Siḏna Ƹisa itaḏaf x usnus ɣar Lquds
21
1 Wami qarrben ɣar ṯendint n Lquds uwḍen ɣar dcar n Bayt Faji ṭṭarf n Uḏrar n zzitun. Issekk Ƹisa ṯnayen zeg imeḥḍaren nnes,
2 inna-asen: "Ruḥem ɣar dcar iǧan zzaṯwem, aȓ ḏinni ṯafem ṯaɣyuȓṯ ṯeqqen akis asnus. Fsim-asen awim-ṯen-d ɣari.
3 Meȓa inna-awem ḥadd ca, inim-as: Iḥḏaj-iṯen Siḏiṯneɣ. Ȓxeddnnit akiwem-ṯen-d issekk ."
4 Ammu iwqeƹ ḥima aḏ ikemmeȓ wawaȓ iy inna Siḏi Arebbi i nnabi Zakariya ḏeg yij n zman:
5 "Inim i yeǧis n Lquds:
Xzar, azeǧiḏ nnem yusa-d ɣarem,
war ḏayes bu ttakebbur.
Inya x yij n ṯeɣyuȓṯ, ḏ usnus mmis n ṯeɣyuȓṯ."a
6 Ruḥen ṯnayen nni imeḥḍaren, ggin mammec ṯen iweṣṣa Ƹisa.
7 Uwin-d ṯaɣyuȓṯ ḏ usnus, ggin xasen izeǧuba nsen ȓxeddnnit inya Ƹisa.
8 Aṭṭas n yiwḏan ssun-as abriḏ s izeǧuba nsen. Inneɣnit qessen ȓefruƹ n ȓcejjur ssun zzaysen abriḏ.
9 Yinni gguren zzaṯes ḏ yinni iy ṯ iḏeffaren qqaren:
"Lƹaḍama i Mmis n Ayṯ-Dawud!
Ssaƹḏ n wenni iy d yusin s lʼiḏen n Siḏi Arebbi.b
Lḥamdu i Arebbi yuƹȓan."
10 Wami yuḏef Ƹisa ɣar Lquds, kkaren-d ayṯbab n ṯendint nnan: "Min iƹna wa?"
11 Nnan ȓɣaci: "Ḏ wa iǧan ḏ Ƹisa nnabi, zi Naṣira n ṯmurṯ n Ljalil."
Siḏna Ƹisa ḏi ṯemziḏa ṯameqqrant n wuḏayen
12 Yuḏef Ƹisa ɣar ṯemziḏa ṯameqqrant yuzzeȓ x marra yinni issaɣen ḏ yinni iznuzan ḏi ṯemziḏa. Iqȓeb-asen missaṯ n iṣarrafen n tmenyaṯ ḏ ȓekrasa n yinni iznuzan iḏbiren.
13 Inna-asen: "Lkitab iqqar: Ṯaddarṯ inu aḏ tiȓi ḏ ṯaddarṯ n ṯẓaǧiṯ, maca kenniw ṯarrim-teṯ ḏ ifri n ixewwanen."
14 Ḏi ṯemziḏa ṯameqqrant qarrben ɣar Ƹisa iḍarɣaȓen ḏ izeḥḥafen uca isgenfa-ṯen.
15 Ƹeṣṣben arruyas n ȓefquha ḏ imseȓmaḏen n Ccariƹa wami ẓrin Ƹisa lmuƹjizaṯ iy igga, ḏ iḥenjiren ṭṭarf i ṯemziḏa ṯameqqrant tȓaɣan s jjehḏ qqaren: "Lƹaḍama i Mmis n Ayṯ-Dawud!"
16 Nnan-as i Ƹisa: "Ma tesȓiḏ min qqaren?"
Inna-asen Ƹisa: "Wah, ma war ṯeɣrim min iǧan ḏi Lkitab? Ṯeggiḏ, ay Arebbi, ac ḥemḏen iḥenjiren ḏ iseyman s uqemmum nsen."c
17 Ssenni ismeḥ ḏaysen, iffeɣ zi ṯendint nni iruḥ ɣar dcar n Bayt Ƹanya isens ḏinni.
Ṯacejjarṯ n ṯazarṯ yuzɣen
18 Ɣar ṣbaḥ zic wami igaƹƹeḏ Ƹisa ɣar ṯendint, netta iǧuz.
19 Iẓra ij n ṯcejjarṯ n ṯazarṯ x ubriḏ iruḥ ɣares yufa ḏayes ṯifray waha. Inna-as: "Zi ssa aȓ ṯsawent ƹemmarṣ aḏ tarweḏ." Ȓxeddnnit ṯuzeɣ ṯcejjarṯ nni n ṯazarṯ.
20 Ẓrin imeḥḍaren min iweqƹen, tƹejjben nnan-as i Ƹisa: "Mammec ṯegga ṯuzeɣ ḏeg umcan ṯcejjarṯ-a?"
21 Indeq-d Ƹisa inna-asen: "Aqa tesȓam ȓḥaqq: Mȓi ḏaywem lʼiman war ṯcekkim, aḏ teggem ktar zi min ggiɣ i ṯcejjarṯ-a. Meȓa ṯennim i uḏrar-a: Neqȓeƹ menḍer ḏi ȓebḥar, aḏ ineqȓeƹ.
