Ȓefḍiḥaṯ n imseȓmaḏen n Ccariƹa ḏ ȓḥizeb n ifarrisiyen
23
1 Issiweȓ Ƹisa ak imeḥḍaren nnes ḏ yiwḏan,
2 inna-asen: "Imseȓmaḏen n Ccariƹa ḏ ȓḥizeb n ifarrisiyen qqimen-as i Musa x ȓkursi nnes, iƹni seȓmaḏen Ccariƹa nnes.
3 X manaya, ggeṯ marra min ḏawem qqaren, xeḏmem zzayes. Maca war teggem am niṯni. Maɣar? Liʼanna niṯni war teggen bu min qqaren.
4 Tceddan ȓeḥmeȓ iḏeqȓen iqesḥen x yiwḏan ḥima aṯ rbun, maca war tḥiḏin bu ȓeḥmeȓ nni uȓa s uḍaḍ nsen.
5 Marra min teggen ḥima aɣarsen xzaren yiwḏan. Teggen ȓeḥruza ḏ imeqqranen, rennin ṯicȓuȓin i izeǧaben nsen.
6 Texsen imucan imezwura ḏi ȓefruḥ ḏ ṯemziḏawin.
7 Texsen axasen seǧmen ḏi ȓeswaq, aḏasen ȓaɣan yiwḏan: A siḏi.
8 Maca kenniw, war tejjam ḥadd aḏawem iȓaɣa: A siḏi. Maɣar? Liʼanna kenniw marra ḏ awmaṯen, ɣarwem ij n Siḏiṯwem.
9 War tȓaɣam i ḥadd ḏi ṯmurṯ: A baba. Maɣar? Liʼanna ɣarwem ɣir ij n Babaṯwem iǧan ḏeg ujenna.
10 War tejjam ḥadd aḏawem iȓaɣa: Ay amseȓmaḏ. Maɣar? Liʼanna ɣarwem ɣir ij n Umseȓmaḏ, netta ḏ Lmasiḥ.
11 Ameqqran jarawem itxeṣṣa aḏ yiȓi ḏ axeddam nwem.
12 Wenni isemɣaren ixef nnes, aḏ imzi. Wenni isemzayen ixef nnes, aḏ imɣar.
13 Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Teqqnem ṯawwarṯ n ȓmulk ujenna x yiwḏan. Kenniw war tiḏfem, war tijjim inneɣnit aḏ aḏfen.
14 {Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Tettem ṯajjaȓin marra min ɣarsent. Tƹeṭṭȓem ḏi ṯẓaǧiṯ nwem ḥima aḏ tbeyynem i yiwḏan belli ṯṣebḥem. X manayenni aḏ twaƹeqqbem ktar.}
15 Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Tekkem marra ȓebḥar ḏ ȓbarr ḥima aḏ tjarrem can ijjen ɣar ddin nwem. U xmi iy kiwem ɣa yiȓi, tarrim-ṯ isḏaheǧ ṯimessi marṯayen ktar zi min ṯesḏaheǧem kenniw.
16 Ya ȓefḍiḥeṯ nwem, ay iḍarɣaȓen itjarran iwḏan! Ṯeqqarem: War ṯseggwi walu ṯjaǧiṯb s ṯemziḏa ṯameqqrant, maca wenni ɣa ijjaǧen s dheb n ṯemziḏa ṯameqqrant itxeṣṣa axas ikemmeȓ x ṯjaǧiṯ nnes.
17 Ay ifɣaȓ ay iḍarɣaȓen! Min iseggwan ktar? Ma ḏ dheb ma ḏ ṯamziḏa ṯameqqrant ig yucin lqima i dheb?
18 Ṯeqqarem ƹaweḏ: War ṯseggwi walu ṯjaǧiṯ s ȓmeḏbaḥ, maca wenni ɣa ijjaǧen s ḏbiḥaṯ iǧan x ȓmeḏbaḥ, itxeṣṣa axas ikemmeȓ x ṯjaǧiṯ nnes.
