Siḏna Musa ḏ Siḏna Ilyas ḍharen-d akeḏ Siḏna Ƹisa
17
1 Ṯeƹḏu sett-iyyam, yuwi Ƹisa Buṭrus ḏ Yaƹqub ḏ wumas Yuḥanna, indeh-iṯen waḥeḏsen ɣar yij n uḏrar yuƹȓa.
2 Ƹisa, netta iḏweȓ am nnur zzaṯ i ṯiṭṭawin nsen, aɣembub nnes itceƹciƹ amecnaw ṯfuct. Iḏweȓ warruḍ nnes ḏ acemȓaȓ ireqq amecnaw ṯfawṯ.
3 Aqa imeḍhar-asen-d ḏinni nnabi Ilyas ḏ nnabi Musa. Twaȓan-ṯen ssawaȓen akeḏ Ƹisa.
4 Indeq-d Buṭrus inna-as i Ƹisa: "A Siḏi, ḏ aṣebḥan akic neqqim ḏanita. Meȓa ṯexseḏ, aḏ ggeɣ ṯȓaṯa n iqiḍan: ijjen i cek, ijjen i Musa, unneɣnit i Ilyas."
5 Ƹaḏ issawaȓ Buṭrus wami xasen d ihwa ij n useynu itseqsiq. Ṯendeq-d ij n ṯmijja zeg useynu nni ṯenna-asen: "Wa ḏ Mmi iƹizzen, farḥeɣ zzayes. Ṣennṭeṯ ɣares."
6 Wami sȓin imeḥḍaren ṯmijja nni ggwḏen sejjḏen ɣar ṯmurṯ.
7 Iqarreb ɣarsen Ƹisa iḥaḏa-ṯen inna-asen: "Kkarem war teggwḏem ca."
8 Ysin ṯiṭṭawin nsen war ufin ḥadd illa Ƹisa.
9 Wami d hewwan zeg uḏrar iweṣṣa-ṯen Ƹisa inna-asen: "War tƹawaḏem i ḥadd min ṯeẓrim aȓ d ɣa ikkar Mmis n bnaḏem zi ȓmewṯ."
10 Sseqsan-ṯ imeḥḍaren nnes nnan-as: "Mayemmi imseȓmaḏen n Ccariƹa qqaren nnabi Ilyas itxeṣṣa aḏ d yas ḏ amezwaru?"
11 Inna-asen: "Ḏ ṣṣaḥ itxeṣṣa aḏ d yas Ilyas aḏ iƹḏeȓ kuȓci.
12 Maca qqareɣ-awem: Aqa Ilyas yusa-d niṯni war ṯ ssinen ca, ggin zzayes min xsen. Amenni iy ɣa ƹeddben Mmis n bnaḏem."
13 Uca fehmen imeḥḍaren belli issawaȓ-asen x Yaḥya wenni itṭehharen s waman.
Siḏna Ƹisa isgenfa ij n uḥenjir ḏayes jjen
14 Wami d ḏewȓen ɣar ȓɣaci, iqarreb ij n uryaz ɣar Ƹisa iwḍa x ifadden zzaṯ nnes.
15 Inna-as: Ahya a Siḏi, rḥem-ayi memmi, ḏayes jjen itƹeddab aṭṭas. Aṭṭas n ṯwaȓaṯin iweṭṭa ḏi ṯmessi niɣ ḏeg waman.
16 Uwiɣ-ṯ-iḏ ɣar imeḥḍaren nnec maca war zemmren aṯ sgenfan."
17 Ijaweb Ƹisa inna: "A iwḏan n ȓweqṯ-a iy ḏi war iǧi lʼiman, a yinni iffɣen abriḏ! Mecḥaȓ iy kiwem ɣa qqimeɣ u mecḥaȓ ḏawem ɣa ṣbareɣ? Awim-ayi-ṯ-id ḏa."
18 Ƹisa isbedd jjen nni aƹeffan, iffeɣ zeg uḥenjir nni igenfa ḏi ṯsaƹat nni.
19 Qarrben-d imeḥḍaren ɣar Ƹisa waḥḏes nnan-as: "Mayemmi neccin war nzemmer aṯ nsufeɣ?"
20 Inna-asen Ƹisa: "Ȓaḥeqqac lʼiman nwem ḏ uqlil. Aqa tesȓam ȓḥaqq: Mȓi ḏaywem lʼiman ɣir anect ij n ṯḥebbuct n bugarḏaȓ,a iȓi ṯennim i uḏrar-a: Neqȓeƹ ssa ɣar ḏiha aḏ ineqȓeƹ. War xawem iteqsiḥ walu.
21 {Nnuƹa-ya n jjen aḏ tsufɣem ɣir s ṯẓaǧiṯ ḏ uẓummi.}"
22 Imeḥḍaren nnes aqayen munen ḏinni ḏi ṯmurṯ n Ljalil wami ḏasen inna Ƹisa: "Ƹȓayen aḏ itwasellem Mmis n bnaḏem ɣar ifassen n yiwḏan.
23 Aṯ nɣen, maca nhar wis ṯeȓt-iyyam aḏ d ikkar." Uca xeyyqen imeḥḍaren s waṭṭas.
Ḍḍariba n ṯemziḏa ṯameqqrant
24 Wami yuweḍ Ƹisa ḏ imeḥḍaren nnes ɣar Kafernaḥum, usin-d yinni ijemmƹen ḍḍariba i ṯemziḏa ṯameqqrant. Qarrben ɣar Buṭrus nnan-as: "Ma war itxeǧis lmuƹallim nwem ḍḍariba n ṯemziḏa ṯameqqrant?"
25 Inna-asen: "Wah, itxeǧas-it."
Wami yuḏef Buṭrus ɣar ṯeddarṯ, Ƹisa izwar-as s wawaȓ inna-as: "Min ḏac imeḍharen a Simƹan? Uw ɣa ixeǧsen ȓaƹcur niɣ ḍḍariba i izeǧiḏen n ṯmurṯ, ma ṯarwa nsen niɣ iwḏan nneɣnit?"
26 Inna-as Buṭrus: "Iwḏan nneɣnit."