Marqus
Lʼinjil n Siḏiṯneɣ Ƹisa Lmasiḥ
Lkitab n Marqus
Yaḥya isewjaḏ abriḏ i Lmasiḥ
"Aqa tsekkiɣ-d ij n arrasul inu zzaṯec,
ḥima aḏ isewjeḏ abriḏ nnec.
3 Ṯmijja tȓaɣa ḏi ȓexȓa:
Swejḏeṯ abriḏ i Siḏi Arebbi,
ggem ibriḏen nnes nican."
4 Yusa-d Yaḥya ɣar ȓexȓa. Itḥeddaṯ i yiwḏan ḥima aḏ tuben aḏ ṭehharen s waman ḥima aḏ twaɣfarent ȓmuƹṣiyaṯ nsen.
5 Tasen-d ɣares marra imezḏaɣ n ṯmurṯ n Yahuḏiya ḏ marra imezḏaɣ n Lquds, teƹtarafen s ȓmuƹṣiyaṯ nsen, Yaḥya itṭehhar-iṯen s waman ḏeg yiɣzar n Lʼurdun.
6 Arruḍ n Yaḥya xeḏmen-ṯ s cƹar n uȓɣem, ḏi nneṣṣ nnes ij n ṯḥezzant n yiȓem. Itett ṯmurɣi ḏ ṯamment ṯaḥurrect.
7 Itḥeddaṯ iqqar: "Aḏ d yas menbaƹd i nec ijjen ijheḏ xafi, war sḏiheǧeɣ aḏ hwiɣ ḥima aḏas fesyeɣ uȓa ḏ ifiȓan n ṯsiȓa nnes.
8 Nec ṭehhareɣ-kenniw s waman, netta akenniw iṭehhar s Arruḥ iqeddsen."
Yaḥya itṭehhar Siḏna Ƹisa s waman
9 Ḏi ȓyamaṯ nni yusa-d Ƹisa zi dcar n Nnaṣira, iy iǧan ḏi ṯmurṯ n Ljalil, iṭehhar-iṯ Yaḥya ḏeg yiɣzar n Lʼurdun.
10 Wami d yuȓi zeg waman, ȓxeddnni iẓra ajenna inurzem, ḏ Arruḥ n Arebbi ihwa-d xas amecnaw ij n ṯeḏbirṯ.
11 Ij n ṯmijja zeg ujenna ṯeqqar: "Cek ḏ memmi iƹizzen, farḥeɣ zzayek."
Ibȓis itjarrab Siḏna Ƹisa
12 Ȓxeddnni yiwi-ṯ Arruḥ ɣar ȓexȓa.
13 Ikka arbeƹin yewm ḏi ȓexȓa nni itjerrab-iṯ Cciṭan. Aqa-ṯ mani ǧan ȓewḥuc, lmalaʼikaṯ tsexxarent xas.
Siḏna Ƹisa itȓaɣa-d i imeḥḍaren nnes imezwura
14 Wami ḥebbsen Yaḥya, iruḥ Ƹisa ɣar ṯmurṯ n Ljalil, itḥeddaṯ s lʼinjil n Arebbi.
15 Iqqar: "Ṯiweḍ-d ȓweqṯ, ȓmulk n Arebbi yuḏes-d. Tubeṯ, amneṯ s lʼinjil."
16 Wami iggur x cceṭṭ n ȓebḥar n Ljalil, iẓra Simƹan ḏ wumas Andrawus neṭṭren ṯiracciwin ḏi ȓebḥar. Niṯni tḥeǧaqen iseȓman.
17 Inna-asen Ƹisa: "Araḥettiw-d akiḏi, aqa ȓexxu akenniw arreɣ ḏ iḥeǧaqen n yiwḏan."
18 Ȓxeddnni semḥen ḏi ṯracciwin nsen, ḏfaren-ṯ.
19 Iƹḏu cwayt aɣirin, iẓra Yaƹqub ḏ Yuḥanna ṯarwa n ij n uryaz umi qqaren Zabdi, ḏi ṯɣarrabut ƹeddȓen ṯiracciwin nsen.
20 Ȓxeddnni iȓaɣa-yasen-d Ƹisa, semḥen ḏi babaṯsen Zabdi ḏi ṯɣarrabut ak ixeddamen, ḏfaren-ṯ.
