Lƹadaṯ iy war d yusin ca zi Arebbi
15
1 Ssenni usin-d ɣar Ƹisa ȓḥizeb n ifarrisiyen ḏ imseȓmaḏen n Ccariƹa zi ṯendint n Lquds, nnan-as:
2 "Mayemmi imeḥḍaren nnec beṭṭȓen lƹadaṯ n ȓejḏuḏ nneɣ? War siriḏen ca ifassen nsen qbeȓ iy ɣa ccen aɣrum."
3 Indeq-d Ƹisa inna-asen: "Iwa kenniw, mayemmi ṯbeṭṭȓem ȓuṣiyeṯ n Arebbi bac aḏ tsiɣim ḏi lƹadaṯ nwem?
4 Minzi Arebbi inna: Weqqar babac ḏ yemmac.a Aqa wen ɣa yukkaren babas niɣ ḏ yemmas, itxeṣṣa aḏ immeṯ.b
5-6 Maca kenniw ṯeqqarem war iǧi bu labud i yiwḏan aḏ weqqaren niɣ aḏ ƹawnen lwalidin. Tmenyaṯ iy ɣa ucen i lwalidin aṯent ucen i ṯemziḏa. Ammu ṯbeddȓem ȓmaƹna n wawaȓ n Arebbi ḥima aḏ teggem mammec ḏawem iƹjeb ȓḥaȓ s lƹadaṯ nwem.
7 A lmunafiqin! Inna ȓḥaqq nnabi Icaƹya wami xawem issiweȓ ḏeg yij n zman:
8 Ccaƹb-a itweqqar-ayi s wawaȓ waha,
maca uȓ nnes iggwej xafi.
9 Iwḏan-a ƹebbḏen-ayi ḏi ȓxawi,
ȓaḥeqqac seȓmaḏen ṯimesȓayin iǧan ḏ ȓuṣiyaṯ n bnaḏem."c
10 Iȓaɣa-d Ƹisa i ȓɣaci, inna-asen: "Sennṭeṯ, fehmeṯ:
11 Ma ḏin can ṯmesȓayṯ itaḏfen aqemmum ig iǧan ḥram x bnaḏem? Walu. Lƹaks, min d iteffɣen zeg uqemmum aqa manayenni ig iǧan ḥram x bnaḏem."
12 Qarrben-d ɣares imeḥḍaren nnes nnan-as: "Ma ṯessneḏ belli ifarrisiyen war ḏasen iƹjib bu ȓḥaȓ wami sȓin i wawaȓ nnec?"
13 Indeq-d inna-asen: "Kuȓ arbiƹ war ṯ iẓẓu ca Baba iǧan ḏeg ujenna aḏ ineqȓeƹ zeg iẓewran nnes.
14 Jjem-ṯen! Niṯni ḏ iḍarɣaȓen tjarran iḍarɣaȓen. Meȓa aḍarɣaȓ ijarr aḍarɣaȓ, aḏ wḍan s ṯnayen iḏsen ḏi can ṯesrafṯ."
15 Inna-as Buṭrus: "Fesser-aneɣ ȓmaƹna-ya."
16 Inna-as Ƹisa: "Ȓa ḏ kenniw ƹaḏ war ṯefhimem?
17 Ma war ṯessinem belli min itaḏfen aqemmum itraḥ ɣar uƹeddis, iteffeɣ zi ddat?
18 Maca min d iteffɣen zeg uqemmum itas-d zeg wuȓ, u ḏ manaya ig iǧan ḥram x bnaḏem.
19 Ȓaḥeqqac zeg wuȓ iy zi d tekkant lʼafkar ṯiƹeffanin, bnaḏem aḏ ineɣ, aḏ izna, aḏ ifseḏ, aḏ yacar, aḏ icheḏ zzur, aḏ yini ȓbaṭeȓ.
20 Ḏ ṯimesȓayin nni ig iǧan ḥram x bnaḏem, maca meȓa itett s ifassen bȓa ma ṯen isireḏ war iǧi bu ḥram x bnaḏem."
