Iwḏan war tefhimen min ƹnant lmuƹjizaṯ n Siḏna Ƹisa
16
1 Usin-d ɣares ȓḥizeb n ifarrisiyen ḏ ȓḥizeb n iṣadduqiyen, ttaren zzayes ij n lmuƹjiza zeg ujenna ḥima aṯ jarrben.
2 Indeq-d Ƹisa inna-asen: "Ɣar ȓmeɣreb ṯeqqarem: Aḏ yiȓi ljaw ḏ aṣebḥan ṯiwecca, ȓaḥeqqac ajenna ḏ azeggwaɣ.
3 Ɣar ȓefjar ṯeqqarem: Nhara n unẓar ḏ wajjaj ȓaḥeqqac ajenna ḏ azeggwaɣ ḏayes aseynu ḏ abercan. Lḥala ujenna ṯessnem at tcerrḥem, maca lƹalamaṯ n zman-a war ṯzemmrem aṯent tcerrḥem.
4 Iwḏan iƹeffanen n ȓweqṯ-a ixeddƹen Arebbi tettaren lmuƹjiza, maca war ḏasen itmuci ɣir lmuƹjiza nni n nnabi Yunes." Ssenni iruḥ ijji-ṯen.
5 Wami uwḍen imeḥḍaren nnes ɣar ujemmaḍ-in n ȓebḥar ttun war kisen uwin aɣrum.
6 Inna-asen Ƹisa: "Ɣarwem! Ḥḍam ixef nwem zeg untuna n lʼaḥzab n ifarrisiyen ḏ iṣadduqiyen."
7 Ssiwȓen jarasen nnan: "Iqqar manaya ȓaḥeqqac war d nuwi bu uɣrum."
8 Issen Ƹisa minxef tuɣa ssawaȓen, inna-asen: "Lʼiman nwem ḏ uqlil. Mayemmi ṯeqqarem jarawem war ɣarneɣ bu uɣrum?
9 Ma ƹaḏ war ṯefhimem? War ṯeƹqiȓem xemsa nni n ṯecnifin ig iseccen xemsa aȓef n iryazen? Mecḥaȓ n induṯen iy ṯeccurem?
10 War ṯeƹqiȓem sebƹa nni n ṯecnifin ig iseccen arbeƹa aȓef n iryazen? Mecḥaȓ n induṯen iy ṯeccurem?
11 Mammec ṯeggim war ṯefhimem? Nec war ssiwiȓeɣ ca x uɣrum. Ḥḍam ixef nwem zeg untun n lʼaḥzab n iṣadduqiyen ḏ ifarrisiyen."
12 Ȓxeddnnit ƹaḏ iy fehmen imeḥḍaren belli war ḏasen issiwiȓ ca x untun n uɣrum, maca inna-asen: Ḥḍam ixef nwem zi min seȓmaḏen ifarrisiyen ḏ iṣadduqiyen.
Buṭrus icehheḏ x Lmasiḥ
13 Wami yuweḍ Ƹisa ɣar jjiheṯ n ṯendint n Qayṣariya Filibbas, isseqsa imeḥḍaren nnes inna-asen: "Min qqaren yiwḏan x Mmis n bnaḏem?"
14 Nnan-as: "Ȓebƹaḍ qqaren ḏ Yaḥya,b inneɣnit qqaren ḏ Ilyas, inneɣnit qqaren ḏ Irmiya niɣ ḏ can ijjen zi lʼanbiya."
15 Inna-asen Ƹisa i imeḥḍaren nnes: "Y kenniw, min ḏayi tarrim nec?"
16 Indeq-d Simƹan Buṭrus inna-as: "Cek ḏ Lmasiḥ, Mmis n Arebbi iddaren."
17 Ȓxeddnnit inna-as Ƹisa: "Ssaƹḏ nnec a Simƹan, a mmis n Yuna! War iǧi bu ḏ bnaḏem iy ḏac iseḍharen manaya menɣir Baba iǧan ḏeg ujenna.
18 Nec ƹaweḏ aqa qqareɣ-ac: Cek ḏ Buṭrus, iƹni ḏ 'Azru.' X uzru-ya aḏ bniɣ jmaƹṯ n ȓmuminin inu, ṯiwwura n Ljaḥim war zzaysent tiwi walu!
19 Aḏac uceɣ ȓemfataḥ n ȓmulk ujenna. Min ɣa ṯceddeḏ ḏi ṯmurṯ aḏ yiȓi itwacedd ḏeg ujenna. Min ɣa ṯerzmeḏ ḏi ṯmurṯ aḏ yiȓi itwarzem ḏeg ujenna."
20 Ȓxeddnnit Ƹisa iweṣṣa imeḥḍaren nnes inna-asen war qqarem i ḥadd belli nec ḏ Lmasiḥ.
Siḏna Ƹisa issawaȓ x ȓmewṯ nnes
21 Ssenni ibḏa Ƹisa isfehham i imeḥḍaren nnes belli labud aḏ iraḥ netta ɣar ṯendint n Lquds aḏ itwaƹeddeb x waṭṭas n ṯmesȓayin x ufus n imeqqranen n wuḏayen ḏ arruyas n ȓefquha ḏ imseȓmaḏen n Ccariƹa. Aṯ nɣen, wis ṯeȓt-iyyam aḏ d ikkar zi ȓmewṯ."
22 Isbeƹƹeḏ-iṯ Buṭrus waḥḏes, iƹarreḏ-as inna-as: "Ac iḥfeḍ Arebbi a Siḏi! Ƹemmarṣ war ḏac itewqiƹ manaya."
23 Maca Ƹisa ineqȓeb ɣares inna-as i Buṭrus: "Beƹƹeḏ xafi ɣar ȓeggwaj a Cciṭan! Ḏ cek ḏ azru iy ḏi tneqȓaḏeɣ. War tfekkareḏ ca amecnaw Arebbi, tfekkareḏ amecnaw bnaḏem."
24 Ssenni issiweȓ Ƹisa akeḏ imeḥḍaren nnes, inna-asen: "Wenni ixsen aḏayi iḏfar nec, aḏ ismeḥ ḏeg yixef nnes, aḏ ikessi ṣṣalib nnes,c aḏayi iḏfar.
25 Ȓaḥeqqac wen ixsen aḏ irbeḥ ȓaƹmar nnes aṯ ixser. Wen ɣa ixesren ȓaƹmar nnes x ȓesbab inu aṯ irbeḥ.
26 Mizi ɣa ṯenfeƹ bnaḏem meȓa irbeḥ ddunect ṯekmeȓ aḏ ixser ȓaƹmar nnes? Min ɣa yuc bnaḏem ḏeg umcan n ȓaƹmar nnes?
27 Aqa Mmis n bnaḏem aḏ d yas s lƹaḍama n Babas akeḏ lmalaʼikaṯ nnes, uca aḏ ijaza mkuȓ ijjen ƹlaḥsab ȓexḏayem nnes.
28 Aqa tesȓam ȓḥaqq: Ȓebƹaḍ zeg yinni iǧan ḏa akiḏi niṯni war tmettin ca aȓ ɣa ẓren Mmis n bnaḏem yusa-d ḏi ȓmulk nnes.