Siḏna Ƹisa ikkar-d zi ȓmewṯ
24
1 Ḏi nhar amezwaru n ssimana, usint-id ɣar ṣbaḥ zic ɣar yifri n unḍeȓ nni, uwint-id lƹiṭar iy swejḏent.
2 Ufint azru itwakkes x unḍeȓ.
3 Uḏfent, war ufint ddat n Siḏiṯneɣ Ƹisa.
4 Wami niṯenti ḏehcent ḏi manaya, bedden-d ɣarsent ṯnayen n iryazen ggin arruḍ itceƹciƹ.
5 Ggwḏent ṯemɣarin nni aṭṭas, siḏarent azeǧif nsent. Uca ṯnayen n iryazen nni nnan-asent: "Mayemmi ṯrezzunt x wenni iddaren jar yinni immuṯen?
6 Netta war ḏa iǧi ca, ikkar-d zi ȓmewṯ. Ma war ṯeƹqiȓent wami kiwem issiweȓ u netta ƹaḏ ḏi Ljalil?
7 Inna-awem ixeṣṣa aḏ itwasellem Mmis n bnaḏem i yinni iƹṣan, aṯ ṣellben, aḏ d ikkar ḏi nhar n wis ṯeȓt-yyam."
8 Uca ƹeqȓent x wawaȓ nnes.
9 Ḏewȓent-id zeg unḍeȓ, siwḍent ȓexbar-a marra ɣar ḥiṭac n arrusul ḏ marra inneɣnit.
10 Ṯinni isiwḍen ȓexbar-a ɣar arrusul, niṯenti ḏ Maryam ṯamagdaliṯ, ḏ Ḥannan, ḏ Maryam yemmas n Yaƹqub, ḏ ṯinneɣnit.
11 Arrusul war uminen ṯimɣarin minzi qqarent can wawaȓen war ṯen iqebbeȓ ȓaƹqeȓ.
12 Maca Buṭrus ikkar, yuzzeȓ ɣar unḍeȓ, issij xas, itwaȓa ȓecfen imers ḏinni waḥḏes. Uca iḏweȓ ɣar ṯeddarṯ, itƹejjeb ḏi nnefs nnes ƹlaḥsab min iweqƹen.
Siḏna Ƹisa iḍehhar-d ḏeg ubriḏ n dcar n Ƹinwas
13 Ḏi nhar nni, ṯnayen imeḥḍaren nnes traḥen ɣar ij n dcar qqaren-as Ƹinwas. Iggwej x Lquds can ḥiṭac kilumiter.
14 Ssawaȓen akeḏ wayawya ḏi ṯmesȓayin iweqƹen.
15 Wami ssawaȓen u temnaqacen, iqarreb-d ɣarsen Ƹisa netta s yixef nnes uca ibḏa iggur akiḏsen.
16 Maca ṯiṭṭawin nsen amecnaw bellƹent minzi war ṯ ƹqiȓen ca.
17 Inna-asen: "Min xef ṯessawaȓem u kenniw ṯeggurem?" Uca bedden, iban lḥuzzen x wuḏem nsen.
18 Ijaweb-iṯ ijjen zzaysen qqaren-as Klubas, inna-as: "Cek waḥḏec zeg yinni d izuren Lquds war ṯessineḏ min iweqƹen ḏeg wussan-a?!"
19 Inna-asen Ƹisa: "Min iweqƹen?"
Nnan-as: "Ƹisa naṣiri tuɣa iǧa ḏ ij n nnabi ɣares jjehḏ ḏi min itegg ḏ min iqqar zzaṯ i Arebbi ḏ marra iwḏan.
20 Arruyas n ȓefquha ḏ lḥukkam nneɣ sellmen-ṯ ḥima aṯ nɣen, uca ṣellben-ṯ.
21 Neccin tuɣa netmenna belli ḏ netta iy ɣa isnejmen Ayṯ-Israʼil! Iwa, u nhara wis ṯeȓt-yyam zeg wami iwqeƹ manaya.
22 Ƹaweḏ can ṯemɣarin zzayneɣ jjint-aneɣ netƹejjeb. Ruḥent ɣar unḍeȓ zic,
23 war ḏinni ufint ddat nnes. Ḏewȓent-id, nnant belli ihwa-d xasent lwaḥi, xebbarent-ṯent lmalaʼikaṯ belli aqa-ṯ iddar.
