Siḏna Ƹisa isgenfa ij n uryaz ihȓec ḏayes ṯuffet
14
1 Ij n nhar n ssebṯ n lƹibada, yuḏef Ƹisa ṯaddarṯ n ijjen zeg imeqqranen n ȓḥizeb n ifarrisiyen ḥima aḏ icc aɣrum, uca tlaḥaḍen xas.
2 Dinni zzaṯes ij n uryaz ihȓec, ḏayes ṯuffet.
3 Inna Ƹisa i yinni itcerraḥen ccariƹa ḏ yinni zi ȓḥizeb n ifarrisiyen: "Ma ḥalal aḏ twasgenfan iwḏan ḏi nhar n lƹibada, niɣ lla?"
4 Sqaren. Uca Ƹisa isqarreb-iṯ-id ɣares, isgenfa-ṯ, inna-as ruḥ.
5 Inna-asen: "Manwen zzaywem meȓa iwḍa mmis niɣ uyenduz nnes ḏeg wanu ḏi nhar n lƹibada war ṯ-iḏ isiȓi ca ḏeɣya?"
6 Ugin aṯ jawben x manaya.
Ȓmaƹna n inewjiwen
7 Ƹisa itwaȓa yinni itwaƹerḍen ḏinni ixḍaren imucan imezwura ɣar missa, issiweȓ akiḏsen s ij n ȓmaƹna:
8 "Meȓa iƹreḍ-ic can ijjen ɣar ij n ȓfarḥ, war tɣima ca ḏeg umcan amezwaru. Imken ƹerḍen can ijjen ɣares lqima ktar zzayek,
9 aḏ d yas wenni iy xawem iƹerḍen, aḏac yini: Uc-as amcan nnec i wa! Ȓxeddnnit aḏ tseḏḥiḏ, aḏ traḥeḏ ɣar umcan aneggar.
10 Maca meȓa ƹerḍen xak, ruḥ qqim ḏeg umcan aneggaru. Meȓa yusa-d wenni iy c iƹerḍen, aḏac yini: Ay ameddukeȓ, gaƹƹeḏ ḏiha. Ȓxeddnnit aḏ temɣareḏ ɣar marra yinni itwaƹerḍen.
11 Ȓaḥeqqac wenni isemɣaren ixef nnes aḏ imzi. Wenni isemzayen ixef nnes aḏ imɣar."
12 Uca inna Ƹisa i wenni iy ṯ iƹerḍen: "Meȓa ṯeggiḏ amecri niɣ amensi, war ƹerreḍ ca x imeddukaȓ nnec niɣ ayṯmac, niɣ familya nnec niɣ ḏ jjiran iǧan ḏ twajar, minzi meȓa ƹerḍen-c uȓa ḏ niṯni, war ɣarek bu lʼajar x manaya.
13 Meȓa ṯeggiḏ zarrdeṯ, ƹreḍ x ȓmusakin ḏ inecrufen ḏ izeḥḥafen ḏ iḍarɣaȓen.
14 Ssaƹḏ nnec ƹlaḥeqqac war ɣarsen minzi c ɣa xeǧsen. Aḏac itwaxȓef ḏi nhar xmi d ɣa kkaren yinni iǧan nican zi ȓmewṯ."
Ȓmaƹna n umensi ameqqran
15 Wami ijjen zeg yinni itwaƹerḍen isȓa i wawaȓ nni, inna-as i Ƹisa: "Ssaƹḏ n wenni ɣa iccen aɣrum ḏi ȓmulk n Arebbi!"
16 Inna-as: "Ij n uryaz igga ij n umensi ḏ ameqqran, iƹreḍ x waṭṭas n yiwḏan.
17 Issekk axeddam nnes ḏi ȓweqṯ n umensi, inna i yinni xef iƹreḍ: Araḥem-d, kuȓci iwjeḏ!
18 Marra iḏsen bḏan teggen ssabab ḥima war triḥen. Inna-as umezwaru: Sɣiɣ ij n umarjeƹ, ixeṣṣa-ayi aḏ raḥeɣ aṯ ẓreɣ, samḥ-ayi.
19 Inna-as unneɣnit: Sɣiɣ xemsa n ṯyuya n ifunasen. Ȓexxu aḏ raḥeɣ ḥima aṯen qeǧbeɣ, samḥ-ayi.
20 Inna-as unneɣnit: Uwiɣ ij n ṯemɣarṯ, x manaya war zemmreɣ aḏ d aseɣ.
21 Iḏweȓ-d uxeddam ɣar siḏes iƹaweḏ-as min iweqƹen. Ȓxeddnnit iɣḍeb bab n ṯeddarṯ, inna-as i uxeddam nnes: Ffeɣ ḏeɣya ɣar ccawariƹ ḏ znaqi, siḏef-d ȓmusakin ḏ inecrufen ḏ iḍarɣaȓen ḏ izeḥḥafen.
22 Inna-as uxeddam: Ggiɣ min ḏayi ṯenniḏ, a siḏi, maca imucan ƹaḏ qqimen xwan.
23 Inna-as siḏes: Ffeɣ ɣar ibriḏen ḏ imesruqen, siḏef-d iwḏan zeyyer xasen ḥima aḏ aḏfen ḥima aḏ tƹemmar ṯeddarṯ inu.
24 Aḏawem iniɣ: War itqisi amensi inu uȓa ḏ ijjen zeg yiwḏan nni xef ƹerḍeɣ!"
Ameḥḍar itxeṣṣa aḏ iḍeḥḥa s yixef nnes
25 Ḏinni aṭṭas n ȓɣaci gguren akeḏ Ƹisa, ineqȓeb-d ɣarsen, inna-asen:
26 "Meȓa can ijjen yusa-d ɣari bȓa aḏ iƹiff babas ḏ yemmas ḏ ṯemɣarṯ nnes ḏ ṯarwa nnes ḏ ayṯmas ḏ swiṯmas, u ḥetta ḏ ixef nnes, war izemmer aḏ yiȓi ḏ ameḥḍar inu.
27 Wenni irezzun aḏayi iḏfar, maca itagi aḏ iysi ṣṣalib nnes mix ɣa iƹeddeb, war izemmer aḏ yiȓi ḏ ameḥḍar inu.
28 Meȓa can ijjen zzaywem ixes aḏ ibna can ṣṣumƹeṯ, ḏ amezwaru itxeṣṣa aḏ igg ȓeḥsab mecḥaȓ minzi ɣa ṯenqam ḥima aḏ ixzar ma at ikemmeȓ niɣ lla.
29 Maci aḏ igg dsas war izemmer at ikemmeȓ. Uca aḏ bḏan axas ḍeḥcen marra yinni ḏayes ixezzaren.
30 Aḏ inin: Aryaz-a ibḏa ibenna maca war izemmer aḏ ikemmeȓ.
31 Azeǧiḏ, meȓa iruḥ aḏ igg ȓḥarb akeḏ ij n uzeǧiḏ nneɣnit, aḏ ixemmem ma aḏ irbeḥ s ƹecra aȓef n ȓƹaskar ȓƹaḏu nnes mi ɣar iǧa ƹicrin aȓef.
32 Meȓa war izemmer, aḏas issekk nnuyab nnes maḥend ƹaḏ iggwej azzayes ttaren mamc ɣa ƹeḏȓen jarasen.
33 Iƹni, war izemmer uȓa ḏ ijjen zzaywem aḏ yiȓi ḏ ameḥḍar inu, illa meȓa ismeḥ ḏi marra min ɣares.