Ṯiggwḏi zi Arebbi
12
1 Ȓxeddnnit munen ij n lƹadad ḏ ameqqran n yiwḏan, aȓ wami ḏewȓen ƹeffsen ij x unneɣnit. Ḏ amezwaru inna-asen i imeḥḍaren nnes: "Ḥḍam ixef nwem zi nnifaq n ȓḥizeb n ifarrisiyen iy iǧan am untun.a
2 Marra min itwasnuffren aḏ itwafḍeḥ. Marra min inuffren aḏ itwassen.
3 X manaya, marra min ṯennim ḏi ṯaǧest aḏas sȓen s uziȓ, marra min ṯennim s ȓḥess ɣar ḏaxeȓ i ṯuḏrin, azzayes sɣuyen zi ṯzeqqa.
4 Aḏawem iniɣ ay imeddukaȓ inu: War teggwḏem bu zeg yinni ineqqen ddat, ȓaḥeqqac war ɣarsen min ɣa ggen ktar zi manaya.
5 Aḏawem iniɣ wi zi ɣa ṯeggwḏem: Ggwḏem zeg wenni ɣa inɣen ddat nwem, umbaƹd ɣares min ɣa igg ktar; at inḍar ḏi jahennama. Aḏawem iniɣ: Wah, wenni ggwḏem-ṯ.
6 Ma war tmenzin xemsa n zzawj s ṯnayen n duru? Wah, maca Arebbi war itettu uȓa ḏ ijjen.
7 Uȓa ḏ izuṭṭan iy ɣarwem x uzeǧif iḥseb-iṯen Arebbi marra. War teggwḏem ca. Kenniw ṯseggwam ktar zeg waṭṭas n izawjiwen.
8 Aḏawem iniɣ: Wenni zzayi ɣa icehḏen zzaṯ i yiwḏan, azzayes cehḏeɣ nec, Mmis n bnaḏem, zzaṯ i lmalaʼikaṯ n Arebbi.
9 Wenni ḏayi ɣa inkaren zzaṯ i yiwḏan, aṯ nkareɣ nec zzaṯ i lmalaʼikaṯ n Arebbi.
10 Wenni ɣa yinin can wawaȓ ḏ aƹeffan x Mmis n bnaḏem aḏas iɣfar. Wenni ɣa yinin can wawaȓ ḏ aƹeffan x Arruḥ iqedsen war ḏas iɣeffar ca.
11 Axmi kenniw ɣa awin ɣar ṯemziḏawin n wuḏayen ḏ lḥukkam ḏ imxazniyen, war tfekkarem ca mammec ɣa ṯdafƹem x yixef nwem niɣ min ɣa ṯinim,
12 minzi Arruḥ iqedsen aḏawem-d iseḍhar ḏi ṯsaƹat nni min ɣa ṯinim."
Ȓmaƹna n ttajar ḏ afɣuȓ
13 Inna-as ij n uryaz zi ȓɣaci: "A lmuƹallim, ini-yas i wuma ḥima akiḏi ifreq ȓwarṯ."
14 Inna-as: "Ay aryaz, wi ḏayi iggin xawem ḏ ȓqaḍi niɣ ḏ wenni iferqen ȓwarṯ?"
15 Inna-asen: "Ḥḍam ixef nwem, beƹƹḏeṯ x ṭmaƹ, minzi ṯuḏarṯ n bnaḏem war tiȓi s waṭṭas n wagȓa."
16 Issiweȓ akiḏsen s ij n ȓmaƹna, inna: "Ij n bnaḏem ḏ ttajar ṯamurṯ nnes ṯurew-as aṭṭas.
17 Inna ḏi nnefs nnes: War ɣari bu amcan mani ɣa xemmȓeɣ ȓɣiǧeṯ-a, min ɣa ggeɣ?
18 Uca inna: Aḏ heḏmeɣ ixezzanen inu, aḏ bniɣ inneɣnit ḏ imeqqranen xasen, aḏaysen xemmȓeɣ marra ȓɣiǧeṯ ḏ arzeq inu.
19 Inna ḏi nnefs nnes: Ṣafi, ɣari aṭṭas n ȓxir iy ḏi ɣa iqidden i waṭṭas n iseggwusa, aḏ reyyḥeɣ aḏ cceɣ aḏ sweɣ aḏ farḥeɣ!
