Yahuḏa itafeq aḏ izzenz Siḏna Ƹisa
22
1 Iqarreb-d ȓƹid n ṯefḍirṯ umi qqaren Ȓƹiḏ Ameqqran n wuḏayen.
2 Arruyas n ȓefquha ḏ imseȓmaḏen n ccariƹa rezzun mammec ɣa nɣen Ƹisa, maca teggwḏen zi ccaƹb.
3 Yuḏef Cciṭan ḏeg wuȓ n Yahuḏa umi tȓaɣan Isxaryuṭi, u netta zi ṯenƹac n arrusul.
4 Iruḥ, issiweȓ akeḏ arruyas n ȓefquha ḏ imeqqranen n iƹessasen n ṯemziḏa ṯameqqrant n wuḏayen x mamc ḏasen-ṯ ɣa isellem.
5 Farḥen, tafqen aḏas ucen ṯipeyyasin n nnuqarṯ.
6 Iwafaq, irezzu ɣir mammec iy ɣa isellem Ƹisa bȓa ma d yarr ȓexbar ccaƹb.
Sewjḏen amensi n Ȓƹiḏ Ameqqran n wuḏayen
7 Yiweḍ-d Ȓƹiḏ n Ṯefḍirṯ, ɣarṣen ḏayes izmaren.
8 Issekk Ƹisa Buṭrus ḏ Yuḥanna, inna-asen: "Ruḥem, swejḏem-aneɣ amensi n Ȓƹiḏ Ameqqran ḥima aṯ necc."
9 Nnan-as: "Mani ṯexseḏ aṯ nsewjeḏ?"
10 Inna-asen: "Xmi ɣa ṯaḏfem ɣar ṯendint, akiwem imeȓqa ij n uryaz iysi aqnuc n waman, ḏfarem-ṯ ɣar ṯeddarṯ iy ḏi ɣa yaḏef.
11 Inim-as i bab n ṯeddarṯ nni, qa inna-ac lmuƹallim: Mani iǧa uxxam iy ḏi ɣa ƹeyyḏeɣ ak imeḥḍaren inu?
12 Akenniw yawi ɣar ij n ṯɣurfat ḏ ṯameqqrant ṯessu. Ḏinni iy ɣa ṯeswejḏem."
13 Ruḥen, ufin nican amecnaw mamc ḏasen inna. Uca swejḏen amensi n Ȓƹiḏ.
Amensi n Ȓƹiḏ
14 Wami d tiweḍ ȓweqṯ, iqqim Ƹisa aḏ icc akeḏ arrusul nnes.
15 Inna-asen: "Mecḥaȓ nec trajiɣ akiwem munsweɣ ḏi Ȓƹiḏ Ameqqran nhara qbeȓ iy ɣa twaƹeddbeɣ.
16 Minzi aḏawem iniɣ: Zi ssa aȓ ṯsawent war zzayes tetteɣ aȓ ɣa yiȓi ḏi ȓmulk n Arebbi."
17 Iysi Ƹisa ȓkas ickar Arebbi, inna: "Ysim ȓkas-a, ferqem-ṯ jarawem.
18 Aḏawem iniɣ: Zi ssa aȓ ṯsawent war sesseɣ zeg waman-a n uḍiȓ aȓ d ɣa yas ȓmulk n Arebbi."
19 Iysi aɣrum, ickar Arebbi. Irza aɣrum nni yuca-asen-ṯ. Inna: "Wa ig iǧan ḏ ddat inu iy ɣa immucen ƹlaḥsab kenniw. Ggeṯ manaya ḥima aḏayi ṯfekkarem."
20 Ƹaweḏ umbaƹd i umensi, iysi ȓkas inna: "Ȓkas-a ḏ ȓƹaheḏ ḏ jḏiḏ iy kiḏwem teggeɣ s iḏammena inu aḏ azzȓen ƹlaḥsab kenniw.
21 Aḏawem iniɣ: Wenni ḏayi ɣa izzenzen aqa-ṯ akiḏi ḏa x missa.
22 Mmis n bnaḏem aḏas iwqeƹ ƹlaḥsab mamc ḏas yura Arebbi, maca ya ȓefḍiḥeṯ n wenni iy ṯ ɣa izzenzen."
23 Bḏan imeḥḍaren ssawaȓen jarasen nnan wi zzayneɣ ɣa iggen manaya?
Wig iǧan ḏ ameqqran?
24 Menɣen ƹaweḏ akeḏ wayawya ƹlaḥsab wi zzaysen itɣiȓan ḏ ameqqran.
25 Inna-asen Ƹisa: "Izeǧiḏen ḥekkmen x ccaƹb nsen. Ȓḥukkam iteƹjib-asen aḏasen tȓaɣan a ssadat.
26 Manaya itxeṣṣa war itiȓi jarawem. Lƹaks, ameqqran nwem itxeṣṣa aḏ yiȓi am umezyan nwem, ḏ wenni iḥekkmen am wenni ixeddmen.
