Siḏna Ƹisa isgenfa ij n unecruf
9
1 Inya Ƹisa ḏi ṯɣarrabut, iqḍeƹ ȓebḥar iƹqeb ɣar dcar nnes.
2 Can yiwḏan uwin-d ɣares ij n uryaz mmuṯen-as iḍaren, izzeȓ ḏi ṯassuṯ nnes. Wami iẓra Ƹisa lʼiman nsen, inna-as i unecruf nni: "War teggweḏ ca a mmi, twaɣfarent-ac ȓmuƹṣiyaṯ nnec."
3 Ḏinni can imseȓmaḏen n Ccariƹa, nnan ḏeg wuȓ nsen: "Bnaḏem-a iqqar awaȓ war iḥȓin x Arebbi."
4 Ƹisa issen minḏi tfekkaren, inna-asen: "Mayemmi tfekkarem ammu ḏi min war iḥȓin?
5 Min isehȓen aṭṭas as iniɣ i bnaḏem-a, Twaɣfarent-ac ȓmuƹṣiyaṯ nnec, niɣ Kkar aḏ tuyureḏ?
6 Xseɣ aḏ tessnem belli Mmis n bnaḏem ɣares ssulṭa x ṯmurṯ ḥima aḏ iɣfar ȓmuƹṣiyaṯ." Uca inna-as i unecruf nni: "Kkar, ysi ṯassuṯ nnec, ruḥ aḏ trewwḥeḏ ɣar ṯeddarṯ nnec!"
7 Ikkar uryaz nni irewweḥ.
8 Wami ẓrin yiwḏan manayenni, ggwḏen ḥemḏen Arebbi x ssulṭa iy ḏasen iticc i yiwḏan.
Siḏna Ƹisa itȓaɣa-d i Matta
9 Wami yuyur ssenni Ƹisa, iẓra ij n uryaz qqaren-as Matta iqqim ḏeg umcan mani jemmƹen ȓaƹcur. Inna-as Ƹisa: "Ḏfar-ayi-d." Ikkar Matta, iḏfar-iṯ.
10 Iqqim Ƹisa ḏi ṯeddarṯ n Matta, itett netta ḏ imeḥḍaren nnes. Aṭṭas n iƹeccaren ḏ yinni iƹṣan qqimen tetten akiḏes.
11 Wami ẓrin ȓḥizeb n ifarrisiyen manayenni kkaren nnan-asen i imeḥḍaren nnes: "Mayemmi itett lmuƹallim nwem akeḏ iƹeccaren ḏ yinni iƹṣan?"
12 Isȓa-yasen Ƹisa, inna-asen: "Iwḏan iǧan mliḥ war teḥḏijin bu uḍbib, teḥḏajan-ṯ imehȓac.
13 Ruḥem rzum x ȓmaƹna n lʼaya iy iqqaren: Xseɣ aḏ treḥmem iwḏan, war xseɣ bu aḏ tɣarṣem i ȓebhayem.a War d usiɣ aḏ ȓaɣiɣ yinni iǧan nican, usiɣ-d ɣar yinni iƹṣan!"
14 Qarrben-d imeḥḍaren n Yaḥya ɣar Ƹisa nnan-as: "Mayemmi neccin ḏ ȓḥizeb n ifarrisiyen ȓebda netẓumma, imeḥḍaren nnec war tẓummin ca?"
15 Inna-asen Ƹisa: "Ma zemmren imeddukaȓ n muȓay aḏ xeyyqen ḏi ȓfarḥ nnes? Maca aḏ d asen wussan aḏ imeysi muȓay zi ȓwesṭ nsen. Ȓxeddnnit aḏ ẓummen!
16 War iǧi ḥadd itreqqaƹ arruḍ ḏ abaȓi s yij n ṯreqqiƹṯ n ttub ḏ jḏiḏ. Mayemmi? Ȓaḥeqqac ṯareqqiƹṯ nni n jḏiḏ aḏ tnejmeƹ uca aḏ d tekkes zeg warruḍ nni abaȓi. Ȓxeddnnit aḏ imɣer ucarrig!
17 Uȓa ḏ aman n uḍiȓ ḏ jḏiḏ war xeǧqen ḏeg yiȓemawen iqḏimen, ḥima war dduqquzen aḏ zeǧƹen waman n uḍiȓ aḏ ḍeyyƹen yiȓemawen nni. Maca aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ. Amenni war itḍeyyiƹ uȓa ḏ ij n ȓḥajeṯ: lla aman uḍiȓ, lla iȓemawen."
