Ȓmaƹna n ixeddamen n umarjeƹ uḍiȓ
20
1 "Aqa ȓmulk ujenna amecnaw ij n bab n umarjeƹ uḍiȓ. Iffeɣ ɣar ṣbaḥ zic aḏ igg ixeddamen i umarjeƹ uḍiȓ nnes.
2 Itafeq akeḏ ixeddamen x yij n dinar i nhar, issekk-iṯen ɣar umarjeƹ nnes.
3 Iffeɣ-d ɣar jwayeh nni n tesƹa yufa ixeddamen nneɣnit qqimen ḏi ȓmewqef bȓa ȓxeḏmeṯ.
4 Inna-asen: Ruḥem uȓa ḏ kenniw ɣar umarjeƹ inu, aḏawem xeǧseɣ min ṯesḏaheǧem.
5 Kkaren ruḥen. Iffeɣ-d ɣar jwayeh n ṯenƹac ƹaweḏ ɣar jwayeh n ṯȓaṯa uƹecci igga nnefs ȓxeḏmeṯ.
6 Uca iffeɣ-d ƹaweḏ ɣar jwayeh nni n xemsa uƹecci, yufa ixeddamen nneɣnit qqimen bȓa ȓxeḏmeṯ. Inna-asen: Min kenniw yuɣin ṯeqqimem ḏa nhar amen ikmeȓ bȓa ȓxeḏmeṯ?
7 Nnan-as: War ḏaneɣ isexḏem ḥadd. Inna-asen: Ruḥem uȓa ḏ kenniw ɣar umarjeƹ inu.
8 Wami ṯeɣȓi ṯfuct, inna-as bab n umarjeƹ i uweqqaf nnes: Ȓaɣa-d i ixeddamen xeǧes-iṯen. Bḏa zeg yinni iy d yusin ḏ ineggura ƹaḏ i imezwura.
9 Yinni ibḏan ȓxeḏmeṯ ɣar xemsa uƹecci, twaxeǧsen s yij n dinar i yijjen.
10 Wami d usin imezwura tɣir-asen aḏ twaxeǧsen ktar, maca uȓa n niṯni twaxeǧsen s yij n dinar i yijjen.
11 Amen iy twaxeǧsen, mxeyyaqen ak bab n umarjeƹ.
12 Nnan-as: Ixeddamen-a iy d yusin ḏ ineggura xeḏmen ij n ṯsaƹat waha, waxxa amenni ṯxeǧseḏ-ṯen amecnaw neccin ig yuwṯin tamara n nhar amen ikmeȓ ḏi ṯfuct.
13 Indeq-d bab n umarjeƹ inna-as i yijjen zzaysen: War c ḍȓimeɣ ca ay ameddukeȓ. Ṯtafqeḏ akiḏi x yij n dinar, niɣ lla?
14 Ysi texȓiseṯ nnec uyur. Xseɣ aḏas uceɣ i wa iy d yusin ḏ aneggar anect nnec.
15 Ma war ɣari ȓḥaqq aḏ ggeɣ min xseɣ zi ṯmesȓayin inu? Niɣ ṯḥesḏeḏ belli teggeɣ ȓxir?
16 Amenni yinni iǧan ḏ ineggura aḏ ḏewȓen ḏ imezwura; imezwura aḏ ḏewȓen ḏ ineggura."
Siḏna Ƹisa issawaȓ ƹaweḏ x ȓmewṯ nnes
17 Wami igaƹƹeḏ Ƹisa ɣar ṯendint n Lquds, ḏeg ubriḏ isbeƹƹeḏ ṯenƹac nni imeḥḍaren nnes x ȓɣaci inna-asen:
18 "Aqa netgaƹƹaḏ ɣar Lquds mani ɣa itwaxḏeƹ Mmis n bnaḏem i arruyas n ȓefquha ḏ imseȓmaḏen n Ccariƹa. Axas ḥekmen s ȓmewṯ,
19 aṯ sellmen i yinni war iǧin ḏ uḏayen. Axas ḍeḥcen, aṯ uwṯen s usɣun, aṯ ṣellben. Uca nhar n wis ṯeȓt-iyyam aḏ d ikkar zi ȓmewṯ."
