Ȓmaƹna n wenni izerrƹen
13
1 Ḏi nhar nni, iffeɣ Ƹisa zi ṯeddarṯ iqqim ṭṭarf n ȓebḥar.
2 Munen-d xas aṭṭas n ȓɣaci, s zḥameṯ nni inya iqqim ḏeg yij n ṯɣarrabut, iwḏan qqimen marra ḏi ȓbarr x ṭṭarf n ȓebḥar.
3 Iqqar-asen aṭṭas n ṯmesȓayin s ȓemƹani, inna: "Ṣennṭeṯ! Iffeɣ ufeǧaḥ ḥima aḏ izreƹ.
4 Wami izerreƹ, ṯewḍa-yas can zzarriƹeṯ x ṭṭarf n ubriḏ, usin-d ijḍaḍ ccin-t.
5 Can zzarriƹeṯ nneɣnit ṯewḍa-yas x yizra war ḏin bu caȓ aṭṭas. Ḏeɣya ṯeɣmi-d ȓaḥeqqac war ṯuḏif ca ḏi ȓaǧeɣ n ṯmurṯ.
6 Maca wami ṯsummer ṯfuct, iḥreq ȓxeddnnit yuzeɣ ȓaḥeqqac iẓewran nnes war uḏifen ɣar ȓaǧeɣ n ṯmurṯ.
7 Can zzarriƹeṯ nneɣnit ṯewḍa jar isennanen. Ɣmin-d akis isennanen jeyyfen-t.
8 Maca can zzarriƹeṯ nneɣnit ṯewḍa x ṯmurṯ ṯaṣebḥant, ṯsufeɣ-d ṯiyḏerin. Ȓebƹaḍ ggint miyya, ȓebƹaḍ settin, ȓebƹaḍ ṯȓaṯin.
9 Ṣenneṭ mliḥ a wenni itsȓan."
10 Qarrben-d ɣares imeḥḍaren nnes nnan-as: "Mayemmi iy kisen ṯessawaȓeḏ s ȓemƹani?"
11 Indeq-d Ƹisa inna-asen: "Itwasmeḥ i kenniw aḏ tessnem min inuffren ḏi ȓmulk ujenna, maca i niṯni war ḏasen itwasmeḥ ca.
12 Ȓaḥeqqac wenni iǧan ɣares itmerni-yas, aɣares yiȓi aṭṭas. Maca wenni war ɣar iǧi ca, itmeysi-yas uȓa min ɣares.
13 X manaya iy kisen ssawaȓeɣ s ȓemƹani. Ȓaḥeqqac xezzaren war twiȓin, tesȓan war tesȓin war fehmen.
14 Amenni iy ḏasen itkemmeȓ wawaȓ n nnabi Icaƹya ig inna ḏeg yij n zman:
Cḥaȓ ma tesȓim war tefhimem,
cḥaȓ ma ṯxezzarem war twiȓim.
15 Ȓaḥeqqac ccaƹb-a, uȓ nsen iḏweȓ ḏ azru,
ƹȓayen war tesȓin walu,
qqnen ṯiṭṭawin nsen.
Ḥima war twiȓin s ṯiṭṭawin nsen,
war tesȓin s imejjan nsen,
war fehmen s wuȓawen nsen,
aɣari d ḏewȓen, aṯen sgenfiɣ.a
16 Maca ssaƹd nwem wami ṯiṭṭawin nwem twaȓant, ssaƹḏ nwem wami imejjan nwem tesȓan.
17 Aqa tesȓam ȓḥaqq: Aṭṭas n lʼanbiya ḏ ȓmuminin rzun aḏ ẓren min twaȓam maca war ṯ ẓrin ca. Rzun aḏ sȓen min ṯesȓim maca war ṯ sȓin ca."
Asfhem n ȓmaƹna n wenni izerrƹen
18 "Iwa ṣennṭeṯ ȓmaƹna n ufeǧaḥ izerrƹen.
19 Ijjen itsȓa i wawaȓ x ȓmulk ujenna, war ṯ itefhim, iƹni netta am zzarriƹeṯ nni ig iwḍan x ubriḏ. Itraḥ Uƹeffan nni n Ibȓis, itekkes awaȓ nni itwazerƹen ḏeg wuȓ nnes.
20 Zzarriƹeṯ nni ig iwḍan x yizra nettaṯ am bnaḏem ig itsȓan i wawaȓ n Arebbi, netta iqbeȓ-iṯ s ȓefraḥeṯ.
21 Wami war yuwṯi bu iẓewran mliḥ, ḏeɣya tneqȓaƹen. Xmi d tasen ȓemḥayen ḏ uƹeddeb x ȓesbab n wawaȓ n Arebbi, ḏeɣya iteffeɣ abriḏ.
