Siḏna Ƹisa ixḍar ṯenƹac n arrusul
10
1 Iȓaɣa-d Ƹisa x ṯenƹac-a n imeḥḍaren nnes. Yuca-asen ssulṭa iy zi ɣa sufɣen jnun, iy zi ɣa sgenfan marra ȓehȓacaṯ ḏ ȓeḥriqaṯ n yiwḏan.
2 Ḏ yina ḏ isemawen n ṯenƹac n arrusul: Amezwaru nsen ḏ Simƹan umi qqaren Buṭrus ḏ wumas Andrawus, ḏ Yaƹqub mmis n Zabdi ḏ wumas Yuḥanna,
3 ḏ Filibbas, ḏ Bartulumay, ḏ Tuma, ḏ Matta zeg iƹeccaren, ḏ Yaƹqub mmis n Ḥalfa, ḏ Taddi,
4 ḏ Simƹan iy tuɣa itdafaƹen x ṯmurṯ nnes, ḏ Yahuḏa Isxaryuṭi, iƹni wenni izzenzen Ƹisa.
Siḏna Ƹisa issekk arrusul aḏ ḥeddṯen
5 Ṯenƹac-a n iryazen issekk-iṯen Ƹisa iweṣṣa-ṯen inna-asen: "War traḥem ca ɣar ṯmura mani war ǧin wuḏayen. War tiḏfem bu ṯineddama n ṯmurṯ n Samarya.
6 Maca ruḥem ɣar izmaren iweddaren, iƹni iwḏan n Ayṯ-Israʼil.
7 Xmi ɣa ṯraḥem, ḥeddṯem s ȓmulk ujenna aqa yuḏes-d.
8 Sgenfam imehȓac, sfaqem-d yinni immuṯen, siṣfam i yinni ig iǧa jḏam, sufɣem jnun. Manaya immuc-awem baṭeȓ, uȓa ḏ kenniw ucem baṭeȓ!
9 War kiwem tiwim walu: lla dheb, lla nnuqarṯ, lla nneḥḥas ḏeg uḥezzam nwem.
10 War kiwem tiwim bu uqrab x ubriḏ uȓa ḏ ṯnayen ičammiren, uȓa ḏ ṯisiȓa, uȓa ḏ aƹekkaz. Minzi wenni itbeccaren isḏaheǧ macca.
11 Xmi ɣa ṯaḏfem can ṯendint niɣ can dcar, rzum x wenni kenniw ɣa iqebȓen ɣar ṯeddarṯ nnes. Qqimem ḏayes aȓ ɣa ṯuyurem ssenni.
12 Xmi ɣa ṯaḏfem ɣar can ṯeddarṯ, seǧmem x ayṯbab nnes.
13 Meȓa qebȓen-kenniw ayṯbab nnes, akiḏsen tiȓi lbaraka nwem. Meȓa war kenniw qbiȓen ca, war kisen ṯɣimi lbaraka nwem.
14 Meȓa war kenniw qbiȓen ca ḏi can ṯeddarṯ niɣ ḏi can ṯendint niɣ meȓa war xsen aɣarwem ṣennṭen, ffɣem ssenni mesḥem ṯaƹejjact zeg iḍaren nwem.
15 Aqa tesȓam ȓḥaqq: Ḏi Yewm Lḥisab ḏ Lƹiqab aḏ yiȓi lƹiqab n ṯendint nni ktar zi lƹiqab n ṯendint ṯaƹeffant n Sadum ḏ ṯendint ṯaƹeffant n Ƹamura."
Aƹeddeb ig itekken x imeḥḍaren
16 "Nec aqa ssekkiɣ-kenniw amecnaw iḥuȓiyen jar wuccanen. Iȓim ṯfaqem amecnaw ifiɣeran, iȓim ḏ nniyeṯ amecnaw iḏbiren.
17 Ḥḍam ixef nwem zeg yiwḏan. Akenniw sellmen i lmaḥkamaṯ; akenniw uwṯen ḏi ṯemziḏawin n wuḏayen.
18 Akenniw jarren ɣar lḥukkam ḏ izeǧiḏen ƹlaḥsab isem inu ḥima axafi ṯcehḏem ɣar niṯni ḏ yinni war iǧin bu ḏ uḏayen.
19 Xmi kenniw ɣa sellmen, war tfekkarem ca ḏi min ɣa ṯinim niɣ ḏi mammec ɣa ṯessiwȓem. Maca awaȓen iy ɣa ṯinim ḏ Arebbi iy ḏawem-ṯen ɣa yucen ḏi ṯsaƹat nni.
20 War iǧi bu ḏ kenniw iy ɣa issiwȓen, ḏ Arruḥ n Babaṯwem iy ɣa issiwȓen ḏeg umcan nwem.
21 Umas aḏ isellem umas i ȓmewṯ. Babas aḏ isellem mmis. Ṯarwa aḏ raḥen ḍed i lwalidin nsen, aṯen sellmen i yinni ṯen ɣa nɣen.
