ca! Ȓexxu ṯawwarṯ ṯbelleƹ, ṯarwa inu ṭṭṣen akiḏi, war zemmreɣ aḏ kkareɣ aḏac uceɣ.
8 Aḏawem iniɣ: Meȓa war ikkir ca aḏas yuc minzi netta ḏ ameddukeȓ nnes, netta aḏ ikkar minzi izaweg ḏayes aṭṭas aḏas yuc marra min iḥḏaj.
9 Nec aḏawem iniɣ: Ttareṯ, aḏawem immuc. Rezzum, aḏ tafem. Sqerqbem, aḏawem rezmen.
10 Minzi marra wenni ɣa ittaren aḏas immuc. Wenni ɣa irzun, aḏ yaf. Aḏ terzem ṯewwarṯ i wen ɣa isqerqben.
11 Meȓa can ijjen zzaywem ittar-as mmis asȓem, ma aḏas yuc fiɣer ḏeg umcan n usȓem? Lla!
12 Ma aḏas yuc babas ṯɣirḏent meȓa ittar-as mmis ṯamǧaȓṯ? Lla!
13 Meȓa kenniw ḏ iƹeffanen maca ṯessnem aḏ tucem i ṯarwa nwem min iṣebḥan, Babaṯwem ig iǧan ḏeg ujenna aḏ igg ktar; iticc Arruḥ iqedsen i yinni ḏas-ṯ ittaren."
Siḏna Ƹisa itwajah yinni iǧan ḍed nnes
14 Isufuɣ Ƹisa ij n jjen ḏ azeynun. Wami iffeɣ jjen nni issiweȓ uryaz, qqimen tƹejjben ȓɣaci.
15 Maca ȓebƹaḍ zzaysen nnan: "Netta isufuɣ jnun minzi arrayes n jnun umi qqaren Bƹalzabul yuca-as jjehḏ-a."
16 Inneɣnit tettarren ij n lmuƹjiza zeg ujenna ḥima aṯ jarrben.
17 Issen min nwan, inna-asen: "Mkuȓ lmemlaka iy ḏi tmenɣan ayṯbab nnes ijjen akeḏ unneɣnit aḏ tnehḏem. Mkuȓ ṯaddarṯ iy ḏi tmenɣan ayṯbab nnes ijjen akeḏ unneɣnit aḏ tewḍa.
18 Meȓa Cciṭan iqeṭṭa x Cciṭan, mammec ɣa ṯegg aḏ tdum lmemlaka nnes? Minzi ṯeqqarem sufuɣeɣ ȓaryaḥ s jjehḏ n Bƹalzabul.
19 Meȓa sufuɣeɣ ȓaryaḥ s jjehḏ n Bƹalzabul, inim-ayi kenniw, mammec iwḏan nwem sufuɣen-ṯen uȓa ḏ niṯni? Niṯni s yixef nsen tbeyyanen belli war ɣarwem bu ȓḥaqq ḏi min ṯeqqarem.
20 Nec, meȓa sufuɣeɣ ȓaryaḥ s jjehḏ n Arebbi, aqa ȓmulk n Arebbi yusa-d aɣarwem.
21 Meȓa aryaz ijehḏen wenni ɣar iǧa ȓesnaḥ iḥeṭṭa ṯaddarṯ nnes, agȓa nnes itiȓi ḏi ȓaman.
22 Maca meȓa ihjem xas wi xas ijehḏen, aṯ iɣȓeb, aḏas ikkes marra ȓesnaḥ iy xef iƹewweȓ, aḏ ifreq agȓa nnes."
23 "Wenni war kiḏi iǧin aqa-ṯ ḍed inu. Wenni war kiḏi ismunan, netta itzeǧaƹ.
