Lʼiman ḏ ȓmuƹṣiyeṯ
18
1 Ḏi ṯsaƹat nni qarrben-d imeḥḍaren ɣar Ƹisa nnan-as: "Ug iǧan qaƹ ḏ ameqqran ḏi ȓmulk ujenna?"
2 Iȓaɣa-d Ƹisa x yij uḥenjir ḏ amezyan, isbedd-iṯ ḏi ȓwesṭ nsen.
3 Inna-asen: "Aqa tesȓam ȓḥaqq: Labud i kenniw aḏ tḏewȓem aḏ tiȓim amecnaw iḥenjiren imezyanen. Meȓa lla, ƹemmarṣ aḏ taḏfem ȓmulk ujenna.
4 Wenni isemzayen ixef nnes amecnaw aḥenjir-a, ḏ netta iy ɣa yiȓin ḏ ameqqran qaƹ ḏi ȓmulk ujenna.
5 Wen ɣa iqebȓen can uḥenjir am wa x ȓesbab inu, ḏ nec ig iqbeȓ.
6 Wenni iy ɣa yawin ijjen zeg imezyanen-a iy zzayi itamnen ɣar ȓmuƹṣiyeṯ, ḥsen-as aḏ itwacedd ij n uzru n ṯsirṯ ɣar yiri nnes aḏ itwaɣreq ḏi ȓaǧeɣ n ȓebḥar.
7 Ya ȓefḍiḥeṯ n yiwḏan x ȓesbab n ṯmesȓayin itawyen ɣar ȓmuƹṣiyeṯ. Ṯimesȓayin nni aḏ d asent, walakin ya ȓefḍiḥeṯ i bnaḏem nni ig iteggen manayenni!
8 Meȓa fus nnec niɣ ḍar nnec itsebbab-ac ḏi can ȓmuƹṣiyeṯ, qess-iṯ nḍer-iṯ xak. Aḏ taḏfeḏ jenneṯ s yij n ufus niɣ s yij n uḍar, ḥsen-ac zi meȓa qqimen ɣarek ṯnayen ifassen niɣ ṯnayen iḍaren aḏ taḏfeḏ ṯimessi iy war ixessin ca.
9 Meȓa ṯiṭṭ nnec tsebbab-ac ḏi can ȓmuƹṣiyeṯ, qȓeƹ-it nḍer-it xak. Aḏ taḏfeḏ jenneṯ s yij n ṯiṭṭ, ḥsen-as zi meȓa qqiment ɣarek ṯnayen ṯiṭṭawin aḏ taḏfeḏ jahennama n ṯmessi.
10 Ɣarwem aḏ tḥeggarem can ḥadd zeg imezyanen-a. Qqareɣ-awem: Lmalaʼikaṯ nsen ḏeg ujenna ȓebda xezzarent Baba iǧan ḏeg ujenna.
11 {Liʼanna Mmis n bnaḏem yusa-d aḏ inejja yinni iweddaren.}
12 Min ḏawem imeḍharen? Ijjen ɣares miyya n iḥuȓiyen. Meȓa iweddar-as ijjen zzaysen, aḏ ijj tesƹa u tesƹin ḏeg uḏrar aḏ iraḥ aḏ irzu x wenni iweddaren.
13 Aqa tesȓam ȓḥaqq: Meȓa yufi-ṯ, azzayes ifareḥ ktar zi min ɣa ifareḥ x tesƹa u tesƹin nni war iweddaren!
14 Amenni uȓa ḏ Babaṯwem iǧan ḏeg ujenna war ixis uȓa ḏ ijjen zeg imezyanen-a aḏ iweddar.
Umac ixḍa akiḏec
15 Meȓa ixḍa akic wumac, ruḥ ɣares nha-ṯ ɣir kenniw s ṯnayen. Meȓa igg-ac array, aḏ tiȓiḏ mliḥ ƹaweḏ ak wumac.
16 Maca meȓa yugi aɣarek iṣenneṭ, awi akiḏec ijjen niɣ ṯnayen, ḥima ataf lɣaleṭ ssnen-ṯ ṯnayen niɣ ṯȓaṯa n ȓechuḏ.a
17 Maca meȓa yugi aɣarsen iṣenneṭ, ini-ṯ i jmaƹṯ n ȓmuminin. U meȓa yugi aɣarsen iṣenneṭ, ḥseb-iṯ ḏ ȓkafer niɣ ḏ axeddaƹ.b
18 Aqa tesȓam ȓḥaqq: Marra min ɣa ṯceddem ḏi ṯmurṯ aḏ yiȓi itwacedd ḏeg ujenna. Marra min ɣa ṯerzmem ḏi ṯmurṯ aḏ yiȓi itwarzem ḏeg ujenna.
