Siḏna Ƹisa issawaȓ x ttuba
13
1 Ḏi nhar nni usin-d can yiwḏan, xebbaren Ƹisa belli wami ijaliliyen ɣarṣen i ḏbiḥaṯ nsen, yusa-d lḥakem ḏ arumani Bilaṭus inɣi-ṯen, uca iḏammen nsen xellṭen akeḏ iḏammen n ḏbiḥaṯ nsen.
2 Yarra xasen Ƹisa, inna-asen: "Ma ṯḥesbem ȓmuƹṣiyaṯ n ijaliliyen nni ktar zi ȓmuƹṣiyaṯ n marra ijaliliyen minzi ṯehwa-d xasen ȓmuṣiba-ya?
3 Aḏawem iniɣ, lla. Meȓa war tubem, marra iḏwem aḏ temmṯem amecnaw niṯni.
4 Ƹaweḏ, ṯmenṭac nni iy xef d tewḍa ṣṣumƹeṯ ḏi Silwam ṯenɣi-ṯen, ma tɣir-awem belli ggin dnub ktar zi marra iwḏan izeddɣen ḏi Lquds?
5 Aḏawem iniɣ, lla. Meȓa war tubem, marra iḏwem aḏ temmṯem amecnaw niṯni."
Ȓmaƹna n ṯcejjarṯ n ṯazarṯ war itirwen
6 Issiweȓ s ȓmaƹna-ya: "Ij n uryaz ɣares ṯacejjarṯ n ṯazarṯ ṯeẓẓu ḏi ȓƹarṣeṯ nnes, yusa-d azzayes ikkes ṯazarṯ war ḏayes yufi walu.
7 Inna-as i ufeǧaḥ: Ṯeȓt snin nec taseɣ-d ɣar ṯcejjarṯ-a ḥima aḏ kkseɣ ṯazarṯ war ḏayes tifeɣ walu. Qess-it! Mayemmi t ɣa nejj aḏ tḍeyyeƹ ṯamurṯ?
8 Inna-as ufeǧaḥ: A siḏi, ejj-it ȓƹam-a waha, ḥima at neqceɣ aḏas ggeɣ ȓeɣbar.
9 Ya ima aḏ tegg ṯazarṯ ḏeg useggwas iy d yusin, meȓa walu ṣafi at nqess."
Siḏna Ƹisa isgenfa aƹrur i yict n ṯemɣarṯ
10 Ƹisa iseȓmaḏ ḏeg ij n ṯemziḏa n wuḏayen ḏi nhar n ssebṯ n lƹibada.
11 Ḏinni ij n ṯemɣarṯ ḏayes jjen, ṯehȓec ṯmenṭac iseggwusa zeg wami. Ṯeqwes, war ṯzemmer aḏ tbedd nican.
12 Wami t iẓra Ƹisa iȓaɣa-d xas, inna-as: "A ṯamɣarṯ, ṯenfekkeḏ zi ȓehȓac nnem."
13 Isers xas ifassen nnes, u ḏi ȓweqṯ nni ṯbedd nican, ṯeƹḍem Arebbi.
14 Uca arrayes n ṯemziḏa nni iƹeṣṣeb akeḏ Ƹisa minzi isgenfa ṯamɣarṯ nni ḏi nhar n lƹibada. Uca inna-asen i yiwḏan: "Arebbi yuca sett-iyyam n ȓxeḏmeṯ, ḏaysen iy d ɣa tasem aḏ tgenfim, war iǧi bu ḏi nhar n lƹibada."
15 Inna-as Siḏiṯneɣ: "A lmunafiqin, ma war ṯḍeǧqem ḏi nhar n lƹibada ifunasen ḏ iɣyaȓ nwem zi ȓkuri ḥima aṯen ṯsesswem?
16 Ṯamɣarṯ-a zi ddurriṯ n Brahim, icedd-it Cciṭan ṯmenṭac iseggwusa, ma aḏas nerxu ḏi nhar n lƹibada, niɣ lla?"
