War tƹeyyabem bu yiwḏan
7
1 War tƹeyyabem ḥadd ḥima Arebbi war kenniw itƹeyyib.
2 Mamc ɣa ṯƹeyybem amenni i kenniw iy ɣa iƹeyyeb Arebbi. Ȓaƹbar iy ṯsexḏamem ḏ wenni iy kiḏwem ɣa isexḏem Arebbi.
3 Mayemmi tseḥqareḏ ȓum ig iǧan ḏi ṯiṭṭ n wumac, cek tettuḏ akeccuḍ ig iǧan ḏi ṯiṭṭ nnec?
4 Mammec ɣa ṯzeƹmeḏ aḏ tiniḏ i wumac: Ejj-ayi aḏac d kkseɣ ȓum zi ṯiṭṭ nnec, u cek tejjiḏ akeccuḍ ḏi ṯiṭṭ nnec?
5 A lmunafiq, kkes ḏ amezwaru akeccuḍ zi ṯiṭṭ nnec. Ȓxeddnnit aḏ twaȓiḏ mliḥ ḥima aḏ tekkseḏ ȓum zi ṯiṭṭ n wumac.
6 War ticcem min iqeddsen n Arebbi i iqzinen ḥima war ɣarwem d teƹqiben akenniw mezzqen. War neṭṭrem jjuhar nwem zzaṯ i yiȓfan ḥima war xasen ƹeffsen.
Ṯẓaǧiṯ iy ɣa istajben
7 Ttarem, aḏawem ucen. Rezzum, aḏ tafem. Sqerqbem, aḏawem rezmen.
8 Minzi marra wenni ɣa ittaren aḏas immuc. Wenni ɣa irzun, aḏ yaf. Aḏ terzem ṯewwarṯ i wenni ɣa isqerqben.
9 Meȓa can ijjen zzaywem ittar-as mmis aɣrum, ma aḏas yuc azru ḏeg umcan n uɣrum? Lla!
10 Meȓa ittar-as asȓem, ma aḏas yuc fiɣer? Lla!
11 Meȓa kenniw ḏ iƹeffanen ṯessnem aḏ tucem i ṯarwa nwem min iǧan ḏ aṣebḥan, Babaṯwem ig iǧan ḏeg ujenna aḏ igg ktar: iticc min iǧan ḏ aṣebḥan i yinni ḏas ittaren.
12 Ggeṯ i yiwḏan min ṯexsem aḏawem ggen. Manaya ḏ ȓmaƹna n Ccariƹa n Musa ḏ ttaƹalim n lʼanbiya.
Ṯawwarṯ n ṯuḏarṯ
13 Aḏfeṯ zi ṯewwarṯ iḥṣaren, minzi ṯawwarṯ itawyen ɣar jahennama ṯiriw aṭṭas, abriḏ nnes isheȓ. Aṭṭas iy zzayes iƹeddun.
14 Maca ṯawwarṯ iḥṣaren ḏ ubriḏ iqesḥen iy tawyen ɣar ṯuḏarṯ. Ḏrus yinni ɣa iƹḏun ssenni.
15 Ḥḍam ixef nwem zeg yinni itarran ixef nsen ḏ lʼanbiya. Tasen-d ɣarwem amecnaw iḥuȓiyen maca ḏeg wuȓawen nsen ḏ uccanen iweƹren.
16 Aṯen ṯessnem s ȓefƹayeȓ nsen. War ȓeqḏen bu ṯazarṯ zeg isennanen. War tekksen aḍiȓ zi ṯzeggwarṯ.
17 Ṯacejjarṯ ṯaṣebḥant tarew min iṣebḥan. Ṯacejjarṯ war iḥȓin tarew min war iḥȓin.
18 Ṯacejjarṯ ṯaṣebḥant war tirew bu min war iḥȓin. Ṯenni war iḥȓin war tirew bu min iṣebḥan.
19 Mkuȓ ṯacejjarṯ iy war itirwen min iṣebḥan aḏ twaqess aḏ tmenḍer ḏi ṯmessi.
20 Ammu s ȓefƹayeȓ nsen iy ɣa ṯessnem i yinni itarran ixef nsen ḏ l'anbiya.
21 Ma aḏ aḏfen ȓmulk ujenna marra yinni iy ḏayi iqqaren a Siḏi, a Siḏi? Lla! War ṯ tiḏfen ɣir yinni iteggen min ixes Baba iǧan ḏeg ujenna.
22 Ḏi Yewm Lḥisab ḏ Lƹiqab aṭṭas iy ḏayi ɣa inin: A Siḏi, a Siḏi, yak s lḥikma nnec iy zi nseȓmeḏ i yiwḏan? Yak s lḥikma nnec iy zi nsufeɣ jnun? Yak s lḥikma nnec iy zi negga ȓaƹjayeb?
23 Ȓxeddnnit aḏasen iniɣ: Nec ƹemmarṣ war kenniw ssineɣ. Beƹƹḏem xafi a yinni iteggen ccerr!
Ȓebni n ṣṣaḥ
24 Marra wenni itsȓan i wawaȓ inu ixeddem zzayes, netta am yij n bnaḏem ḏ amiɣis ibna ṯaddarṯ nnes x uzru.
25 Yuwṯa unẓar, ḥemȓen-d iɣezran, iṣuḍ arriḥ aṭṭas isenhezz ṯaddarṯ. Waxxa amenni war ṯnehḏem ca ȓaḥeqqac ṯebna x dsas n uzru.
26 Marra wenni itsȓan i wawaȓ inu war zzayes itegg ca, netta am yij n ufɣuȓ ibna ṯaddarṯ nnes x yijḏi.
27 Yuwṯa unẓar, ḥemȓen-d iɣezran, iṣuḍ arriḥ aṭṭas isenhezz ṯaddarṯ. Ȓxeddnnit ṯnehḏem, ṯeqqim ḏ ȓxarbeṯ."