Ṣṣaḏaqa
6
1 Ɣarwem, war teggem ȓxir zzaṯ i yiwḏan ḥima akenniw ẓren. Niɣ, war ɣarwem itiȓi bu lʼajar zi Babaṯwem iǧan ḏeg ujenna.
2 Ƹlaḥsab manaya, xmi ɣa ṯṣeḏqeḏ i ḥadd, war zzayes tberraḥ ca ḏi ȓbuq amecnaw mammec teggen lmunafiqin ḏi ṯemziḏawin ḏ znaqi bac azzaysen semɣaren yiwḏan. Aqa tesȓam ȓḥaqq: War ɣarsen itiȓi bu lʼajar.
3 Maca cek xmi ɣa ṯṣeḏqeḏ i ḥadd, ixeṣṣa fus nnec aẓeȓmaḍ war itessen min iticc ufusi,
4 ḥima ṣṣaḏaqa nnec aḏ ttwagg ḏi ṯnufra. Ḏ Babac Arebbi, ig iẓerren min itwagg s ṯnufra, aḏac yuc lʼajar.
Ṯẓaǧiṯ
5 Xmi ɣa ṯeẓẓaǧem, war tiȓim ca am lmunafiqin iy texsen aḏ ẓẓaǧen amen bedden ḏi ṯemziḏawin ḏ ṯɣemmura n znaqi ḥima aṯen ẓren yiwḏan. Aqa tesȓam ȓḥaqq: War ɣarsen itiȓi bu lʼajar.
6 Maca cek xmi ɣa ṯeẓẓaǧeḏ, aḏef ɣar uxxam nnec qqen xak ṯawwarṯ, ẓẓaǧ i Babac iǧan mani war ṯ itwiȓi ḥadd. Babac ig itwaȓan ȓexḏayem nnec ḏi ṯnufra ac ijaza.
7 War tẓaǧim ca s wawaȓen war ɣarsen bu ȓmaƹna amecnaw mammec teggen ȓegnus. Ḥessben meȓa qqaren awaȓen aṭṭas, Arebbi aḏasen istajeb.
8 War teggem ca am niṯni ȓaḥeqqac Arebbi issen min ṯeḥḏajem qbeȓ iy ḏas ɣa ṯettarem.
9 Ha mammec iy ɣa ṯeẓẓaǧem:
A Babaṯneɣ iǧan ḏeg ujenna,
nxes aḏ yiȓi yisem nnec ḏ ameqqran.
10 Aḏ d yas ȓmulk nnec,
aḏ ggen ȓxaḍar nnec ḏi ṯmurṯ,
mamc teggen ḏeg ujenna.
11 Uc-aneɣ kuȓ nhar aɣrum iy ɣa neḥḏaj.
12 Ɣfar-aneɣ ȓmuƹṣiyaṯ nneɣ,
amecnaw mammec nsemmeḥ neccin
i yinni iy kiḏneɣ ixeṭṭan.
13 War ḏaneɣ tegg ca ḏi ȓemḥayen,
maca senjem-aneɣ zi ccerr.
{Ȓaḥeqqac ȓmulk iǧan nnec, ḏ ṯizemmar,
ḏ lƹaḍama i cek i ȓebda. Amin.}
14 Meȓa ṯsemmḥem i yiwḏan dnub iy ḏawem teggen, Babaṯwem iǧan ḏeg ujenna uȓa ḏ netta aḏawem iɣfar.
15 Meȓa war ṯsemmḥem i yiwḏan iy kiḏwem ixeṭṭan, Babaṯwem uȓa ḏ netta war ḏawem iɣeffar x dnub nwem.
Aẓummi
16 Xmi ɣa ṯẓummem, war teggem ca amecnaw mammec teggen lmunafiqin. Txeyyaqen ḥima marra iwḏan aṯen ssnen belli ẓummen. Aqa tesȓam ȓḥaqq: War ɣarsen itiȓi bu lʼajar.
17 Maca cek xmi ɣa ṯẓummeḏ, sireḏ aɣembub nnec mceḍ acewwaf nnec,
18 ḥima war tessnen yiwḏan belli ṯẓummeḏ. Maca Siḏi Arebbi iǧan mani war ṯ itwiȓi ḥadd, netta ig issnen. Siḏi Arebbi ig itwaȓan ḏi ṯnufra min txeddmeḏ, ac ijaza.
