Ssulṭa n Siḏna Ƹisa
20
1 Ḏeg ij n nhar wami iseȓmaḏ iwḏan ḏi ṯemziḏa ṯameqqrant n wuḏayen, itbeccar-iṯen, usin-d ɣares arruyas n ȓefquha ḏ imseȓmaḏen n ccariƹa ḏ imeqqranen n wuḏayen.
2 Ssiwȓen akis, nnan-as: "Ini-yaneɣ: Man ssulṭa iy zi teggeḏ manaya, niɣ wi ḏac yucin ssulṭa-ya?"
3 Ijaweb-iṯen, inna-asen: "Uȓa ḏ nec akenniw sseqsiɣ. Inim-ayi:
4 Ssulṭa n Yaḥya aḏ iṭehhar s waman, ma zi Arebbi niɣ zeg yiwḏan?"
5 Ssiwȓen jarasen, nnan: "Meȓa nenna-as zi Arebbi, aḏaneɣ yini: Mayemmi war zzayes ṯuminem?
6 Meȓa nenna-as zeg yiwḏan, marra iwḏan aḏaneɣ rejmen minzi tamnen belli Yaḥya ḏ nnabi."
7 Uca nnan-as: "War nessin zi manis d ṯusa."
8 Inna-asen Ƹisa: "Iwa uȓa ḏ nec war ḏawem qqireɣ man ssulṭa iy zi xeddmeɣ."
Ȓmaƹna n ixemmasen iy ḏi iǧa ccerr
9 Ibḏa issawaȓ s ȓmaƹna-ya akeḏ ccaƹb: "Ij n uryaz iẓẓu aḍiȓ ḏeg ij n umarjeƹ nnes, igga ḏayes ixemmasen uca isafer aṭṭas n ȓweqṯ.
10 Wami d yiweḍ ȓweqṯ n uȓqeḍ n uḍiȓ, issekk ij n uxeddam ɣar ixemmasen nni ḥima aḏas d ucen ȓḥaqq nnes zeg uȓqeḍ n umarjeƹ uḍiȓ. Maca ixemmasen uwṯin-ṯ uca ssekken-ṯ-id ixwa.
11 Ƹaweḏ issekk ij n uxeddam nneɣnit, uwṯin-ṯ ƹaweḏ uȓa ḏ netta, ƹedden xas uca ssekken-ṯ-id ixwa.
12 Ƹaweḏ issekk wis ṯȓaṯa. Uȓa ḏ netta jarḥen-ṯ, uzzȓen xas.
13 Inna bab n umarjeƹ uḍiȓ: Min ɣa ggeɣ? Aḏasen ssekkeɣ memmi iƹizzen imken aṯ ggwḏen.
14 Wami ṯ ẓrin ixemmasen, nnan i wayawya: Aqa wenni iy ɣa iwarṯen! Aṯ nneɣ, aḏ iḏweȓ umarjeƹ uḍiȓ nneɣ!
15 Nḍaren-ṯ barra i umarjeƹ uḍiȓ nɣin-ṯ. Iwa, min ɣa igg bab n umarjeƹ uḍiȓ i ixemmasen nni?
16 Aḏ d yas aṯen ineɣ marra, aḏ yuc marjeƹ uḍiȓ nni i inneɣnit."
Wami sȓin i manaya, nnan: "Allah ister!"
17 Ixzar ɣarsen inna: "Min ixes aḏ yini wawaȓ-a yurin ḏi lkitab?
Azru iy ƹiffen ibennayen,
aḏ yiȓi ḏeg umcan aṣebḥan ḏi ṯɣemmarṯ n dsas.
18 Wenni ɣa iwḍan x uzru-ya aḏ irrez. Wenni xef ɣa iwḍa uzru wa aḏ irbeẓ."
19 Ḏi ȓweqṯ nni imseȓmaḏen n ccariƹa ḏ arruyas n ȓefquha rezzun aṯ ṭṭfen, minzi ssnen belli issiweȓ s ȓmaƹna-ya xasen, maca ggwḏen zeg yiwḏan.
Ḍḍariba n Qayṣar
20 Imseȓmaḏen n ccariƹa ḏ arruyas n ȓefquha ḥeṭṭan-ṯ. Ssekken-as can yiwḏan sneƹmiȓen ǧan nican maca niṯni ḏ ibergagen. Rzun aṯ ṭṭfen x can wawaȓ nnes, ḥima aṯ sellmen i lḥakem ḏ ssulṭa nnes.
21 Sseqsan-ṯ, nnan: "Nessen, a lmuƹallim, belli ṯeqqareḏ ȓḥaqq, ṯseȓmaḏeḏ s ȓḥaqq. War teggeḏ bu uḏemawen, ṯseȓmaḏeḏ s ȓḥaqq mammec ixes Arebbi a nƹic.
