Matta
Lʼinjil n Siḏiṯneɣ Ƹisa Lmasiḥ
Lkitab n Matta
Ȓejḏuḏ n Siḏna Ƹisa
1
1 Wa ḏ lkitab n ȓejḏuḏ n Ƹisa Lmasiḥ, wenni iy d iteƹnan i Dawud ḏ Brahim.
2 Brahim ijja-d Isḥaq. Isḥaq ijja-d Yaƹqub. Yaƹqub ijja-d Yahuḏa ḏ ayṯmas.
3 Yahuḏa ijja-d Faris ḏ Zaraḥ akeḏ ṯemɣarṯ nnes Ṯamra. Faris ijja-d Ḥaṣrun. Ḥaṣrun ijja-d Aram.
4 Aram ijja-d Ƹaminadab. Ƹaminadab ijja-d Nassun. Nassun ijja-d Salmun.
5 Salmun ijja-d Buƹazza akeḏ ṯemɣarṯ nnes Raḥab. Buƹazza ijja-d Ƹubid akeḏ ṯemɣarṯ nnes Raƹuṯ. Ƹubid ijja-d Yassa.
6 Yassa ijja-d Dawud azeǧiḏ. Dawud azeǧiḏ ijja-d Suliman zi ṯenni tuɣa iǧan ḏ ṯamɣarṯ n Uriya.
7 Suliman ijja-d Raḥubƹam. Raḥubƹam ijja-d Abiya. Abiya ijja-d Asa.
8 Asa ijja-d Yahucafaṭ. Yahucafaṭ ijja-d Yuram. Yuram ijja-d Ƹuzziya.
9 Ƹuzziya ijja-d Yuṯam. Yuṯam ijja-d Aḥaz. Aḥaz ijja-d Ḥazaqiya.
10 Ḥazaqiya ijja-d Manassa. Manassa ijja-d Amun. Amun ijja-d Yuciya.
11 Yuciya ijja-d Yakunya ḏ ayṯmas ḏi ȓweqṯ wami xafsen uzzȓen ɣar Babil.
12 Umbaƹd wami xafsen uzzȓen ɣar Babil, Yakunya ijja-d Cƹaltihil. Cƹaltihil ijja-d Zarubbabil.
13 Zarubbabil ijja-d Abihud. Abihud ijja-d Lyaqim. Lyaqim ijja-d Ƹazur.
14 Ƹazur ijja-d Ṣaduq. Ṣaduq ijja-d Axim. Axim ijja-d Alyud.
15 Alyud ijja-d Lƹizar. Lƹizar ijja-d Mattan. Mattan ijja-d Yaƹqub.
16 Yaƹqub ijja-d Yusef aryaz n Maryam nettaṯ iy d ijjin Ƹisa ig itwasemman s Lmasiḥ.
17 Ḏinni arbeƹṭac n lʼajyal zi Brahim ɣar Dawud. Zi Dawud ɣar wami xasen uzzȓen ɣar Babil arbeƹṭac n lʼajyal. Zeg wami xasen uzzȓen ɣar Babil ɣar wami d ixȓeq Lmasiḥ arbeƹṭac n lʼajyal.
Ammu iy d ixȓeq Siḏna Ƹisa
18 Aqa mammec ixȓeq Ƹisa Lmasiḥ. Wami yemmas Maryam ṯegga zzujiya akeḏ Yusef, qbeȓ iy ɣa meȓcen jarasen ṯeysi aƹeddis zi Arruḥ n Siḏi Arebbi.
19 Yusef wenni ixsen at yawi, nican ig iǧa. War ixis ca axas iḍȓeq ddiƹaya, irezzu aḏas iǧef s ṯnufra.
20 Maca wami itfekkar ḏi ṯmesȓayṯ nni, ṯbedd-d xas ij n lmalaʼika ḏi ṯerjiṯ ṯenna-as: "A Yusef a mmis n Ayṯ Dawud, war teggweḏ ca aḏ tawiḏ Maryam ṯamɣarṯ nnec. Aqa zi Arruḥ n Siḏi Arebbi iy zi ṯeysi aƹeddis.
21 Aqa aḏ tejj ij uḥenjir aṯ ṯsemmiḏ Ƹisa minzi aḏ isenjem ȓqum nnes zi ȓmuƹṣiyaṯ nsen."
22 Ḏ manaya marra ig iweqƹen ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yij n zman:
23 "Aqa ṯaƹzrect aḏ teysi aƹeddis, aḏ tejj ij uḥenjir aḏas semman Immanwil."a (Ȓmaƹna nnes: Arebbi akiḏneɣ.)