19 Qqareɣ-awem ƹaweḏ: Meȓa ṯtafqem ṯnayen zzaywem x ṯmurṯ ṯettarem can ȓḥajeṯ i Baba iǧan ḏeg ujenna, aḏawem istajeb.
20 Ȓaḥeqqac mani ɣa munen ṯnayen niɣ ṯȓaṯa x ȓesbab inu, nec aȓ ḏin iȓiɣ ḏi ȓwesṭ nsen."
Ȓmaƹna n uxeddam iy ḏi war iǧi arraḥmeṯ
21 Ȓxeddnnit iqarreb Buṭrus ɣar Ƹisa inna-as: "A Siḏi, cḥaȓ n ṯwaȓaṯin iy kiḏi ɣa ixḍa wuma bac aḏas semḥeɣ? Ma sebƹa n ṯwaȓaṯin?"
22 Inna-as Ƹisa: "Lla, war iǧi bu sebƹa n ṯwaȓaṯin, aḏac iniɣ sebƹin uweṯ-it ḏi sebƹa n ṯwaȓaṯin!
23 Ȓaḥeqqac ȓmulk ujenna itawi-d ḏeg yij n uzeǧiḏ irezzu aḏ igg ȓeḥsab akeḏ ixeddamen nnes.
24 Wami ibḏa ḏi ȓeḥsab, uwin-d ɣares ijjen ḏayes aṭṭas n umarwas, am ƹecra aȓef milyar.
25 War ɣares minzi ɣa yarr amarwas, iweṣṣa siḏes aḏ immenz netta ḏ ṯamɣarṯ nnes ḏ ṯarwa nnes ḏ marra min ɣares ḥima aḏ ixeǧes amarwas.
26 Yusa-d uxeddam isejjeḏ-as i siḏes, inna-as: Ahya a siḏi, ṣbar xafi. Aḏac xeǧseɣ marra min ḏayi tarseḏ.
27 Uca iqqes-as i siḏes iḏȓeq-as, ismeḥ-as ḏeg umarwas.
28 Iffeɣ uxeddam nni imseȓqa ak yijjen nneɣnit zeg ixeddamen, tuɣa itares-as cwayt waha, am yij n milyun. Iṭṭef-iṯ ibḏa itjeyyaf-iṯ iqqar-as: Xeǧes-ayi min ḏac tarseɣ!
29 Iwḍa-yas umeddukeȓ nnes ɣar iḍaren inna-as: Ṣbar xafi cwayt ac xeǧseɣ.
30 Yugi, iruḥ netta inḍer-iṯ ḏi ȓeḥbes aȓ ɣa ixeǧes amarwas nnes.
31 Ẓrin yinni kis ixeddmen min iweqƹen, iqqes-asen ȓḥaȓ ruḥen ɣar siḏiṯsen ƹawḏen-as min iweqƹen.
32 Ikkar iȓaɣa-yas-d siḏes inna-as: Ay axeddam aƹeffan! Nec semḥeɣ-ac ḏi marra min ḏac tarseɣ ȓaḥeqqac ṯettareḏ-ayi.
33 Ȓa ḏ cek tuɣa itxeṣṣa-cek aḏ treḥmeḏ ameddukeȓ nnec amecnaw mammec c reḥmeɣ."
34 Iɣḍeb siḏes s waṭṭas isellem axeddam nni ɣar yinni iy ṯ ɣa ƹeddben aȓ ɣa ixeǧes marra min ḏayes ḏ amarwas.
35 Ammu iy kiwem ɣa igg Baba iy iǧan ḏeg ujenna meȓa war ismiḥ mkuȓ ijjen zzaywem s wuȓ nnes i wumas.