22 Ṯsemmeḥ ccariƹa nneɣ a nxeǧes ḍḍariba i uzeǧiḏ Qayṣar, niɣ lla?"
23 Issen Ƹisa ȓexḏaƹ nsen, inna-asen:
24 "Awim-d ij n ṯpeyyast n nnuqarṯ. Uw t yiȓan tteṣwirṯ-a ḏ yisem-a iy ḏayes?"
Nnan-as: "Qa n Qayṣar."
25 Inna-asen Ƹisa: "Ucem-as i Qayṣar min iǧan n Qayṣar. Ucem-as i Arebbi min iǧan n Arebbi."
26 War zemmren niṯni aḏ cemṯen Ƹisa zi can wawaȓ iy ɣa yini zzaṯ i ccaƹb. Tƹejjben ḏeg ujawab nnes uca sqaren.
Siḏna Ƹisa itbeccar x ṯuḏarṯ n ȓebda
27 Usin-d ɣar Ƹisa can yiwḏan zi ȓḥizeb n iṣadduqiyen (niṯni qqaren belli iwḏan war d tnekkiren zi ȓmewṯ), sseqsan-ṯ,
28 nnan-as: "A Siḏi, yura-aneɣ Musa belli meȓa can uryaz immuṯ, ijja ṯamɣarṯ maca war d ijji bu ṯarwa, at yawi uȓwes nnes. Akis d ijj ṯarwa i wumas immuṯen.
29 Tuɣa ḏin sebƹa n wawmaṯen, imȓec umezwaru, immuṯ war d ijji bu ṯarwa.
30 Yiwi-t wis ṯnayen,
31 ḏ wis ṯȓaṯa, aȓ wis sebƹa. Mmuṯen, war kis d jjin bu ddurriṯ.
32 Aȓ uneggar uȓa ḏ ṯamɣarṯ ṯemmuṯ.
33 Xmi d ɣa kkaren yinni immuṯen, umi ɣa ṯiȓi ṯemɣarṯ nni? Ȓaḥeqqac ḏ ṯamɣarṯ nsen s sebƹa."
34 Inna-asen Ƹisa: "Ṯarwa n ddunect-a meǧcen, iryazen ḏ ṯemɣarin.
35 Maca yinni iḥaseb-iṯen Arebbi aɣarsen ṯiȓi ṯuḏarṯ n ȓebda, aḏ d kkaren zi ȓmewṯ, niṯni war meǧcen ca, iryazen ḏ ṯemɣarin.
36 War zemmren aḏ mmṯen, niṯni amecnaw lmalaʼikaṯ. Ƹaweḏ niṯni ḏ ṯarwa n Arebbi minzi kkaren-d zi ȓmewṯ.
37 Maca yinni immuṯen aḏ d kkaren zi ȓmewṯ. Uȓa ḏ Musa isbeyyen-d manaya ḏi ȓqiṣa n ṯcejjarṯa wami inna qa Siḏi Arebbi ḏ Arebbi n Brahim ḏ Arebbi n Isḥaq ḏ Arebbi n Yaƹqub.
38 Netta ḏ Arebbi n yinni iddaren maci n yinni immuṯen, minzi marra ddaren ɣares."
39 Nnan can imseȓmaḏen n ccariƹa: "A Siḏi, ṯenniḏ mliḥ!"
40 War izƹim uȓa ḏ ijjen aṯ isseqsa x can iseqsiṯen nneɣnit.
Lmasiḥ netta ḏ Siḏes n Dawud
41 Inna-asen Ƹisa: "Mayemmi qqaren Lmasiḥ netta ḏ mmis n Dawud?
42 Minzi Dawud netta s yixef nnes inna ḏi lkitab n Zzabur:
Inna-as Siḏi Arebbi i Siḏi,
Qqim-d x ufusi inu,
43 aȓ ɣa ggeɣ ȓƹaḏyan nnec
swadday i iḍaren nnec.
44 Mammec ɣa yiȓi Lmasiḥ ḏ mmis d Dawud? Netta Dawud iqqar-as i Lmasiḥ, A Siḏi."
Lmunafiqin
45 Inna-asen i imeḥḍaren nnes u marra ccaƹb tesȓan i manaya:
46 "Ḥḍam ixef nwem zeg imseȓmaḏen n ccariƹa. Texsen aḏ uyuren s iseȓhamen. Texsen axasen seǧmen ḏi ȓeswaq, aḏ qqimen ḏeg imucan imezwura ḏi ṯemziḏawin ḏ ȓefruḥ.
47 Tetten ṯajjaȓin. Seḍharen-d ixef nsen tẓaǧan aṭṭas ḥima aḏ banen. Niṯni aḏ twaḥasben aṭṭas!"