22 Meȓa ṯumnem, aɣarwem yiȓi marra min ɣa ṯettarem i Arebbi ḏi ṯẓaǧiṯ nwem."
Ssulṭa n Siḏna Ƹisa
23 Yuḏef Ƹisa ḏi ṯemziḏa ṯameqqrant iseȓmaḏ ḏinni. Qarrben-d ɣares arruyas n ȓefquha ḏ imeqqranen n wuḏayen nnan-as: "Zi man ssulṭa iy zi teggeḏ ṯimesȓayin-a? Wi ḏac yucin ssulṭa-ya?"
24 Indeq-d Ƹisa inna-asen: "Uȓa ḏ nec akenniw sseqsiɣ x yij n ṯmesȓayṯ. Meȓa ṯjawbem-ayi, aḏawem iniɣ zi man ssulṭa iy zi teggeɣ ṯimesȓayin-a.
25 Yaḥya, man ssulṭa iy zi iṭehhar s waman, ma zi Arebbi niɣ zeg yiwḏan?
Ssiwȓen, nnan jarasan: "Meȓa nenna-as zi Arebbi, aḏaneɣ yini Ƹisa: Mayemmi war zzayes ṯuminem ca?
26 Meȓa nenna-as zeg yiwḏan, neccin a neggweḏ zi ccaƹb minzi marra twaȓan belli Yaḥya netta ḏ nnabi."
27 Arrin x Ƹisa nnan-as: "War nessin ca."
Ikkar Ƹisa inna-asen: "Iwa uȓa ḏ nec war ḏawem qqireɣ ca man ssulṭa iy zi teggeɣ ṯimesȓayin-a."
Ȓmaƹna n ṯnayen wawmaṯen
28 "Min ḏawem iḍharen? Ij n bnaḏem ɣares ṯnayen n ṯarwa nnes. Iruḥ ɣar umezwaru inna-as: Ruḥ a mmi, aḏ txeḏmeḏ nhara ḏeg umarjeƹ inu uḍiȓ.
29 Indeq-d netta inna-as: Lla, war xseɣ ca. Maca cwayt indem, iruḥ ɣar umarjeƹ.
30 Iruḥ ɣar mmis nneɣnit ittar zzayes min ittar zeg umezwaru. Indeq-d inna-as: Waxxa, a Baba inu. Maca war iruḥ ca.
31 Uw iggin min ixes babaṯsen zi ṯnayen-a?" Nnan-as: "Amezwaru." Inna-asen Ƹisa: "Aqa tesȓam ȓḥaqq: Iƹeccaren ḏ ṯemɣarin iffɣen abriḏ aḏawem zwaren ɣar ȓmulk n Arebbi.
32 Ȓaḥeqqac yusa-d ɣarwem Yaḥya iseḍhar-awem-d abriḏ n ȓḥaqq, war zzayes ṯuminem. Maca iƹeccaren ḏ ṯemɣarin iffɣen abriḏ umnen zzayes. Kenniw ṯeẓrim manayenni, maca war tubem ca ḥima azzayes ṯamnem."
Ȓmaƹna n ixemmasen iy ḏi iǧa ccerr
33 "Ṣennṭeṯ ij n ȓmaƹna nneɣnit. Ij n bab n ṯeddarṯ iẓẓu aḍiȓ ḏeg yij n umarjeƹ nnes. Inneḍ-as ȓḥiḍ, igga ḏayes ṯasirṯ uḍiȓ. Ibna ḏayes ij n ṯsumƹeṯ iḥeṭṭu. Igga ḏayes ixemmasen ikkar isafer.
34 Wami d yiweḍ ȓweqṯ uȓqeḍ n uḍiȓ, ikkar issekk ixeddamen nnes ɣar ixemmasen nni ḥima aḏas d ucen ȓḥaqq nnes uḍiȓ.
35 Ixemmasen nni ṭṭfen ixeddamen nnes, ḥadd uwṯin-ṯ, ḥadd nɣin-ṯ, ḥadd rejmen-ṯ.
36 Ikkar issekk ixeddamen nneɣnit ktar zeg umezwar. Ggin-asen ixemmasen nni min ggin i imezwura.
37 Ɣar uneggar issekk ɣarsen mmis. Inna aqa aḏ ggwḏen memmi.
38 Wami ẓrin ixemmasen nni mmis, nnan i wayawya: Aṯ nneɣ ḥima aḏ iḏweȓ umarjeƹ uḍiȓ nneɣ!
39 Ṭṭfen-ṯ, nɣin-ṯ, neḍren-ṯ barra i umarjeƹ uḍiȓ.
40 "Iwa xmi iy d ɣa iḏweȓ bab n umarjeƹ, min ḏasen ɣa igg i ixemmasen nni?"
41 Nnan-as: "Iwḏan nni iƹeffanen aṯen ineɣ, uca aḏ ijj amarjeƹ uḍiȓ i ixemmasen nneɣnit iy ḏas ɣa yucen ȓḥaqq nnes uḍiȓ ḏi ȓweqṯ."
42 Inna-asen Ƹisa: "Ma war ṯeɣrim ƹemmarṣ min yurin ḏi Lkitab?
Azru iy ƹiffen ibennayen,
aḏ yiȓi ḏeg umcan aṣebḥan ḏi ṯɣemmarṯ n dsas.
Ḏ Siḏi Arebbi ig iggin manaya,
ḏ ij n ȓḥajeṯ ḏ ṯameqqrant!d
43 X manayenni qqareɣ-awem: Ȓmulk n Arebbi aḏawem itwakkes aḏ immuc i yij n ccaƹb ig iteggen ȓxir.
44 Wenni ɣa iwḍan x uzru-ya aḏ irrez. Wenni xef ɣa iwḍa uzru-ya aḏ iȓbeẓ."