Lʼiman ḏ ȓmuƹṣiyeṯ
17
1 Inna Ƹisa i imeḥḍaren nnes: "Ȓebda tewqiƹent ṯmesȓayin zi ɣa wḍan yiwḏan ḏi ȓmuƹṣiyeṯ, maca ya ȓefḍiḥeṯ n bnaḏem itiȓi ḏ ȓesbab n bnaḏem nniḍen iweṭṭan ḏi ȓmuƹṣiyeṯ.
2 Meȓa cedden ij n uzru n ṯsirṯ ɣar yiri nnes nḍaren-ṯ ḏi ȓebḥar, ḥsen zi meȓa yiwi ijjen zeg imezyanen-a ɣar ȓmuƹṣiyeṯ.
3 Ḥḍam ixef nwem. Meȓa ixḍa akic umac nha-ṯ. Meȓa itub samḥ-as.
4 Meȓa ixḍa akic sebƹa n ṯwaȓaṯin ḏi nhar, uca iḏweȓ-d ɣarek sebƹa n ṯwaȓaṯin iqqar-ac nec tubeɣ, samḥ-as."
5 Nnan arrusul i Siḏiṯneɣ: "Rni ḏayneɣ lʼiman."
6 Inna Siḏiṯneɣ: "Mȓi ḏaywem lʼiman ɣir anict ij n ṯḥebbuct n bugarḏar, iȓi ṯennim i ṯcejjarṯ-a n ttuṯ: Qȓeƹ-d ixef nnem s izewran ruḥ ẓẓu ixef nnem ḏi ȓebḥar, aḏawem ṯegg array."
Semzyem ixef nwem
7 "Meȓa can ijjen zzaywem ɣares axeddam itfeǧaḥ niɣ itrass iḥuȓiyen, uca iƹqeb-d zeg umarjeƹ, ma aḏas ṯiniḏ: Qqim ḏeɣya aḏ tecceḏ? Lla.
8 Aḏas ṯiniḏ: Sewjeḏ-ayi min ɣa cceɣ. Geffeḍ, sexxar xafi aȓ ɣa cceɣ aḏ sweɣ. Ƹaḏ iy ɣa ṯecceḏ aḏ tesweḏ.
9 Axeddam nni, ma ṯ ṯcekkareḏ meȓa igga-ac array? Lla.
10 Ammu, uȓa ḏ kenniw, meȓa ṯeggim marra minzi ḏawem weṣṣan, inim: Neccin ḏ ixeddamen war nneffeƹ, negga ɣir min ixeṣṣa-aneɣ aṯ negg."
Siḏna Ƹisa isgenfa ƹecra n imehȓac ḏaysen jḏam
11 Wami iggur ɣar Lquds, ikka x Samarya ḏ Ljalil.
12 Yuḏef ɣar ij n dcar meȓqen akis ƹecra n iryazen ḏaysen jḏam. Bedden ɣar ȓaggwaj
13 tȓaɣan-as s jjehḏ, nnan: "A Ƹisa, a lmuƹallim, rḥem-aneɣ!"
14 Ixzar ḏaysen inna-asen: "Ruḥem ɣar ȓefquha ṯseḍharem-asen ixef nwem!" Wami ruḥen, genfan ḏeg ubriḏ.
15 Ijjen zzaysen, wami iẓra belli igenfa, iḏweȓ-d isemɣar Arebbi s jjehḏ.
16 Isejjeḏ ɣar iḍaren n Ƹisa itcekkar-iṯ, u netta zi Samarya.
17 Inna Ƹisa: "Ma war genfan ca s ƹecra iḏsen? Mani ǧan tesƹa nneɣnit?
18 Ma aryaz-a abarrani waha iy d iḏewȓen ḥima aḏ isemɣar Arebbi?"
19 Inna-as: "Kkar, aḏ trewwḥeḏ. Lʼiman nnec isenjem-ic."
Ȓmulk n Arebbi
20 Wami ṯ sseqsan yiwḏan zi ȓḥizeb n ifarrisiyen nnan-as meȓmi d ɣa yas ȓmulk n Arebbi, inna-asen: "War d iḍehhar ȓmulk n Arebbi xmi d ɣa yas.