24 Axmi ɣa iffeɣ jjen ḏ aƹeffan zi can bnaḏem, iggur ḏeg imucan yuzɣen irezzu amcan mani ɣa ireyyeḥ. Meȓa war yufi ca aḏ yini: Aḏ ḏewreɣ ɣar ṯeddarṯ inu iy zi ffɣeɣ.
25 Aɣares iḏweȓ at yaf ṯeƹḏeȓ, ṯenqa.
26 Uca aḏ iraḥ, aḏ d yawi sebƹa n jnun nneɣnit ḏ iƹeffanen ktar zzayes, aḏ ḏewȓen jmiƹ aḏayes zeḏɣen. Ȓxeddnnit aḏ tiȓi lḥala n bnaḏem nni war ṯeḥȓi ktar zeg umezwar."
27 Wami tuɣa issawaȓ x manaya, ij n ṯemɣarṯ ṯesɣuy ḏi ȓwesṭ n ȓɣaci, ṯenna-as: "Ssaƹḏ n ṯemɣarṯ nni cek d yurwen, ṯenni iy c isuṭḍen."
28 Maca netta inna: "Lla, ssaƹḏ n yinni itsȓan i wawaȓ n Arebbi, tṭaƹan-as."
Yinni irezzun lmuƹjiza zi Siḏna Ƹisa
29 Wami temzaḥamen ȓɣaci, ibḏa Ƹisa iqqar: "Iwḏan iƹeffanen n ȓweqṯ-a tettaren lmuƹjiza, maca war ḏasen itmuci ɣir wenni n nnabi Yunes.
30 Mammec iǧa nnabi Yunes ḏ ij n lƹalama i ayṯbab n ṯendint n Ninwa, ammu aḏ yiȓi ƹaweḏ Mmis n bnaḏem ḏ ij n lƹalama i yiwḏan n ȓweqṯ-a.
31 Yewm Lḥisab ḏ Lƹiqab aḏ tekkar lmalika n ljanub akeḏ yiwḏan n ȓweqṯ-a, axasen ṯceṯca, minzi ṯusa-d zi ṯmurṯ yugjen ḥima aḏ tseȓ i lḥikma n Suliman. Ḏanita ijjen ḏ ameqqran zi Suliman.
32 Yewm Lḥisab ḏ Lƹiqab aḏ d kkaren imezḏaɣ n ṯendint n Ninwa akeḏ yiwḏan n ȓweqṯ-a, axasen ceṯcan, ȓaḥeqqac ayṯbab n ṯendint n Ninwa tuben wami ṯen inha Yunes. Ḏanita ijjen ḏ ameqqran zi Yunes.
Ṯfawṯ n ddat nettaṯ ḏ ṯiṭṭawin
33 Uȓa ḏ ijjen ma itcaƹƹaȓ ȓqendiȓ ḥima aṯ isnuffer niɣ axas iqȓeb can uṣenduq. Lƹaks, aṯ igg x ȓmarfaƹ ḥima aḏ yuc ṯfawṯ x yinni iy d itaḏfen.
34 Ṯiṭṭawin amecnaw ṯfawṯ i ṯuḏarṯ nnec. Meȓa ṯiṭṭawin nnec ṣeḥḥant, aḏ tiȓi ṯfawṯ ḏi marra ṯuḏarṯ nnec. Meȓa ṯiṭṭawin nnec war ǧint ca mliḥ, marra ṯuḏarṯ nnec aḏ tiȓi ḏi ṯaǧest.
35 Ḥḍa ixef nnec, ḥima war iḏewweȓ nnur iy ḏayek ḏ ṯaǧest.
