Ȓmaƹna n uweqqaf ḏi iǧa lḥila
16
1 Inna ƹaweḏ i imeḥḍaren nnes: "Ij n uryaz ḏ ttajar, ɣares aweqqaf, maca arrin xas ȓexbar belli aweqqaf nni iḍeyyeƹ-as tmenyaṯ nnes.
2 Uca iȓaɣa-d xas, inna-as: Min xak tesȓiɣ? Uc-ayi ȓeḥsab iǧan jaraneɣ. Zi nhara aȓ ṯsawent war ṯeqqimeḏ aḏ tiȓiḏ ḏ aweqqaf inu.
3 Inna uweqqaf ḏi nnefs nnes: Min ɣa ggeɣ? Bab n ci aḏayi ikkes lwakala, u nec war ḏayi bu jjehḏ aḏ neqceɣ, aḏ seḏḥiɣ aḏ ttareɣ.
4 Uca inna: Ssneɣ min ɣa ggeɣ. Waxxa ikkes-ayi lwakala, azzayi reḥḥben yiwḏan ɣar ṯuḏrin nsen.
5 Uca iȓaɣa-d i mkuȓ ijjen umi itars bab n ci, inna i umezwaru: Mecḥaȓ ḏac itars bab n ci inu?
6 Inna-as: Miyya n ṯbarmiȓin n zzect. Uca inna-as: Ysi-d ȓciɣeḏ kis ṯeggiḏ, qqim ari ḏeɣya xemsin!
7 Ƹaweḏ inna i unneɣnit: Y cek, mecḥaȓ ḏac itars? Inna-as: Miyya n iqenḍaren n yirḏan. Inna-as uweqqaf: Ysi-d ȓciɣeḏ kis ṯeggiḏ, ari ṯmanin!
8 Uca bab n ci ickar aweqqaf nnes ḏi iǧa lḥila x ȓefṭaneṯ nnes. Minzi ṯarwa n zman-a ḏaysen ȓefṭaneṯ jarasen ktar zi ṯarwa n nnur.
9 Ȓexxu nec aḏawem iniɣ: Ggem imeddukaȓ zi ȓewsex n ddunect-a. Xmi ɣa iqḍa, aḏ twaqebȓem ḏi ṯuḏrin n ȓebda.
10 Wenni ḏi iǧa ȓaman x ḏrus, ḏayes ȓaman x waṭṭas. Wenni war ḏi iǧi ȓaman x ḏrus, war ḏayes bu ȓaman x waṭṭas.
11 Meȓa war ḏaywem bu ȓaman x ȓewsex n ddunect-a, wi ḏaywem ɣa iggen ȓaman x tmesȓayin n ȓḥaqq?
12 Meȓa war ḏaywem bu ȓaman x min war iǧin bu nwem, wi ḏaywem ɣa yucen min iǧan nwem?
13 War izemmer can ijjen aḏ yiȓi ḏ axeddam ɣar ṯnayen n siyaḏes, minzi ima aṯ iƹiff ijjen, unneɣnit aṯ ixes. Niɣ aḏ irseq ḏeg ijjen, unneɣnit aṯ iḥeggar. Aḏ txeḏmem i Siḏi Arebbi niɣ i ȓewsex n ddunect, maca war iǧi bu s ṯnayen."
Ccariƹa war tbeddiȓ
14 Ȓḥizeb n ifarrisiyen, u niṯni zeg yinni itexsen tmenyaṯ, wami tesȓan i marra manaya ḍeḥcen xas.
15 Inna-asen Ƹisa: "Kenniw tarram ixef nwem ṯeǧam nican zzaṯ i yiwḏan, maca Arebbi issen min iǧan ḏeg wuȓ nwem. Min itarran bnaḏem ɣares lqima, netta ḏ aƹeffan aṭṭas ɣar Arebbi.
16 Ccariƹa n Musa ḏ useȓmaḏ n lʼanbiya ǧan aȓ wami d yusa Yaḥya. Zi ȓweqṯ n Yaḥya bḏan tbeccaren s ȓmulk n Arebbi, kuȓ ijjen ibḏa itemḏeḥḥas mamc ɣa yaḏef.
17 Maca isheȓ aḏ ikkes ujenna ḏ ṯmurṯ, war ṯzemmer aḏ tekkes ij n ṯneqqiṭ zi ccariƹa.
18 Marra wenni ɣa iǧfen i ṯemɣarṯ nnes, yiwi can icten nneɣnit, izna. U marra wenni ɣa imeȓcen ak ṯenni iǧfen, izna."
Ttajar ḏ ȓmeskin umi qqaren Liƹazar
19 Uca inna Ƹisa: "Ij n uryaz ḏ ttajar itareḍ arruḍ iɣȓan, mkuȓ nhar itƹic ḏi niƹmeṯ, izehhu.
20 Ƹaweḏ ij n ȓmeskin qqaren-as Liƹazar, ḏayes aṭṭas n ṯḥebba, itmenḍar ɣar ṯewwarṯ n uryaz iǧan ḏ ttajar.
21 Itcehha aḏ icc min iweṭṭan zi missa n ttajar. Ƹaḏ ktar iqzinen tasen-d ȓessḥen-as ṯiḥebba nnes.
22 Immuṯ ȓmeskin nni, ysint-ṯ lmalaʼikaṯ sersent-ṯ x ifadden n Brahim. Ƹaweḏ immuṯ ttajar nḍȓen-ṯ.
23 Isiȓi ttajar ṯiṭṭawin nnes u netta itƹeddab ḏi Ljaḥim, iẓra Brahim zi ȓaggwaj ḏ Liƹazar akiḏes.
24 Iȓaɣa-ṯ, inna: Rḥem-ayi, a baba Brahim, sekk Liƹazar ḥima aḏ isuff ij n ṯicceṭ n uḍaḍ n ufus zeg waman, azzayes semḍeɣ iȓes inu, minzi tƹeddabeɣ ḏi ṯmessi-ya.
25 Inna-as Brahim: Ƹqeȓ, a mmi inu, cek ṯeysiḏ ȓḥaqq nnec zi ȓxir ḏi ṯuḏarṯ nnec, Liƹazar iƹic ḏi ȓƹaddab. Ȓexxu netta aqa-ṯ ḏa mliḥ u cek aqa-cek ḏi ȓƹaddab.
26 Ktar i marra manaya, jaraneɣ ḏinni ij n ȓaǧeɣ yuǧeɣ. Meȓa can ijjen ssa ixes aɣarwem d iƹḏu war izemmer. Niɣ meȓa ixes can ijjen ssenni aɣarneɣ d iƹḏu war izemmer.
27 Inna ttajar: X manaya, tettareɣ zzayek a baba Brahim, aḏ tessekkeḏ Liƹazar ɣar ṯeddarṯ n baba.
28 Minzi ɣari xemsa n ayṯma xseɣ aṯen iƹȓem ḥima uȓa ḏ niṯni war tƹeddiben ca ḏeg umcan-a.
29 Inna-as Brahim: Ɣarsen Musa ḏ lʼanbiya nneɣnit ixeṣṣa aḏasen sȓen.
30 Inna-as ttajar: Lla, a baba Brahim! Meȓa iruḥ ɣarsen can ijjen zeg yinni immuṯen, aḏ tuben.
31 Inna-as Brahim: Meȓa niṯni war tesȓin i Musa ḏ lʼanbiya, waxxa ikkar-d can ijjen zi ȓmewṯ war ṯ timnen."