21 War ḏin ḥad aḏ yini: Xzarem, netta aqa-ṯ ḏa, niɣ aqa-ṯ ḏiha! Minzi ȓmulk n Arebbi aqa-ṯ ḏaywem."
22 Inna i imeḥḍaren nnes: "Aḏ d asen ȓyamaṯ aḏaysen ṯrezzum aḏ teẓrem ijjen nhar zi nhuraṯ n Mmis n bnaḏem, maca war ṯ teẓrem.
23 Aḏawem inin: Netta aqa-ṯ ḏa, niɣ aqa-ṯ ḏiha! Maca war ḏin triḥem, war ṯen teḏfirem.
24 Ḏi nhar iy ḏi d ɣa yas Mmis n bnaḏem aḏ yiȓi amecnaw assam itissiqen ḏi ṭṭarf n ujenna, itegg ṯfawṯ ḏi ṭṭarf nneɣnit.
25 Maca itxeṣṣa amezwaru aḏ itwaƹeddeb aṭṭas, aṯ ƹiffen yiwḏan n ȓweqṯ-a.
26 Amecnaw min iweqƹen ḏi ȓyamaṯ n Nuḥ, ammu iy ɣa iweqƹen ḏi ȓyamaṯ n Mmis n bnaḏem:
27 Iwḏan tetten, sessen, meǧcen iryazen ḏ ṯemɣarin, aȓ nhar iy ḏi yuḏef Nuḥ ḏeg uɣarrabu. Yusa-d ttufan, inɣi-ṯen marra iḏsen.
28 Ƹaweḏ amecnaw min iwqeƹ ḏi ȓyamaṯ n Luṭ: Tuɣa iwḏan tetten, sessen, ssaɣen, znuzan, teẓẓun, bennan.
29 Maca nhar iy ḏi iffeɣ Luṭ zi ṯendint n Sadum isehwa-d xasen Arebbi ṯimessi ḏ izra isecmaḍen zeg ujenna, inɣi-ṯen marra iḏsen.
30 Ammu iy ɣa iweqƹen ḏi nhar iy ḏi d ɣa iḍhar Mmis n bnaḏem.
31 Ḏi nhar nni, wenni iy ɣa yiȓin x ṯzeqqa nnes u ȓeḥwayej aqa-ṯen ḏi ṯeddarṯ, ixeṣṣa war ihekkwi ɣar ṯeddarṯ ḥima aḏ iysi ȓeḥwayej nnes. Ƹaweḏ wenni iǧan ḏeg umarjeƹ, ixeṣṣa war idekkwiȓ ɣar ṯeddarṯ.
32 Fekkarem ḏi min iweqƹen i ṯemɣarṯ n Luṭ!a
33 Wenni irezzun aḏ isenjem ȓaƹmar nnes aṯ ixser, wenni ixesren ȓaƹmar nnes aṯ isenjem.
34 Aḏawem iniɣ: Aḏ yiȓi ḏi ǧiȓeṯ nni ṯnayen ṭṭṣen ḏeg ij n ṯassuṯ, aḏ imeysi ijjen aḏ iqqim unneɣnit.
35 Aḏ iȓint ṯnayen n ṯemɣarin ḥarrint ṯiḥebba ḏi ṯsirṯ, aḏ tmeysi icten aḏ teqqim ṯenneɣnit. [
36 Aḏ iȓin ṯnayen n iryazen ḏeg umarjeƹ, aḏ imeysi ijjen aḏ iqqim unneɣnit."]
37 Sseqsan-ṯ imeḥḍaren: "Mani, a Siḏi?"
Inna-asen: "Mani ɣa iȓin imurḍas, tmunen ḏinni ibaɣeriwen."