20 Inna-as Arebbi: Ay afɣuȓ! Ḏi ǧiȓeṯ-a aḏ ysiɣ buḥbeȓ nnec. Umi ṯsewjaḏeḏ manaya?
21 Wenni ijemmƹen i yixef nnes war iǧi bu ḏ ttajar ɣar Arebbi."
War kessim bu umnus
22 Inna i imeḥḍaren nnes: "X manaya, aḏawem iniɣ: War kessim bu umnus i ṯuḏarṯ nwem ƹlaḥsab min ɣa ṯeccem niɣ ḏeg warruḍ iy ɣa ṯeḥḏajem i ddat nwem.
23 Minzi ṯuḏarṯ tseggwa ktar zi macca, ddat tseggwa ktar zeg warruḍ.
24 Xzarem ɣar ibaɣeriwen. War zerrƹen, war mejjaren. War ɣarsen ṯiserfin uȓa ḏ mani ɣa xemmȓen. Ḏ Arebbi iy ḏasen iticcen aḏ ccen. Kenniw, ma war tseggwim ktar zeg yijḍaḍ?
25 Ug izemmren zzaywem aḏ irni s umnus nnes ɣir ṯsaƹat ḏi ȓƹumur nnes?
26 Meȓa war ṯzemmrem uȓa i min iǧan ḏ amezyan, mayemmi ṯkessim amnus i can nneɣnit?
27 Xzarem mammec imɣar nwar ḏi ȓexȓa; war ixeddem war itxeyyiḍ. Aḏawem iniɣ: Uȓa ḏ azeǧiḏ Suliman, marra min ɣares ḏ agȓa, amenni ƹemmarṣ war ɣares arruḍ ḏ aṣebḥan amecnaw ij n nwar.
28 Meȓa Arebbi iticc arruḍ i arbiƹ n ȓexȓa ig iǧan nhara aḏ iḥareq ṯiwecca, kenniw akiḏwem igg ktar. Lʼiman nwem ḏ uqlil.
29 War rezzum min ɣa ṯeccem niɣ min ɣa ṯeswem. War kessim bu umnus.
30 Marra manaya rezzun-ṯ ȓegnus n ddunect-a, maca Babaṯwem issen belli ṯeḥḏajem ṯimesȓayin-a.
31 Meȓa ṯrezzum ȓmulk n Arebbi, aḏawem twarnint ṯimesȓayin-a.
32 War teggwḏem ca a ṯḥimerṯ inu ṯamezyant, minzi irḍa Babaṯwem aḏawem yuc ȓmulk nnes.
33 Zenzem agȓa nwem, ṣedqem-ṯ. Ggem ṯizeƹbuȓin n tmenyaṯ iy war ifennin niṯenti ḏ ij n ȓkenz ḏeg ujenna iy war iqeṭṭin. War itiḏef ḏinni uceffar, lla ḏ ṯzura itḍeyyaƹen.
34 Mani iǧa ȓkenz nwem, ḏinni ɣa yiȓi wuȓ nwem.
Iȓim ṯewjḏem xmi d ɣa iḏweȓ Siḏiṯwem
35 Iȓim ṯewjḏem geffḍem, aḏ iȓint ṯifawin nwem caƹƹȓent.
36 Iȓim amecnaw iwḏan iy trajan siḏiṯsen aḏ iḏweȓ zi ȓfarḥ. Xmi d ɣa yas aḏ isqerqeb aḏas rezmen ḏeɣya.
37 Ssaƹḏ n ixeddamen nni meȓa yusa-d siḏiṯsen aṯen yaf ƹaḏ war ṭṭiṣen. Aqa tesȓam ȓhaqq: Aḏ igeffeḍ siḏiṯsen, aṯen isɣim, aḏ ibḏa itsexxar xasen.
38 Ssaƹḏ n ixeddamen-a meȓa yusa-d yufi-ṯen ammu qbeȓ ȓwesṭ n ǧiȓeṯ niɣ qbeȓ i ȓefjar.
39 Ixeṣṣa-awem aḏ tessnem manaya: Mȓi issen bab n ṯeddarṯ ṯsaƹat iy ḏi d ɣa yas uceffar, iȓi war ṯ itijji aḏ d yaḏef ṯaddarṯ nnes.