Siḏna Ƹisa isgenfa yeǧis n yij n arrayes
18 Wami iqqar Ƹisa manaya, yusa-d ɣares ij n arrayes isejjeḏ-as inna-as: "Yeǧi tmetta ȓexxu. Araḥ-d, sers xas fus nnec ḥima aḏ tekkar."
19 Ikkar Ƹisa iḏfar-iṯ netta ḏ imeḥḍaren nnes.
20 Ḏinni ij n ṯemɣarṯ ṯenƹac iseggwusa zeg wami ṯehȓec, tazzeȓ s iḏammen.b Ṯeḏfar Ƹisa, ṯḥaḏa-yas ṭṭarf n useȓham nnes.
21 Ṯenna ḏeg wuȓ nnes: "Meȓa ɣir ḥaḏiɣ aseȓham nnes aqa aḏ genfiɣ."
22 Ineqȓeb ɣares Ƹisa iẓri-t uca inna-as: "War teggweḏ ca a yeǧi, lʼiman nnem isgenfa-cem." Ṯgenfa ṯemɣarṯ nni ḏi ṯsaƹat nni.
23 Wami yiweḍ Ƹisa ɣar ṯeddarṯ n arrayes nni, itwaȓa ḏinni ȓebƹaḍ zi ȓɣaci itzemmaren lmusiqa umettin, ḏ lharaj.
24 Inna-asen Ƹisa: "Ffɣem ssa! Ṯaḥenjirṯ war ṯemmuṯ ca, aqa ṯeṭṭeṣ waha!" Ȓxeddnnit ḍeḥcen xas.
25 Wami sufɣen iwḏan, yuḏef ɣar uxxam iṭṭef-as ḏeg ufus i ṯḥenjirṯ nni uca ṯekkar.
26 Iffeɣ ȓexbar ɣar marra ayṯbab n ṯmurṯ nni.
Siḏna Ƹisa isgenfa ṯnayen iḍarɣaȓen ḏ ij uzeynun
27 Yuyur ssenni Ƹisa, ḏfaren-ṯ ṯnayen iḍarɣaȓen sɣuyiwen qqaren: "Rḥem-aneɣ a Mmis n Ayṯ-Dawud!"
28 Wami yuḏef Ƹisa ɣar ṯeddarṯ, qarrben ɣares iḍarɣaȓen nni. Inna-asen: "Ma ṯumnem belli nec zemmreɣ aḏ ggeɣ manaya?" Nnan-as: "Wah a Siḏi."
29 Uca iḥaḏa-yasen Ƹisa ṯiṭṭawin inna: "Aɣarwem yiȓi anect min ɣarwem ḏ lʼiman."
30 Ȓxeddnnit nurzment ṯiṭṭawin nsen. Iƹȓem-asen Ƹisa inna-asen: "Ɣarwem aḏ tƹawḏem manaya i can ḥadd!"
31 Maca niṯni ruḥen siwḍen ȓexbar x Ƹisa ḏi marra ṯamurṯ nni.
32 Ḏi ȓweqṯ iy ḏi ruḥen, can yiwḏan uwin-as-d i Ƹisa ij uryaz ḏ azeynun ḏayes jjen.
33 Wami isufeɣ Ƹisa jjen nni, ibḏa uzeynun nni issawaȓ. Qqimen tƹejjben ȓɣaci nnan: "Ƹemmarṣ ma iwqeƹ manaya ḏi ṯmurṯ n Ayṯ-Israʼil."
34 Maca ȓḥizeb n ifarrisiyen qqaren: "Netta isufuɣ jnun ȓaḥeqqac arrayes n jnun yuca-as jjehḏ nni."
35 Iggur Ƹisa ḏi marra ṯineddamc ḏ ȓedcur, iseȓmaḏ ḏi ṯemziḏawin n wuḏayen itḥeddaṯ u itbeccar s ȓmulk n Arebbi. Isgenfa marra ȓehȓacaṯ ḏ ddiƹan n ddat.
36 Wami iẓra ȓɣaci nni, qqsen-as minzi twaƹeddben, nhewȓen. Niṯni amecnaw iḥuȓiyen war ɣarsen uw ṯen ɣa irewsen.
37 Inna-asen i imeḥḍaren nnes: "Ṯafeǧaḥṯ aṭṭas maca icewwaren ḏrus iy ɣa ixeḏmen.
38 Ttareṯ zi Bab n ṯfeǧaḥṯ aḏ irni icewwaren i umarjeƹ nnes."