Ṯajjaȓṯ ticc ṣṣaḏaqa ktar zi twajar
21
1 Ixzar Ƹisa uca iẓra belli twajar teggen ṣṣaḏaqa nsen ḏi ṣṣenduq n ṯemziḏa ṯameqqrant n wuḏayen.
2 Ƹaweḏ iẓra ij n ṯajjaȓṯ ḏ ȓmeskina tegg ḏinni ṯnayen iṣuldan.
3 Inna: "Aqa tesȓam ȓḥaqq: Ṯajjaȓṯ-a ḏ ȓmeskina ṯṣeddeq ktar zi kuȓci.
4 Minzi niṯni marra ucin zi min xasen izayḏen ḏ agȓa. Nettaṯ, waxxa ḏ ȓmeskina, ṯuca marra min ṯeƹȓem."
Lƹalamaṯ n ȓfana n ddunect
5 Can yiwḏan ssawaȓen x ṯemziḏa ṯameqqrant qqaren ḏ ṯasebḥant aṭṭas minzi ṯzewweq s uzru aṣebḥan u s ṣṣeḏqeṯ. Inna Ƹisa:
6 "Ṯimesȓayin-a iy twaȓim aḏ d yas ij n nhar war ḏa itɣimi uzru x unneɣnit. Marra aḏ inehḏem."
7 Sseqsan-ṯ, nnan-as: "A lmuƹallim, meȓmi ɣa iwqeƹ manaya? Man lƹalama iqqaren belli manaya ƹȓayen aḏ iwqeƹ?"
8 Inna-asen: "Ḥḍam ixef nwem ḥima war kenniw ixeddeƹ ḥad. Aṭṭas iy d ɣa yasen s yisem inu aḏ inin ḏ nec! Ƹaweḏ aḏawem inin ȓweqṯ ṯiweḍ-d! Maca ixeṣṣa war ṯen teḏfirem.
9 Xmi ɣa ṯesȓem x lḥuȓub ḏ lfitnaṯ war teggwḏem ca. Labuda zi manaya amezwaru, maca ƹaḏ war ṯfenni ddunect."
10 Uca inna-asen: "Ȓgens aḏ ihjem x ȓgens, ḏ lmemlaka x lmemlaka.
11 Aḏ iwqeƹ zzinzal ḏ ameqqran ḏeg waṭṭas n imucan. Aḏ yiȓi jjuƹ ḏ ȓehȓacaṯ ḏ waṭṭas n ṯmesȓayin iseggwaḏen, ḏ lƹalamaṯ ḏ ṯimeqqranin ḏeg ujenna.
12 Qbeȓ i marra manaya, akenniw ṭṭfen, akenniw ƹeddben, akenniw sellmen i ṯemziḏawin n wuḏayen. Akenniw ḥebsen, akenniw jarren ɣar izeǧiḏen ḏ lḥukkam ƹlaḥsab isem inu.
13 Manaya aḏawem ṯiȓi ḏ ij n fursa i chaḏeṯ.
14 War kessiṯ bu umnus mammec ɣa ṯdafƹem x yixef nwem.
15 Aḏawem uceɣ awaȓen ḏ ȓefhameṯ ḥima marra yinni kiḏwem itmenɣan war zmiren axawem arren.
16 Akenniw zzenzen lwalidin nwem ḏ ayṯmaṯwem ḏ ȓeḥbab nwem ḏ imeddukaȓ nwem, aḏ nɣen ȓebƹaḍ zzaywem.
17 Marra akenniw ƹiffen ƹlaḥsab isem inu.
18 Waxxa amenni war iweṭṭi uȓa ḏ ij n uzuṭṭu zeg uzeǧif nwem.
19 Ṣbareṯ uca aɣarwem ṯiȓi ṯuḏarṯ.
Lƹalamaṯ n uhḏam n Lquds
20 Meȓa ṯeẓrim Lquds ḥeṣȓen-ṯ ȓƹaskar, ssnem belli ƹȓayen aḏ inehḏem.
21 Ȓxeddnnit ixeṣṣa yinni iǧan ḏi ṯmurṯ n Yahuḏiya aḏ rewȓen ɣar iḏurar; ḏ yinni iǧan ḏi Lquds ixeṣṣa azzayes rewȓen ɣar barra; ḏ yinni iǧan ḏeg imarjeƹiwen ixeṣṣa war tiḏfen ɣar Lquds.
22 Minzi ȓyamaṯ-a n uƹmuḏ, aḏayes ikemmeȓ marra min yurin ḏi lkutub n lʼanbiya.
23 Ya tamara x ṯemɣarin iy ɣa yiȓin s uƹeddis ḏeg wussan nni, ḏ ṯinni nneɣnit isuṭuḍen! Minzi aḏ yiȓi ḏi ṯmurṯ ij n uƹeddeb ḏ ameqqran ḏ uɣḍab x ccaƹb-a.
24 Aṯen nɣen s ȓesyuf, aṯen awin ḏ imeḥbas ɣar marra ȓegnus. Uca yinni war iǧin ḏ uḏayen aḏ heḏmen Lquds aȓ ɣa ifna zman nsen.
25 Aḏ ḍharent lƹalamaṯ ḏi ṯfuct ḏ ṯziri ḏ yiṯran. Aḏ iȓin x ṯmurṯ ȓegnus ḏaysen amnus minzi war fhimen sdaƹ n ȓmujaṯ ḏ ȓebḥar.
26 Aḏ sexfen yiwḏan s ṯiggwḏi ḏ umnus x min itweqiƹen i ddunect minzi marra yinni ijehḏen ḏeg ujenna aṯen isenhezz Arebbi.
27 Ȓxeddnnit iy ɣa ẓren Mmis n bnaḏem xmi d ɣa ihwa ḏeg useynu s lƹaḍama ḏ jjehḏ nnes imɣaren.
28 Xmi ɣa ibḏa aḏ iwqeƹ manaya, beddeṯ, sgaƹƹḏeṯ azeǧif nwem minzi ƹȓayen aḏ tnejmem."
Ȓmaƹna n ṯcejjarṯ n ṯazarṯ
29 Issiweȓ akiḏsen s ij n ȓmaƹna: "Xzareṯ ɣar ṯcejjarṯ n ṯazarṯ ḏ marra ȓcejjur.
30 Ɣir aḏ ggent ṯifray, ṯessnem belli anebḏu iqarreb-d.
31 Amenni uȓa ḏ kenniw, xmi ɣa ṯeẓrem marra manaya, ṯessnem belli aqa ȓmulk n Arebbi yuḏes-d.
32 Aqa tesȓam ȓḥaqq: War tmettin yiwḏan n ȓweqṯ-a aȓ ɣa iwqeƹ marra manaya.
33 Aḏ ikkes ujenna ḏ ṯmurṯ, maca awaȓ inu war itekkes ƹemmarṣ.
34 Ma ṯexsem aḏ teccem uȓ nwem? Ḥḍaṯ ixef nwem zi lmaddla n ssekra ḏ waṭṭas n ccreb ḏ ȓehmum n ddunect. Qa aḏ d yas nhar nni aneggaru ƹlaɣafla,
35 amecnaw ṯaxcefṯ. Aḏ iṭṭef marra yinni iǧan x ṯmurṯ.
36 Ḥḍaṯ, ẓẓaǧeṯ ḏi mkuȓ ȓweqṯ, ḥima aḏ tzemmrem aḏ tnejmem zi marra min ɣa iweqƹen, aḏ tbeddem zzaṯ i Mmis n bnaḏem."