22 Akenniw ƹiffen marra ƹlaḥsab isem inu, maca wenni ɣa iṣbaren aȓ uneggar aḏ injem.
23 Meȓa ƹeddben-kenniw ḏi can ṯendint, rewȓem ɣar ṯenneɣnit. Aqa tesȓam ȓḥaqq: Aḏ d yas Mmis n bnaḏem, u kenniw ƹaḏ war ṯkemmȓemx min kenniw weṣṣiɣ ḏi ṯneddam n Ayṯ-Israʼil.
24 Ameḥḍar war iǧi bu ḏ ameqqran zi lmuƹallim nnes. Axeddam war iǧi bu ḏ ameqqran zeg uweqqaf nnes.
25 Baraka ɣir aḏ yiȓi umeḥḍar am lmuƹallim nnes ḏ uxeddam amecnaw aweqqaf nnes. Meȓa ȓaɣan-as i bab n ṯeddarṯ A Ibȓis,b iwa mammec ɣa ȓaɣan i ȓeḥbab nnes?"
Ṯiggwḏi zi Arebbi
26 "War teggwḏem ca zzaysen. Marra min itwasnuffren aḏ itwafḍeḥ. Marra min inuffren aḏ itwassen!
27 Min ḏawem qqareɣ ḏi ṯaǧest, ƹawḏem-as ḏi ṯfawṯ n nhar. Min tesȓam s ȓḥess, sɣuyem zzayes x ṯzeqqa.
28 War teggwḏem bu zeg yinni ineqqen ddat, u niṯni war zemmren aḏ nɣen ȓaƹmar. Ggwḏem Arebbi iƹni wenni izemmren aḏ ihḏem ddat ḏ ȓaƹmar munen ḏi jahennama.
29 Ma war tmenzin ṯnayen n izawjiwenc s duru? Walakin, war zzaysen iweṭṭi uȓa ḏ ijjen ɣar ṯmurṯ meȓa war ixis Babaṯwem.
30 Uȓa ḏ izuṭṭan iy ɣarwem x uzeǧif iḥseb-iṯen Arebbi marra.
31 War teggwḏem ca. Kenniw ṯseggwam ktar s waṭṭas x izawjiwen."
Wenni icehhḏen x Siḏna Ƹisa
32 "Wenni zzayi ɣa icehḏen zzaṯ i yiwḏan, azzayes cehḏeɣ nec zzaṯ i Baba iǧan ḏeg ujenna.
33 Wenni ḏayi ɣa inkaren zzaṯ i yiwḏan, aṯ nkareɣ nec zzaṯ i Baba iǧan ḏeg ujenna.
34 War tfekkarem belli usiɣ-d aḏ ggeɣ ȓehna ḏi ddunect. War d usiɣ ca aḏ ggeɣ ȓehna, usiɣ-d aḏ ggeɣ amenɣi.
35 Usiɣ-d aḏ smenɣeɣ mmis akeḏ babas, ḏ yeǧis akeḏ yemmas, ḏ ṯsȓiṯ akeḏ lallas.
36 Aḏ yiȓi ȓaƹḏu n bnaḏem ḏ ȓeḥbab iy kis izeddɣen ḏi ṯeddarṯ nnes.d
37 Wenni xef iƹizz babas niɣ ḏ yemmas ktar zi mammec xas ƹizzeɣ nec, war ḏayi isḏiheǧ ca. Wenni xef iƹizz mmis niɣ ḏ yeǧis ktar zi mammec xas ƹizzeɣ nec, war ḏayi isḏiheǧ ca.
38 Wenni itagin aḏ iysi ṣṣalib nnese aḏayi iḏfar, war ḏayi isḏiheǧ.
39 Wenni ɣa irebḥen ṯuḏarṯ nnes, at ixser. Wenni ɣa ixesren ṯuḏarṯ nnes x ȓesbab inu, at irbeḥ."
Lʼajar
40 "Wenni kenniw iqebbȓen, iqbeȓ-ayi. Wenni ḏayi iqebbȓen, iqbeȓ wenni ḏayi d issekken.
41 Wenni iqebbȓen can nnabi ȓaḥeqqac issekk-iṯ-iḏ Arebbi, aɣares yiȓi lʼajar amecnaw nnabi. Wenni iqebbȓen can ȓmumen ȓaḥeqqac ḏ ȓmumen, aɣares yiȓi lʼajar amecnaw ȓmumen.
42 Aqa tesȓam ȓḥaqq: Wenni ɣa yucen ɣir ȓkas n waman ḏ asemmaḍ i can yijjen zeg imezyanen-a ȓaḥeqqac ḏ ameḥḍar inu, aqa war itḍeyyiƹ ca lʼajar nnes."