Siḏna Ƹisa ḏi ṯeddarṯ n Zaki
19
1 Yuḏef Ƹisa ɣar ṯendint n Ariḥa iggur ḏayes.
2 Ḏinni ij n uryaz ḏ ttajar zeg imeqqranen n yinni ijemmƹen ḍḍariba qqaren-as Zaki.
3 Irezzu aḏ ixzar min iƹna Ƹisa maca war izemmer, ƹlaḥeqqac ḏinni aṯṭas n ȓɣaci u netta ḏ aquḍaḍ.
4 Yuzzeȓ ɣar zzaṯ, igaƹƹeḏ x ij n ṯcejjarṯ n ṯazarṯ n isemɣan ḏeg ubriḏ nni manis d ɣa ikk Ƹisa ḥima aṯ iẓer.
5 Wami yiweḍ Ƹisa ɣar umcan nni, irfeƹ ṯiṭṭawin nnes iẓri-ṯ, inna-as: "Hwa-d ḏeɣya, a Zaki, itxeṣṣa-ayi nhara aḏ raḥeɣ ɣar ṯeddarṯ nnec."
6 Ihwa-d ḏeɣya uca ireḥḥeb zzayes u ifareḥ.
7 Wami marra ẓrin manaya, tgemgumen nnan: "Yuḏef aḏ iqqim ḏi ṯeddarṯ n ij n uryaz ḏ lƹaṣi?"
8 Ibedd Zaki, inna i Siḏiṯneɣ: "A Siḏi, aḏ uceɣ azyen n wagȓa inu i ȓmusakin. Meȓa cemṯeɣ can ijjen, aḏas rniɣ arbeƹa n ṯseqqar."
9 Uca inna-as Ƹisa: "Nhara ayṯbab n ṯeddarṯ-a nejmen, minzi aṯarras-a uȓa ḏ netta zi ddurriṯ n Brahim.
10 Mmis n bnaḏem yusa-d ḥima aḏ irzu u aḏ isenjem yinni iweddaren."
Ȓmaƹna n ṯraṯa ixeddamen
11 Wami tesȓan i manaya, issiweȓ akiḏsen Ƹisa s ij n ȓmaƹna nneɣnit, ȓaḥeqqac yuḏes ɣar Lquds. Ƹaweḏ tɣir-asen ȓmulk n Arebbi aḏ d iḍhar ȓxeddnnit.
12 Inna: "Ij n uryaz lʼaṣel nnes zeg imeqqranen isafer zi ṯmurṯ nnes ɣar ij n ṯmurṯ ṯeggwej ḥima aḏas ucen tesriḥ aḏ iḏweȓ aȓ ṯmurṯ nnes azzayes iḥkem.
13 Iȓaɣa-d x ƹecra n ixeddamen nnes, yuca i mkuȓ ijjen zzaysen ƹecra n ȓuznaṯ n nnuqarṯ uca inna-asen: Ggem tijara zi tmenyaṯ-a aȓ d ɣa ḏewȓeɣ.
14 Maca ccaƹb nnes ƹiffen-ṯ, seḏfaren-as can nnuyab aȓ mani ɣa iraḥ, nnan: War nxis aryaz-a aḏ yiȓi ḏ azeǧiḏ xaneɣ.
15 Wami iḏweȓ ḏ azeǧiḏ, iƹqeb-d, yumar ḥima aḏas d awin ixeddamen nni umi yuca tmenyaṯ, ḥima aḏ ixzar mecḥaȓ irbeḥ mkuȓ ijjen zzaysen.
16 Yusa-d uxeddam amezwaru inna: A siḏi, ƹecra n ȓuznaṯ n nnuqarṯ nnec ṯerni kuȓ icten ƹecra n ṯwaȓaṯin.
17 Inna-as: Ṯeggiḏ mliḥ, ay axeddam aṣebḥan! Cek ḏayek ȓaman x ṯmesȓact ḏ ṯamezyant, ȓexxu aḏac uceɣ aḏ tḥekmeḏ x ƹecra n ṯneddam.
18 Yusa-d wis ṯnayen inna: A siḏi, ƹecra n ȓuznaṯ n nnuqarṯ nnec ṯerni kuȓ icten xemsa n ṯwaȓaṯin.
19 Inna-as i uxeddam-a ƹaweḏ: Aḏac uceɣ aḏ tḥekmeḏ x xemsa n ṯneddam.
20 Yusa-d wis ṯȓaṯa inna: A siḏi, aqa-c ƹecra n ȓuznaṯ n nnuqarṯ nnec: Ggiɣ-ṯen ḏeg ij n zzif,
21 minzi ggwḏeɣ zzayek, u cek ḏ ij n bnaḏem ṯeqsḥeḏ. Ṯkessiḏ min war ṯesrusiḏ, qa ṯmejjareḏ min war ṯzerƹeḏ.
