Siḏna Ƹisa isgenfa ijjen ihȓec s jḏam
8
1 Wami d ihwa Ƹisa zeg uḏrar ḏfaren-ṯ aṭṭas n ȓɣaci.
2 Iqarreb-d ɣares ijjen ḏayes jḏam, isejjeḏ-as inna-as: "A Siḏi, meȓa ṯexseḏ, cek ṯzemmreḏ aḏayi ṯeṣfiḏ."
3 Isers xas Ƹisa fus nnes iḥaḏa-ṯ inna-as: "Nec xseɣ aḏ tgenfiḏ." Ḏeg umcan igenfa umehȓuc nni zi jḏam nnes.
4 Inna-as Ƹisa: "Xzar, war txebbar ḥadd. Ruḥ ɣar ȓefqih seḍḥar-as ixef nnec. Egg ṣṣedqeṯ iy zi iweṣṣa Musa ḥima aḏ cehḏen x min iweqƹen."
Lʼiman n ij n uƹaskari ḏ ameqqran n arrumanus
5 Wami yuḏef Ƹisa ɣar Kafernaḥum, yusa-d ɣares ij n uƹaskari ḏ ameqqran n arrumanus. Iḥeccem-iṯ,
6 inna-as: "A Siḏi, axeddam inu itnezbar aṭṭas ḏi ṯassuṯ, aqa-ṯ ɣari ḏi ṯeddarṯ ḏ anecruf."
7 Inna-as Ƹisa: "Aḏ raḥeɣ aṯ sgenfiɣ."
8 Indeq-d uƹaskari nni ameqqran inna-as: "Ahya a Siḏi, nec war sḏiheǧeɣ aḏ taḏfeḏ ɣar ṯeddarṯ inu. Ini ɣir ij n wawaȓ ṣafi, aḏ igenfa uxeddam inu.
9 Uȓa ḏ nec s yixef inu ɣari yinni xafi iḥekkmen. Ɣari ȓƹaskar x ufus inu iy xef ḥekkmeɣ. Aḏ iniɣ i wa: Ruḥ, aḏ iraḥ. Aḏ iniɣ i unneɣnit: Araḥ-d, aḏ d yas. Aḏ iniɣ i uxeddam inu: Egg ṯa, at igg."
10 Wami isȓa Ƹisa i manaya, itƹejjeb uca inna-asen i yinni ṯ iḏfaren: "Aqa tesȓam ȓḥaqq: Yinni iǧan ḏ uḏayen war ḏaysen ufiɣ lʼiman imɣer aṭṭas am wa!
11 Aqa qqareɣ-awem: Aḏ d asen aṭṭas n yiwḏan zi ccarq ḏ ȓɣarb aḏ qqimen akeḏ Brahim ḏ Isḥaq ḏ Yaƹqub ɣar missa ḏi ȓmulk ujenna.
12 Maca yinni tuɣa ixeṣṣa aḏ iȓin ḏi ȓmulk n Arebbi, aḏ menḍren ɣar barra ḏi ṯaǧest mani ɣa iȓin imeṭṭawen ḏ uɣeẓẓaẓ n ṯeɣmas."
13 Inna-as Ƹisa i uƹaskari nni: "Ruḥ! Aɣarec yiȓi anect min ṯumneḏ." Ȓxeddnnit igenfa uxeddam nni.
Siḏna Ƹisa isgenfa ṯaḏeggwaȓṯ n Buṭrus
14 Wami yuḏef Ƹisa ɣar ṯeddarṯ n Buṭrus, yufa ṯaḏeggwaȓṯ n Buṭrus ḏi ṯassuṯ ḏayes ṯimessi.
15 Ɣir iḥaḏa-t s ufus uca ṯeffeɣ-it ṯmessi, ṯekkar ṯebḏa tsexxar xas.
