Tawin Siḏna Ƹisa ɣar lḥakem Bilaṭus
23
1 Kkaren marra iḏsen, uwin Ƹisa ɣar Bilaṭus.
2 Bḏan tceṯcan zzayes, nnan: "Nufi-ṯ itegg lbelbala ḏi ccaƹb. Iqqar-asen: War ticceṯ bu ḍḍariba i Qayṣar. Iḥseb ixef nnes netta ḏ Lmasiḥ ḏ azeǧiḏ."
3 Isseqsa-ṯ Bilaṭus, inna-as: "Ma cek ḏ azeǧiḏ n wuḏayen?"
Ijaweb-iṯ, inna: "Ṯenniḏ-t cek."
4 Inna Bilaṭus i arruyas n ȓefquha ḏ ȓɣaci: "War twiȓiɣ can ttuhmeṯ ḏeg uṯarras-a."
5 Maca tƹawaḏen xas aṭṭas n ṯwaȓaṯin, nnan-as: "Itegg ȓfitna ḏi marra ṯamurṯ n Yahuḏiya s useȓmaḏ nnes. Ibḏa ḏi Ljalil, ȓexxu yusa-d ɣarneɣ ḏa."
6 Wami isȓa Bilaṭus belli nnan Ljalil, isseqsa: "Ma aryaz-a zi Ljalil?"
7 Wami isȓa belli Ƹisa zi manis iteḥkam Hirudus, issekk-iṯ ɣar Hirudus iy iǧan uȓa ḏ netta ḏi ȓweqṯ nni ḏi Lquds.
Tawin Siḏna Ƹisa ɣar uzeǧiḏ Hirudus
8 Wami iẓra Hirudus Ƹisa, ifareḥ aṭṭas. Ixes aṯ iẓer aṭṭas zeg wami minzi isȓa xas. Itmenna aḏ igg Ƹisa can lmuƹjiza zzaṯes.
9 Isseqsa-ṯ aṭṭas. Ƹisa war xas yarri ca.
10 Arruyas n ȓefquha ḏ imseȓmaḏen n ccariƹa bedden ḏinni, ttahmen-ṯ aṭṭas.
11 Iḥeggar-iṯ Hirudus ḏ ȓƹaskar nnes, iḍḥec xas. Igga xas aseȓham ḏ aṣebḥan, yarr-iṯ ɣar Bilaṭus.
12 Qbeȓ, Bilaṭus ḏ Hirudus tuɣa ḏin lƹadawa jarasen, maca ḏewȓen ḏ imeddukaȓ ḏi nhar nni.
Lḥakem Bilaṭus irezzu aḏ irxu i Siḏna Ƹisa
13 Iȓaɣa-d Bilaṭus x arruyas n ȓefquha, ḏ lḥukkam n wuḏayen, ḏ marra ccaƹb.
14 Inna-asen: "Kenniw ṯiwim-ayi-d bnaḏem-a, ṯennim-ayi qa itegg ȓfitna jar yiwḏan. Nec xemmmeɣ ḏi ṯmesȓact nnes zzaṯwem. War twiȓiɣ ḏeg uṯarras-a bu can ttuhmeṯ ƹlaḥsab min tceṯcam.
15 Uȓa ḏ Hirudus war ḏayes yufi walu minzi yarra-aneɣ-ṯ-id. Xzareṯ, wanita war iggi min xef isḏaheǧ ȓmewṯ.
16 Aḏas uceɣ aƹmuḏ aḏas rxuɣ." [
17 Bilaṭus iƹeffu ḏi mkuȓ Ȓƹiḏ Ameqqran x ij n umeḥbus aḏ iffeɣ.]
18 Isɣuyiw marra ccaƹb, inna: "Ysi xaneɣ wanita. Rxu-yaneɣ-d i Barabas."
19 Barabas tuɣa ggin-ṯ ḏi ȓeḥbes ḏi ssabab n ij n ȓfawḍa ṯewqaƹ ḏi ṯendint, ƹaweḏ x ij n ljarima n ȓmewṯ.
20 Bilaṭus ixes aḏ irxu i Ƹisa, issiweȓ akeḏ ccaƹb ṯwaȓa nneɣnit.
21 Sɣuyen, nnan-as: "Ṣelleb-iṯ! Ṣelleb-iṯ!"
22 Issiweȓ akiḏsen wis ṯeȓt marraṯ, inna: "Maɣar? Man ljarima ig igga wanita? Nec war ḏayes ufiɣ bu ttuhmeṯ iy xef isḏaheǧ ȓmewṯ. X manaya aḏas uceɣ aƹmuḏ uca aḏas rxuɣ."
23 Maca snekkaren ṯɣuyyiṯ s jjehḏ ḥima aṯ iṣelleb. Ṯɣuyyiṯ nsen ṯeqȓeb-as array.
24 Bilaṭus igga s min xsen niṯni.
25 Irxu i wenni iǧan ḏi ȓeḥbes x ȓesbab n ȓfawḍa ḏ ljarima n ȓmewṯ. Isellem Ƹisa as ggen mamc xsen.
Tawin Siḏna Ƹisa aṯ ṣellben
26 Wami ṯ uwin aṯ ṣellben, ṭṭfen ij n uryaz zi Lqurina qqaren-as Simƹan, u netta tuɣa itas-d zi ȓkampu. Ggin xas ṣṣalib bac aṯ irbu aḏ iḏfar Ƹisa.
27 Ḏfaren-ṯ aṭṭas n ȓɣaci, ḏ ṯemɣarin ḥeznent, trunt xas.