22 Inna-as: Ƹlaḥsab min ṯenniḏ axak ḥekmeɣ, ay axeddam aƹeffan. Ṯessneḏ belli nec ḏ ij n uryaz qesḥeɣ. Kessiɣ min war srusiɣ, mejjareɣ min war zerrƹeɣ.
23 Mayemmi war ṯejjiḏ tmenyaṯ inu ɣar iṣarrafen, meȓmi ma usiɣ-d aḏ ysiɣ akiḏsent ȓa ḏ ȓefḍeȓ?
24 Inna i yinni ḏinni iǧan: Kksem-as ƹecra n ȓuznaṯ n nnuqarṯ, ucem-as-ṯent i wenni ɣar iǧa miyya n ȓuznaṯ n nnuqarṯ.
25 Nnan-as: Mayemmi, a siḏi? Ɣares miyya n ȓuznaṯ n nnuqarṯ!
26 Inna-asen: Wah, aḏawem iniɣ: Wenni iǧan ɣares itmerni-yas. Wen war ɣar iǧi ca, itmeysi-yas uȓa min ɣares.
27 Maca ȓƹaḏyan inu, yinni tuɣa war ixisen axasen iȓiɣ ḏ azeǧiḏ, awim-ṯen-d ḏa, nɣem-ṯen zzaṯi."
Siḏna Ƹisa itaḏaf x usnus ɣar ṯendint n Lquds
28 Wami inna awaȓ-a, iggur u netta itgaƹƹeḏ ɣar Lquds.
29 Wami iqarreb ɣar dcar n Bayt Faji ḏ Bayt Ƹanya, ɣar uḏrar umi qqaren aḏrar n zzitun, issekk ṯnayen zeg imeḥḍaren nnes,
30 inna-asen: "Ruḥem ɣar dcar iǧan zzaṯwem, xmi ɣa ṯawḍem aȓ ḏinni ṯafem ij n usnus iqqen, war xas inyi uȓa ḏ ijjen qbeȓ, fsim-as awim-ṯ-id.
31 Meȓa isseqsa-kenniw can ijjen inna-awem, mayemmi ḏas-ṯ fsim, inim-as, iḥḏaj-iṯ Siḏiṯneɣ."
32 Ruḥen yinni itwasekken ufin mammec ḏasen inna Ƹisa.
33 Wami fessin i usnus nni, nnan-asen ayṯbab nnes: "Mayemmi ṯfessim i usnus-a?"
34 Nnan-asen: "Iḥḏaj-iṯ Siḏiṯneɣ."
35 Uwin-ṯ-iḏ ɣar Ƹisa, ggin xas izeǧuba nsen senyen xas Ƹisa.
36 Wami iggur, iwḏan ssun-as izeǧuba nsen ḏeg ubriḏ.
37 Wami iqarreb ɣar ṯeksarṯ n ubriḏ zzaṯ i uḏrar n zzitun, bḏan aṭṭas n imeḥḍaren farrḥen, ḥemmḏen Arebbi s jjehḏ x marra lmuƹjizaṯ iy ẓrin.
38 Qqaren: "Ssaƹḏ n uzeǧiḏ iy d yusin s lʼiḏen n Siḏi Arebbi. Ȓehna ḏeg ujenna, lƹaḍama i Arebbi yuƹȓan!"
39 Ȓebƹaḍ zi ȓḥizeb n ifarrisiyen iǧan ḏi ȓɣaci nnan-as: "A lmuƹallim, nha imeḥḍaren nnec."
40 Inna-asen: "Aḏawem iniɣ: Meȓa sqaren niṯni, aḏ sɣuyen yizra."
41 Wami iqarreb ɣar Lquds, ixzar ɣar ṯendint uca itru xas.
42 Inna: "Maƹlik ṯessneḏ uȓa ḏ cem ḏi nhara abriḏ n ȓehna! Maca ȓexxu inuffer x ṯiṭṭawin nnem.
43 Aḏ d tas ij n ȓweqṯ aḏam sennḍen ȓƹaḏyan nnem ij n ufrag, aḏam-d nnḍen, acem zeyyaren zi mkuȓ jjiha.
44 Acem sheḏmen cem ḏ ṯarwa nnem iǧan ɣar ḏaxeȓ nnem. War ḏayem tejjin bu uzru x umas minzi ifqeḏ-icem Arebbi u cem war ṯ tessineḏ."
Siḏna Ƹisa ḏi ṯemziḏa ṯameqqrant n wuḏayen
45 Wami yuḏef ɣar ṯemziḏa ṯameqqrant n wuḏayen, ibḏa itazzeȓ x yinni iznuzan ḏinni.
46 Inna-asen: "Lkitab iqqar: Ṯaddarṯ inu aḏ tiȓi ṯeddarṯ n ṯẓaǧiṯ. Kenniw ṯarrim-teṯ ḏ ifri n ixewwanen."