Ȓmaƹna n umensi ameqqran
22
1 Issawaȓ Ƹisa akisen ƹaweḏ s ȓemƹani, indeq-d inna-asen:
2 "Ȓmulk ujenna amecnaw ij uzeǧiḏ igga amensi ḏ ameqqran ḏi ȓfarḥ n mmis.
3 Issekk ixeddamen nnes aḏ ȓaɣan i yinni xef iƹreḍ ɣar umensi, maca ugin aḏ d asen.
4 Issekk ixeddamen nneɣnit inna-asen: Inim-asen i yinni itwaƹerḍen: Aqa swejḏeɣ amensi inu, ɣarṣeɣ iƹejmiyena ḏ iyenduzen inu iṣeḥḥan. Kuȓci iwjeḏ, araḥem-d ɣar ȓfarḥ!
5 Maca yinni itwaƹerḍen war ḏayes t uwin: ḥadd iruḥ ɣar umarjeƹ nnes, ḥadd ɣar ttijara nnes.
6 Inneɣnit ṭṭfen ixeddamen n uzeǧiḏ ƹedden xasen nɣin-ṯen.
7 Iɣḍeb uzeǧiḏ issekk ȓƹaskar nnes aḏ nɣen lmujrimin nni aḏ sḥerqen ṯandint nsen.
8 Inna-asen i ixeddamen nnes: Amensi n ȓfarḥ iwjeḏ, maca yinni itwaƹerḍen war ṯ sḏihiǧen.
9 Ffɣem ɣar mani temsagaren ibriḏen ƹerḍem-d ɣar umensi marra wi ɣa ṯafem.
10 Ruḥen ixeddamen nni ɣar ibriḏen uwin-d marra ug ufin ḏinni, iṣebḥanen ḏ iƹeffanen, iƹemmar ȓfarḥ s inewjiwen.
11 Yuḏef uzeǧiḏ ḥima aḏ iẓer inewjiwen, yufa ḏinni ij n uryaz war ireḍ bu warruḍ n ȓfarḥ.
12 Inna-as: Mammec ṯeggiḏ ṯuḏfeḏ bȓa arruḍ n ȓfarḥ, ay ameddukeȓ? Aryaz nni isqar.
13 Uca inna-asen uzeǧiḏ i ixeddamen nnes: Carfem-ṯ zeg iḍaren ḏ ifassen neḍrem-ṯ barra ɣar ṯaǧest, mani ɣa iȓin imeṭṭawen ḏ uɣeẓẓaẓ n ṯeɣmas."
14 Inna-asen Ƹisa: "Aqa aṭṭas ig itwaƹerḍen, ḏrus ig itwaxḍaren."
Ifarrisiyen ḏ yiwḏan n uzeǧiḏ tjarraben Siḏna Ƹisa
15 Kkaren ifarrisiyen mcawaren jarasen x mammec iy ɣa ggen aḏ ṭṭfen Ƹisa x min iqqar.
16 Ssekken ɣares can imeḥḍaren nsen akeḏ can yiwḏan zi ȓḥizeb n uzeǧiḏ Hirudus aḏas inin: "A lmuƹallim, nessen belli ṯeqqareḏ ȓḥaqq. War teggwḏeḏ i yiwḏan ȓaḥeqqac war teggeḏ bu uḏemawen. Ṯseȓmaḏeḏ s ȓḥaqq mammec ixes Arebbi a nƹic.
17 Ini-yaneɣ, min ḏac iḍharen? Ṯsemmeḥ Ccariƹa nneɣ a nxeǧes ḍḍariba i uzeǧiḏ Qayṣar niɣ lla?"
18 Issen Ƹisa ccerr nsen, inna-asen: "A lmunafiqin, mayemmi ḏayi teggem ṯaxcebṯ?
19 Awim-d ṯapeyyast nni n ḍḍariba ḥima at ẓreɣ." Kkaren uwin-as-d ij n dinar.
20 Inna-asen: "Uw t yiȓan teṣwarṯ-a ḏ yisem-a iy ḏayes?"
21 Nnan-as: "Qa n Qayṣar."
Uca inna-asen: "Iwa ucem min iǧan n Qayṣar i Qayṣar. Ucem min iǧan n Arebbi i Arebbi."