19 Ay iḍarɣaȓen! Min iseggwan ktar: Ḏ ḏbiḥaṯ niɣ d ȓmeḏbaḥ iticcen lqima i ḏbiḥaṯ?
20 X manaya, wenni itjaǧan s ȓmeḏbaḥ, itjaǧa zzayes ḏ marra min xas.
21 Wenni itjaǧan s ṯemziḏa ṯameqqrant, itjaǧa zzayes ḏ Arebbi iy t izeddɣen.
22 Wenni itjaǧan s ujenna, itjaǧa s lƹarc n Arebbi ḏ wi xas iqqimen.
23 Ya ȓefḍiḥeṯ nwem, ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Ticcem ȓaƹcur uȓa x naƹnaƹ ḏ uwramc ḏ ȓcemmun,d war tehtimim min iǧan muhim qaƹ ḏi Ccariƹa, iƹni ȓḥaqq ḏ arraḥmeṯ ḏ lʼiman. Lla, ixeṣṣa-awem aḏ tehtamem s manaya, bȓa ma tettum ȓaƹcur.
24 Ay iḍarɣaȓen itjarran iwḏan! Tṣeffim izi zi min ṯsessem, ṯesɣeǧayem aȓɣem!
25 Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Kenniw ṯsiriḏem mliḥ ȓkas ḏ ṭebṣi ɣar barra, walakin ɣar ḏaxeȓ aqa ccuren s ṯukkarḏa ḏ ṭmaƹ!
26 Ay afarrisi aḍarɣaȓ, ḏ amezwaru sireḏ ȓkas ɣar ḏaxeȓ, ḥima aḏ yiȓi isireḏ zi barra.
27 Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Kenniw amecnaw imeḍȓan ibeyyḍen s jjir. Twaḍharen ṣebḥan ɣar barra, maca niṯni ccuren ɣar ḏaxeȓ s yixsan ḏ marra min ireccan.
28 Amenni kenniw iy teḍharem i yiwḏan nican iy ṯeǧam ɣar barra, maca ɣar ḏaxeȓ ṯeccurem s nnifaq ḏ ȓmuƹṣiyaṯ.
29 Ya ȓefḍiḥeṯ nwem ay imseȓmaḏen n Ccariƹa ḏ ȓḥizeb n ifarrisiyen, a lmunafiqin! Kenniw ṯbennam imeḍȓan n lʼanbiya, ṯƹeddȓem imrabeḏen n ȓmuminin.
30 Ṯeqqarem: Maƹlik neǧa ḏi ȓweqṯ n ȓejḏuḏ nneɣ ataf war akiḏsen nsizzeȓ iḏammene n l'anbiya.
31 X manayenni ṯcehhḏem x yixef nwem belli kenniw ḏ ṯarwa n yinni inɣin lʼanbiya.
32 Iwa, kemmȓeṯ kenniw x min bḏan ȓejḏuḏ nwem!
33 Ay ifiɣeran! A ṯarwa n ṯfiɣerawin! Mamc ṯfekkarem aḏ trewȓem zi lƹiqab n jahennama?
34 X manaya xzarem! Tsekkiɣ-awem-d lʼanbiya, ḏ imiɣisen, ḏ imseȓmaḏen. Ḥadd zzaysen aṯen ṯenɣem aṯen ṯṣellbem. Ḥadd zzaysen aṯen ṯuwṯem s usɣun ḏi ṯemziḏawin, axasen ṯazzȓem zi ṯendint ɣar ṯendint.
35 X manayenni aḏ twaƹeqqbem x marra iḏammen iy yuzzȓen n ȓmuminin ḏi ddunect: zeg iḏammen n Habil ȓmumen aȓ iḏammen n Zakariya mmis n Barxiya iy ṯenɣim jar ȓmeḏbaḥ ḏ ṯemziḏa ṯameqqrant.
36 Aqa tesȓam ȓḥaqq: Marra lƹiqab-a aḏ d ihwa x yiwḏan n ȓweqṯ-a!
Siḏna Ƹisa itxeyyaq x ṯendint n Lquds
37 Ya Lquds, ya Lquds! Cem ig ineqqen lʼanbiya, ṯrejjmeḏ yinni ɣarem d issekk Arebbi! Mecḥaȓ n ṯwaȓaṯin xseɣ aḏ smuneɣ ṯarwa nnem amecnaw ṯyaziṭ xmi ṯḥebbeḍ x ifiǧusen nnes, maca kenniw ṯugim.
38 Ammu iy ɣa ṯeqqim ṯemziḏa ṯameqqrant nwem ḏ ȓxirbeṯ.
39 Qqareɣ-awem belli war ḏayi ṯeẓrem ḥetta nhar iy ɣa ṯinim: Ssaƹḏ n wenni iy d yusin s lʼiḏen n Siḏi Arebbi!"f