Ẓẓaǧeṯ aṭṭas
18
1 Issiweȓ akisen s ij n ȓmaƹna ḥima aḏ ssnen belli itxeṣṣa aḏ ẓẓaǧen ȓebda war tiḥȓen.
2 Inna-asen: "Ḏeg ij n ṯendint ij n ȓqaḍi war iteggweḏ bu Arebbi, war itweqqir bu yiwḏan.
3 Ḏinni ḏi ṯendint nni ij n ṯajjaȓṯ traḥ ɣares, teqqar-as: Uc-ayi-d ȓḥaqq inu x wenni ḏayi iḍeȓmen!
4 Aṭṭas zeg wami itagi aḏ igg min ḏas tettar. Maca umbaƹd i manaya inna ḏi nnefs nnes: Waxxa war teggwḏeɣ Arebbi, war tweqqireɣ bu yiwḏan,
5 ṯajjaȓṯ-a ṯsiḥeȓ-ayi. Aḏas uceɣ ȓḥaqq ḥima war d tis ṯwaȓa nneɣnit aḏayi ṯseddeƹ."
6 Inna-asen Siḏiṯneɣ Ƹisa: "Ṣennṭeṯ i min inna ȓqaḍi-ya iḍeǧmen.
7 Arebbi, ma war ḏasen iticc ȓḥaqq i yiwḏan nnes iy ḏas itettaren ǧiȓeṯ ḏ nhar? Ma xasen iƹeṭṭeȓ war ḏasen istijib?
8 Aḏawem iniɣ: Aḏasen yuc ȓḥaqq ḏeɣya. Innama, Mmis n bnaḏem nhar iy ḏi ɣa d yas, ma aḏ yaf lʼiman ḏi ṯmurṯ?"
Ṯẓaǧiṯ n ṣṣaḥ
9 Issiweȓ s ȓmaƹna-ya akeḏ can yiwḏan tuɣa ḥasben ixef nsen nican, tḥeggaren inneɣnit:
10 "Ij n nhar ruḥen ij n ṯnayen n iryazen ɣar ṯemzida ṯameqqrant n wuḏayen ḥima aḏ ẓẓaǧen. Ijjen zi ȓḥizeb n ifarrisiyen, unneɣnit ijemmeƹ ḍḍariba.
11 Ibedd ufarrisi itẓaǧa ḏi nnefs nnes inna: Ya Arebbi, tcekkareɣ-cek minzi war ǧiɣ am iwḏan nneɣnit iǧan ḏ ixewwanen, ḏ yinni war iǧin bu nican, ḏ yinni izennan, niɣ am wa ig ijemmƹen ḍḍariba!
12 Tẓummiɣ yumayen ḏi ssimana, tƹeccareɣ x marra min ɣari.
13 Maca wenni ijemmƹen ḍḍariba ibedd ɣar ȓaggwaj, war izƹim aḏ iysi ṯiṭṭawin nnes ɣar ujenna. Iccaṯ ḏeg wuȓ nnes, inna: Ya Arebbi, rḥem-ayi minzi ƹṣiɣ!
14 Aḏawem iniɣ: Wenni ijemmƹen ḍḍariba iḏweȓ ɣar ṯeddarṯ nnes iqbeȓ-iṯ Arebbi, maca afarrisi nni lla. Minzi marra wenni isemɣaren ixef nnes itemzi, wenni isemzayen ixef nnes imeqqar."
Siḏna Ƹisa itbarek iḥenjiren imezyanen
15 Uwin-d yiwḏan can iseyman ɣar Ƹisa ḥima aṯen iḥaḏa. Wami ẓrin manaya imeḥḍaren nnes ƹarrḏen-asen.
16 Ƹisa iȓaɣa-d xasen, inna: "Jjem iḥenjiren imezyanen aɣari d asen war ḏasen tƹarraḏem ca, ȓaḥeqqac ȓmulk n Arebbi itiȓi ɣar yinni amecnaw yina.
17 Aqa tesȓam ȓḥaqq: Labud i bnaḏem aḏ yamen ḏi ȓmulk n Arebbi mamc ḏayes itamen uḥenjir amezyan. Meȓa lla, ƹemmarṣ aḏ yaḏef ȓmulk n Arebbi."