24 Uca ruḥen can yiwḏan zzayneɣ ɣar unḍeȓ, ufin nican mamc ḏasen nnant ṯemɣarin, maca netta war ṯ ẓrin ca."
25 Inna-asen: "A yinni war ifhimen! A yinni war itimnen ḏeɣya ḏi marra min nnan lʼanbiya!
26 Tuɣa ixeṣṣa i Lmasiḥ aḏ iƹeddeb, aḏ yaḏef ɣar lƹaḍama nnes."
27 Ibḏa zi Tuwrat n Musa ḏ lkutub n marra lʼanbiya, isefhem-asen min xas yurin ḏi marra lkutub.
28 Qarrben ɣar dcar iy ɣar traḥen, igga axmi ixes aḏ ikemmeȓ x ubriḏ nnes.
29 Ggin xas s bezzez nnan-as: "Qqim akiḏneɣ, minzi ƹȓayen aƹecci u iruḥ ȓḥaȓ." Uca yuḏef ḥima akisen isens.
30 Wami akisen iqqim aḏ icc, iysi aɣrum, ickar Arebbi, irez-iṯ, yuca-asen-ṯ.
31 Nurzment ṯiṭṭawin nsen ƹeqȓen-ṯ uca iḏweȓ war iḍhar ca.
32 Nnan i wayawya: "X manaya uȓ nneɣ ḏayes ṯimessi wami issawaȓ akiḏneɣ ḏeg ubriḏ, isefhem-aneɣ lkutub."
33 Ȓxeddnni kkaren ḏewȓen ɣar Lquds. Ufin ḥiṭac n arrusul ḏ yinni kisen imunen ḏinni,
34 qqaren: "Ḏ ṣṣaḥ ikkar-d Siḏiṯneɣ zi ȓmewṯ, iban-d i Simƹan!"
35 Txebbaren-ṯen s min iweqƹen ḏeg ubriḏ, ḏ mammec ssnen Siḏiṯsen wami irza aɣrum.
Siḏna Ƹisa iḍehhar-d i imeḥḍaren nnes
36 Wami ssawaȓen x manaya, ibedd Ƹisa ḏi ȓwesṭ nsen, inna-asen: "Sȓam xawem."
37 Ggwḏen aṭṭas, tɣir-asen aqa xzaren ḏi ȓexyaȓ.
38 Inna-asen: "Min kenniw yuɣin ṯnexȓeƹem? Mayemmi uȓ nwem ḏayes ccekk?
39 Xzarem ifassen inu ḏ iḍaren inu, ḏ nec. Ḥaḏam-ayi, xzarem. Ȓexyaȓ war ḏayes aysum uȓa ḏ yixsan ƹlaḥsab mamc ḏayi twaȓam."
40 Inna manaya, iseḍhar-asen ifassen nnes ḏ iḍaren nnes.
41 Niṯni qqimen ƹaḏ war uminen min iweqƹen minzi farḥen, ḏehcen, uca inna-asen: "Ma ɣarwem ḏa can macca at cceɣ?"
42 Ucin-as cwayt n iseȓman cenfen.
43 Iysi-t, itett zzaṯsen.
44 Inna-asen: "Ḏ wa ḏ awaȓ iy zi kiwem ssiwȓeɣ wami ƹaḏ tuɣa ǧiɣ akiḏwem, belli labud aḏ ikemmeȓ marra min xafi yurin ḏi ccariƹa n Musa ḏ lkutub n lʼanbiya ḏ Zzabur."
45 Ȓxeddnnit irzem Ƹisa ȓaƹqeȓ nsen ḥima aḏ fehmen lkitab.
46 Inna-asen: "Ammu iy yura ḏi lkitab, ixeṣṣa i Lmasiḥ aḏ itwaƹeddeb, aḏ d ikkar zi ȓmewṯ ḏi wis ṯeȓt-yyam.
47 Aḏ ḥeddṯen i marra ȓegnus ḥima aḏ tuben, aḏ twaɣfarent ȓmuƹṣiyaṯ nsen s yisem n Lmasiḥ. Aḏ ibḏa manaya ḏi Lquds.
48 Kenniw aqa ṯcehhḏem x manaya.
49 Minḏi kenniw iwƹeḏ Baba, aḏawem-ṯ-iḏ ssekkeɣ nec. Qqimem ḏi ṯendint-a aȓ ɣa xawem d ihwa jjehḏ zeg ujenna."
Siḏna Ƹisa itwarfeƹ ɣar ujenna