28 Ineqȓeb Ƹisa ɣarsent, inna-asent: "Ay yessis n Lquds, war xafi trunt, maca runt x yixef ncent ḏ ṯarwa ncent.
29 Aḏ d tas ij n ȓweqṯ aḏayes inin: Ssaƹḏ n ṯinni war zemmrent aḏ arwent ḏ ṯinni ƹemmarṣ war urwent niɣ suṭḍent.
30 Aḏ bḏan aḏ inin i iḏurar, wḍam xaneɣ, i ṯeƹrurin, qbarent xaneɣ.
31 Meȓa ggin manaya i ṯcejjarṯ ḏ ṯazeyzawṯ, min ɣa iweqƹen xmi ɣa ṯazeɣ?"
32 Ƹaweḏ uwin-d ṯnayen nneɣnit ǧan ḏ lmujrimin akis twanɣen.
Irumaniyen tṣellaben Siḏna Ƹisa x ṣṣalib
33 Wami yiwḍen ɣar umcan umi qqaren Jumjuma, ṣellben-ṯ ḏinni akeḏ ṯnayen nni n lmujrimin, ijjen x ufusi, unneɣnit x uẓeȓmaḍ nnes.
34 Inna Ƹisa: "A Baba, ɣfar-asen, war ssinen min xeddmen." Ggin lqurƹa x warruḍ nnes ferqen-ṯ jarasen.
35 Iwḏan bedden ḏinni xezzaren, arruyas ḍeḥcen xas, qqaren: "Isenjem inneɣnit, aḏ isenjem ixef nnes meȓa netta ḏ Lmasiḥ iy ixḍar Arebbi."
36 Ƹaweḏ uȓa ḏ ȓƹaskar ḍeḥcen xas, qarrben ɣares, ucin-as aman uḍiȓ isemmamen.
37 Nnan: "Meȓa cek ḏ azeǧiḏ n wuḏayen, nejja ixef nnec."
38 Ɣar uzeǧif nnes ḏinni ij n ṯeȓwiḥet ṯura ḏayes: Wa ḏ azeǧiḏ n wuḏayen.
39 Ijjen zi lmujrimin iṣellben itzawar-iṯ, iqqar: "Cek ma ḏ Lmasiḥ niɣ lla? Yallah, nejja ixef nnec, nejja-yaneɣ."
40 Inha-ṯ unneɣnit, inna-as: "Ma war teggwḏeḏ ca Arebbi? Cek tƹeddabeḏ amecnaw netta.
41 Neccin nesḏaheǧ minzi netwaƹeddeb ƹlaḥsab min negga. Netta war iggi minxef."
42 Uca inna-as: "A Ƹisa, ƹqeȓ xafi xmi d ɣa ṯaseḏ ɣar ȓmulk nnec."
43 Inna-as Ƹisa: "Aqa tesȓiḏ ȓḥaqq: Aḏ tiȓiḏ ḏi jjenneṯ nhara akiḏi."
Siḏna Ƹisa immuṯ
44 Ɣar uzyen nhar, ṯehwa-d ṯaǧest x ṯmurṯ amen ṯekmeȓ aȓ wami ḏ ṯȓaṯa uƹecci.
45 Ṯfuct ṯeḏweȓ ḏ ṯaǧest, iqqarṣ arwaq n ṯemziḏa ṯameqqrant n wuḏayen x ṯnayen.
46 Ƹisa iȓaɣa s jjehḏ, inna: "A Baba, g ifassen nnec sellmeɣ-ac buḥbeȓ inu." Wami inna manaya, immuṯ.
47 Ij n uƹaskari ḏ ameqqran n rrumanus iẓra min iweqƹen, isemɣar Arebbi, inna: "Ḏi lḥaqiqa aṯarras-a iǧa nican."
48 Marra iwḏan iy ḏin imunen, ẓrin min iweqƹen, ƹeqben-d ccaṯen ḏeg wuȓ nsen.
49 Marra imeddukaȓ nnes ḏ ṯemɣarin iy ṯ iḏfaren zi Ljalil, bedden ɣar ȓaggwaj, ẓrin manaya.
Neṭṭȓen Siḏna Ƹisa
50 Ḏinni ij n uryaz qqaren-as Yusef zi jmaƹṯ n lḥukkam n wuḏayen, netta ḏ ij n uryaz iṣbaḥ, iǧa nican.
51 War iqbiȓ min xef ṯtafeq jmaƹṯ nni ḏ min ṯexḏem. Netta zi dcar n Arimatya, iǧan ḏi ṯmurṯ n Yahuḏa. Ƹaweḏ netta itreḥḥab ȓmulk n Arebbi.
52 Iruḥ ɣar Bilaṭus ittar-as ddat n Ƹisa.
53 Isehwa-t-id.a Ikeffen-it s ȓecfen. Isers-it ḏeg ij n unḍeȓ iɣzin ḏeg uzru am yifri, ƹemmarṣ war ḏinni inḍiȓ ḥad.
54 Nhar nni sewjaḏen ḏayes i nhar n ssebṯ n lƹibada minzi iqarreb-d.
55 Ṯimɣarin iy d yusin akeḏ Ƹisa zi Ljalil ḏfarent Yusef, ẓrint anḍeȓ ḏ mamc ḏayes ggin ddat nnes.
56 Ḏewȓent ɣar ṯeddarṯ, sewjaḏent lƹiṭer ḏ waman n lwarḍ. Ḏi nhar n lƹibada qqiment reyyḥent ƹlaḥsab ȓuṣiyeṯ n Tuwrat.