Aryaz iǧan ḏ ttajar
18 Isseqsa-ṯ ijjen zi lḥukkam n wuḏayen, inna-as: "A lmuƹallim aṣebḥan, min ɣa ggeɣ ḥima aɣari ṯiȓi ṯuḏarṯ n ȓebda?"
19 Inna-as Ƹisa: "Mayemmi ṯeqqareḏ nec ḏ aṣebḥan? War iǧi ḥad ḏ aṣebḥan minɣir Arebbi waḥḏes.
20 Ṯessneḏ ȓuṣiyaṯ: War zenni, war neqq, war tacar, war cehheḏ bu zur, weqqar babac ḏ yemmac."
21 Inna-as uryaz nni: "Zeg wami ǧiɣ ḏ amezyan tweqqareɣ zi marra manaya."
22 Wami isȓa Ƹisa awaȓ nnes, inna-as: "Ṯeqqim-ac ij n ȓḥajeṯ war t teggiḏ. Zenz marra min ɣarek freq-iṯ x ȓmusakin. Uca aɣarek yiȓi ȓkenz ḏeg ujenna, as-d aḏayi ṯedfareḏ."
23 Wami isȓa manaya ixeyyeq aṭṭas minzi netta iǧa ḏ ttajar.
24 Wami ṯ iẓra Ƹisa belli ixeyyeq, inna: "Mecḥaȓ iqseḥ x twajar ḥima aḏ aḏfen ȓmulk n Arebbi.
25 Qbeȓ iy ɣa yaḏef ij n ttajar ɣar ȓmulk n Arebbi, qa aḏ yaḏef ij n uȓɣem zi ṯiṭṭ n ṯsinefṯ!"
26 Nnan yinni tuɣa itsȓan: "Xyar, ug izemmren aḏ injem!?"
27 Ijaweb-iṯen Ƹisa: "Min war ḏas zemmren yiwḏan, aḏas izmer Arebbi."
28 Inna-as Buṭrus: "Aqa neccin nesmeḥ ḏi kuȓci neḏfar-icek!"
29 Ijaweb-iṯ Ƹisa: "Aqa tesȓam ȓḥaqq: Wen ɣa isemḥen ḏi ṯeddarṯ nnes niɣ ḏi ṯemɣarṯ nnes niɣ ḏi ayṯmas niɣ ḏi babas ḏ yemmas niɣ ḏi ṯarwa nnes ƹlaḥsab ȓmulk n Arebbi,
30 aɣares ṯiȓi ḏi ddunect-a ktar s waṭṭas. U ḏi ȓweqṯ iy d ɣa yasen aɣares ṯiȓi ṯuḏarṯ n ȓebda."
Siḏna Ƹisa issawaȓ ƹaweḏ x ȓmewṯ nnes
31 Yiwi ṯenƹac nni n imeḥḍaren, inna-asen: "Aqa netgaƹƹeḏ ɣar Lquds, ḏinni iy ɣa ikemmeȓ marra min urin lʼanbiya x Mmis n bnaḏem.
32 Minzi aṯ sellmen i yinni war iǧin ḏ uḏayen, axas ḍeḥcen, aṯ zawaren, axas ssusfen.
33 Aṯ uwṯen s usɣun, aṯ nɣen, ḏi nhar wis ṯeȓt-iyyam aḏ d ikkar zi ȓmewṯ."
34 Imeḥḍaren war fhimen walu zi manaya. Awaȓ-a tuɣa iqseḥ xasen, war ssinen min xef issawaȓ.
Siḏna Ƹisa isgenfa ij uḍarɣaȓ ḏi Ariḥa
35 Wami iqarreb Ƹisa ɣar ṯendint n Ariḥa, ḏinni ij n uḍarɣaȓ iqqim ṭṭarf n ubriḏ itettar.
36 Wami isȓa i ȓɣaci ƹeddun, isseqsa-ṯen min iweqƹen?
37 Nnan-as Ƹisa naṣiri iy ssa iƹeddun.
38 Uca isɣuyiw, iqqar: "A Ƹisa, mmis n Ayṯ-Dawud, rḥem-ayi!"
39 Zeyyaren xas yinni igguren ḏeg umezwar ḥima aḏ isqar, maca netta iqqim isɣuyiw ƹaḏ s jjehḏ: "A mmis n Ayṯ-Dawud, rḥem-ayi!"
40 Ibedd Ƹisa yumar ḥima aḏas-ṯ-id awin. Wami ɣares d iqarreb isseqsa-ṯ,
41 inna-as: "Min ṯexseḏ aḏac ggeɣ?"
Ijaweb-iṯ: "A Siḏi, xseɣ aḏ twaȓiɣ."