Min iǧan ḥalal ḏi nhar n ssebṯ
12
1 Ḏeg wussan nni ḏi nhar n ssebṯ iƹḏu Ƹisa ḏeg ubriḏ ḏi ȓwesṭ n imendi, imeḥḍaren nnes ǧuzen gguren tekksen ṯiyḏerin tetten-ṯent.
2 Wami ṯen ẓrin can yiwḏan zi ȓḥizeb n ifarrisiyen nnan i Ƹisa: "Xzar! Imeḥḍaren nnec teggen min iǧan ḥram ḏi nhar n ssebṯ."
3 Inna-asen Ƹisa: "Ma war ṯeɣrim ca min igga Dawud wami iǧuz netta ḏ yinni akiḏes?
4 Yuḏef ɣar ṯemziḏa n Arebbi, icca aɣrum nni iy iǧan ḏ ṣṣeḏqeṯ netta ḏ yinni akis. Aɣrum nni war iǧi ca ḥalal i niṯni, ɣir i ȓefquha waha.
5 Niɣ war ṯeɣrim ḏi Ccariƹa n Musa belli ȓefquha tsexxaren ḏi nhar n ssebṯ ḏi ṯemziḏa n Arebbi bȓa ma ṯen iḥasseb ḥadd?
6 Qqareɣ-awem: Ḏanita, min iǧan ktar zi ṯemziḏa n Arebbi.
7 Mȓi ṯfehmem ȓmaƹna n wawaȓ iy iqqar Arebbi: 'Xseɣ aḏ treḥmem iwḏan, war xseɣ bu aḏ tɣarṣem i ȓebhayem,'a ataf war ṯḥekmem x yinni war iggin minxef.
8 Ȓaḥeqqac Mmis n bnaḏem ig iǧan ḏ lḥakem x nhar n ssebṯ."
9 Yuyur ssenni Ƹisa, yuḏef ɣar ij n ṯemziḏa n wuḏayen.
10 Yufa ḏinni ij n uryaz fus nnes immuṯ. Ȓxeddnnit sseqsan Ƹisa, xsen aṯ tehmen, nnan-as: "Ma ḥalal uw ɣa isgenfan can ḥadd ḏi nhar n ssebṯ n lƹibada?"
11 Inna-asen Ƹisa: "Meȓa can ḥadd zzaywem ɣares ij uḥuȓi uca iwḍa-yas ḏi can ṯsrafṯ ḏi nhar n lƹibada, ma ṯ-iḏ iṭṭef aṯ-iḏ isiȓi, niɣ lla?
12 U bnaḏem iseggwa ktar s waṭṭas zeg uḥuȓi! Ƹlaḥsab manaya ḥalal wi ɣa iggen ȓxir ḏi nhar n lƹibada."
13 Ȓxeddnnit inna-as Ƹisa i uryaz nni: "Sarreḥ fus nnec." Isarreḥ-iṯ, iḏweȓ mliḥ am ufus nneɣnit.
14 Ffɣen yiwḏan n ȓḥizeb n ifarrisiyen mcawaren jarasen mammec ɣa ggen aḏ nɣen Ƹisa.
Siḏna Ƹisa itwajah yinni iǧan ḍed nnes
15 Issen Ƹisa manayenni yuyur ssenni. Ḏfaren-ṯ aberru n yiwḏan, isgenfa marra imehȓac nsen.
16 Iweṣṣa-ṯen war txebbarem ḥadd xafi,
17 ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yij n zman:
18 "Ḏ wanita ḏ axeddam inu ig xḍareɣ,
wenni iy xafi iƹizzen iy xef rḍiɣ.
Aḏayes ggeɣ Arruḥ iqeddsen,
aḏ ixebbar yinni war iǧin ḏ uḏayen s ȓḥaqq.
19 War itmenɣi akeḏ ḥadd,
war isnekkar bu ṯɣuyyiṯ,
war itsȓi ḥadd i wawaȓ nnes ḏeg ibriḏen.
20 War itrezzi bu ɣanim imeyyren,
war isexsi ṯfawṯ n ṯefṯiȓt iteggen ddexxan,
aȓ ɣa irbeḥ ȓḥaqq.
21 Ḏeg yisem nnes ȓegnus aḏ ggen lʼamal."b
22 Ssenni can yiwḏan uwin-as-d i Ƹisa ij uryaz ḏ aḍarɣaȓ ḏ azeynun ḏayes jjen. Isgenfa-ṯ Ƹisa ḥima aḏ issiweȓ aḏ itwaȓa.
23 Qqimen tƹejjben ȓɣaci nni marra, nnan: "Maci ḏ wa ig iǧan ḏ Mmis n Dawud, niɣ?"
24 Tesȓan ȓḥizeb n ifarrisiyen i wawaȓ nsen nnan-asen: "Bnaḏem-a isufuɣ jnun minzi arrayes n jnun umi qqaren Bƹalzabul yuca-as jjehḏ-a."
25 Issen Ƹisa min nwan, inna-asen: "Mkuȓ lmemlaka iy ḏi tmenɣan ayṯbab nnes ijjen akeḏ unneɣnit aḏ tnehḏem. Mkuȓ ṯandint niɣ ḏ ṯaddarṯ iy ḏi tmenɣan ayṯbab nnes ijjen akeḏ unneɣnit aḏ tewḍa.
26 Meȓa Cciṭan isufuɣ Cciṭan, aḏ iqḍa x yixef nnes, mammec ɣa ṯegg aḏ tdum lmemlaka nnes?
27 Meȓa sufuɣeɣ jnun s jjehḏ n Bƹalzabul, inim-ayi kenniw, mammec teggen yiwḏan nwem sufuɣen-ṯen uȓa ḏ niṯni? Niṯni s yixef nsen tbeyyanen belli war ɣarwem bu ȓḥaqq ḏi min ṯeqqarem.