40 Sewjḏem ixef nwem minzi Mmis n bnaḏem aḏ d yas ḏi ṯsaƹat iy war trijim."
41 Inna-as Buṭrus: "A Siḏi, ȓmaƹna-ya ṯeqqareḏ-ṯ ɣir i neccin niɣ i marra iwḏan?"
42 Inna-as Siḏiṯneɣ: "Manwen iǧan ḏ aweqqaf ḏ amiɣis, ḏayes ȓaman? Ḏ wenni ig itkellaf siḏes aḏasen yuc i ixeddamen nnes macca ḏi ȓweqṯ.
43 Ssaƹḏ n uweqqaf nni, xmi ɣa iḏweȓ siḏes itaf-iṯ ḏi ȓxeḏmeṯ nnes.
44 Aqa tesȓam ȓḥaqq: Aqa aweqqaf nni aḏ itwakellef x marra agȓa n siḏes.
45 Maca meȓa aweqqaf nni aḏ inwa belli siḏes aḏ iƹeṭṭeȓ war d itis ca, aḏ ibḏa aḏ yuweṯ ixeddamen ḏ ṯxeddamin, aḏ icc aḏ isew aḏ yiȓi ḏ askayri,
46 uca aḏ d yas siḏes n uweqqaf nni ḏeg ij n nhar war ṯ inwi ca, ḏeg ij n ṯsaƹat war t issin, aṯ iqess ḏ iwezwizen, aṯ ijj ḏeg umcan n yinni ḏi war iǧi lʼiman.
47 Aweqqaf nni ig issnen min ixes siḏes, war isewjiḏ ixef nnes, war itegg min ixes siḏes, aḏ itwaƹeqqeb aṭṭas.
48 Maca wenni war issinen min ixes siḏes, waxxa isḏaheǧ aƹmuḏ x min itegg, maca aḏ itwaƹeqqeb ḏrus. Marra wenni umi immuc aṭṭas, azzayes ttaren aṭṭas. Wenni ig itwakellfen x ktar, azzayes ttaren ktar.
Iwḏan aḏ mesfraqen ḏi ȓesbab n Siḏna Ƹisa
49 Usiɣ-d ḥima aḏ nḍareɣ ṯimessi x ṯmurṯ, mecḥaȓ xseɣ at afeɣ ṯceƹƹeȓ!
50 Itxeṣṣa-ayi aḏ twaƹaddbeɣ. Mecḥaȓ xeyyqeɣ aȓ ɣa ƹḏuɣ manaya.
51 Ma tfekkarem belli usiɣ-d aḏ ggeɣ ȓehna ḏi ddunect? Lla! Qqareɣ-awem usiɣ-d aḏ ggeɣ afreq.
52 Ssa aȓ ṯsawent aḏ mesfraqen xemsa n yiwḏan ḏeg ij n ṯeddarṯ: ṯȓaṯa aḏ menɣen akeḏ ṯnayen, ṯnayen aḏ menɣen akeḏ ṯȓaṯa.
53 Aḏ imneɣ babas akeḏ mmis,
ḏ mmis akeḏ babas,
ḏ yemmas akeḏ yeǧis,
ḏ yeǧis akeḏ yemmas,
ḏ lallas akeḏ ṯsȓiṯ nnes,
ḏ ṯasȓiṯ akeḏ lallas."
Lƹalamaṯ n zman-a
54 Inna ƹaweḏ i ȓɣaci: "Meȓa ṯeẓrim aseynu igaƹƹeḏ-d zi ȓɣarb, aḏ tinim ḏeg umcan aḏ yuweṯ unẓar, uca aḏ yuweṯ.
55 Meȓa iṣuḍ-d arriḥ n ljanub, aḏ tinim aḏ yiȓi ȓeḥmu aṭṭas, uca ḏ manaya iy ɣa iȓin.
56 A lmunafiqin! Lḥala n ujenna ḏ ṯmurṯ ṯessnem at tcarrḥem. Mayemmi war ṯzemmrem aḏ tcarrḥem zman-a ḏi neǧa?
Meṣȓaḥem akeḏ yiwḏan