16 Ɣar uƹecci, uwin-d ɣares aṭṭas n yinni ḏi ǧan jnun. Isufuɣ zzaysen jnun s yij n wawaȓ, isgenfa marra yinni iheȓcen,
17 ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yij n zman: "Iysi xaneɣ ȓeḥriqaṯ nneɣ, irbu ȓehȓacaṯ nneɣ."a
Yinni iḏeffaren Siḏna Ƹisa
18 Wami iẓra Ƹisa aṭṭas n yiwḏan iy ḏas d innḍen, yumar imeḥḍaren nnes inna-asen: Yallah a neẓwam ɣar ujemmaḍ-in.
19 Iqarreb-d ɣares ij umseȓmaḏ n Ccariƹa inna-as: "A lmuƹallim, ac ḏfareɣ mani ma ṯruḥeḏ."
20 Inna-as Ƹisa: "Ucannen ɣarsen ifran nsen, ijḍaḍ ɣarsen ȓaƹwac nsen, maca Mmis n bnaḏem war ɣares bu can umcan mani ɣa issummeṯ azeǧif nnes."
21 Ƹaweḏ inna-as ij umeḥḍar nnes: "A Siḏi, smeḥ-ayi aḏ raḥeɣ aḏ neḍȓeɣ baba."
22 Inna-as Ƹisa: "Ḏfar-ayi-d, ejj yinni immuṯen aḏ neḍȓen imettinen nsen."
Siḏna Ƹisa ihedden ȓebḥar
23 Inya Ƹisa ḏi ṯɣarrabut, ḏfaren-ṯ imeḥḍaren nnes.
24 Bȓa ȓexbar, ṯekkar-d ij n lƹaṣifa ṯejheḏ aṭṭas ḏi ȓebḥar ṯebḏa ṯɣarrabut tƹemmar s waman. Ƹisa, netta iṭṭeṣ.
25 Qarrben ɣares imeḥḍaren, sfaqen-ṯ nnan-as: "A Siḏi, nejja-yaneɣ aqa netmetta!"
26 Inna-asen Ƹisa: "Mayemmi teggwḏem qaƹ ammu? Lʼiman nwem ḏ uqlil." Uca ikkar isbedd arriḥ ḏ ȓemwaj, irsa ȓḥaȓ.
27 Tƹejjben iryazen nni, nnan: "Min iƹna siyyed-a wanita? Uȓa ḏ arriḥ ḏ ȓebḥar tṭaƹan-as!"
Ṯnayen ḏaysen jnun ḏi ṯmurṯ n ijariṯiyen
28 Wami yiweḍ Ƹisa ɣar ujemmaḍ-in n ȓebḥar ɣar ṯmurṯ n ijariṯiyen, ȓqan-ṯ-iḏ ṯnayen n yiwḏan ḏaysen jnun ffɣen-d zeg imeḍȓan mani zeddɣen. Qesḥen, ccaṯen, war izemmer ḥadd axasen ikk ḏeg ubriḏ nni.
29 Sɣuyiwen qqaren: "Min zzayneɣ ṯexseḏ a Mmis n Arebbi? Ma ṯusiḏ-d aḏaneɣ ṯƹeddbeḏ qbeȓ i ȓweqṯ?"
30 Ɣar ȓeggwaj cwayt, ṯerwes ij n ṯḥimerṯ ḏ ṯameqqrant n yiȓfan.b
31 Ttaren jnun nni zi Ƹisa nnan-as: "Meȓa ṯsufɣeḏ-aneɣ, sekk-aneɣ ɣar ṯḥimerṯ-in n yiȓfan ḥima aḏaysen naḏef."
32 Inna-asen Ƹisa: "Ruḥem!" Ffɣen zi ṯnayen nni n yiwḏan uḏfen ḏeg yiȓfan. Ṯehwa ṯḥimerṯ nni marra ḏi ṯeysarṯ ɣar ȓebḥar mmuṯen ḏeg waman.
33 Yinni irewsen rewȓen ruḥen ɣar ubilaj, sufɣen ȓexbar ḏinni x marra min iweqƹen ḏ min iweqƹen i yiwḏan nni ḏi ǧan jnun.
34 Ȓxeddnnit ffɣen-d marra iwḏan n ubilaj bac aḏ ȓqan Ƹisa. Wami ṯ ẓrin, ḥeccmen-ṯ ḥima axasen ibeƹƹeḏ zi jjiheṯ nsen.