Siḏna Ƹisa isufuɣ ij n jjen ḏ aƹeffan
21 Uḏfen ɣar ubilaj n Kafernaḥum. Ḏi nhar n ssebṯ n lƹibada yuḏef ḏi ṯemziḏa n wuḏayen, ibḏa iseȓmaḏ.
22 Tƹejjben ḏeg useȓmaḏ nnes ȓaḥeqqac ɣares ṯizemmar iy zi iseȓmaḏ, war iǧi bu amecnaw imseȓmaḏen n ccariƹa.
23 Ḏinni ḏi ṯemziḏa ij n uryaz ḏayes jjen ḏ aƹeffan, isɣuyiw,
24 iqqar: "Min ḏac iruḥen ḏayneɣ, a Ƹisa Naṣiri? Ma ṯusiḏ-d axaneɣ ṯeqḍiḏ? Nec ssneɣ min ṯeƹniḏ; cek ḏ arrasul muqeddes n Arebbi!"
25 Isbedd-iṯ Ƹisa, inna-as: "Sqar cek, ffeɣ zzayes!"
26 Iserjjijay-iṯ jjen nni aƹeffan, iƹeyyeḍ s yij n ṯmijja ṯuƹȓa, iffeɣ zzayes.
27 Ḏehcen marra iwḏan nni, nnan i wayawya: "Min iƹna manaya? Aseȓmaḏ-a ḏ jḏiḏ ḏayes jjehḏ! Itamar uȓa ḏ jnun iƹeffanen, teggen-as array."
28 Ȓxeddnni intacar ȓexbar nnes ḏi mkuȓ amcan ḏi jwayeh n Ljalil.
Siḏna Ƹisa isgenfa ṯaḏeggwaȓṯ n Simƹan
29 Wami d iffeɣ zi ṯemziḏa n wuḏayen, yusa-d ɣar ṯeddarṯ n Simƹan ḏ Andrawus akeḏ Yaƹqub ḏ Yuḥanna.
30 Yufa ṯaḏeggwaȓṯ n Simƹan ṯezzeȓ, ḏayes ṯimessi. Ȓxeddnni ssiwȓen ak Ƹisa xas.
31 Iqarreb ɣares, iṭṭef-it zeg ufus nnes, isgaƹƹeḏ-it. Ṯeffeɣ-it ṯmessi, ṯebḏa tsexxar xasen.
32 Ɣar uƹecci wami ṯeɣȓi ṯfuct, uwin-d ɣares marra yinni iheȓcen ḏ yinni ḏi ǧan jnun,
33 munen marra ayṯbab n ṯendint ḏinni ɣar ṯewwarṯ.
34 Isgenfa aṭṭas n imehȓac ḏaysen lʼanwaƹ n ȓehȓacaṯ. Isufeɣ aṭṭas n jnun, war ṯen ijji aḏ ssiwȓen minzi jnun-a ssnen min iƹna.
35 Ṯiwecca nnes zic wami ƹaḏ war iṣbiḥ ȓḥaȓ, ikkar iffeɣ, iruḥ ɣar ij n umcan ixȓa, itẓaǧa ḏinni.
36 Irzu xas Simƹan ḏ yinni kiḏes iǧan.
37 Wami ṯ ufin nnan-as: "Marra rezzun xak."
38 Inna-asen: "Yallahem akiḏi, a nraḥ ɣar ȓedcur nneɣnit yuḏsen ḥima aḏ ḥeddṯeɣ uȓa ḏinni. X manaya mixef d usiɣ."
39 Iruḥ itḥeddaṯ ḏi ṯemziḏawin n wuḏayen ḏi marra ṯamurṯ n Ljalil, isufuɣ jnun.
Siḏna Ƹisa isgenfa ijjen ihȓec s jḏam
40 Yusa-d ɣares ijjen ihȓec ḏayes jḏam. Iḥeccem-iṯ, iwḍa x ifadden nnes, inna-as: "Cek meȓa ṯexseḏ, ṯzemmreḏ aḏayi ṯeṣfiḏ."
41 Iqqes-as i Ƹisa, iḥaḏa-ṯ s ufus nnes inna-as: "Wah, xseɣ, aḏ tgenfiḏ!"
42 Ḏeg umcan ikkes-as jḏam, iḏweȓ iṣfa.
43 Ȓxeddnni issekk-iṯ Ƹisa, iweṣṣa-ṯ aṭṭas
44 inna-as: "Xzar, war qqar walu i ḥadd, maca ruḥ ɣar ȓefqih ṯseḍhareḏ-as ixef nnec, egg ṣṣeḏqeṯ iy zi iweṣṣa Musa ḥima aḏ cehḏen x min iweqƹen."
45 Maca netta iruḥ ibḏa issawaȓ aṭṭas, isiweḍ ȓexbar aȓ wami iḏweȓ Ƹisa war izemmer aḏ yaḏef ɣar ṯendint bȓa ma aḏ isnuffer ixef nnes. Iǧa ḏeg imucan ixȓan, iwḏan tasen-d ɣares zi marra imucan.