22 Wami sȓin i ujawab nni, tƹejjben. Ssenni semḥen ḏayes, ruḥen.
Iṣadduqiyen tjarraben Siḏna Ƹisa
23 Ḏi nhar nni, qarrben-d ɣar Ƹisa can yiwḏan zi ȓḥizeb n iṣadduqiyen (niṯni qqaren belli iwḏan war d tnekkiren zi ȓmewṯ). Kkaren
24 nnan-as: "A lmuƹallim, iqqar-aneɣ Musa belli meȓa can uryaz immuṯ war d ijji bu ṯarwa, ṯamɣarṯ nnes at yawi uȓwes nnes akis d ijj ṯarwa i wumas immuṯen.
25 Tuɣa akiḏneɣ ḏa sebƹa n wawmaṯen, imȓec umezwaru, immuṯ war d ijji bu ṯarwa. Ṯamɣarṯ nni yuwi-t uȓwes nnes.
26 Amenni ig iweqƹen i wumas wis ṯnayen ḏ wis ṯȓaṯa aȓ wis sebƹa.
27 Aȓ uneggaru uȓa ḏ ṯamɣarṯ nni ṯemmuṯ.
28 Ḏi Yewm Lqiyama, zi sebƹa nni umi ɣa ṯiȓi ṯemɣarṯ nni? Ȓaḥeqqac ḏ ṯamɣarṯ nsen marra."
29 Indeq-d Ƹisa inna-asen: "Kenniw ṯexḍim ȓaḥeqqac war ṯessinem Lkitab uȓa ḏ jjehḏ n Arebbi.
30 Xmi d ɣa kkaren yinni immuṯen iryazen ḏ ṯemɣarin war meǧcen ca, aḏ iȓin amecnaw lmalaʼikaṯ iǧan ḏeg ujenna.
31 Maca yinni immuṯen aḏ d kkaren zi ȓmewṯ. Ma ƹemmarṣ war ṯeɣrim min ḏawem iqqar Arebbi?
32 Iqqar qa nec ḏ Arebbi n Brahim, ḏ Arebbi n Isḥaq, ḏ Arebbi n Yaƹqub.b Inna-asen Ƹisa: Netta ḏ Arebbi n yinni iddaren maci n yinni immuṯen."
33 Sȓin yiwḏan i wawaȓ-a, ḏehcen ḏeg useȓmaḏ nnes.
Ijjen zeg ifarrisiyen itjarrab Siḏna Ƹisa
34 Wami d arrin ȓexbar ȓḥizeb n ifarrisiyen belli Ƹisa ibelleƹ-asen aqemmum iṣadduqiyen, munen ifarrisiyen jarasen.
35 Ikkar ijjen zzaysen, netta itcerraḥ Ccariƹa, ixes aḏas igg ṯaxcebṯ inna-as:
36 "A Lmuƹallim, man ȓuṣiyeṯ qaƹ iǧan ḏ ṯameqqrant ḏi Ccariƹa?"
37 Inna-as Ƹisa: "Aḏ texseḏ Siḏi Arebbi nnec s marra uȓ nnec, s marra arruḥ nnec, s marra ȓaƹqeȓ nnec.c
38 Ḏ ṯa ḏ ȓuṣiyeṯ iǧan ḏ ṯameqqrant ḏ ṯamezwarut.
39 Ȓuṣiyeṯ wis ṯnayen am ṯenneɣnit: Aḏ texseḏ ajjar nnec amecnaw ixef nnec.d
40 X ṯnayen-a n ȓuṣiyaṯ iy xef ṯebna Ccariƹa n Musa amen tekmeȓ ḏ ttaƹalim n lʼanbiya."
Siḏna Ƹisa itjarrab ifarrisiyen
41 Ȓḥizeb n ifarrisiyen aqa-ṯen munen ḏinni, ikkar Ƹisa isseqsa-ṯen.
42 Inna-asen: "Min ḏawem iḍharen ḏi Lmasiḥ? Uw ṯ yiȓan?" Nnan-as: "Ḏ mmis n Dawud."
43 Inna-asen Ƹisa: "Iwa mammec Dawud iqqar-as i mmis s Arruḥ n Arebbi: A Siḏi? Minzi Dawud inna:
44 Siḏi Arebbi inna-as i Siḏi: Qqim-d x ufusi inu
aȓ ɣa ggeɣ ȓƹaḏyan nnec swadday i iḍaren nnec.e
45 U meȓa Dawud iqqar-as i Lmasiḥ: A Siḏi, mammec aḏ yiȓi Lmasiḥ ḏ mmis n Dawud?"
46 War izemmer uȓa ḏ ijjen axas yarr uȓa ḏ ij n wawaȓ. U zi nhar nni war izƹim uȓa ḏ ijjen aṯ isseqsa ƹaḏ ktar.