22 Zzarriƹeṯ nni ig iwḍan jar isennanen nettaṯ am bnaḏem ig itsȓan i wawaȓ n Arebbi, ḏayes amnus n ddunect, icemmeṯ-iṯ wagȓa, uca itwajeyyef wawaȓ n Arebbi war ineffeƹ ca.
23 Maca zzarriƹeṯ nni ig iwḍan ḏi ṯmurṯ ṯeṣbaḥ nettaṯ am bnaḏem ig itsȓan i wawaȓ n Arebbi, ifehhem-as ineffeƹ. Ȓebƹaḍ tmernin miyya, ȓebƹaḍ tmernin settin, ȓebƹaḍ tmernin ṯȓaṯin."
Ȓmaƹna n isennanen
24 Issiweȓ Ƹisa s yij n ȓmaƹna nneɣnit, inna-asen: "Ȓmulk ujenna amecnaw ij n uryaz izreƹ zzarriƹeṯ ṯeṣbaḥ ḏeg umarjeƹ nnes.
25 Ij n ǧiȓeṯ wami ṭṭṣen yiwḏan, yusa-d ȓaƹḏu nnes izreƹ zzarriƹeṯ n isennanen akeḏ zzarriƹeṯ n yirḏan ȓxeddnnit irweȓ.
26 Wami d gaƹƹḏen yirḏan ggin ṯiyḏerin, ȓxeddnnit ɣmin-d akiḏsen uȓa ḏ isennanen.
27 Usin-d ixeddamen nnan-as i bab n umarjeƹ: A siḏi, cek ṯzerƹeḏ zzarriƹeṯ ṯeṣbaḥ ḏeg umarjeƹ nnec. Iwa manis ḏas d kkin isennanen?
28 Inna-asen: Can ȓaƹḏu iy iggin manaya. Nnan-as ixeddamen nnes: Ma ṯexseḏ a nraḥ a nekkes isennanen nni?
29 Inna-asen: Lla, bac war kisen ṯqeǧƹem uȓa ḏ irḏan.
30 Jjem irḏan aḏ meɣren akeḏ isennanen. Axmi d ɣa yaweḍ ȓweqṯ n umjar aḏasen iniɣ i icewwaren: Kksem ḏ amezwaru isennanen ṯesmunem-ṯen ṯceddem-ṯen ḥima aḏ ḥerqen, maca irḏan jemƹem-ṯen ɣar ṯesrafin inu."
Ȓemƹani n zzariƹeṯ n bugarḏaȓ ḏ untun
31 Inna-asen Ƹisa ij n ȓmaƹna nneɣnit: "Ȓmulk ujenna amecnaw ij n zzarriƹeṯ n yij n nnuƹ n arbiƹ qqaren-as bugarḏaȓ. Iysi-t yij n uṯarras iẓẓu-t ḏeg umarjeƹ nnes.
32 Tiȓi ḏ ṯamezyant qaƹ x marra ṯiḥebba. Maca xmi temɣur ṯḏewweȓ ktar zi marra arbiƹ. Ṯḏewweȓ ḏ ṯacejjarṯ, tasen-d yijḍaḍ teggen ḏayes ȓaƹwac."
33 Inna-asen Ƹisa ij n ȓmaƹna nneɣnit: "Ȓmulk ujenna amecnaw antunb ṯeysi-ṯ yij n ṯemɣarṯ ṯeggwi-ṯ ḏi ȓmud n waren aȓ wami antun nni isgaƹƹeḏ-iṯ marra."
34 Qaƹ manaya inna-ṯ Ƹisa i yiwḏan s ȓemƹani. War kisen issiwiȓ ɣir s ȓemƹani.
35 Ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yij n zman:
Akisen ssiwȓeɣ s ȓemƹani,
aḏ d seḍhareɣ min innuffren zeg wami ṯeǧa ddunect."c
Asfhem n ȓmaƹna n isennanen
36 Ijja Ƹisa ȓɣaci nni, yuḏef ɣar ṯeddarṯ. Ȓxeddnnit usin-d ɣares imeḥḍaren nnes, nnan-as: "Fesser-aneɣ ȓmaƹna isennanen ḏeg umarjeƹ."
