Aḥeddeṯ ḏeg uḏrar
5
1 Wami iẓra qaƹ ȓɣaci nni, yuȓi ɣar uḏrar iqqim usin-d ɣares imeḥḍaren nnes.
2 Ibḏa iseȓmaḏ-iṯen, inna-asen:
3 "Ssaƹḏ nsen i yinni iǧan ḏ ȓmusakin ḏeg arruḥ nsen, aqa ȓmulk ujenna i niṯni.
4 Ssaƹḏ nsen i yinni ixeyyqen, aqa aḏ twacejjƹen.
5 Ssaƹḏ nsen i yinni iǧan ḏ drawec, aqa aḏ warṯen ddunect.
6 Ssaƹḏ nsen i yinni iǧuzen iffuḏen ɣar min iǧan nican, ȓaḥeqqac niṯni aḏ jjawnen.
7 Ssaƹḏ nsen i yinni ireḥḥmen, aqa aṯen irḥem Arebbi uȓa ḏ niṯni.
8 Ssaƹḏ nsen i yinni ɣar iǧa uȓ ḏ acemȓaȓ, aqa aḏ ẓren Arebbi.
9 Ssaƹḏ nsen i yinni iṣeǧḥen iwḏan, aqa aṯen semman amecnaw ṯarwa n Arebbi.
10 Ssaƹḏ nsen i yinni itwaƹeddaben x ȓesbab n min iǧan nican, aqa ȓmulk ujenna i niṯni.
11 Ssaƹḏ nwem meȓa tzawaren-kenniw, ƹeddben-kenniw, niɣ nnan ḏaywem ȓƹib s ixarriqen x ȓesbab inu.
12 Ḏeḥceṯ, farḥeṯ. Aqa ɣarwem ij n lʼajar ḏ ameqqran ḏeg ujenna, ȓaḥeqqac amenni itwaƹeddaben lʼanbiya iy ddaren qbeȓ nwem.
Ȓemȓeḥ ḏ ṯfawṯ
13 Ḏ kenniw iy iǧan ḏ ȓemȓeḥ ṯaṣebḥant n ṯmurṯ, maca meȓa iruḥ-as lmaḏaq nnes, mamc ḏas ɣa negg aḏas-ṯ-iḏ narr? Aqa war ṯṣeǧeḥ i walu, at inḍer ɣar barra axas ƹeffsen yiwḏan.
14 Kenniw ḏ ṯfawṯ n ddunect, ij n ṯendint iy iǧan x uḏrar war ṯzemmer aḏ teqqim ṯnuffer.
15 Iwḏan war sreqqin bu ȓqendiȓ ḥima axas qeȓben can uqnuc. Lƹaks, teggen-ṯ x ȓmarfaƹ ḥima aḏ yuc ṯfawṯ i marra ug iǧan ḏi ṯeddarṯ.
16 Ammu, jjem ṯfawṯ nwem ṯceƹƹeȓ i yiwḏan, ḥima aḏ ẓren ȓexḏayem nwem ṯiṣebḥanin aḏ ḥemḏen Babaṯwem iǧan ḏeg ujenna.
Ccariƹa
17 War ṯfekkarem ca belli usiɣ-d ḥima aḏ qḍiɣ x Ccariƹa n Musa ḏ min nnan lʼanbiya. War d usiɣ ca axasen qḍiɣ, usiɣ-d aḏ kemmȓeɣ awaȓ nsen.
18 Aqa tesȓam ȓḥaqq: Aȓ ɣa itwakkes ujenna ḏ ṯmurṯ uȓa ḏ ij n ȓḥarf niɣ ij n ṯneqqiṭ aḏ tekkes zi Ccariƹa, aȓ ɣa ikemmeȓ kuȓci.
19 Marra uw ɣa iḥarfen ij n ȓuṣiyeṯ ḏ ṯamezyant zi Ccariƹa, uca aḏ iseȓmeḏ i yiwḏan x min itegg netta, aḏ yiȓi ḏ amezyan s waṭṭas ḏi ȓmulk ujenna. Maca wen ɣa iṭaƹen i Ccariƹa igga zzayes, uca iseȓmeḏ i yiwḏan aḏ ggen am netta, aḏ yiȓi ḏ ameqqran s waṭṭas ḏi ȓmulk ujenna.
20 Aqa qqareɣ-awem: Meȓa war ṯṭiƹem i min iqqar Arebbi ktar zi min teggen imseȓmaḏen n Ccariƹa ḏ ȓḥizeb n ifarrisiyen, ƹemmarṣ aḏ taḏfem ȓmulk ujenna.
Aƹṣeb
21 Aqa ṯesȓim ḏi Tuwrat belli itwanna-yasen i ȓejḏuḏ nwem: War neqq ca, aqa marra wenni iy ɣa inɣen ḥadd aḏ itwaḥkem.a
22 Maca nec qqareɣ-awem: Marra uw ɣa iƹaṣben x wumas aḏ itwaḥkem. Wen ɣa yinin i wumas: Ay aɣyuȓ, aḏ itwaḥkem ḏi lmaḥkama ṯameqqrant. Ḏ wen ɣa yinin i wumas: Ay afɣuȓ, isḏaheǧ aḏ iraḥ ɣar ṯmessi n jahennama.
23 Meȓa ṯruḥeḏ aḏ tqeddmeḏ ḏbiḥeṯ i Arebbi, uca ṯfekkareḏ ij n wumac ixeyyeq xac,
24 ejj ḏbiḥeṯ nnec ḏinni ɣar ȓmeḏbaḥ, ruḥ amezwaru aḏ tṣeȓḥeḏ akeḏ wumac. Ƹaḏ iy d ɣa ṯḏewȓeḏ aḏ tqeddmeḏ ḏbiḥeṯ i Arebbi.