27 Ug imɣaren? Ma wen iqqimen aḏ icc, ma wen iy xas itsexxaren? Ḏ wenni iqqimen aḏ icc. Aqa-ayi akiḏwem nec amecnaw wenni itsexxaren.
28 Ḏ kenniw iy kiḏi iṣbaren ḏi ȓemḥayen inu.
29 Am ḏayi yuca Baba ȓmulk, uȓa ḏ nec aḏawem-ṯ uceɣ.
30 Akiḏi ṯeqqimem aḏ teccem aḏ teswem ḏi ȓmulk inu. Aḏ teqqimem x ȓƹarc ḥima aḏ tḥekmem x ṯenƹac n ṯqebbaȓ n Ayṯ-Israʼil."
Buṭrus aḏ inkar Siḏna Ƹisa ṯȓaṯa n ṯwaȓaṯin
31 Inna-as Ƹisa: "Xzar, a Simƹan: Cciṭan irzu akenniw iɣarbeȓ, amecnaw mamc itɣarbeȓ ufeǧaḥ ṯiḥebba n yirḏan.
32 Ttareɣ akiḏec ɣar Siḏi Arebbi ḥima lʼiman nnec war ineqqeṣ. Xmi aɣari ṯḏewȓeḏ, cejjeƹ ayṯmac."
33 Inna-as Buṭrus: "A Siḏi, aqa-ayi wejḏeɣ, meȓa ṯuḏfeḏ ȓeḥbes, akic aḏfeɣ, meȓa ṯemmuṯeḏ, akic mmṯeɣ."
34 Inna-as Ƹisa: "Aḏac iniɣ, a Buṭrus: Qbeȓ iy ɣa idden uyaziḍ ǧiȓeṯ-a, aḏayi ṯenkareḏ ṯȓaṯa n ṯwaȓaṯin war ḏayi ṯessineḏ."
35 Uca inna i imeḥḍaren nnes: "Wami kenniw ssekkeɣ bȓa ṯazeƹbuȓṯ, bȓa aqrab, bȓa ṯisiȓa, ma ixeṣṣa-kenniw ca?"
Nnan: "Lla."
36 Inna-asen: "Ȓexxu wenni ɣar iǧa can ṯzeƹbuȓṯ niɣ can uqrab aṯen iysi. Wenni war ɣar iǧi ca ssif, aḏ izzenz arruḍ nnes aḏ iseɣ ssif.
37 Aḏawem iniɣ: Labud aḏayi iwqeƹ min yurin ḏi lkitab mani iqqar: Ḥesben-ṯ akeḏ lmujrimin. Min xafi yurin aḏ iwqeƹ."
38 Nnan-as: "Aqa ɣarneɣ ṯnayen n ȓesyuf, a Siḏi."
Inna-asen: "Ṣafi."
Siḏna Ƹisa itẓaǧa ḏeg uḏrar n zzitun
39 Iffeɣ, iruḥ am ȓebda ɣar uḏrar n zzitun, ḏfaren-ṯ ƹaweḏ imeḥḍaren nnes.
40 Wami yiweḍ ɣar umcan nni, inna-asen: "Ẓẓaǧeṯ ḥima war tiḏfem ḏi ȓemḥayen."
41 Ibeƹƹeḏ xasen cwayt, irkeƹ, itettar i Arebbi,
42 inna: "Meȓa imken, a Baba, aḏ tesbeƹƹḏeḏ xafi ȓkas-a n ȓaƹḏab. Maci mamc xseɣ nec, lla! Mamc ixes ȓxaḍar nnec cek."
43 Uca ṯbedd-d ɣares ij n lmalaʼika zeg ujenna ḥima aḏas ṯuc jjehḏ.
44 Izeyyar xas ȓḥaȓ, iẓẓuǧ aṭṭas, ṯehwa-d zzayes ṯiḏi amecnaw ṯineqqiḍin n iḏammen.
45 Wami ikemmeȓ ṯẓaǧiṯ, iḏweȓ ɣar imeḥḍaren nnes, yufi-ṯen ṭṭṣen s uxiyyeq.
46 Inna-asen: "Mayemmi teṭṭṣem? Kkarem, ẓẓaǧeṯ ḥima war tiḏfem ḏi ȓemḥayen."
Uḏayen ḏ irumaniyen teṭṭfen Siḏna Ƹisa
47 Ƹisa issawaȓ ƹaḏ wami d yiweḍ Yahuḏa, ijjen zi ṯenƹac n arrusul nnes. Yiwi-d akis ȓɣaci, iqarreb ɣar Ƹisa ḥima axas iseǧem x uɣembub.