War kessim bu umnus
19 War smunaṯ ca ȓkenz nwem ḏi ddunect mani irecca ḏ mani ṯ tett ṯzura, mani ǧan iceffaren ccaṯen nqabeṯa tacaren.
20 Maca smuneṯ ȓkenz nwem ḏeg ujenna mani war irecci ca ḏ ṯzura war ṯ tett ca, mani war ǧin iceffaren ccaṯen nqabeṯ, tacaren.
21 Aqa mani iǧa ȓkenz nnec, ḏinni iy ɣa yiȓi wuȓ nnec.
22 Ṯiṭṭawin amecnaw ṯfawṯ i ṯuḏarṯ nnec. Meȓa ṯiṭṭawin nnec ṣeḥḥant, aɣarek ṯiȓi ṯfawṯ marra ḏi ṯuḏarṯ nnec.
23 Maca meȓa ṯiṭṭawin nnec war ǧint bu mliḥ, marra ṯuḏarṯ nnec aḏayes ṯiȓi ṯaǧest. Meȓa ṯfawṯ iy ḏayec ṯeḏwer ḏ ṯaǧest, cḥaȓ iy ɣa ṯiȓi ṯubbarcent n ṯaǧest ḏayec.
24 War izemmer can ijjen aḏ yiȓi ḏ axeddam ɣar ṯnayen n siyaḏis. Ima aṯ iƹiff ijjen, unneɣnit aṯ ixes. Niɣ aḏ irseq ḏeg yijjen, unneɣnit aṯ iḥeggar. Aḏ txeḏmem i Arebbi niɣ i ȓewsex n ddunect, maca war iǧi bu s ṯnayen.
25 X manaya, qqareɣ-awem: War kessim bu umnus i ṯuḏarṯ nwem ƹlaḥsab min ɣa ṯeccem niɣ min ɣa ṯeswem, niɣ ḏ arruḍ iy ɣa ṯeḥḏajem i ddat nwem. Ṯuḏarṯ, ma war tseggwi ktar zi macca? Ddat, ma war tseggwi ktar zeg warruḍ?
26 Xzarem ɣar yijḍaḍ ujenna. War zerrƹen, war mejjaren, war xezznen ḏi ṯesȓafin. Maca Babaṯwem iy iǧan ḏeg ujenna iy ḏasen iticcen aḏ ccen. Kenniw, ma war tseggwim ktar zeg waṭṭas zeg yijḍaḍ?
27 Meȓa can ijjen zzaywem iysi amnus, ma izemmer aḏ irni ṯsaƹat ḏi ȓƹumur nnes?
28 Mayemmi tekssim amnus i warruḍ? Xzarem mammec imɣer nwar ḏi ȓexȓa, war ixeddem war itxeyyiḍ.
29 Maca qqareɣ-awem: Uȓa ḏ azeǧiḏ Suliman, marra min ɣares ḏ agȓa, amenni ƹemmarṣ war ɣares arruḍ ḏ aṣebḥan amecnaw ij n nwar.
30 Meȓa Arebbi iticc arruḍ i arbiƹ n ȓexȓa ig iǧan nhara aḏ iḥreq ṯiwecca, ma war akiḏwem itegg ktar kenniw? Lʼiman nwem ḏ uqlil.
31 War kessim bu umnus aḏ tinim, min ɣa necc? Niɣ, min ɣa nsew? Niɣ, mammec ɣa nreḍ arruḍ?
32 Marra manayenni rezzun-ṯ ȓegnus. Aqa Babaṯwem iǧan ḏeg ujenna issen belli ṯeḥḏajem ṯimesȓayin nni.
33 Rezzuṯ ḏ amezwaru x ȓmulk n Arebbi ḏ ṯuḏarṯ ig iǧan nican, ssenni ṯimesȓayin nni marra aḏawem tmernint.
34 War kessim bu umnus i min ɣa iweqƹen ṯiwecca, aqa ṯiwecca aḏ iysi nniṯ amnus i cɣeȓ nnes. Ȓhem iy d iḍehharen gi nhar aḏ ikfa ɣir nhar nni.