Nnabi Yaḥya isewjaḏ abriḏ i Lmasiḥ
3
1 Ḏi ȓweqṯ nni iy ḏi d iḍhar Yaḥya itṭehhar iwḏan s waman itḥeddaṯ ḏi ȓexȓa n Yahuḏa.
2 Iqqar-asen: "Tubem, aqa yuḏes-d ȓmulk ujenna."
3 X Yaḥya ig inna nnabi umi qqaren Icaƹya ḏeg yij n zman:
"Ṯmijja ṯȓaɣa ḏi ȓexȓa:
Swejḏeṯ abriḏ i Siḏi Arebbi,
ggem ibriḏen nnes nican."a
4 Yaḥya arruḍ nnes xeḏmen-ṯ s cƹar n uȓɣem, ḏi nneṣṣ nnes ij n uḥezzam n yiȓem. Itett ṯmurɣi ḏ ṯamment ṯaḥurrect.
5 Tasen-d ɣares imezḏaɣ n ṯendint n Lquds ḏ yinni n Yahuḏa amen tekmeȓ ḏ marra yinni iy d innḍen i yiɣzar n Lʼurdun.
6 Teƹtarafen s ȓmuƹṣiyaṯ nsen, Yaḥya itṭehhar-iṯen s waman ḏeg yiɣzar n Lʼurdun.
7 Maca wami iẓra Yaḥya belli aṭṭas n ȓefquha ḏ ifarrisiyen ḏ iṣadduqiyen tasen-d ɣares ḥima aṯen iṭehhar s waman, inna-asen: "A ṯarwa ifiɣeran, wi ḏawem iƹeȓmen aḏ trewȓem zi lɣaḍab n Siḏi Arebbi iy d ɣa yasen?
8 Meȓa ṯtubem ḏ ṣṣaḥ, ggeṯ ȓexḏayem iṣebḥan.
9 Maci aḏ tinim ḏi nnefs nwem neccin ḏ ṯarwa n Brahim u ṣafi. Meȓa ixes Arebbi ṯarwa n Brahim, aḏ iysi izra-ya aṯen yarr ḏ ṯarwa n Brahim!
10 Aqa caqur iwjeḏ ḥima aḏ iqess iẓewran n ȓcejjur. Mkuȓ ṯacejjarṯ iy war itirwen min iṣebḥan aḏ twaqess aḏ tmenḍer ḏi ṯmessi.
11 Nec tṭehhareɣ-kenniw s waman bac aḏ tubem, maca wenni iy d ɣa yasen menbaƹd i nec, netta ijheḏ xafi. War sḏihiǧeɣ aḏas ysiɣ uȓa ḏ ṯisiȓa nnes. Netta akenniw iṭehhar s Arruḥ iqeddsen ḏ ṯmessi.
12 Ɣares ṯazzarṯ ḏeg ufus ḥima aḏ izuzzar ṯaffa nnes marra. Aḏ ismun ṯiḥebba n yirḏan ḏi ṯsrafṯ. Aḏ isḥreq min war ineffƹenb ca ḏi ṯmessi iy war ixessin ƹemmarṣ."
Nnabi Yaḥya itṭehhar Siḏna Ƹisa s waman
13 Ȓxeddnnit yusa-d Ƹisa zi ṯmurṯ n Ljalil ɣar iɣzar n Lʼurdun bac aṯ iṭehhar Yaḥya s waman.
14 Maca Yaḥya yugi, inna-as: "Nec itxeṣṣa cek iy ḏayi ɣa iṭehharen, u cek ṯusiḏ-d ɣari?"
15 Indeq-d Ƹisa inna-as: "Ɣir qbeȓ ȓexxu, ḏ manaya ig iǧan nican ḥima aḏ ikemmeȓ marra min ixes Siḏi Arebbi." Uca iqbeȓ Yaḥya.