Ṭṭalaq ƹlaḥsab mammec iqqar Siḏna Ƹisa
19
1 Wami ikemmeȓ Ƹisa awaȓ nnes, iffeɣ zi ṯmurṯ n Ljalil, yiweḍ ɣar jwayeh n Yahuḏiya ḏ ujemmaḍ-in n yiɣzar n Lʼurdun.
2 Ḏfaren-ṯ ij n lƹadad n yiwḏan, isgenfa imehȓac nsen ḏinni.
3 Qarrben ɣares can yiwḏan zi ȓḥizeb n ifarrisiyen ḥima aṯ jarrben, nnan-as: "Ma ḥalal aḏ iǧef uryaz i ṯemɣarṯ nnes ḏi mkuȓ ssabab?"
4 Indeq-d Ƹisa inna-asen: "Ma war ṯeɣrim min iqqar Lkitab? Zeg wami ṯeǧa ddunect ixȓeq Lxaliq aryaz ḏ ṯemɣarṯ.a
5 Inna Arebbi: X manayenni aryaz aḏ ijj babas ḏ yemmas aḏ imun akeḏ ṯemɣarṯ nnes, aḏ ḏewȓen s ṯnayen iḏsen ḏ ijjen.b
6 War tiȓin bu ḏ ṯnayen, aḏ iȓin ḏ ijjen. X manaya, min ismun Arebbi war ṯ iferreq bnaḏem."
7 Nnan-as ifarrisiyen: "Iwa, mayemmi iweṣṣa Musa aryaz aḏ yuc ṯabrat n waǧaf i ṯemɣarṯ nnes, aḏas iǧef?"
8 Inna-asen Ƹisa: "Ijja-kenniw Musa aḏ teǧfem i ṯemɣarin nwem minzi uȓ nwem iqseḥ, maca ḏeg umezwaru war iǧi ca ammu.
9 Maca nec qqareɣ-awem: Marra wenni ɣa iǧfen i ṯemɣarṯ nnes, amen war ṯezni, yuwi can icten nneɣnit, izna."
10 Nnan-as imeḥḍaren nnes: "Meȓa ammu lḥala n uryaz akeḏ ṯemɣarṯ, ḥsen-as war imeǧec ca."
11 Inna-asen Ƹisa: "Zemmren aḏ qebȓen awaȓ-a ɣir yinni umi yuca Arebbi ṯizemmar aṯ qebȓen.
12 Ḏinni ȓebƹaḍ zeg wami xeȓqen war zemmren aḏ meȓcen. Ḏinni ȓebƹaḍ nneɣnit qqnen-ṯen yiwḏan. U ḏinni ȓebƹaḍ nneɣnit ugin aḏ meȓcen x ȓesbab n ȓmulk ujenna. Wenni izemmren aḏ iqbeȓ ṯimesȓayin-a aṯent iqbeȓ."
Siḏna Ƹisa itbarek iḥenjiren imezyanen
13 Uwin-d yiwḏan can iḥenjiren ḏ imezyanen ɣar Ƹisa ḥima axasen isers ifassen axasen iẓẓaǧ. Maca ƹarrḏen-asen imeḥḍaren nnes.
14 Uca inna-asen Ƹisa: "Jjem iḥenjiren imezyanen aɣari d asen war ḏasen tƹarraḏem ca, ȓaḥeqqac ȓmulk ujenna itiȓi ɣar yinni iǧan am yina."
15 Igga xasen ifassen nnes yuyur ssenni.
Aḥenjir ig iǧan ḏ ttajar
16 Iqarreb ij n uḥenjir ɣar Ƹisa inna-as: "A Lmuƹallim, min ɣa ggeɣ ḏ aṣebḥan ḥima aɣari ṯiȓi ṯuḏarṯ n ȓebda?"
17 Inna-as Ƹisa: "Mayemmi iy ḏayi tesseqsiḏ x min iṣebḥan? Ɣir ijjen ig iǧan ḏ aṣebḥan. Meȓa ṯexseḏ aḏ taḏfeḏ ṯuḏarṯ n ȓebda, egg array s ȓuṣiyaṯ."
18 Inna-as uḥenjir nni: "Man ȓuṣiyaṯ?"
Inna-as Ƹisa: "War neqq, war zenni, war tacar, war cehheḏ bu zzur,
19 weqqar babac ḏ yemmac, xes ajjar nnec amecnaw ixef nnec."
20 Inna-as uḥenjir nni: "Tweqqareɣ marra manaya. Min ḏayi iqqimen at ggeɣ?"
21 Inna-as Ƹisa: "Meȓa ṯexseḏ aḏ teggeḏ kuȓci nican, ruḥ zenz marra min ɣarek freq-iṯ x ȓmusakin. Uca aɣarek yiȓi ȓkenz ḏeg ujenna, as-d aḏayi ṯeḏfareḏ."
22 Wami isȓa uḥenjir manayenni, iruḥ ixeyyeq ȓaḥeqqac ɣares aṭṭas n wagȓa.
23 Inna-asen Ƹisa i imeḥḍaren nnes: "Aqa tesȓam ȓḥaqq: Mecḥaȓ iqseḥ x ttajar aḏ yaḏef ȓmulk ujenna."
24 Qqareɣ-awem ƹaweḏ: Qbeȓ iy ɣa yaḏef ij n ttajar ɣar ȓmulk n Arebbi, qa aḏ yaḏef ij n uȓɣem zi ṯiṭṭ n ṯseynefṯ."
25 Imeḥḍaren tƹejjben aṭṭas wami sȓin manayenni, nnan-as: "Xyar, ug izemmren aḏ injem!?"
26 Ixzar ɣarsen Ƹisa inna-asen: "Manaya war ḏas zemmren yiwḏan, maca kuȓci izemmer-as Arebbi."
27 Indeq-d Buṭrus inna-as: "Aqa neccin nesmeḥ ḏi kuȓci neḏfar-icek, min ɣarneɣ ɣa yiȓin?"
28 Inna-asen Ƹisa: "Aqa tesȓam ȓḥaqq: Ḏi ṯuḏarṯ nneɣnit xmi ɣa iqqim Mmis n bnaḏem x lƹarc nnes n lƹaḍama, uȓa ḏ kenniw ḏayi iḏfaren aḏ teqqimem x ṯenƹac n lƹarcaṯ ḥima aḏ tḥekmem x ṯenƹac n ṯqebbaȓ n Ayṯ-Israʼil.
29 U marra yinni isemmḥen x ȓesbab inu ḏi ṯuḏrin nsen niɣ ḏi ayṯmas niɣ ḏi suyṯmas niɣ ḏi babas ḏ yemmas niɣ ḏi ṯarwa nsen niɣ ḏi imarjeƹiwen nsen aɣarsen ṯiȓi miyya n ṯseqqar ktar, aḏ warṯen ṯuḏarṯ n ȓebda.
30 Aṭṭas iǧan ḏ imezwura aḏ ḏewȓen ḏ ineggura, ineggura aḏ ḏewȓen ḏ imezwura."