Lʼiman n ṯemɣarṯ n Ayṯ-Kanƹan
21 Yuyur ssenni Ƹisa, iruḥ ɣar jwayeh n ṯneddamd n Ṣur ḏ Ṣaydun.
22 Ṯusa-d ɣares ij n ṯemɣarṯ zi Ayṯ-Kanƹane ṯzeddeɣ ḏinni. Ṯesɣuyiw ṯenna-as i Ƹisa: "Rḥem-ayi a Ƹisa, a Mmis n Ayṯ-Dawud! Yeǧi ḏayes jjen, itƹeddab-it aṭṭas."
23 War ḏas inni Ƹisa uȓa ḏ ij n wawaȓ. Qarrben ɣares imeḥḍaren nnes nnan-as: "Sufeɣ-it xaneɣ, ȓaḥeqqac ṯetbeƹ-aneɣ s ṯɣuyyiṯ."
24 Inna Ƹisa: "Twassekkeɣ-d ɣir ɣar izmaren iweddaren, iƹni iwḏan n Ayṯ-Israʼil."
25 Maca ṯamɣarṯ nni ṯusa-d ɣares ṯsejjeḏ-as ṯenna-as: "Ahya a Siḏi, ƹawen-ayi!"
26 Indeq-d inna-as: "War iƹeddeȓ aḏ imeysi uɣrum n iḥenjiren aḏ imenḍer i iqzinen."
27 Ṯenna-as ṯemɣarṯ nni: "Wah a Siḏi, maca uȓa ḏ iqzinen tetten min iweṭṭan zi ṭabȓa n ayṯbab nsen."
28 Uca inna-as Ƹisa: "Cem a ṯamɣarṯ, lʼiman nnem ḏ ameqqran!" Inna-as: "Aḏ tafeḏ min ṯrezzuḏ." Ḏi ṯsaƹat nni ṯgenfa yeǧis.
Siḏna Ƹisa isecc arbeƹa aȓef n iryazen
29 Ibeƹƹeḏ ssenni Ƹisa, iruḥ ɣar ujemmaḍ-in n ȓebḥar n Ljalil. Igaƹƹeḏ ɣar ij n uḏrar iqqim ḏinni.
30 Usin-d ɣares aṭṭas n ȓɣaci. Uwin-d akiḏsen izeḥḥafen ḏ iḍarɣaȓen ḏ izeynunen ḏ inecrufen ḏ waṭṭas n imehȓac nneɣnit. Sersen-ṯen ɣar iḍaren nnes isgenfa-ṯen.
31 Tƹejjben yiwḏan nni wami ẓrin izeynunen ssawaȓen, inecrufen genfan, izeḥḥafen gguren, iḍarɣaȓen twaȓan. Uca ḥemḏen Arebbi n Ayṭ-Israʼil.
32 Iȓaɣa-d Ƹisa i imeḥḍaren nnes inna-asen: "Qqsen-ayi yiwḏan-a. Ṯeȓt-iyyam aqa-ṯen akiḏi war ɣarsen min ɣa ccen. War xseɣ ca aṯen ssekkeɣ amen war ccin, ḥima war nezzfen ḏeg ubriḏ."
33 Nnan-as imeḥḍaren nnes: "Mani ɣa naf aɣrum iy zi ɣa nsejjiwen qaƹ lƹadad-a n yiwḏan ḏi ȓexȓa-ya?"
34 Inna-asen Ƹisa: "Cḥaȓ ɣarwem n uɣrum?"
Nnan-as: "Sebƹa n ṯecnifin ḏ can iseȓman ḏ imezyanen."
35 Yumar Ƹisa ȓɣaci aḏ qqimen ḏi ṯmurṯ.
36 Iṭṭef sebƹa nni n ṯecnifin ḏ iseȓman, ickar Arebbi. Irza manayenni yuca-asen i imeḥḍaren nnes aḏ ferqen x ȓɣaci nni.
37 Marra ccin jjiwnen. Ceṭṭen-asen sebƹa n induṯen ƹemmaren s iȓeqquzen.
38 Marra iryazen nni ig iccin niṯni arbeƹa aȓef iḏsen bȓa ṯimɣarin ḏ iḥenjiren.
39 Wami imsafaḍ Ƹisa x ȓɣaci nni, inya ḏeg ij n ṯɣarrabut iruḥ ɣar jwayeh n Magdala.