Ibȓis itjarrab Siḏna Ƹisa
4
1 Ssenni Arruḥ n Arebbi yuwi Ƹisa ɣar ȓexȓa ḥima aṯ ijarreb Ibȓis.
2 Wami iẓumm Ƹisa arbeƹin yewm jar ǧyaȓi ḏ wussan, yusa-as-d jjuƹ.
3 Ikkar wenni itjarraben iqarreb-d ɣar Ƹisa inna-as: "Meȓa cek ḏ Mmis n Arebbi, ini-yasen i yizra-ya aḏ ḏewȓen ḏ aɣrum."
4 Indeq-d Ƹisa inna-as: "Lkitab iqqar: Bnaḏem war iddar bu s uɣrum waha, iddar s mkuȓ awaȓ ig iqqar Arebbi!"a
5 Ssenni Ibȓis yuwi Ƹisa ɣar ṯendint n Lquds, isbedd-iṯ x ṯqiccit n ṯemziḏa ṯameqqrant n wuḏayen.
6 Inna-as: "Meȓa cek ḏ Mmis n Arebbi ngez ssa ɣar ṯmurṯ, aqa Lkitab iqqar: Aḏ iweṣṣa Arebbi lmalaʼikaṯ nnes xac, ac ysint x ifassen nsent ḥima war ṯḥekkmeḏ bu uzru s uḍar nnec!"b
7 Inna-as Ƹisa: "Lkitab iqqar ƹaweḏ: War tjarrab bu Siḏi Arebbi nnec!"
8 Ssenni Ibȓis yuwi Ƹisa ɣar ṯqiccit n yij n uḏrar yuƹȓa aṭṭas. Iseḍhar-as-d marra lmemlakaṯ n ddunect ḏ ṯuṣubḥant nsent.
9 Inna-as: "Aḏac uceɣ marra ṯina meȓa ṯewḍiḏ x ifadden nnec ṯsejjḏeḏ-ayi."
10 Indeq-d Ƹisa inna-as: "Ruḥ, beƹƹeḏ-ayi a Cciṭan, aqa Lkitab iqqar: Sejjeḏ i Siḏi Arebbi nnec, ƹbeḏ-iṯ waḥḏes."
11 Ssenni ibeƹƹeḏ xas Ibȓis. Lmalaʼikaṯ usint-id, niṯenti tsexxarent x Ƹisa.
Siḏna Ƹisa itȓaɣa-d i imeḥḍaren nnes imezwura
12 Wami isȓa Ƹisa belli Yaḥya aqa itwaḥebbes, iƹqeb ɣar Naṣira ɣar ṯmurṯ n Ljalil.
13 Maca war iqqim ca ḏi Naṣira, iruḥ aḏ izḏeɣ ḏeg ij ubilaj qqaren-as Kafernaḥum ig iǧan x ṭṭarf n ȓebḥar n Ljalil, jjiheṯ n ṯmurṯ n Zabulun ḏ Naftalim.
14 Amenni ikemmeȓ wawaȓ iy inna Siḏi Arebbi i nnabi umi qqaren Icaƹya ḏeg yij n zman:
15 "Ṯamurṯ n Zabulun ḏ ṯmurṯ n Naftalim,
ṯinni umi qqaren Ljalil,
x ubriḏ n ȓebḥar ḏi ccarq n yiɣzar n Lʼurdun,
mani iy zeddɣen uȓa ḏ yinni war iǧin ḏ uḏayen.
16 Ccaƹb n ṯmurṯ-a iy itiƹicen ḏi ṯaǧest,
aḏ iẓer ṯfawṯ ḏ ṯameqqrant.
Yinni izeddɣen ḏi ṯaǧest n ȓmewṯ
aḏasen-d imeḍhar nnur."c
17 Zi ssenni ibḏa Ƹisa itḥeddaṯ iqqar-asen: "Tubem, aqa yuḏes-d ȓmulk ujenna."
18 Wami Ƹisa iggur x ṭṭarf n ȓebḥar n Ljalil, iẓra ṯnayen n wawmaṯen niṯni ḏ iḥeǧaqen n iseȓman. Simƹan umi qqaren Buṭrus ḏ Andrawus umas. Neṭṭren ṯracca ḏi ȓebḥar.
19 Inna-asen Ƹisa: "Araḥem-d akiḏi aqa ȓexxu akenniw arreɣ ḏ iḥeǧaqen n yiwḏan."
20 Ȓxeddnnit semḥen ḏi ṯracciwin nsen, ḏfaren-ṯ.
21 Iƹḏu aɣiȓin, iẓra ṯnayen n wawmaṯen nneɣnit, Yaƹqub ḏ Yuḥanna ṯarwa n yij n uryaz umi qqaren Zabdi. Aqa-ṯen ḏi ṯɣarrabut akeḏ babaṯsen ƹeddȓen ṯiracciwin nsen. Iȓaɣa-yasen-d Ƹisa,
22 ḏeg umcan semḥen ḏi ṯɣarrabut nsen ḏ babaṯsen, ḏfaren Ƹisa.
23 Iggur Ƹisa ḏi marra ṯimura n Ljalil iseȓmaḏ ḏi ṯemziḏawin n wuḏayen itḥeddaṯ s Lʼinjil n ȓmulk n Arebbi. Isgenfa marra ȓehȓacaṯ ḏ ddiƹan n ddat ḏeg yiwḏan.
24 Iffeɣ ȓexbar nnes ḏi Surya amen tekmeȓ. Tawyen-d ɣares marra yinni iheȓcen tƹeddaben s lʼanwaƹ n ȓehȓacaṯ ḏ ȓeḥȓiqaṯ, mkuȓ imaryaḥen ḏ imejnunen ḏ inecrufen, netta isgenfa-ṯen.
25 Ḏfaren Ƹisa aṭṭas n ȓɣaci zi Ljalil ḏ iqlim umi qqaren Dikaplis ḏ ṯendint n Lquds ḏ Yahuḏa ḏ jjiheṯ n ccarq n yiɣzar n Lʼurdun.