36 Meȓa marra ddat nnec ḏayes ṯfawṯ, war ḏayes bu ṯaǧest, aḏ tceƹceƹ aṭṭas amecnaw tegg ṯfawṯ n ȓqendiȓ."
Ȓefḍiḥaṯ n ȓḥizeb n ifarrisiyen ḏ imseȓmaḏen n ccariƹa
37 Wami issawaȓ, iƹreḍ-iṯ ijjen zi ȓḥizeb n ifarrisiyen ḥima akis icc. Yuḏef iqqim.
38 Uca iqqim ufarrisi itƹejjeb wami iẓra Ƹisa war iṭehhar ca ixef nnes s usireḏ qbeȓ i macca.
39 Inna-as Siḏiṯneɣ: "Kenniw ifarrisiyen ṯsiriḏem ȓkas ḏ ṭṭebsi ɣar barra, maca kenniw ɣar ḏaxeȓ nwem iƹemmar s ṭmaƹ ḏ ccerr.
40 A yinni war ifhimen! Arebbi iggin ddat, ḏ netta ig iggin min ḏayes ɣar ḏaxeȓ.
41 Ṣedqem min ɣarwem ɣar ḏaxeȓ, marra aḏ iḏweȓ isireḏ i kenniw.
42 Maca ya ȓefḍiḥeṯ nwem, a ȓḥizeb n ifarrisiyen! Ticcem ȓaƹcur uȓa zi naƹnaƹ ḏ uwrama ḏ marra ȓaƹcub, war tehtimim zi ȓḥaqq ḏ ȓemḥibbeṯ n Arebbi. Lla, ixeṣṣa-awem aḏ tehtamem s manaya, bȓa ma tettum ȓaƹcur.
43 Ya ȓefḍiḥeṯ nwem, a ȓḥizeb n ifarrisiyen! Minzi texsem imucan imezwura ḏi ṯemziḏawin, ƹaweḏ iteƹjib-awem aḏawem ggen sȓam ḏi znaqi.
44 Ya ȓefḍiḥeṯ nwem, kenniw amecnaw imeḍȓan iweddaren, gguren xasen yiwḏan maca war ṯen ssinen."
45 Ijaweb-iṯ ijjen zeg yinni itcerraḥen ccariƹa, inna-as: "A lmuƹallim, wami ṯeqqareḏ manaya aqa tzawareḏ-aneɣ uȓa ḏ neccin!"
46 Inna: "Ya ȓefḍiḥeṯ nwem uȓa ḏ kenniw, a yinni itcerraḥen ccariƹa, minzi tceddim ȓeḥmeȓ iḏeqȓen iqeṣḥen x yiwḏan ḥima aṯ rbun, maca kenniw war tḥiḏim bu ȓeḥmeȓ nni uȓa s ṭṭarf n uḍaḍ nwem.
47 Ya ȓefḍiḥeṯ nwem, minzi kenniw tarrim imeḍȓan n lʼanbiya ḏ imrabeḏen u ȓejḏuḏ nwem ḏ niṯni iy ṯen inɣin.
48 Tafqem akeḏ ȓejḏuḏ nwem, iƹjeb-awem min xeḏmen. Minzi d niṯni ig inɣin lʼanbiya u kenniw tarrim imeḍȓan nsen ḏ imrabeḏen.
49 X manaya ƹaweḏ ṯeqqar lḥikma n Arebbi: Aḏasen ssekkeɣ lʼanbiya ḏ arrusul, azzaysen nɣen, axasen azzȓen,
50 ḥima iwḏan n ȓweqṯ-a aḏ twaƹeqqben x marra iḏammen iy yuzzȓen n lʼanbiya zeg wami ṯeǧa ddunect,
51 zeg iḏammen n Habil aȓ iḏammen n Zakariya iy inɣin jar ȓmeḏbaḥ ḏ ṯemziḏa ṯameqqrant. Wah, aḏawem iniɣ: Marra lƹiqab x manaya, ḏ iwḏan n ȓweqṯ-a iy xas ɣa itwaḥasben!
52 Ya ȓefḍiḥeṯ nwem, a yinni itcerraḥen ccariƹa! Minzi ṯeysim ȓmeftaḥ n ȓefhameṯ, kenniw war ṯuḏifem war ṯejjim uw iy ɣa yaḏfen."