17 Wami inna awaȓ-a, marra yinni akis itmenɣan seḏḥan, maca marra ȓɣaci ifareḥ zi ȓexḏayem ṯimeqqranin iy itegg.
Siḏna Ƹisa issawaȓ x ȓmulk n Arebbi
18 Inna Ƹisa: "Min ḏi itcebbah ȓmulk n Arebbi? S minzi ɣa ṯ cebbheɣ?
19 Ȓmulk n Arebbi amecnaw ij n zzarriƹeṯ n ij n nnuƹ n arbiƹ qqaren-as bugarḏar. Iysi-t ij n uṯarras iẓẓu-t ḏi ȓƹarṣeṯ nnes. Ṯemɣar, ṯeḏweȓ ḏ ṯacejjarṯ ṯameqqrant, ijḍaḍ teggen ḏayes ȓaƹwac."
20 Inna ƹaweḏ: "S minzi ɣa cebbheɣ ȓmulk n Arebbi?
21 Netta amecnaw antun ṯeysi-ṯ ij n ṯemɣarṯ ṯeggwi-ṯ ḏi ȓmud n waren aȓ wami antun nni isgaƹƹeḏ-iṯ marra."
Ṯawwarṯ n ṯuḏarṯ
22 Ikka x ṯneddam ḏ ȓedcur, iseȓmaḏ iggur ɣar Lquds.
23 Isseqsa-ṯ ij n uryaz: "A Siḏi, ma ḏrus iy ɣa iraḥen aȓ ṯuḏarṯ n ȓebda?"
Ijaweb-iṯ Ƹisa:
24 "Ggem mamc ɣa ṯaḏfem zi ṯewwarṯ iḥṣaren. Aḏawem iniɣ: Aṭṭas n yiwḏan aḏ rzun ḥima aḏ aḏfen maca war zemmren.
25 Xmi ɣa ikkar bab n ṯeddarṯ aḏ ibelleƹ ṯawwarṯ, meȓa ṯeqqimem ɣar barra ṯesqerqubem ḏi ṯewwarṯ ṯeqqarem: A siḏi, rzem-aneɣ! Aḏawem yini: War ssineɣ zi manis kenniw!
26 Ȓxeddnnit aḏ tebḏam aḏ tinim: Necca neswa akic, ṯesȓemḏeḏ-aneɣ ḏi mani nzeddeɣ!
27 Aḏawem yini: War ssineɣ ca zi manis kenniw. Beƹƹḏem xafi a yinni iteggen ccerr!
28 Aȓ ḏinni iȓin imeṭṭawen ḏ uɣeẓẓaẓ n ṯeɣmas, xmi ɣa ṯeẓrem Brahim ḏ Isḥaq ḏ Yaƹqub ḏ marra lʼanbiya ḏi ȓmulk n Arebbi, maca kenniw uzzȓen xawem ɣar barra!
29 Aḏ d asen yiwḏan zi ccarq ḏ ȓɣarb, zi ccamal ḏ ljanub, aḏ qqimen ɣar missa ḏi ȓmulk n Arebbi.
30 Ineggura aḏ iȓin ḏ imezwura, ḏ imezwura aḏ iȓin ḏ ineggura."
Siḏna Ƹisa ixeyyeq x ṯendint n Lquds
31 Ḏi nhar nni qarrben ȓebƹaḍ zi ȓḥizeb n ifarrisiyen ɣar Ƹisa, nnan-as: "Ruḥ ssa, minzi Hirudus ixes ac ineɣ!"
32 Inna-asen: "Ruḥem inim-as i ucƹeb nni: Aqa sufuɣeɣ jnun, sgenfiɣ iwḏan nhara ḏ ṯiwecca. Ḏi nhar wis ṯȓaṯa aḏ kemmȓeɣ.
33 Maca ixeṣṣa aḏ uyureɣ nhara ḏ ṯiwecca ḏ farwecca, minzi war izemmer aḏ immeṯ can nnabi illa ḏi Lquds.
34 Ya Lquds, ya Lquds! Cem ig ineqqen lʼanbiya, ṯrejjmeḏ yinni ɣarem d issekk Arebbi! Mecḥaȓ n ṯwaȓaṯin xseɣ aḏ smuneɣ ṯarwa nnem amecnaw ṯyaziṭ xmi ṯḥebbeḍ x ifiǧusen nnes, maca kenniw war ṯxisem.
35 Ṯaddarṯ nwem aḏ texȓa! Aḏawem iniɣ belli war ḏayi ṯeẓrem ḥetta nhar iy ɣa ṯinim: Ssaƹḏ n wenni iy d yusin s lʼiḏen n Siḏi Arebbi."