Ȓmaƹna n yinni iḏewȓen ɣar ubriḏ
15
1 Marra yinni ijemmƹen ḍḍariba ḏ yinni iƹṣan qarrben ɣar Ƹisa ḥima aḏas sȓen.
2 Ȓḥizeb n ifarrisiyen ḏ imseȓmaḏen n ccariƹa ssawaȓen ḏayes x manaya, nnan: "Aryaz-a itreḥḥab s yinni iƹṣan, itett akisen!"
3 Uca issiweȓ akiḏsen s ȓmaƹna-ya:
4 "Meȓa ijjen zzaywem ɣares miyya n iḥuȓiyen, uca iweddar-as ijjen zzaysen, aḏ ijj tesƹa u tesƹin ḏi ȓexȓa aḏ iraḥ aḏ irzu x wenni iweddaren aȓ ṯ ɣa yaf.
5 Xmi ṯ ɣa yaf aṯ iysi x uɣiȓ nnes ifareḥ.
6 Aḏ iḏweȓ ɣar ṯeddarṯ nnes, aḏ d iȓaɣa x imeddukaȓ nnes ḏ jjiran nnes aḏasen yini: Farḥem akiḏi, minzi ufiɣ aḥuȓi inu iy tuɣa iweddaren!
7 Aḏawem iniɣ: Aḏ farḥen ḏeg ujenna aṭṭas x yijjen iy ɣa iḏewȓen ɣar ubriḏ ktar zi min ɣa farḥen x tesƹa u tesƹin nni war ffiɣen ca abriḏ.
8 Niɣ, meȓa can ṯemɣarṯ ɣares ƹecra n dinar uca iweddar-as ij n dinar, aḏ tesreɣ ȓqendiȓ, aḏ tsekk ṯaddarṯ, aḏ terzu aṭṭas x dinar nni aȓ ṯ ɣa ṯaf.
9 Xmi ṯ ɣa ṯaf, aḏ tȓaɣa x ṯmeddukaȓ nnes ḏ ṯajjarin nnes aḏasent ṯini: Farḥent akiḏi minzi ufiɣ dinar iy tuɣa iweddaren!
10 Aḏawem iniɣ: Ammu, ijjen meȓa iƹeṣṣa uca itub, farḥent xas lmalaʼikaṯ n Arebbi."
Ȓmaƹna n uḥenjir iǧan ḏ amfelles
11 Ƹisa inna ƹaweḏ: "Ij n uryaz ɣares ṯnayen n iḥenjiren.
12 Inna wenni amezyan i babas: A baba, uc-ayi ȓwarṯ inu. Uca ifreq-asen agȓa nni.
13 Umbaƹd cwit n wussan, ismun uḥenjir nni amezyan marra min ɣares, iruḥ ɣar ij n ṯmurṯ ṯeggwej, iḍeyyeƹ ḏinni tmenyaṯ nnes ḏi teflayes.
14 Wami iḍeyyeƹ marra agȓa nnes, iwqeƹ ḏi ṯmurṯ nni ij n jjuƹ ḏ ameqqran, iḏweȓ war ɣares ca.
15 Uca ibḏa ixeddem ɣar ij n uryaz zi ṯmurṯ nni. Issekk-iṯ ḥima aḏ irwes iȓfan ḏeg imarjeƹiwen nnes.
16 Ḏayes imezri aḏ ijjawen s iqaccwen n ṯsȓiɣwa iy tetten yiȓfan, maca war ṯ iƹṯiq uȓa ḏ ijjen.
17 Ixemmem ḏeg yixef nnes, inna: Mecḥaȓ ixeddamen ɣar baba itceṭṭa xasen uɣrum. Nec tmettiɣ ḏa s jjuƹ.
18 Aḏ kkareɣ aḏ ḏewȓeɣ ɣar baba aḏas iniɣ: A baba, ƹṣiɣ Siḏi Arebbi, ƹṣiɣ cek.
19 Ȓexxu war sḏihǧeɣ aḏ iȓiɣ ḏ mmic, egg-ayi amecnaw axeddam nnec.
20 Ikkar iruḥ ɣar babas. Iẓri-ṯ babas zi ȓaggwaj, iqqes-as, yuzzeȓ ɣares iḏerreƹ-as, iseǧem-iṯ.
21 Inna-as mmis: A baba, ƹṣiɣ Siḏ Arebbi, ƹṣiɣ cek. War sḏihǧeɣ aḏ iȓiɣ ƹaḏ ḏ mmic.
22 Inna babas i ixeddamen nnes: Ḏeɣya! Awim-d čammiȓ aṣebḥan, rḍem-as-ṯ, ggem-as ṯxaṯent ḏeg ufus nnes ḏ ṯsiȓa ḏeg iḍaren nnes.
23 Awim-d ayenduz iṣeḥḥen ɣarṣem-as. A necc a nfareḥ,
24 minzi mmi tuɣa immuṯ ȓexxu iddar. Tuɣa iweddar ȓexxu itwaf. Uca farḥen.
25 Mmis ameqqran iǧa ḏeg umarjeƹ. Wami d iḏweȓ, iqarreb-d ɣar ṯeddarṯ isȓa i lmusiqa ḏ cḍiḥ.
26 Iȓaɣa-d x yijjen zeg ixeddamen isseqsa-ṯ: Min iweqƹen?
27 Inna-as: Yusa-d umac. Ȓexxu babac iɣareṣ i uyenduz iseḥḥen ȓaḥeqqac ireḥḥeb zeg wumac wami d iḏweȓ s buḥbeȓ nnes.
28 Iɣḍeb, war ixis aḏ yaḏef. Iffeɣ-d ɣares babas iterɣab-iṯ aḏ yaḏef.
29 Inna-as i babas: Xeḏmeɣ akiḏec marra iseggwusa-ya, ȓebda tṭaƹaɣ-ac. Ƹemmarṣ war ḏayi ṯuciḏ uȓa ḏ iɣiyḏ ḥima aḏ farḥeɣ akeḏ imeddukaȓ inu.
30 Wami d yusa mmic-a ig iqarḍen agȓa nnec ḏi lfasdaṯ, ṯɣarṣeḏ-as i uyenduz iṣeḥḥen!
31 Inna-as babas: A mmi, cek aqa-cek akiḏi ȓebda, marra min ɣari nnec.
32 Maca ixeṣṣa-aneɣ a nfareḥ a nezhu aṭṭas, minzi umac tuɣa immuṯ ȓexxu iddar. Tuɣa iweddar ȓexxu itwaf."