28 Nec, meȓa sufuɣeɣ jnun s Arruḥ n Arebbi, aqa ȓmulk n Arebbi yusa-d ɣarwem.
29 Iwa mammec? War izemmer ḥadd aḏ ihjem x ṯeddarṯ n can ijjen ijheḏ bac aḏ yacar agȓa nnes illa meȓa icedd-iṯ ḏ amezwaru. Uca aḏas yawi marra min ɣares ḏi ṯeddarṯ.
30 Wenni war kiḏi iǧin aqa-ṯ ḍed inu. Wenni war ismunen akiḏi, netta itzeǧaƹ.
31 Aqa qqareɣ-awem: Aḏ twaɣfarent marra ȓmuƹṣiyaṯ iy teggen yiwḏan, ḏ marra awaȓ war iḥȓin iy qqaren x Arebbi. Maca wenni ɣa yinin can wawaȓ war iḥȓin x Arruḥ n Arebbi war ḏas iɣeffar ca.
32 Wenni ɣa yinin can wawaȓ war iḥȓin x Mmis n bnaḏem, ɣares aɣfar. Maca wenni ɣa yinin can wawaȓ war iḥȓin x Arruḥ iqeddsen, war ḏas iɣeffar lla ḏi ddunect u lla ḏi lʼaxira.
33 Meȓa ṯacejjarṯ ṯeṣbaḥ, aḏ tarew min iṣebḥan. Meȓa ṯacejjarṯ war teḥȓi, aḏ tarew min war iḥȓin. Ṯacejjarṯ ṯḍehhar s min tarew.
34 A ṯarwa ifiɣeran, mammec ɣa ṯeggem aḏ tinim min iṣebḥan u kenniw ḏ iƹeffanen? Ȓaḥeqqac aqemmum isufuɣ min ḏayes ḏeg wuȓ.
35 Bnaḏem iṣebḥan isufuɣ-d min iṣebḥan zi ȓkenz nnes iṣebḥan. Bnaḏem aƹeffan isufuɣ-d ṯuƹuffna zi ȓkenz nnes aƹeffan.
36 Aḏawem iniɣ: Aqa Yewm Lḥisab ḏ Lƹiqab aḏ twaḥasben yiwḏan x mkuȓ awaȓ ixwan azzayes ssiwȓen.
37 Ȓaḥeqqac ƹlaḥsab awaȓen nnec aqa-c bariʼ, niɣ ƹlaḥsab awaȓen nnec aḏ twaƹeqqbeḏ."
Lmuƹjiza n Siḏna Yunes
38 Nnan-as ȓebƹaḍ n imseȓmaḏen n Ccariƹa ḏ ȓḥizeb n ifarrisiyen i Ƹisa: "A lmuƹallim, nxes a nẓer ij n lmuƹjiza zzayek."
39 Indeq-d Ƹisa inna-asen: "Iwḏan iƹeffanen n ȓweqṯ-a ixeddƹen Arebbi tettaren lmuƹjiza, maca war ḏasen itmuci ɣir lmuƹjiza nni n nnabi Yunes.
40 Amec iqqim Yunes ṯeȓt-iyyam jar ǧyaȓi ḏ wussan ḏeg uƹeddis n usȓem, amenni iy ɣa iseƹḏu Mmis n bnaḏem ṯeȓt-iyyam jar ǧyaȓi ḏ wussan swadday n ṯmurṯ.
41 Yewm Lḥisab ḏ Lƹiqab aḏ d kkaren imezḏaɣ n ṯendint n Ninwa akeḏ yiwḏan n ȓweqṯ-a, axasen ceṯcan, ȓaḥeqqac ayṯbab n ṯendint n Ninwa tuben wami ṯen inha Yunes. Ḏanita ijjen ḏ ameqqran zi Yunes.
42 Yewm Lḥisab ḏ Lƹiqab aḏ tekkar lmalika n ljanub akeḏ yiwḏan n ȓweqṯ-a, axasen ṯceṯca, minzi ṯusa-d zi ṯmurṯ yugjen ḥima aḏ tṣenneṭ i lḥikma n Suliman. Ḏanita ijjen ḏ ameqqran zi Suliman.
43 Xmi ɣa itwasufeɣ jjenn aƹeffan zi can bnaḏem, iggur ḏeg imucan yuzɣen irezzu amcan mani ɣa ireyyeḥ. Meȓa war yufi ca,
44 iqqar: Aḏ ḏewȓeɣ ɣar ṯeddarṯ inu iy zi ffɣeɣ. Aɣares iḏweȓ at yaf ṯexwa, ṯeƹḏeȓ, ṯenqa.
45 Uca aḏ iraḥ, aḏ d yawi sebƹa n jnun nneɣnit ḏ iƹeffanen ktar zzayes, aḏ ḏewȓen aḏayes zeḏɣen. Ȓxeddnnit aḏ tiȓi lḥala ṯaneggarut n bnaḏem nni war ṯeḥȓi ktar zeg umezwar. Amenni iy ḏasen ɣa ṯewqeƹ i yiwḏan iƹeffanen n ȓweqṯ-a."
46 Ƹaḏ issawaȓ Ƹisa aḵeḏ ȓɣaci wami ɣares d tusa yemmas ḏ ayṯmas, bedden barra i ṯeddarṯ rezzun akis ssiwȓen.
47 Inna-as can ḥadd i Ƹisa: "Aqa yemmac ḏ ayṯmac bedden ḏi barra rezzun akic ssiwȓen."