Ṭṭaleb n yemmas n ṯarwa n Zabdi
20 Ij n ṯemɣarṯ, nettaṯ ḏ yemmaṯsen n ṯarwa n Zabdi, ṯqarreb ɣar Ƹisa akeḏ ṯnayen ṯarwa nnes, ṯsejjeḏ-as ḥima azzayes ṯettar can ȓḥajeṯ.
21 Inna-as Ƹisa: "Min ṯrezzuḏ?"
Ṯenna-as: "Ini-ayi aḏ qqimen yina ṯarwa inu s ṯnayen ḏi ȓmulk nnec ijjen x ufusi ijjen x uẓeȓmaḍ nnec."
22 Indeq-d Ƹisa inna-asen i Yaƹqub ḏ Yuḥanna: "Kenniw war ṯessinem min ṯettarem. Ma ṯzemmrem aḏ teswem zi ȓkas iy zi ɣa sweɣ nec ƹȓayen?"
Nnan-as: "Wah, nzemmer-as!"
23 Inna-asen: "Wah, aḏ teswem zi ȓkas inu. Maca aɣimi x ufusi inu ḏ uẓeȓmaḍ inu war iǧi bu ḏ nec iy ṯ ɣa yucen. Aɣimi-ya aḏ immuc i yinni umi ṯen isewjeḏ Baba."
24 Wami sȓin ƹecra nni imeḥḍaren, xeyyqen x ṯnayen nni n wawmaṯen.
25 Iȓaɣa-yasen-d Ƹisa marra iḏsen inna-asen: "Ṯessnem belli arruyas n ṯmura ḥekkmen x ccaƹb, iwḏan imeqqranen nsen tzeyyaren xasen.
26 Maca manaya itxeṣṣa war itiȓi jarawem. Lƹaks, wenni irezzun aḏ iḏweȓ ḏ ameqqran jarawem itxeṣṣa aḏ yiȓi ḏ axeddam nwem.
27 Wenni irezzun aḏ iḏweȓ ḏ amezwaru jarawem itxeṣṣa aḏ yiȓi ḏ ismeɣa nwem.
28 Mmis n bnaḏem netta s yixef nnes war d yusi ḥima aḏas xeḏmen yiwḏan, maca ḥima aḏasen ixḏem. Aḏ isellem ṯuḏarṯ nnes ḥima aḏ isenjem aṭṭas zzaysen."
Siḏna Ƹisa isgenfa ṯnayen iḍarɣaȓen ḏi Ariḥa
29 Wami ffɣen zi ṯendint n Ariḥa, ḏfaren Ƹisa aṭṭas n ȓɣaci.
30 Ḏinni ṯnayen iḍarɣaȓen qqimen ṭṭarf i ubriḏ. Wami sȓin i Ƹisa iggur-d, sɣuyiwen qqaren: "Rḥem-aneɣ a Siḏi, a Mmis n Ayṯ-Dawud!"
31 Zeyyaren xasen yiwḏan ḥima aḏ sqaren, maca niṯni qqimen sɣuyiwen ƹaḏ s jjehḏ, qqaren: "Rḥem-aneɣ a Siḏi, a Mmis n Ayṯ-Dawud!"
32 Ibedd Ƹisa, iȓaɣa-yasen-d inna-asen: "Min ṯexsem aḏawem ggeɣ?"
33 Nnan-as: "A Siḏi, nxes aḏ nurzment ṯiṭṭawin nneɣ!"
34 Qqsen-as i Ƹisa iḥaḏa-yasen ṯiṭṭawin. Ḏeg umcan ḏewȓen twaȓan uca ḏfaren-ṯ.