25 Meȓa ithem-icek can ḥadd umbaƹd uwin-ac-d lʼistidƹa ḥima akiḏes ṯraḥeḏ ɣar lmaḥkama, ƹḏeȓ akiḏes ḏeɣya ḏeg ubriḏ, bac war c isiwwiḍ ɣar ȓqaḍi, ȓqaḍi ac yuc i umxazni, uca ac neḍren ḏi ȓeḥbes.
26 Aqa tesȓiḏ ȓḥaqq: War teffɣeḏ ssenni aȓ ɣa ṯxeǧseḏ ṣuldi aneggaru.
Azna
27 Ṯesȓim ḏi Tuwrat belli itwanna ḏeg yij n zman: War zenna ca.b
28 Maca nec qqareɣ-awem: Marra wenni ixezzaren ɣar can ṯemɣarṯ s wuȓ nnes, itwaḥsab izna.
29 Meȓa ṯiṭṭ nnec ṯafusiṯ tsebbab-ac ḏi can ȓefḍiḥeṯ, qȓeƹ-it nḍer-it xak. Meȓa ṯxesreḏ ij n ṭṭarf zi ddat nnec, ḥsen-ac zi meȓa ṯmenḍer ddat nnec amen tekmeȓ ḏi jahennama.
30 Meȓa fus nnec afusi isebbab-ac ḏi can ȓefḍiḥeṯ, qess-iṯ nḍer-iṯ xak. Meȓa ṯxesreḏ ij n ṭṭarf zi ddat nnec, ḥsen-ac zi meȓa ṯruḥ ddat nnec amen tekmeȓ ḏi jahennama.
Aǧef
31 Aqa itwanna ḏeg yij n zman ḏi Tuwrat ƹaweḏ: Wenni ɣa iǧfen i ṯemɣarṯ nnes, aḏas yuc ṯabrat nnes.c
32 Maca nec qqareɣ-awem: Marra wenni ɣa iǧfen i ṯemɣarṯ nnes, amen war ṯezni, itarra-t ṯezna iƹni meȓa ṯƹaweḏ ȓemȓac. Wenni iy ɣa imeȓcen ṯenni iǧfen, izna.
Ṯijaǧiṯ
33 Aqa ṯesȓim ḏi Tuwrat ƹaweḏ belli itwanna i ȓejḏuḏ nwem: War txalaf bu ṯjaǧiṯ nnec, kemmeȓ ṯjaǧiṯ nnec iy ṯuciḏ zzaṯ i Arebbi.d
34 Maca nec qqareɣ-awem: War tjaǧam ƹemmarṣ: waxxa s ujenna ȓaḥeqqac netta ḏ lƹarc n Arebbi;
35 uȓa s ṯmurṯ ȓaḥeqqac xas itmersen iḍaren nnes; waxxa s ṯendint n Lquds ȓaḥeqqac nettaṯ ḏ ṯandint n uzeǧiḏ ameqqran.
36 War tjaǧa bu s uzeǧif nnec, ȓaḥeqqac war ṯzemmreḏ aḏ tarreḏ ij uzuṭṭu ḏ acemȓaȓ niɣ ḏ abercan.
37 Aḏ yiȓi wawaȓ nwem: Wah, niɣ lla. Marra min ɣa ṯinim ḏ zziyada, aẓwer nnes zi Cciṭan.
Xsem ȓƹaḏyan nwem
38 Aqa ṯesȓim ḏi Tuwrat min itwannan ḏeg yij n zman: Wenni ɣa ikksen ṯiṭṭ i ḥadd, aḏas kksen ṯiṭṭ. Wenni ɣa ikksen ṯiɣmest i ḥadd, aḏas kksen ṯiɣmest.e
39 Maca nec qqareɣ-awem: War tƹarraḏem ca i wenni iǧan ḏ aƹeffan. Wenni c ɣa iseqqȓen ɣar uɣembub jjihet afusi ḏewwaȓ-as jjihet nneɣni.
40 Wenni ixsen ac yawi ɣar craƹ ḥima aḏac yawi ṯaqmijat, uc-as uȓa ḏ azeǧab nnec.
41 Meȓa can ḥadd zi ȓmexzen igga xak bezzez aḏ teysiḏ ȓeḥmeȓ x yij n kilumit, ysi-ṯ cek x ṯnayen kilumit.
42 Uw ḏac ɣa ittaren, uc-as. Wenni d ɣa yasen ɣarek irezzu aḏ irḍeȓ war ṯ tarra ixwa.
43 Aqa ṯesȓim ḏi Tuwrat min itwannan ḏeg yij n zman: Aḏ texseḏ ajjar nnec, aḏ tƹiffeḏ ȓaƹḏu nnec.f
44 Maca qqareɣ-awem nec: Xsem ȓƹaḏyan nwem, ttareṯ i Arebbi x yinni kenniw itƹeddaben,
45 ḥima aḏ tiȓim ḏ ṯarwa n Babaṯwem iǧan ḏeg ujenna. Ȓaḥeqqac itegg ṯfuct x yinni iṣebḥanen ḏ yinni iƹeffanen. Itegg anẓar x yinni iteggen ȓxir ḏ yinni iteggen ccerr.
46 Meȓa ṯexsem ɣir yinni kenniw iy texsen, man lʼajar iy ɣarwem kenniw? Ma war iǧi amenni iy teggen uȓa ḏ iƹeccaren?g
47 Meȓa tseǧamem ɣir x imeddukaȓ nwem, iwa min teggem ḏ zziyada? Aqa uȓa ḏ ȓkuffar teggen manayenni!
48 Iȓim nican qaƹ, amecnaw mamc iǧa Babaṯwem ḏeg ujenna.