Ȓmewṯ n Siḏna Yaḥya
14
1 Ḏi ȓweqṯ nni azeǧiḏ Hirudus isȓa ȓexbar x Ƹisa.
2 Inna-asen i ixeddamen nnes: "Aqa wanita ḏ Yaḥya,a ikkar-d zi ȓmewṯ! X manayenni iy ɣares jjehḏ iy zi itegg lmuƹjizaṯ."
3 Qbeȓ i manaya, azeǧiḏ Hirudus tuɣa iṭṭef Yaḥya icedd-iṯ iggi-ṯ ḏi ȓeḥbes x ȓesbab n Hirudiya ṯamɣarṯ n wumas Filibbas.
4 Ȓaḥeqqac iqqar-as Yaḥya i uzeǧiḏ Hirudus: "Ḥram aḏ tawiḏ ṯamɣarṯ n wumac."
5 Irezzu uzeǧiḏ Hirudus aḏ ineɣ Yaḥya, maca iggweḏ zi ccaƹb ȓaḥeqqac twaȓan Yaḥya ḏ nnabi.
6 Wami igga uzeǧiḏ Hirudus ȓƹiḏ lmilad nnes, ṯecḍeḥ yeǧis n ṯemɣarṯ nnes Hirudiya ḏi ȓfarḥ nnes, ȓxeddnnit iƹjeb-as ȓḥaȓ i uzeǧiḏ Hirudus.
7 X manayenni ijjuǧ aḏas yuc min ḏas ɣa ṯettar.
8 Wami t ṯweṣṣa yemmas, yeǧis ṯenna-as i uzeǧiḏ Hirudus: "Uc-ayi-d ḏa x siniyeṯ azeǧif n Yaḥya!"
9 Ixeyyeq uzeǧiḏ aṭṭas, maca iweṣṣa aḏas immuc ȓaḥeqqac tuɣa ijjuǧ zzaṯ i yinni kis iqqimen ḏi ȓfarḥ nnes.
10 Ȓxeddnnit issekk ɣar ȓeḥbes wenni ḏas ɣa iqessen azeǧif i Yaḥya.
11 Yuwi-d azeǧif nnes x siniyeṯ, yuca-as-ṯ i ṯḥenjirṯ nni, ṯuwi-ṯ i yemmas.
12 Usin-d imeḥḍaren n Yaḥya ysin ddat nnes neḍȓen-t. Ssenni ruḥen, xbaren Ƹisa s min iweqƹen.
Siḏna Ƹisa isecc xemsa aȓef n iryazen
13 Wami d yarra Ƹisa ȓexbar nni, iruḥ ssenni waḥḏes ḏi ṯɣarrabut ɣar ij n umcan ixwa. Arrin-d ȓexbar ȓɣaci, ḏfaren-ṯ zi ṯneddamb x iḍaren.
14 Wami d iḍra Ƹisa zi ṯɣarrabut, iẓra aṭṭas n yiwḏan qqsen-as isgenfa imehȓac nsen.
15 Wami d iqarreb uƹecci, qarrben-d ɣares imeḥḍaren nnes nnan-as: "Ȓweqṯ ṯeƹḏu, amcan-a ḏ ȓexȓa. Sekk iwḏan ɣar ȓedcur aḏ d sɣen min ɣa ccen."
16 Inna-asen Ƹisa: "Mayemmi ɣa raḥen? Ucem-asen kenniw min ɣa ccen."
17 Nnan-as: "Ɣarneɣ ḏa ɣir xemsa n ṯxebbazin ḏ ṯnayen iseȓman."
18 Inna-asen: "Awim-d manayenni ɣari."
19 Yumar ȓɣaci nni aḏ qqimen x arbiƹ. Iṭṭef xemsa n ṯxebbazin nni ḏ ṯnayen n iseȓman nni, iysi ṯiṭṭawin nnes ɣar ujenna ickar Arebbi. Irza ṯixebbazin nni yuca-asen-ṯent i imeḥḍaren nnes, ȓxeddnnit ferqen-ṯent x yiwḏan nni marra.
20 Marra ccin jjiwnen. Kkaren jemƹen min xasen iceṭṭen, ṯenƹac n induṯen ƹemmaren s iȓeqquzen.
21 Lƹadad n yinni iccin niṯni xemsa aȓef n iryazen bȓa ṯimɣarin ḏ iḥenjiren.
Siḏna Ƹisa iggur x ȓemwaj n ȓebḥar
22 Ȓxeddnnit inna-asen Ƹisa i imeḥḍaren nnes aḏ nyen ḏi ṯɣarrabut aḏ ẓwan ɣar ujemmaḍ-in, u netta itemsafaḍ x ȓɣaci.
23 Wami xasen imsafaḍ x ȓɣaci nni, igaƹƹeḏ ɣar uḏrar aḏ iẓẓaǧ ḏinni waḥḏes. Ɣar uƹecci ƹaḏ aqa-ṯ ḏinni waḥḏes.
24 Ṯaɣarrabut ṯeggwej aṭṭas zi ȓbarr, ȓemwaj tawin-teṯ tarran-teṯ ȓaḥeqqac arriḥ itṣuḍ-d zi jjiheṯ nneɣnit.
25 Ƹȓayen iqarreb-d ȓefjar, iruḥ Ƹisa ɣar imeḥḍaren nnes iggur x iḍaren x waman n ȓebḥar.
26 Wami ṯ ẓrin iggur x waman x iḍaren, nxeȓƹen nnan: "Wa ḏ ȓexyaȓ!" Snekkaren ṯɣuyyiṯ s ṯiggwḏi.
27 Ȓxeddnnit inna-asen Ƹisa: "Ahnam! Aqa ḏ nec, war teggwḏem ca!"
28 Indeq-d Buṭrus inna-as: "Meȓa ḏ cek a Siḏi, ȓaɣa-ayi-d aɣarek d aseɣ x waman."
29 Inna-as Ƹisa: "Araḥ-d!" Ikkar ihwa-d Buṭrus zi ṯɣarrabut uca iggur x iḍaren x waman ɣar Ƹisa.
30 Maca iggweḏ wami iẓra arriḥ itṣuḍ s jjehḏ. Ibḏa iɣarreq ȓxeddnnit isnekkar ṯɣuyyiṯ: "Ahya a Siḏi, nejja-ayi!"
31 Ȓxeddnnit isiɣ-as Ƹisa fus nnes iṭṭef-iṯ inna-as: "Lʼiman nnec ḏ uqlil, mayemmi c yuḏef ccekk?"
32 Wami nyan ḏi ṯɣarrabut irsa arriḥ.
33 Uca sejjḏen-as yinni iǧan ḏi ṯɣarrabut nnan: "Ḏ ṣṣaḥ, cek ḏ Mmis n Arebbi!"