37 Indeq-d Ƹisa inna-asen: "Wenni izerrƹen zzarriƹeṯ ṯaṣebḥant netta ḏ Mmis n bnaḏem.
38 Amarjeƹ netta ḏ ddunect. Zzarriƹeṯ iṣebḥan nettaṯ ḏ ṯarwa n ȓmulk ujenna. Isennanen niṯni ḏ ṯarwa n Uƹeffan nni n Ibȓis.
39 Ȓaƹḏu ig izerrƹen isennanen netta ḏ Ibȓis. Ȓweqṯ n umjar nettaṯ ḏ ȓefna n zman. Ixeddamen niṯni ḏ lmalaʼikaṯ.
40 Amecnaw mammec ismun ufeǧaḥ isennanen isḥerreq-iṯen ḏi ṯmessi, amenni iy ɣa ṯiȓi ȓefna n zman.
41 Aḏ d issekk Mmis n bnaḏem lmalaʼikaṯ nnes, aḏ kksent zi ȓmulk nnes marra min itsebbaben ḏi ȓmuƹṣiyaṯ ḏ yinni iteggen ccerr.
42 Aṯen neḍren ḏi ȓkuceṯ n ṯmessi mani ɣa iȓin imeṭṭawen ḏ uɣeẓẓaẓ n ṯeɣmas.
43 Maca ȓmuminin aḏ iȓin reqqen am ṯfuct ḏi ȓmulk n Babaṯsen. Ṣenneṭ mliḥ a wenni itsȓan.
Ȓemƹani n ȓkenz ḏ jjuhar ḏ ṯracca
44 Ȓmulk ujenna amecnaw ij n ȓkenz ixzen ḏi can umarjeƹ, yufi-ṯ can ḥadd iƹaweḏ isnuffer-iṯ. Uca s ȓefraḥeṯ nni iy ḏayes, izzenz marra min ɣares isɣa amarjeƹ nni.
45 Ȓmulk ujenna amecnaw ij n ttajar irezzu x jjuhar aṣebḥan.
46 Wami yufa ij n jjuhar iɣȓan, izzenz marra min ɣares isɣi-ṯ.
47 Ȓmulk ujenna amecnaw ṯracca inḍer-it ij ubeḥri ḏi ȓebḥar, ṯeṭṭef-d mkuȓ nnuƹ n usȓem.
48 Wami ṯƹemmar ṯracca sufɣen-t-id ibeḥriyen ɣar ṭṭarf n ȓebḥar. Qqimen, ggin iseȓman iṣebḥan ḏi ṯsuǧaṯin nsen, neḍren yinni war iḥȓin.
49 Ammu iy ɣa yiȓi nhar iy ɣa ikemmeȓ zman: Aḏ d asent lmalaʼikaṯ aḏ fernent ȓkuffar zi ȓmuminin.
50 Aṯen neḍren ḏi ȓkuceṯ n ṯmessi, mani ɣa iȓin imeṭṭawen ḏ uɣeẓẓaẓ n ṯeɣmas."
51 Inna-asen Ƹisa i imeḥḍaren nnes: "Ma ṯfehmem marra manaya?" Nnan-as: "Wah a Siḏi."
52 Inna-asen: "Kuȓ amseȓmaḏ n Ccariƹa n Musa ig ifehmen ȓmulk ujenna netta am yij n bab n ṯeddarṯ ig isufɣen ṯimesȓayin ṯiqḏimin niɣ ḏ jḏiḏ ḏi mani ixzen ȓkenz nnes."
Tazzȓen x Siḏna Ƹisa zeg ubilaj nnes
53 Wami ikemmeȓ Ƹisa ȓemƹani nni, yuyur ssenni.
54 Iḏweȓ ɣar ṯmurṯ nnes, iseȓmaḏ ḏi ṯemziḏa nsen. Tƹejjben ḏayes nnan: "Min teƹna ȓefhameṯ-a iy ḏas immucen, ḏ lmuƹjizaṯ-a?
55 Ma war iǧi netta ḏ mmis unejjar nni? Ma war iǧi yemmas qqaren-as Maryam? Yaƹqub ḏ Yusef ḏ Simƹan ḏ Yahuḏa ḏ ayṯmas?
56 Ma war ǧint suyṯmas aqa-ṯent akiḏneɣ ḏa? Iwa manis ḏas d ikka marra manaya?"
57 X manaya war ṯ qbiȓen ca. Inna-asen Ƹisa: "Nnabi meḥtarem mani ma, walakin ḏeg ubilaj nnes ḏ ṯeddarṯ nnes, lla!"
58 Igga ḏin Ƹisa ḏrus n lmuƹjizaṯ ȓaḥeqqac lʼiman nsen ḏ uqlil.