Yinni iqqaren lƹilem n yiṯran
2
1 Wami ixȓeq Ƹisa ḏeg ubilaj n Bayt Laḥm ḏi ṯmurṯ n Yahuḏa ḏi ȓweqṯ n uzeǧiḏ Hirudus, usin-d can yiwḏan zeg yinni iqqaren lƹilem n yiṯran zi ccarq ɣar ṯendint n Lquds.
2 Nnan: "Mani iǧa uḥenjir iy d ixeȓqen iy ɣa yiȓin ḏ azeǧiḏ n wuḏayen? Aqa neẓra ḏi ccarq iṯri nnes, nusa-d aḏas nsejjeḏ."
3 Wami isȓa uzeǧiḏ Hirudus manaya, ixeyyeq iysi ij n umnus ḏ ameqqran netta ḏ imezḏaɣ n Lquds.
4 Ismun arruyas n ȓefquha n wuḏayen ḏ imseȓmaḏen n Ccariƹa, isseqsa-ṯen: "Mani d ɣa ixȓeq Lmasiḥ?"
5 Nnan-as: "Ḏi Bayt Laḥm ḏi ṯmurṯ n Yahuḏa, mammec yura nnabi Mixa ḏeg yij n zman:
6 Arebbi inna: Uȓa ḏ cem,
a Bayt Laḥm ḏi ṯmurṯ n Yahuḏa,
war ṯeǧiḏ bu ḏ ṯamezyant
jar ṯneddama n Yahuḏa.
Zzayem iy d ɣa iffeɣ ij n ȓḥakem
iy ɣa inedhen ccaƹb inu n Ayṯ-Israʼil."b
7 Ȓxeddnnit iȓaɣa-yasen-d s ṯnufra uzeǧiḏ Hirudus i yinni iqqaren lƹilem n yiṯran, issen zzaysen nican ȓweqṯ iy ḏi d iḍhar yiṯri.
8 Ssenni issekk-iṯen ɣar Bayt Laḥm, inna-asen: "Ruḥem ḏinni rzum mliḥ x uḥenjir nni. Xmi ṯ ɣa ṯafem, ƹeȓmem-ayi bac aḏ raḥeɣ uȓa ḏ nec aḏas sejjḏeɣ."
9 Sȓin min inna uzeǧiḏ, kkaren ruḥen. Iṯri nni iy ẓrin ḏi ccarq iggur ɣar zzaṯ. Wami yiweḍ, ibedd ḏeg ujenna ɣar mani iǧa uḥenjir nni.
10 Wami ẓrin iṯri nni farḥen aṭṭas.
11 Uḏfen ṯaddarṯ nni, ẓrin aḥenjir akeḏ yemmas Maryam, wḍan x ifadden nsen sejjḏen-as. Jebḏen-d ȓeknuz nsen, iƹni dheb ḏ tbaxur lluban ḏ ij n ȓḥajeṯ ḏ tufuḥ qqaren-as murr, ucin-as ḏ ȓehdiyaṯ.
12 Iƹȓem-asen Arebbi ḏi ṯerjiṯ war teƹqibem ca ɣar uzeǧiḏ Hirudus. Kkaren ḏewȓen ɣar ṯmurṯ nsen x yij n ubriḏ nneɣnit.
Ṯarweȓa ɣar Miṣra
13 Wami uyuren yiwḏan nni iqqaren lƹilem n yiṯran, ij n lmalaʼika n Siḏi Arebbi ṯbedd-d ɣar Yusef ḏi ṯerjiṯ, ṯenna-as: "Kkar ysi aḥenjir nni ḏ yemmas rweȓ ɣar Miṣra, zeḏɣem ḏinni aȓ ḏac ɣa iniɣ ḏweȓ-d. Aqa azeǧiḏ Hirudus irezzu x uḥenjir nni bac aṯ ineɣ."
14 Ikkar Yusef yuyur s ǧiȓeṯ ɣar Miṣra yuwi aḥenjir nni ḏ yemmas akiḏes.
15 Iqqim ḏinni aȓ wami immuṯ Hirudus. Qaƹ manaya ḥima aḏ ikemmeȓ wawaȓ ig inna Siḏi Arebbi i nnabi Hucaƹ ḏeg yij n zman: "Ȓaɣiɣ-d i mmi bac aḏ d iffeɣ zi Miṣra."c
Ȓmewṯ n iḥenjiren n Bayt Laḥm
16 Wami d yarra ȓexbar Hirudus belli yinni iqqaren lƹilem n yiṯran cemṯen-ṯ, ixeyyeq iɣḍeb aṭṭas. Issekk bac aḏ ineɣ marra iḥenjiren ḏi Bayt Laḥm ḏ nawaḥi nnes iy ɣar iǧan zi ƹamayen swadday, ƹlaḥsab ȓweqṯ iy ḏasen d imeḍhar yiṯri i yinni iqqaren lƹilem n yiṯran.
17 Ȓxeddnnit ikemmeȓ wawaȓ iy inna Siḏi Arebbi i nnabi umi qqaren Irmiya ḏeg yij n zman:
18 "Ṯɣuyyiṯ twaṣenneṭ zi dcar n Rama,
imeṭṭawen ḏ waṭṭas n uḥzan.
Ayṯ-Raḥil ig itrun x ṯarwa nsen,
war xisen aḏ twaƹezzan ȓaḥeqqac mmuṯen."d
Teƹqaben zi Miṣra ɣar Naṣira
19 Wami immuṯ uzeǧiḏ Hirudus ṯbedd-d ij n lmalaʼika n Siḏi Arebbi ḏi ṯerjiṯ ɣar Yusef ḏi Miṣra.
20 Ṯenna-as: "Kkar awi akiḏec aḥenjir ḏ yemmas ruḥ ɣar ṯmurṯ n Ayṯ-Israʼil, aqa mmuṯen yinni ixsen aḏ nɣen aḥenjir-a."
21 Ssenni ikkar Yusef yuwi akiḏes aḥenjir ḏ yemmas iḏweȓ ɣar ṯmurṯ n Ayṯ-Israʼil.
22 Maca wami isȓa belli azeǧiḏ Arxilawus ixȓef babas Hirudus ḏi ȓeḥkam n Yahuḏa, iggweḏ aȓ ḏin iraḥ. Ƹlaḥsab min ɣares d ibedden ḏeg yij n ṯerjiṯ nneɣnit, iruḥ ɣar jjiheṯ n ṯmurṯ n Ljalil.
23 Izḏeɣ ḏeg yij n ubilaj qqaren-as Naṣira ḥima aḏ ikemmeȓ wawaȓ iy inna Siḏi Arebbi i lʼanbiya ḏeg yij n zman: "Aqa aḏas semman Naṣiri."