48 Inna-as Ƹisa: "Ma s sȓam-a iy zi ṯezzenzeḏ Mmis n bnaḏem, a Yahuḏa?"
49 Wami ẓrin imeḥḍaren manaya, nnan: "A Siḏi, ma a nuweṯ s ssif?"
50 Yuwṯa ijjen zzaysen ismeɣ n arrayes n ȓefquha, iqess-as amezzuɣ afusi.
51 Inna Ƹisa: "Beddeṯ! Ṣafi!" Iḥaḏa amezzuɣ n uryaz nni, isgenfa-ṯ.
52 Inna Ƹisa i arruyas n ȓefquha ḏ imeqqranen n iƹessasen n ṯemziḏa ṯameqqrant ḏ imeqqranen n wuḏayen iy ɣares d yusin: "Ma tɣir-awem nec ḏ lmujrim wami teysim ȓesyuf ḏ idebbuzen ḥima aḏayi ṯeṭṭfem?
53 Tuɣa ǧiɣ akiḏwem mkuȓ nhar ḏi ṯemzida ṯameqqrant, war ḏayi ṯeṭṭifem. Maca ȓexxu ḏ ȓweqṯ nwem. Ȓexxu ḏ ssulṭa n ṯaǧest."
Buṭrus inekkar Siḏna Ƹisa
54 Ṭṭfen-ṯ, uwin-ṯ, siḏfen-ṯ ɣar ṯeddarṯ n arrayes n ȓefquha. Buṭrus iḏfar-iṯ zi ȓaggwaj.
55 Ceƹƹȓen ṯimessi ḏi ȓwesṭ n ȓemraḥ n ṯeddarṯ. Qqimen ḏinni, iqqim Buṭrus akiḏsen.
56 Ṯeẓri-ṯ ij n ṯxeddant iqqim zzaṯ i ṯmessi, ṯexzar ḏayes mliḥ, ṯenna: "Uȓa ḏ wanita tuɣa iǧa akis."
57 Inkar-iṯ, inna: "A ṯamɣarṯ, war ṯ ssineɣ ca."
58 Umbaƹd cwayt, iẓri-ṯ ij n uryaz inna: "Y cek zzaysen?"
Inna-as Buṭrus: "Ay aryaz, nec, lla!"
59 Wami ṯeƹḏu can ṯsaƹat, inna-as ijjen nneɣnit u netta mʼakked: "Ḏ ṣṣaḥ, uȓa ḏ wa tuɣa iǧa akis minzi uȓa ḏ netta zi Ljalil."
60 Inna-as Buṭrus: "Ay aryaz, war ssineɣ minxef ṯessawaȓeḏ!" Ȓxeddnni, wami issawaȓ, idden uyaziḍ.
61 Ineqȓeb Siḏiṯneɣ ixzar ɣar Buṭrus, uca ifekkar Buṭrus awaȓ n Siḏiṯneɣ wami ḏas inna: Qbeȓ iy ɣa idden uyaziḍ aḏayi ṯenkareḏ ṯȓaṯa n ṯwaȓaṯin.
62 Iffeɣ, itru aṭṭas.
63 Bḏan yinni iḥeṭṭan Ƹisa ḍeḥcen xas, ccaṯen-ṯ.
64 Ȓeḥḥfen-as x uɣembub nnes, tseqsan-ṯ: "Iwa ḥaqq a nnabi, uw c yuwṯin?"
65 Rnin x manaya, zawaren-ṯ aṭṭas.
Siḏna Ƹisa zzaṯ i jmaƹṯ n lḥukkam n wuḏayen
66 Wami iṣbaḥ ȓḥaȓ, munen imeqqranen n wuḏayen ḏ arruyas n ȓefquha ḏ imseȓmaḏen n ccariƹa. Ȓaɣan-d x Ƹisa ɣar jmaƹṯ n lḥukkam nsen.
67 Nnan-as: "In-aneɣ, ma cek ḏ Lmasiḥ?"
Inna-asen: "Meȓa nniɣ-awem-t, kenniw war ḏayi timnem.
68 Meȓa sseqsiɣ-kenniw war ḏayi tjiwibem ca.
69 Zi ssa aȓ ṯsawent aḏ iqqim Mmis n bnaḏem x ufusi n jjehḏ n Arebbi."
70 Nnan-as marra iḏsen: "Iwa cek ḏ mmis n Arebbi?"
Inna-asen: "Ṯeqqarem belli ḏ nec."
71 Nnan: "Mayemmi ɣa neḥḏaj ƹaḏ can chaḏeṯ? Neccin marra iḏneɣ nesȓa-yas min inna s uqemmum nnes."