Siḏna Ƹisa ḏ Siḏna Yaḥya
11
1 Wami ikemmeȓ Ƹisa ȓuṣiyaṯ i ṯenƹac imeḥḍaren nnes, yuyur ssenni ḥima aḏ iseȓmeḏ aḏ iḥeddeṯ ḏi ṯneddama iy yuḏsen jjiheṯ nni.
2 Wami iǧa Yaḥya ḏi ȓeḥbes isȓa x ȓexḏayem n Lmasiḥ. Issekk can imeḥḍaren nnes ɣar Ƹisa
3 ḥima aḏas inin: "Ma ḏ cek iy xef nesȓa aḏ d taseḏ niɣ a nraja ḥadd nneɣnit?"
4 Indeq-d Ƹisa inna-asen: "Ƹeqbem ƹawḏem-as i Yaḥya min tesȓam ḏ min twaȓam:
5 iḍarɣaȓen twaȓan, izeḥḥafen gguren, yinni ḏi iǧa jḏam genfan, iḏehcuren tesȓan, yinni immuṯen tnekkaren-d, twabeccaren ȓmusakin.
6 Ssaƹḏ n yinni war ḏayi itcekkin ca."
7 Wami rewwḥen imeḥḍaren n Yaḥya, Ƹisa issawaȓ x Yaḥya iqqar i ȓɣaci: "Mix ṯeffɣem aḏ teẓrem ḏi ȓexȓa? Ma ij uɣanim ithezza-ṯ arriḥ?
8 Meȓa lla, mix ṯeffɣem aḏ teẓrem? Ma ij n uryaz ireḍ arruḍ ḏ aṣebḥan? Yinni iy ɣar iǧa warruḍ aṣebḥan tiȓin ḏi ȓeqṣur n izeǧiḏen!
9 Meȓa lla, mix ṯeffɣem aḏ teẓrem? Ma ij n nnabi? Qqareɣ-awem: Wah, netta ktar zi nnabi.
10 Ḏ Yaḥya iy xef issiweȓ lkitab:
Aqa tsekkiɣ-d ij n arrasul inu zzaṯec,
ḥima ac isewjeḏ abriḏ nnec.b
11 Aqa tesȓam ȓḥaqq: Zi min d jjint ṯemɣarin, war ḏin bu can ijjen ḏ ameqqran ktar zi Yaḥya, maca wen iǧan ḏ amezyan ḏi ȓmulk ujenna netta ḏ ameqqran x Yaḥya.
12 Zi ȓweqṯ n Yaḥya aȓ ȓexxu, iwḏan temḏeḥḥasen aḏ aḏfen ḏi ȓmulk ujenna tmenɣan iryazen bac aɣarsen yiȓi.
13 Ccariƹa n Musac ḏ marra lʼanbiya ssiwȓen x ȓmulk ujenna ḥetta aȓ wami d yusa Yaḥya.
14 U meȓa ṯexsem aḏ tamnem, Yaḥya netta ḏ nnabi Ilyas iy netraja.
15 Ṣenneṭ mliḥ a wenni itsȓan.
16 X manaya wi ḏi ɣa cabbheɣ iwḏan n ȓweqṯ-a? Tcabbahen ḏeg iḥenjiren iy iqqimen ḏi saḥa, tȓaɣan i wayawya, qqaren:
17 Nṣuḍ ḏi ṯemja, war ṯecḍiḥem ca. Netƹezza-kenniw, war ṯrum ca.
18 Minzi Yaḥya yusa-d itẓumma, war isess aman uḍiȓ, nnan qa ḏayes jnun!
19 Yusa-d Mmis n bnaḏem war itẓummi ca, isess, nnan qa bnaḏem-a itett isess aṭṭas, ƹaweḏ ḏ ameddukeȓ n iƹeccaren ḏ yinni iƹṣan. Ȓefhameṯ n Arebbi qebbȓen-t marra yinni ifehhmen."d
Ṯineddam ikeffaren
20 Ssenni ibḏa Ƹisa itƹeyyab ṯineddam nni iy ḏi igga aṭṭas n lmuƹjizaṯ nnes, war tuben ca ayṯbab nsent.
21 Inna Ƹisa: "Ya ȓefḍiḥeṯ nnem ya dcar n Kurzin! Ya ȓefḍiḥeṯ nnem ya dcar n Bayt Ṣayda! Maƹlik lmuƹjizaṯ-a iy ḏayem ixeȓqen, xeȓqent ḏi ṯneddam ṯiƹeffanin n Ṣur ḏ Ṣaydun, iȓi tuben ayṯbab nsent aṭṭas zeg wami, iȓi ggin arruḍ n uḥzan uca qqimen x yiɣeḏe ḥima aḏ tban tuba nsen.
22 X manayenni qqareɣ-awem: Aqa ṯineddam ṯiƹeffanin n Ṣur ḏ Ṣaydun aḏ iȓint xir zzaykent ḏi Yewm Lḥisab ḏ Lƹiqab.
23 Y cem a Kafernaḥum, ma tɣir-am aḏ tgaƹƹḏeḏ ɣar ujenna? Lla, aḏ tehwiḏ ɣar Ljaḥim. Ȓaḥeqqac mȓi lmuƹjizaṯ iy ḏayem ixeȓqen, xeȓqent ḏi ṯendint ṯaƹeffant n Sadum iȓi ƹaḏ aqa-t ḏ ṯandint aȓ nhara.
24 X manayenni qqareɣ-awem: Aqa ṯandint ṯaƹeffant n Sadum aḏ tiȓi ḏi Yewm Lḥisab ḏ Lƹiqab xir zzayem!"
Arraḥeṯ i yinni yuḥȓen
25 Ȓxeddnnit issiweȓ Ƹisa inna: "Ḥemḏeɣ-cek a Baba a Siḏi Arebbi ujenna ḏ ṯmurṯ, minzi ṯesnuffreḏ manaya x imiɣisen ḏ lƹulama, ṯseḍhareḏ-ṯ-id i iḥenjiren imezyanen.
26 Wah a Baba, ȓaḥeqqac ammu iy twaȓiḏ ḥsen.
27 Baba yuca-ayi-d kuȓci. Uȓa ḏ ijjen war issin min iƹna Mmis menɣir Babas, niɣ min iƹna Babas menɣir Mmis. Babas, aṯ ssnen ɣir yinni umi ixes Mmis aḏasen-ṯ-iḏ iseḍhar.